໑໐. ມຎ຺ຈທາຍກຕ຺ເຖຣອປທານໍ

໑໘໔. ‘‘ປຣິນິພ຺ພຸເຕ ກາຣຸຓິເກ, ສິທ຺ຘຕ຺ເຖ ໂລກນາຍເກ;

ວິຕ຺ຖາຣິເກ ປາວຈເນ, ເທວມານຸສສກ຺ກເຕ.

໑໘໕. ‘‘ຈຓ຺ຑາໂລ ອາສຫໍ ຕຕ຺ຖ, ອາສນ຺ທິປີຐກາຣໂກ;

ເຕນ ກມ຺ເມນ ຊີວາມິ, ເຕນ ໂປເສມິ ທາຣເກ.

໑໘໖. ‘‘ອາສນ຺ທິໍ ສຸກຕໍ ກຕ຺ວາ, ປສນ຺ໂນ ເສຫິ ປາຓິຠິ;

ສຍເມວຸປຄນ຺ຕ຺ວານ, ຠິກ຺ຂຸສງ຺ຆສ຺ສທາສຫໍ.

໑໘໗. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໘໘. ‘‘ເທວໂລກຄໂຕ ສນ຺ໂຕ, ໂມທາມິ ຕິທເສ ຄເຓ;

ສຍນານິ ມຫຄ຺ຆານິ, ນິພ຺ພຕ຺ຕນ຺ຕິ ຍທິຈ຺ຉກໍ.

໑໘໙. ‘‘ປຎ຺ຎາສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ;

ອສີຕິກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ອໂຫສຫໍ.

໑໙໐. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ສຸຂິໂຕ ຍສວາ ໂຫມິ, ມຎ຺ຈທານສ຺ສິທໍ ຜລໍ.

໑໙໑. ‘‘ເທວໂລກາ ຈວິຕ຺ວານ, ເອມິ ເຈ ມານຸສໍ ຠວໍ;

ມຫາຣຫາ ສຸສຍນາ, ສຍເມວ ຠວນ຺ຕິ ເມ.

໑໙໒. ‘‘ອຍໍ ປຈ຺ຉິມໂກ ມຍ຺ຫໍ, ຈຣິໂມ ວຕ຺ຕເຕ ຠໂວ;

ອຊ຺ຊາປິ ສຍເນ ກາເລ [ສຍນກາເລ (ສ຺ຍາ.)], ສຍນໍ ອຸປຕິຏ຺ຐຕິ.

໑໙໓. ‘‘ຈຕຸນ຺ນວຸຕິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ມຎ຺ຈທານສ຺ສິທໍ ຜລໍ.

໑໙໔. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໙໕. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໙໖. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຎ຺ຈທາຍໂກ ເຖໂຣ ອິມາ ຄາຖາໂຍ

ອຠາສິຕ຺ຖາຕິ.

ມຎ຺ຈທາຍກຕ຺ເຖຣສ຺ສາປທານໍ ທສມໍ.

ຠທ຺ທາລິວຄ຺ໂຄ ພາຈຕ຺ຕາລີສໂມ.