ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ

ຂຸທ຺ທກນິກາເຍ

ເຖຣາປທານປາຬິ

(ປຐໂມ ຠາໂຄ)

໑. ພຸທ຺ຘວຄ຺ໂຄ

໑. ພຸທ຺ຘອປທານໍ

໑. ຕຖາຄຕໍ ເຊຕວເນ ວສນ຺ຕໍ, ອປຸຈ຺ຉິ ເວເທຫມຸນີ ນຕງ຺ໂຄ;

‘‘ສພ຺ພຎ຺ຎຸພຸທ຺ຘາ ກິຣ ນາມ ໂຫນ຺ຕິ, ຠວນ຺ຕິ ເຕ ເຫຕຸຠິ ເກຫິ ວີຣ’’.

໒. ຕທາຫ ສພ຺ພຎ຺ຎຸວໂຣ ມເຫສີ, ອານນ຺ທຠທ຺ທໍ ມຘຸຣສ຺ສເຣນ;

‘‘ເຍ ປຸພ຺ພພຸທ຺ເຘສຸ [ສພ຺ພພຸທ຺ເຘສຸ (ສ຺ຍາ.)] ກຕາຘິກາຣາ, ອລທ຺ຘໂມກ຺ຂາ ຊິນສາສເນສຸ.

໓. ‘‘ເຕເນວ ສມ຺ໂພຘິມຸເຂນ ຘີຣາ, ອຊ຺ຌາສເຍນາປິ ມຫາພເລນ;

ປຎ຺ຎາຍ ເຕເຊນ ສຸຕິກ຺ຂປຎ຺ຎາ, ສພ຺ພຎ຺ຎຸຠາວໍ ອນຸປາປຸຓນ຺ຕິ.

໔. ‘‘ອຫມ຺ປິ ປຸພ຺ພພຸທ຺ເຘສຸ, ພຸທ຺ຘຕ຺ຕມຠິປຕ຺ຖຍິໍ,

ມນສາເຍວ ຫຸຕ຺ວານ, ຘມ຺ມຣາຊາ ອສງ຺ຂິຍາ.

໕. ‘‘ອຖ ພຸທ຺ຘາປທານານິ, ສຸຓາຖ ສຸທ຺ຘມານສາ;

ຕິໍສປາຣມິສມ຺ປຸຓ຺ຓາ, ຘມ຺ມຣາຊາ ອສງ຺ຂິຍາ.

໖. ‘‘ສມ຺ໂພຘິໍ ພຸທ຺ຘເສຏ຺ຐານໍ, ສສງ຺ເຆ ໂລກນາຍເກ;

ທສງ຺ຄຸລີ ນມສ຺ສິຕ຺ວາ, ສິຣສາ ອຠິວາທຍິໍ [ອຠິວາທເຍ (ສ຺ຍາ.)].

໗. ‘‘ຍາວຕາ ພຸທ຺ຘເຂຕ຺ເຕສຸ, ຣຕນາ ວິຊ຺ຊນ຺ຕິສງ຺ຂິຍາ;

ອາກາສຏ຺ຐາ ຈ ຠູມຏ຺ຐາ [ຠຸມ຺ມຏ຺ຐາ (ສີ. ສ຺ຍາ.)], ມນສາ ສພ຺ພມາຫຣິໍ.

໘. ‘‘ຕຕ຺ຖ ຣູປິຍຠູມິຍໍ, ປາສາທໍ ມາປຍິໍ ອຫໍ;

ເນກຠຸມ຺ມໍ ຣຕນມຍໍ, ອຸພ຺ພິທ຺ຘໍ ນຠມຸຄ຺ຄຕໍ.

໙. ‘‘ວິຈິຕ຺ຕຖມ຺ຠໍ ສຸກຕໍ, ສຸວິຠຕ຺ຕໍ ມຫາຣຫໍ;

ກນກມຍສງ຺ຆາຏໍ, ໂກນ຺ຕຈ຺ຉຕ຺ເຕຫິ ມຓ຺ຑິຕໍ.

໑໐. ‘‘ປຐມາ ເວຬຸຣິຍາ ຠູມິ, ວິມລພ຺ຠສມາ ສຸຠາ;

ນຬິນຊລຊາກິຓ຺ຓາ, ວຣກຎ຺ຈນຠູມິຍາ.

໑໑. ‘‘ປວາຬໍສາ ປວາຬວຓ຺ຓາ, ກາຈິ ໂລຫິຕກາ ສຸຠາ;

ອິນ຺ທໂຄປກວຓ຺ຓາຠາ, ຠູມິ ໂອຠາສຕີ ທິສາ.

໑໒. ‘‘ສຸວິຠຕ຺ຕາ ຆຣມຸຂາ, ນິຍ຺ຍູຫາ ສີຫປຎ຺ຊຣາ;

ຈຕຸໂຣ ເວທິກາ ຊາລາ, ຄນ຺ຘາເວຬາ ມໂນຣມາ.

໑໓. ‘‘ນີລາ ປີຕາ ໂລຫິຕກາ, ໂອທາຕາ ສຸທ຺ຘກາຬກາ;

ກູຏາຄາຣວຣູເປຕາ, ສຕ຺ຕຣຕນຠູສິຕາ.

໑໔. ‘‘ໂອໂລກມຍາ ປທຸມາ, ວາຬວິຫງ຺ຄໂສຠິຕາ;

ນກ຺ຂຕ຺ຕຕາຣກາກິຓ຺ຓາ, ຈນ຺ທສູເຣຫິ [ຈນ຺ທສຸຣິເຍຫິ (ສີ. ສ຺ຍາ.)] ມຓ຺ຑິຕາ.

໑໕. ‘‘ເຫມຊາເລນ ສຎ຺ຉນ຺ນາ, ໂສຓ຺ຓກິງ຺ກິຓິກາຍຸຕາ;

ວາຕເວເຄນ ກູຊນ຺ຕິ, ໂສຓ຺ຓມາລາ ມໂນຣມາ.

໑໖. ‘‘ມຎ຺ເຊຏ຺ຐກໍ ໂລຫິຕກໍ, ປີຕກໍ ຫຣິປິຎ຺ຊຣໍ;

ນານາຣງ຺ເຄຫິ ສມ຺ປີຕໍ [ສໍຈິຕ຺ຕໍ (ສ຺ຍາ.)], ອຸສ຺ສິຕທ຺ຘຊມາລິນີ [ມາລິນິໍ (ສີ.)].

໑໗. ‘‘ນ ນໍ [ນານາ (ສີ. ສ຺ຍາ.)] ພຫູເນກສຕາ, ຜລິກາ ຣຊຕາມຍາ;

ມຓິມຍາ ໂລຫິຕງ຺ຄາ, ມສາຣຄລ຺ລມຍາ ຕຖາ;

ນານາສຍນວິຈິຕ຺ຕາ, ສຓ຺ຫກາສິກສນ຺ຖຕາ.

໑໘. ‘‘ກມ຺ປລາ ທຸກູລາ ຈີນາ, ປຏ຺ຏຸຓ຺ຓາ ປຓ຺ຑຸປາວຸຣາ;

ວິວິຘຕ຺ຖຣຓໍ ສພ຺ພໍ, ມນສາ ປຎ຺ຎເປສຫໍ.

໑໙. ‘‘ຕາສຸ ຕາສ຺ເວວ ຠູມີສຸ, ຣຕນກູຏລງ຺ກຕໍ;

ມຓິເວໂຣຈນາ ອຸກ຺ກາ, ຘາຣຍນ຺ຕາ ສຸຕິຏ຺ຐເຣ.

໒໐. ‘‘ໂສຠນ຺ຕິ ເອສິກາ ຖມ຺ຠາ, ສຸຠາ ກຎ຺ຈນໂຕຣຓາ;

ຊມ຺ໂພນທາ ສາຣມຍາ, ອໂຖ ຣຊຕມຍາປິ ຈ.

໒໑. ‘‘ເນກາ ສນ຺ຘີ ສຸວິຠຕ຺ຕາ, ກວາຏຄ຺ຄຬຈິຕ຺ຕິຕາ;

ອຸຠໂຕ ປຸຓ຺ຓຆຏາເນກາ, ປທຸມຸປ຺ປລສໍຍຸຕາ.

໒໒. ‘‘ອຕີເຕ ສພ຺ພພຸທ຺ເຘ ຈ, ສສງ຺ເຆ ໂລກນາຍເກ;

ປກຕິວຓ຺ຓຣູເປນ, ນິມ຺ມິນິຕ຺ວາ ສສາວເກ.

໒໓. ‘‘ເຕນ ທ຺ວາເຣນ ປວິສິຕ຺ວາ, ສພ຺ເພ ພຸທ຺ຘາ ສສາວກາ;

ສພ຺ພໂສຓ຺ຓມເຍ ປີເຐ, ນິສິນ຺ນາ ອຣິຍມຓ຺ຑລາ.

໒໔. ‘‘ເຍ ຈ ເອຕຣຫິ ອຕ຺ຖິ, ພຸທ຺ຘາ ໂລເກ ອນຸຕ຺ຕຣາ;

ອຕີເຕ ວຕ຺ຕມານາ ຈ, ຠວນໍ ສພ຺ເພ ສມາຫຣິໍ.

໒໕. ‘‘ປຈ຺ເຈກພຸທ຺ເຘເນກສເຕ, ສຍມ຺ຠູ ອປຣາຊິເຕ;

ອຕີເຕ ວຕ຺ຕມາເນ ຈ, ຠວນໍ ສພ຺ເພ ສມາຫຣິໍ.

໒໖. ‘‘ກປ຺ປຣຸກ຺ຂາ ພຫູ ອຕ຺ຖິ, ເຍ ທິພ຺ພາ ເຍ ຈ ມານຸສາ;

ສພ຺ພໍ ທຸສ຺ສໍ ສມາຫນ຺ຕາ, ອຈ຺ຉາເທມິ ຕິຈີວຣໍ.

໒໗. ‘‘ຂຊ຺ຊໍ ໂຠຊ຺ຊໍ ສາຍນີຍໍ, ສມ຺ປນ຺ນໍ ປານໂຠຊນໍ;

ມຓິມເຍ ສຸເຠ ປຕ຺ເຕ, ສໍປູເຣຕ຺ວາ ອທາສຫໍ.

໒໘. ‘‘ທິພ຺ພວຕ຺ຖສມາ ຫຸຕ຺ວາ, ມຏ຺ຐາ [ມຏ຺ຏາ (ສີ.)] ຈີວຣສໍຍຸຕາ;

ມຘຸຣາ ສກ຺ຂຣາ ເຈວ, ເຕລາ ຈ ມຘຸຜາຓິຕາ.

໒໙. ‘‘ຕປ຺ປິຕາ ປຣມນ຺ເນນ, ສພ຺ເພ ເຕ ອຣິຍມຓ຺ຑລາ;

ຣຕນຄພ຺ຠໍ ປວິສິຕ຺ວາ, ເກສຣີວ ຄຸຫາສຍາ.

໓໐. ‘‘ມຫາຣຫມ຺ຫິ ສຍເນ, ສີຫເສຍ຺ຍມກປ຺ປຍຸໍ;

ສມ຺ປຊານາ ສມຸຏ຺ຐາຍ, ສຍເນ [ເສຍ຺ເຍ (ສ຺ຍາ.)] ປລ຺ລງ຺ກມາຠຸຊຸໍ.

໓໑. ‘‘ໂຄຈຣໍ ສພ຺ພພຸທ຺ຘານໍ, ຌານຣຕິສມປ຺ປິຕາ;

ອຎ຺ເຎ ຘມ຺ມານິ ເທເສນ຺ຕິ, ອຎ຺ເຎ ກີຬນ຺ຕິ ອິທ຺ຘິຍາ.

໓໒. ‘‘ອຎ຺ເຎ ອຠິຎ຺ຎາ ອປ຺ເປນ຺ຕິ, ອຠິຎ຺ຎາ ວສິຠາວິຕາ;

ວິກຸພ຺ພນາ ວິກຸພ຺ພນ຺ຕິ, ອຎ຺ເຎເນກສຫສ຺ສິໂຍ.

໓໓. ‘‘ພຸທ຺ຘາປິ ພຸທ຺ເຘ ປຸຈ຺ຉນ຺ຕິ, ວິສຍໍ ສພ຺ພຎ຺ຎຸມາລຍໍ;

ຄມ຺ຠີຣໍ ນິປຸຓໍ ຐານໍ, ປຎ຺ຎາຍ ວິນິພຸຊ຺ຌເຣ.

໓໔. ‘‘ສາວກາ ພຸທ຺ເຘ ປຸຈ຺ຉນ຺ຕິ, ພຸທ຺ຘາ ປຸຈ຺ຉນ຺ຕິ ສາວເກ;

ອຎ຺ຎມຎ຺ຎຎ຺ຈ ປຸຈ຺ຉິຕ຺ວາ [ປຸຈ຺ຉນ຺ຕິ (ສີ. ສ຺ຍາ.)], ອຎ຺ໂຎຎ຺ຎໍ ພ຺ຍາກໂຣນ຺ຕິ ເຕ.

໓໕. ‘‘ພຸທ຺ຘາ ປຈ຺ເຈກພຸທ຺ຘາ ຈ, ສາວກາ ປຣິຈາຣກາ;

ເອວໍ ສກາຍ ຣຕິຍາ, ປາສາເທຠິຣມນ຺ຕິ ເຕ.

໓໖. ‘‘ຉຕ຺ຕາ ຕິຏ຺ຐນ຺ຕຸ ຣຕນາ, ກຎ຺ຈນາເວຬປນ຺ຕິກາ;

ມຸຕ຺ຕາຊາລປຣິກ຺ຂິຕ຺ຕາ, ສພ຺ເພ ຘາເຣນ຺ຕຸ [ຘາເຣນ຺ຕິ (ກ.)] ມຕ຺ຖເກ.

໓໗. ‘‘ຠວນ຺ຕຸ ເຈຬວິຕານາ, ໂສຓ຺ຓຕາຣກຈິຕ຺ຕິຕາ;

ວິຈິຕ຺ຕມລ຺ຍວິຕຕາ, ສພ຺ເພ ຘາເຣນ຺ຕຸ ມຕ຺ຖເກ.

໓໘. ‘‘ວິຕຕາ ມລ຺ຍທາເມຫິ, ຄນ຺ຘທາເມຫິ ໂສຠິຕາ;

ທຸສ຺ສທາມປຣິກິຓ຺ຓາ, ຣຕນທາມຠູສິຕາ.

໓໙. ‘‘ປຸປ຺ຜາຠິກິຓ຺ຓາ ສຸຈິຕ຺ຕາ, ສຸຣຠິຄນ຺ຘຠູສິຕາ;

ຄນ຺ຘປຎ຺ຈງ຺ຄຸລິກຕາ [ຄນ຺ຘປຎ຺ຈງ຺ຄຸລໍ ກຕາ (ອຏ຺ຐ.)], ເຫມຈ຺ຉທນຉາທິຕາ.

໔໐. ‘‘ຈຕຸທ຺ທິສາ ໂປກ຺ຂຣຎ຺ໂຎ, ປທຸມຸປ຺ປລສນ຺ຖຕາ;

ໂສວຓ຺ຓຣູປາ ຂາຍນ຺ຕຸ, ປທ຺ມໍເຣຓຸຣຊຸຄ຺ຄຕາ.

໔໑. ‘‘ປຸປ຺ຜນ຺ຕຸ ປາທປາ ສພ຺ເພ, ປາສາທສ຺ສ ສມນ຺ຕໂຕ;

ສຍຎ຺ຈ ປຸປ຺ຜາ ມຸຎ຺ຈິຕ຺ວາ, ຄນ຺ຕ຺ວາ ຠວນໂມກິຣຸໍ.

໔໒. ‘‘ສິຂິໂນ ຕຕ຺ຖ ນຈ຺ຈນ຺ຕຸ, ທິພ຺ພຫໍສາ ປກູຊເຣ;

ກຣວີກາ ຈ ຄາຍນ຺ຕຸ, ທິຊສງ຺ຆາ ສມນ຺ຕໂຕ.

໔໓. ‘‘ເຠຣິໂຍ ສພ຺ພາ ວຊ຺ຊນ຺ຕຸ, ວີຓາ ສພ຺ພາ ຣສນ຺ຕຸ [ຣວນ຺ຕຸ (ສີ. ສ຺ຍາ.)] ຕາ;

ສພ຺ພາ ສງ຺ຄີຕິ ວຕ຺ຕນ຺ຕຸ, ປາສາທສ຺ສ ສມນ຺ຕໂຕ.

໔໔. ‘‘ຍາວຕາ ພຸທ຺ຘເຂຕ຺ຕມ຺ຫິ, ຈກ຺ກວາເຬ ຕໂຕ ປເຣ;

ມຫນ຺ຕາ ໂຊຕິສມ຺ປນ຺ນາ, ອຈ຺ຉິນ຺ນາ ຣຕນາມຍາ.

໔໕. ‘‘ຕິຏ຺ຐນ຺ຕຸ ໂສຓ຺ຓປລ຺ລງ຺ກາ, ທີປຣຸກ຺ຂາ ຊລນ຺ຕຸ ເຕ;

ຠວນ຺ຕຸ ເອກປຊ຺ໂຊຕາ, ທສສຫສ຺ສິປຣມ຺ປຣາ.

໔໖. ‘‘ຄຓິກາ ລາສິກາ ເຈວ, ນຈ຺ຈນ຺ຕຸ ອຈ຺ຉຣາຄຓາ;

ນານາຣງ຺ຄາ ປທິສ຺ສນ຺ຕຸ, ປາສາທສ຺ສ ສມນ຺ຕໂຕ.

໔໗. ‘‘ທຸມຄ຺ເຄ ປພ຺ພຕຄ຺ເຄ ວາ, ສິເນຣຸຄິຣິມຸທ຺ຘນິ;

ອຸສ຺ສາເປມິ ຘຊໍ ສພ຺ພໍ, ວິຈິຕ຺ຕໍ ປຎ຺ຈວຓ຺ຓິກໍ.

໔໘. ‘‘ນຣາ ນາຄາ ຈ ຄນ຺ຘພ຺ພາ, ສພ຺ເພ ເທວາ ອຸເປນ຺ຕຸ ເຕ;

ນມສ຺ສນ຺ຕາ ປຎ຺ຊລິກາ, ປາສາທໍ ປຣິວາຣຍຸໍ.

໔໙. ‘‘ຍໍ ກິຎ຺ຈິ ກຸສລໍ ກມ຺ມໍ, ກຕ຺ຕພ຺ພໍ ກິຣິຍໍ ມມ;

ກາເຍນ ວາຈາ ມນສາ, ຕິທເສ ສຸກຕໍ ກຕໍ.

໕໐. ‘‘ເຍ ສຕ຺ຕາ ສຎ຺ຎິໂນ ອຕ຺ຖິ, ເຍ ຈ ສຕ຺ຕາ ອສຎ຺ຎິໂນ;

ກຕໍ ປຸຎ຺ຎຜລໍ ມຍ຺ຫໍ, ສພ຺ເພ ຠາຄີ ຠວນ຺ຕຸ ເຕ.

໕໑. ‘‘ເຍສໍ ກຕໍ ສຸວິທິຕໍ, ທິນ຺ນໍ ປຸຎ຺ຎຜລໍ ມຍາ;

ເຍ ຈ ຕຕ຺ຖ [ຕສ຺ມິໍ (ສີ. ກ.)] ນ ຊານນ຺ຕິ, ເທວາ ຄນ຺ຕ຺ວາ ນິເວທຍຸໍ.

໕໒. ‘‘ສພ຺ພໂລກມ຺ຫິ [ສພ຺ເພ ໂລກມ຺ຫິ (ສ຺ຍາ. ກ.)] ເຍ ສຕ຺ຕາ, ຊີວນ຺ຕາຫາຣເຫຕຸກາ;

ມນຸຎ຺ຎໍ ໂຠຊນໍ ສພ຺ພໍ [ສພ຺ເພ (ສ຺ຍາ.)], ລຠນ຺ຕຸ ມມ ເຈຕສາ.

໕໓. ‘‘ມນສາ ທານໍ ມຍາ ທິນ຺ນໍ, ມນສາ ປສາທມາວຫິໍ;

ປູຊິຕາ ສພ຺ພສມ຺ພຸທ຺ຘາ, ປຈ຺ເຈກາ ຊິນສາວກາ.

໕໔. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໕໕. ‘‘ທຸເວ ຠເວ ປຊານາມິ, ເທວຕ຺ເຕ ອຖ ມານຸເສ;

ອຎ຺ຎໍ ຄຕິໍ ນ ຊານາມິ, ມນສາ ປຕ຺ຖນາຜລໍ.

໕໖. ‘‘ເທວານໍ ອຘິໂກ ໂຫມິ, ຠວາມິ ມນຸຊາຘິໂປ;

ຣູປລກ຺ຂຓສມ຺ປນ຺ໂນ, ປຎ຺ຎາຍ ອສໂມ ຠເວ.

໕໗. ‘‘ໂຠຊນໍ ວິວິຘໍ ເສຏ຺ຐໍ, ຣຕນຎ຺ຈ ອນປ຺ປກໍ;

ວິວິຘານິ ຈ ວຕ຺ຖານິ, ນຠາ [ນຠສາ (ສ຺ຍາ.)] ຂິປ຺ປໍ ອຸເປນ຺ຕິ ມໍ.

໕໘. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ທິພ຺ພາ ຠກ຺ຂາ ອຸເປນ຺ຕິ ມໍ.

໕໙. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ຣຕນາ ສພ຺ເພ ອຸເປນ຺ຕິ ມໍ.

໖໐. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ສພ຺ເພ ຄນ຺ຘາ ອຸເປນ຺ຕິ ມໍ.

໖໑. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ [ຍຕ຺ຖ (ສ຺ຍາ.), ຍຎ຺ຎໍ (ກ.)] ຫຕ຺ຖໍ ປສາເຣມິ, ສພ຺ເພ ຍານາ ອຸເປນ຺ຕິ ມໍ.

໖໒. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ສພ຺ເພ ມາລາ ອຸເປນ຺ຕິ ມໍ.

໖໓. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ອລງ຺ກາຣາ ອຸເປນ຺ຕິ ມໍ.

໖໔. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ສພ຺ພາ ກຎ຺ຎາ ອຸເປນ຺ຕິ ມໍ.

໖໕. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ມຘຸສກ຺ຂຣາ ອຸເປນ຺ຕິ ມໍ.

໖໖. ‘‘ປຖພ຺ຍາ ປພ຺ພເຕ ເຈວ, ອາກາເສ ອຸທເກ ວເນ;

ຍໍ ຍໍ ຫຕ຺ຖໍ ປສາເຣມິ, ສພ຺ເພ ຂຊ຺ຊາ ອຸເປນ຺ຕິ ມໍ.

໖໗. ‘‘ອຘເນ ອທ຺ຘິກ [ອທ຺ຘິເກ (ສ຺ຍາ.)] ຊເນ, ຍາຈເກ ຈ ປຖາວິໂນ;

ທທາມິຫໍ [ທທາມິຫ (ສີ.) ທທາມິ ຕໍ (ສ຺ຍາ.)] ທານວຣໍ, ສມ຺ໂພຘິວຣປຕ຺ຕິຍາ.

໖໘. ‘‘ນາເທນ຺ໂຕ ປພ຺ພຕໍ ເສລໍ, ຄຊ຺ເຊນ຺ໂຕ ພຫລໍ ຄິຣິໍ;

ສເທວກໍ ຫາສຍນ຺ໂຕ, ພຸທ຺ໂຘ ໂລເກ ຠວາມຫໍ.

໖໙. ‘‘ທິສາ ທສວິຘາ ໂລເກ, ຍາຍໂຕ ນຕ຺ຖິ ອນ຺ຕກໍ;

ຕສ຺ມິຎ຺ຈ ທິສາຠາຄມ຺ຫິ, ພຸທ຺ຘເຂຕ຺ຕາ ອສງ຺ຂິຍາ.

໗໐. ‘‘ປຠາ ປກິຕ຺ຕິຕາ ມຍ຺ຫໍ, ຍມກາ ຣໍສິວາຫນາ;

ເອຕ຺ຖນ຺ຕເຣ ຣໍສິຊາລໍ, ອາໂລໂກ ວິປຸໂລ ຠເວ.

໗໑. ‘‘ເອຕ຺ຕເກ ໂລກຘາຕຸມ຺ຫິ, ສພ຺ເພ ປສ຺ສນ຺ຕຸ ມໍ ຊນາ;

ສພ຺ເພ ມໍ ອນຸວຕ຺ຕນ຺ຕຸ, ຍາວ ພ຺ຣຫ຺ມນິເວສນໍ [ສພ຺ເພວ ສຸມນາ ໂຫນ຺ຕຸ, ສພ຺ເພ ມໍ ອນຸວຕ຺ຕເຣ (ສີ. ສ຺ຍາ.)].

໗໒. ‘‘ວິສິຏ຺ຐມຘຸນາເທນ, ອມຕເຠຣິມາຫນິໍ;