໙. ປຕ຺ໂຖທນທາຍກຕ຺ເຖຣອປທານໍ

໑໗໐. ‘‘ວນຈາຣີ ປຸເຣ ອາສິໍ, ສຕຕໍ ວນກມ຺ມິໂກ;

ປຕ຺ໂຖທນໍ ຄເຫຕ຺ວານ, ກມ຺ມນ຺ຕໍ ອຄມາສຫໍ.

໑໗໑. ‘‘ຕຕ຺ຖທ຺ທສາສິໍ ສມ຺ພຸທ຺ຘໍ, ສຍມ຺ຠຸໍ ອປຣາຊິຕໍ;

ວນາ ປິຓ຺ຑາຍ ນິກ຺ຂນ຺ຕໍ, ທິສ຺ວາ ຈິຕ຺ຕໍ ປສາທຍິໍ.

໑໗໒. ‘‘ປຣກມ຺ມາຍເນ [ວຍກມ຺ມາຍເນ (ກ.)] ຍຸຕ຺ໂຕ, ປຸຎ຺ຎຎ຺ຈ ເມ ນ ວິຊ຺ຊຕິ;

ອຍໍ ປຕ຺ໂຖທໂນ ອຕ຺ຖິ, ໂຠຊຍິສ຺ສາມຫໍ [ໂຠຊຍິສ຺ສາມິ ມໍ (ສ຺ຍາ.)] ມຸນິໍ.

໑໗໓. ‘‘ປຕ຺ໂຖທນໍ ຄເຫຕ຺ວານ, ສຍມ຺ຠຸສ຺ສ ອທາສຫໍ;

ມມ ນິຊ຺ຌາຍມານສ຺ສ, ປຣິຠຸຎ຺ຊິ ຕທາ ມຸນິ.

໑໗໔. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໗໕. ‘‘ຉຕ຺ຕິໍສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ;

ເຕຕ຺ຕິໍສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ອໂຫສຫໍ.

໑໗໖. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ສຸຂິໂຕ ຍສວາ ໂຫມິ, ປຕ຺ໂຖທນສ຺ສິທໍ ຜລໍ.

໑໗໗. ‘‘ຠວາຠເວ ສໍສຣນ຺ໂຕ, ລຠາມິ ອມິຕໍ ຘນໍ;

ໂຠເຄ ເມ ອູນຕາ ນຕ຺ຖິ, ປຕ຺ໂຖທນສ຺ສິທໍ ຜລໍ.

໑໗໘. ‘‘ນທີໂສຕປຏິຠາຄາ, ໂຠຄາ ນິພ຺ພຕ຺ຕເຣ ມມ;

ປຣິເມຕຸໍ ນ ສກ຺ໂກມິ, ປຕ຺ໂຖທນສ຺ສິທໍ ຜລໍ.

໑໗໙. ‘‘ອິມໍ ຂາທ ອິມໍ ຠຸຎ຺ຊ, ອິມມ຺ຫິ ສຍເນ ສຍ;

ເຕນາຫໍ ສຸຂິໂຕ ໂຫມິ, ປຕ຺ໂຖທນສ຺ສິທໍ ຜລໍ.

໑໘໐. ‘‘ຈຕຸນ຺ນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ປຕ຺ໂຖທນສ຺ສິທໍ ຜລໍ.

໑໘໑. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໘໒. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໘໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປຕ຺ໂຖທນທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປຕ຺ໂຖທນທາຍກຕ຺ເຖຣສ຺ສາປທານໍ ນວມໍ.