໔໒. ຠທ຺ທາລິວຄ຺ໂຄ

໑. ຠທ຺ທາລິຕ຺ເຖຣອປທານໍ

໑. ‘‘ສຸເມໂຘ ນາມ ສມ຺ພຸທ຺ໂຘ, ອຄ຺ໂຄ ກາຣຸຓິໂກ ມຸນິ;

ວິເວກກາໂມ ໂລກຄ຺ໂຄ, ຫິມວນ຺ຕມຸປາຄມິ.

໒. ‘‘ອຊ຺ໂຌຄາເຫຕ຺ວາ ຫິມວໍ, ສຸເມໂຘ ໂລກນາຍໂກ;

ປລ຺ລງ຺ກໍ ອາຠຸຊິຕ຺ວານ, ນິສີທິ ປຸຣິສຸຕ຺ຕໂມ.

໓. ‘‘ສມາຘິໍ ໂສ ສມາປນ຺ໂນ, ສຸເມໂຘ ໂລກນາຍໂກ;

ສຕ຺ຕຣຕ຺ຕິນ຺ທິວໍ ພຸທ຺ໂຘ, ນິສີທິ ປຸຣິສຸຕ຺ຕໂມ.

໔. ‘‘ຂາຣິຠາຣໍ [ຂາຣິກາຊໍ (ສີ.)] ຄເຫຕ຺ວານ, ວນມຊ຺ໂຌຄຫິໍ ອຫໍ;

ຕຕ຺ຖທ຺ທສາສິໍ ສມ຺ພຸທ຺ຘໍ, ໂອຆຕິຓ຺ຓມນາສວໍ.

໕. ‘‘ສມ຺ມຊ຺ຊນິໍ ຄເຫຕ຺ວານ, ສມ຺ມຊ຺ຊິຕ຺ວານ ອສ຺ສມໍ;

ຈຕຸທຓ຺ເຑ ຐເປຕ຺ວານ, ອກາສິໍ ມຓ຺ຑປໍ ຕທາ.

໖. ‘‘ສາລປຸປ຺ຜໍ ອາຫຣິຕ຺ວາ, ມຓ຺ຑປໍ ຉາທຍິໍ ອຫໍ;

ປສນ຺ນຈິຕ຺ໂຕ ສຸມໂນ, ອຠິວນ຺ທິໍ ຕຖາຄຕໍ.

໗. ‘‘ຍໍ ວທນ຺ຕິ ສຸເມໂຘຕິ, ຠູຣິປຎ຺ຎໍ ສຸເມຘສໍ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໘. ‘‘‘ພຸທ຺ຘສ຺ສ ຄິຣມຎ຺ຎາຍ, ສພ຺ເພ ເທວາ ສມາຄມຸໍ;

ອສໍສຍໍ ພຸທ຺ຘເສຏ຺ໂຐ, ຘມ຺ມໍ ເທເສຕິ ຈກ຺ຂຸມາ.

໙. ‘‘‘ສຸເມໂຘ ນາມ ສມ຺ພຸທ຺ໂຘ, ອາຫຸຕີນໍ ປຏິຄ຺ຄໂຫ;

ເທວສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໑໐. ‘‘‘ໂຍ ເມ ສຕ຺ຕາຫໍ ມຓ຺ຑປໍ, ຘາຣຍີ ສາລຉາທິຕໍ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໑໑. ‘‘‘ເທວຠູໂຕ ມນຸສ຺ໂສ ວາ, ເຫມວຓ຺ໂຓ ຠວິສ຺ສຕິ;

ປຫູຕໂຠໂຄ ຫຸຕ຺ວານ, ກາມໂຠຄີ ຠວິສ຺ສຕິ.

໑໒. ‘‘‘ສຏ຺ຐິ ນາຄສຫສ຺ສານິ, ສພ຺ພາລງ຺ກາຣຠູສິຕາ;

ສຸວຓ຺ຓກຈ຺ຉາ ມາຕງ຺ຄາ, ເຫມກປ຺ປນວາສສາ.

໑໓. ‘‘‘ອາຣູຬ຺ຫາ ຄາມຓີເຍຫິ, ໂຕມຣງ຺ກຸສປາຓິຠິ;

ສາຍໍ ປາໂຕ [ສາຍປາໂຕ (ປີ.)] ອຸປຏ຺ຐານໍ, ອາຄມິສ຺ສນ຺ຕິມໍ ນຣໍ;

ເຕຫິ ນາເຄຫິ ປຣິວຸໂຕ, ຣມິສ຺ສຕິ ອຍໍ ນໂຣ.

໑໔. ‘‘‘ສຏ຺ຐິ ອສ຺ສສຫສ຺ສານິ, ສພ຺ພາລງ຺ກາຣຠູສິຕາ;

ອາຊານີຍາວ ຊາຕິຍາ, ສິນ຺ຘວາ ສີຆວາຫິໂນ.

໑໕. ‘‘‘ອາຣູຬ຺ຫາ ຄາມຓີເຍຫິ, ອິລ຺ລິຍາຈາປຘາຣິຠິ;

ປຣິວາເຣສ຺ສນ຺ຕິມໍ ນິຈ຺ຈໍ, ພຸທ຺ຘປູຊາຍິທໍ ຜລໍ.

໑໖. ‘‘‘ສຏ຺ຐິ ຣຖສຫສ຺ສານິ, ສພ຺ພາລງ຺ກາຣຠູສິຕາ;

ທີປາ ອໂຖປິ ເວຍຄ຺ຆາ, ສນ຺ນທ຺ຘາ ອຸສ຺ສິຕທ຺ຘຊາ.

໑໗. ‘‘‘ອາຣູຬ຺ຫາ ຄາມຓີເຍຫິ, ຈາປຫຕ຺ເຖຫິ ວມ຺ມິຠິ;

ປຣິວາເຣສ຺ສນ຺ຕິມໍ ນິຈ຺ຈໍ, ພຸທ຺ຘປູຊາຍິທໍ ຜລໍ.

໑໘. ‘‘‘ສຏ຺ຐິ ຄາມສຫສ຺ສານິ, ປຣິປຸຓ຺ຓານິ ສພ຺ພໂສ;

ປຫູຕຘນຘຎ຺ຎານິ, ສຸສມິທ຺ຘານິ ສພ຺ພໂສ;

ສທາ ປາຕຸຠວິສ຺ສນ຺ຕິ, ພຸທ຺ຘປູຊາຍິທໍ ຜລໍ.

໑໙. ‘‘‘ຫຕ຺ຖີ ອສ຺ສາ ຣຖາ ປຕ຺ຕີ, ເສນາ ຈ ຈຕຸຣງ຺ຄິນີ;

ປຣິວາເຣສ຺ສນ຺ຕິມໍ ນິຈ຺ຈໍ, ພຸທ຺ຘປູຊາຍິທໍ ຜລໍ.

໒໐. ‘‘‘ອຏ຺ຐາຣເສ ກປ຺ປສເຕ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

໒໑. ‘‘‘ສຕານໍ ຕີຓິກ຺ຂຕ຺ຕຸຎ຺ຈ, ເທວຣຊ຺ຊໍ ກຣິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໒໒. ‘‘‘ຕິໍສກປ຺ປສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໒໓. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ວິຫຣິສ຺ສຕິນາສໂວ’.

໒໔. ‘‘ຕິໍສກປ຺ປສຫສ຺ສມ຺ຫິ, ອທ຺ທສໍ ໂລກນາຍກໍ;

ເອຕ຺ຖນ຺ຕຣມຸປາທາຍ, ຄເວສິໍ ອມຕໍ ປທໍ.

໒໕. ‘‘ລາຠາ ມຍ຺ຫໍ ສຸລທ຺ຘໍ ເມ, ຍມຫຎ຺ຎາສິ ສາສນໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໒໖. ‘‘ນໂມ ເຕ ປຸຣິສາຊຎ຺ຎ, ນໂມ ເຕ ປຸຣິສຸຕ຺ຕມ;

ຕວ ຎາຓໍ ປກິຕ຺ເຕຕ຺ວາ, ປຕ຺ໂຕມ຺ຫິ ອຈລໍ ປທໍ.

໒໗. ‘‘ຍໍ ຍໍ ໂຍນຸປປຊ຺ຊາມິ, ເທວຕ຺ຕໍ ອຖ ມານຸສໍ;

ສພ຺ພຕ຺ຖ ສຸຂິໂຕ ໂຫມິ, ຜລໍ ເມ ຎາຓກິຕ຺ຕເນ.

໒໘. ‘‘ອິທໍ ປຈ຺ຉິມກໍ ມຍ຺ຫໍ, ຈຣິໂມ ວຕ຺ຕເຕ ຠໂວ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໒໙. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

໓໐. ‘‘ສ຺ວາຄຕໍ ວຕ ເມ ອາສິ, ມມ ພຸທ຺ຘສ຺ສ ສນ຺ຕິເກ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໓໑. ‘‘ປຏິສມ຺ຠິທາ ຈຕສ຺ໂສ, ວິໂມກ຺ຂາປິ ຈ ອຏ຺ຐິເມ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຠທ຺ທາລິຕ຺ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຠທ຺ທາລິຕ຺ເຖຣສ຺ສາປທານໍ ປຐມໍ.

໒. ເອກຉຕ຺ຕິຍຕ຺ເຖຣອປທານໍ

໓໒. ‘‘ຈນ຺ທຠາຄານທີຕີເຣ, ອສ຺ສໂມ ສຸກໂຕ ມມ;

ສຸສຸທ຺ຘປຸລິນາກິຓ຺ໂຓ, ປນ຺ນສາລາ ສຸມາປິຕາ.

໓໓. ‘‘ອຸຕ຺ຕານກູລາ ນທິກາ, ສຸປຕິຕ຺ຖາ ມໂນຣມາ;

ມຈ຺ຉກຈ຺ຉປສມ຺ປນ຺ນາ [… ສຎ຺ຉນ຺ນາ (ກ.)], ສຸສຸມາຣນິເສວິຕາ.

໓໔. ‘‘ອຈ຺ຉາ ທີປີ ຈ ມຍູຣາ, ກຣວີກາ ຈ ສາຬິກາ;

ກູຊນ຺ຕິ ສພ຺ພທາ ເອເຕ, ໂສຠຍນ຺ຕາ ມມສ຺ສມໍ.

໓໕. ‘‘ໂກກິລາ ມຎ຺ຊຸຠາຓີ ຈ, ຫໍສາ ຈ ມຘຸຣສ຺ສຣາ;

ອຠິກູຊນ຺ຕິ ເຕ ຕຕ຺ຖ, ໂສຠຍນ຺ຕາ ມມສ຺ສມໍ.

໓໖. ‘‘ສີຫາ ພ຺ຍຄ຺ຆາ ວຣາຫາ ຈ, ອຈ຺ຉ [ວກ (ສີ. ປີ.), ພກາ (ສ຺ຍາ.), ວກາ (ກ.)] ໂກກຕຣຈ຺ຉກາ;

ຄິຣິທຸຄ຺ຄມ຺ຫິ ນາເທນ຺ຕິ, ໂສຠຍນ຺ຕາ ມມສ຺ສມໍ.

໓໗. ‘‘ເອຓີມິຄາ ຈ ສຣຠາ, ເຠຣຓ຺ຑາ ສູກຣາ ພຫູ;

ຄິຣິທຸຄ຺ຄມ຺ຫິ ນາເທນ຺ຕິ, ໂສຠຍນ຺ຕາ ມມສ຺ສມໍ.

໓໘. ‘‘ອຸທ຺ທາລກາ ຈມ຺ປກາ ຈ, ປາຏລີ ສິນ຺ທຸວາຣກາ;

ອຕິມຸຕ຺ຕາ ອໂສກາ ຈ, ໂສຠຍນ຺ຕິ ມມສ຺ສມໍ [ປຸປ຺ຜນ຺ຕິ ມມ ອສ຺ສເມ (ສີ. ປີ.)].

໓໙. ‘‘ອງ຺ໂກລາ ຍູຖິກາ ເຈວ, ສຕ຺ຕລີ ພິມ຺ພິຊາລິກາ;

ກຓິກາຣາ ຈ ປຸປ຺ຜນ຺ຕິ, ໂສຠຍນ຺ຕາ ມມສ຺ສມໍ [ກຓິກາກຓິກາຣາ ຈ, ປຸປ຺ຜນ຺ຕິ ມມ ອສ຺ສເມ (ສີ. ສ຺ຍາ. ປີ.)].

໔໐. ‘‘ນາຄາ ສາລາ ຈ ສຬລາ, ປຸຓ຺ຑຣີເກຕ຺ຖ ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໔໑. ‘‘ອຊ຺ຊຸນາ ອສນາ ເຈຕ຺ຖ, ມຫານາມາ ຈ ປຸປ຺ຜິຕາ;

ສາລາ ຈ ກງ຺ຄຸປຸປ຺ຜາ ຈ, ໂສຠຍນ຺ຕິ ມມສ຺ສມໍ.

໔໒. ‘‘ອມ຺ພາ ຊມ຺ພູ ຈ ຕິລກາ, ນິມ຺ພາ ຈ ສາລກລ຺ຍາຓີ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໔໓. ‘‘ອໂສກາ ຈ ກປິຏ຺ຐາ ຈ, ຄິຣິມາເລຕ຺ຖ [ຠຄິນິມາເລຕ຺ຖ (ສີ. ປີ.), ຠຄິນິມາລາ ຈ (ສ຺ຍາ.)] ປຸປ຺ຜິຕາ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໔໔. ‘‘ກທມ຺ພາ ກທລີ ເຈວ, ອິສິມຸຄ຺ຄາ ຈ ໂຣປິຕາ;

ຘຸວໍ ຜລານິ ຘາເຣນ຺ຕິ, ໂສຠຍນ຺ຕາ ມມສ຺ສມໍ.

໔໕. ‘‘ຫຣີຕກາ ອາມລກາ, ອມ຺ພຊມ຺ພຸວິຠີຕກາ;

ໂກລາ ຠລ຺ລາຕກາ ພິລ຺ລາ, ຜລິໂນ ມມ ອສ຺ສເມ.

໔໖. ‘‘ອວິທູເຣ ໂປກ຺ຂຣຓີ, ສຸປຕິຕ຺ຖາ ມໂນຣມາ;

ມນ຺ທາລເກຫິ ສຎ຺ຉນ຺ນາ, ປທຸມຸປ຺ປລເກຫິ ຈ.

໔໗. ‘‘ຄພ຺ຠໍ ຄຓ຺ຫນ຺ຕິ ປທຸມາ, ອຎ຺ເຎ ປຸປ຺ຜນ຺ຕິ ເກສຣີ;

ໂອປຕ຺ຕກຓ຺ຓິກາ ເຈວ, ປຸປ຺ຜນ຺ຕິ ມມ ອສ຺ສເມ.

໔໘. ‘‘ປາຐີນາ ປາວຸສາ ມຈ຺ຉາ, ພລຊາ ມຸຎ຺ຊໂຣຫິຕາ;

ອຈ຺ໂຉທກມ຺ຫິ ວິຈຣໍ, ໂສຠຍນ຺ຕິ ມມສ຺ສມໍ.

໔໙. ‘‘ນຍິຕາ ອມ຺ພຄນ຺ຘີ ຈ, ອນຸກູເລ ຈ ເກຕກາ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໕໐. ‘‘ມຘຸ ຠິສມ຺ຫາ ສວຕິ, ຂີຣສປ຺ປິ ມຸຬາລິຠິ;

ທິພ຺ພຄນ຺ຘໍ ສມ຺ປວນ຺ຕາ, ໂສຠຍນ຺ຕິ ມມສ຺ສມໍ.

໕໑. ‘‘ປຸລິນາ ໂສຠນາ ຕຕ຺ຖ, ອາກິຓ຺ຓາ ຊລເສວິຕາ;

ໂອປຸປ຺ຜາ ປຸປ຺ຜິຕາ ເສນ຺ຕິ, ໂສຠຍນ຺ຕາ ມມສ຺ສມໍ.

໕໒. ‘‘ຊຏາຠາເຣນ ຠຣິຕາ, ອຊິນຸຕ຺ຕຣວາສນາ;

ວາກຈີຣຘຣາ ສພ຺ເພ, ໂສຠຍນ຺ຕິ ມມສ຺ສມໍ.

໕໓. ‘‘ຍຸຄມຕ຺ຕມເປກ຺ຂນ຺ຕາ, ນິປກາ ສນ຺ຕວຸຕ຺ຕິໂນ;

ກາມໂຠເຄ ອນເປກ຺ຂາ, ວສນ຺ຕິ ມມ ອສ຺ສເມ.

໕໔. ‘‘ປຣູຬ຺ຫກຈ຺ຉນຂໂລມາ, ປງ຺ກທນ຺ຕາ ຣຊສ຺ສິຣາ;

ຣໂຊຊລ຺ລຘຣາ ສພ຺ເພ, ວສນ຺ຕິ ມມ ອສ຺ສເມ.

໕໕. ‘‘ອຠິຎ຺ຎາປາຣມິປ຺ປຕ຺ຕາ, ອນ຺ຕລິກ຺ຂຈຣາ ຈ ເຕ;

ອຸຄ຺ຄຈ຺ຉນ຺ຕາ ນຠໍ ເອເຕ, ໂສຠຍນ຺ຕິ ມມສ຺ສມໍ.

໕໖. ‘‘ເຕຫິ ສິສ຺ເສຫິ ປຣິວຸໂຕ, ວສາມິ ວິປິເນ ຕທາ;

ຣຕ຺ຕິນ຺ທິວໍ ນ ຊານາມິ, ສທາ ຌານສມປ຺ປິໂຕ.

໕໗. ‘‘ຠຄວາ ຕມ຺ຫິ ສມເຍ, ອຕ຺ຖທສ຺ສີ ມຫາມຸນິ;

ຕມນ຺ຘກາຣໍ ນາເສນ຺ໂຕ, ອຸປ຺ປຊ຺ຊິ ໂລກນາຍໂກ.

໕໘. ‘‘ອຖ ອຎ຺ຎຕໂຣ ສິສ຺ໂສ, ອາຄຈ຺ຉິ ມມ ສນ຺ຕິກໍ;

ມນ຺ເຕ ອຊ຺ເຌຕຸກາໂມ ໂສ, ຉຬງ຺ຄໍ ນາມ ລກ຺ຂຓໍ.

໕໙. ‘‘ພຸທ຺ໂຘ ໂລເກ ສມຸປ຺ປນ຺ໂນ, ອຕ຺ຖທສ຺ສີ ມຫາມຸນິ;

ຈຕຸສຈ຺ຈໍ ປກາເສນ຺ໂຕ, ເທເສຕິ ອມຕໍ ປທໍ.

໖໐. ‘‘ຕຸຏ຺ຐຫຏ຺ໂຐ ປມຸທິໂຕ, ຘມ຺ມນ຺ຕຣຄຕາສໂຍ;

ອສ຺ສມາ ອຠິນິກ຺ຂມ຺ມ, ອິທໍ ວຈນມພ຺ຣວິໍ.

໖໑. ‘‘‘ພຸທ຺ໂຘ ໂລເກ ສມຸປ຺ປນ຺ໂນ, ທ຺ວຕ຺ຕິໍສວຣລກ຺ຂໂຓ;

ເອຖ ສພ຺ເພ ຄມິສ຺ສາມ, ສມ຺ມາສມ຺ພຸທ຺ຘສນ຺ຕິກໍ’.

໖໒. ‘‘ໂອວາທປຏິກຣາ ເຕ, ສຘມ຺ເມ ປາຣມິໍ ຄຕາ;

ສາຘູຕິ ສມ຺ປຏິຈ຺ຉິໍສຸ, ອຸຕ຺ຕມຕ຺ຖຄເວສກາ.

໖໓. ‘‘ຊຏາຠາຣຠຣິຕາ ເຕ [ຊຏາຠາເຣນ ຠຣິຕາ (ກ.)], ອຊິນຸຕ຺ຕຣວາສນາ;

ອຸຕ຺ຕມຕ຺ຖໍ ຄເວສນ຺ຕາ, ນິກ຺ຂມິໍສຸ ວນາ ຕທາ.

໖໔. ‘‘ຠຄວາ ຕມ຺ຫິ ສມເຍ, ອຕ຺ຖທສ຺ສີ ມຫາຍໂສ;

ຈຕຸສຈ຺ຈໍ ປກາເສນ຺ໂຕ, ເທເສຕິ ອມຕໍ ປທໍ.

໖໕. ‘‘ເສຕຈ຺ຉຕ຺ຕໍ ຄເຫຕ຺ວານ, ພຸທ຺ຘເສຏ຺ຐສ຺ສ ຘາຣຍິໍ;

ເອກາຫໍ ຘາຣຍິຕ຺ວານ, ພຸທ຺ຘເສຏ຺ຐໍ ອວນ຺ທຫໍ.

໖໖. ‘‘ອຕ຺ຖທສ຺ສີ ຕຸ ຠຄວາ, ໂລກເຊຏ຺ໂຐ ນຣາສໂຠ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໖໗. ‘‘‘ໂຍ ເມ ຉຕ຺ຕໍ ອຘາເຣສິ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໖໘. ‘‘‘ອິມສ຺ສ ຊາຍມານສ຺ສ, ເທວຕ຺ເຕ ອຖ ມານຸເສ;

ຘາເຣສ຺ສຕິ ສທາ ຉຕ຺ຕໍ, ຉຕ຺ຕທານສ຺ສິທໍ ຜລໍ.

໖໙. ‘‘‘ສຕ຺ຕສຕ຺ຕຕິກປ຺ປານິ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

໗໐. ‘‘‘ສຕ຺ຕສຕ຺ຕຕິກ຺ຂຕ຺ຕຸຎ຺ຈ, ເທວຣຊ຺ຊໍ ກຣິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

໗໑. ‘‘‘ອຏ຺ຐາຣເສ ກປ຺ປສເຕ, ໂຄຕໂມ ສກ຺ຍປຸງ຺ຄໂວ;

ຕມນ຺ຘກາຣໍ ນາເສນ຺ໂຕ, ອຸປ຺ປຊ຺ຊິສ຺ສຕິ ຈກ຺ຂຸມາ.

໗໒. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;