໔. ອຄ຺ຄິສຸຕ຺ຕໍ

໙໓. ວຸຕ຺ຕຎ຺ເຫຕໍ ຠຄວຕາ, ວຸຕ຺ຕມຣຫຕາຕິ ເມ ສຸຕໍ –

‘‘ຕໂຍເມ, ຠິກ຺ຂເວ, ອຄ຺ຄີ. ກຕເມ ຕໂຍ? ຣາຄຄ຺ຄິ, ໂທສຄ຺ຄິ, ໂມຫຄ຺ຄິ – ອິເມ ໂຂ, ຠິກ຺ຂເວ, ຕໂຍ ອຄ຺ຄີ’’ຕິ. ເອຕມຕ຺ຖໍ ຠຄວາ ອໂວຈ. ຕຕ຺ເຖຕໍ ອິຕິ ວຸຈ຺ຈຕິ –

‘‘ຣາຄຄ຺ຄິ ທຫຕິ ມຈ຺ເຈ, ຣຕ຺ເຕ ກາເມສຸ ມຸຈ຺ຉິເຕ;

ໂທສຄ຺ຄິ ປນ ພ຺ຍາປນ຺ເນ, ນເຣ ປາຓາຕິປາຕິໂນ.

‘‘ໂມຫຄ຺ຄິ ປນ ສມ຺ມູຬ຺ເຫ, ອຣິຍຘມ຺ເມ ອໂກວິເທ;

ເອເຕ ອຄ຺ຄີ ອຊານນ຺ຕາ, ສກ຺ກາຍາຠິຣຕາ ປຊາ.

‘‘ເຕ ວຑ຺ຒຍນ຺ຕິ ນິຣຍໍ, ຕິຣຈ຺ຉານຎ຺ຈ ໂຍນິໂຍ;

ອສຸຣໍ ເປຕ຺ຕິວິສຍໍ, ອມຸຕ຺ຕາ ມາຣພນ຺ຘນາ.

‘‘ເຍ ຈ ຣຕ຺ຕິນ຺ທິວາ ຍຸຕ຺ຕາ, ສມ຺ມາສມ຺ພຸທ຺ຘສາສເນ;

ເຕ ນິພ຺ພາເປນ຺ຕິ ຣາຄຄ຺ຄິໍ, ນິຈ຺ຈໍ ອສຸຠສຎ຺ຎິໂນ.

‘‘ໂທສຄ຺ຄິໍ ປນ ເມຕ຺ຕາຍ, ນິພ຺ພາເປນ຺ຕິ ນຣຸຕ຺ຕມາ;

ໂມຫຄ຺ຄິໍ ປນ ປຎ຺ຎາຍ, ຍາຍໍ ນິພ຺ເພຘຄາມິນີ.

‘‘ເຕ ນິພ຺ພາເປຕ຺ວາ ນິປກາ, ຣຕ຺ຕິນ຺ທິວມຕນ຺ທິຕາ;

ອເສສໍ ປຣິນິພ຺ພນ຺ຕິ, ອເສສໍ ທຸກ຺ຂມຈ຺ຈຄຸໍ.

‘‘ອຣິຍທ຺ທສາ ເວທຄຸໂນ, ສມ຺ມທຎ຺ຎາຍ ປຓ຺ຑິຕາ;

ຊາຕິກ຺ຂຍມຠິຎ຺ຎາຍ, ນາຄຈ຺ຉນ຺ຕິ ປຸນພ຺ຠວ’’ນ຺ຕິ.

ອຍມ຺ປິ ອຕ຺ໂຖ ວຸຕ຺ໂຕ ຠຄວຕາ, ອິຕິ ເມ ສຸຕນ຺ຕິ. ຈຕຸຕ຺ຖໍ.