໘. ຍາຄຸທາຍກຕ຺ເຖຣອປທານໍ

໑໔໙. ‘‘ອຕິຖິໍ [ອຕີຕໍ (ກ.)] ເມ ຄເຫຕ຺ວານ, ອຄຈ຺ຉິໍ ຄາມກໍ ຕທາ;

ສມ຺ປຸຓ຺ຓນທິກໍ ທິສ຺ວາ, ສງ຺ຆາຣາມໍ ອຸປາຄມິໍ.

໑໕໐. ‘‘ອາຣຎ຺ຎກາ ຘຸຕຘຣາ, ຌາຍິໂນ ລູຂຈີວຣາ;

ວິເວກາຠິຣຕາ ຘີຣາ, ສງ຺ຆາຣາເມ ວສນ຺ຕິ ເຕ.

໑໕໑. ‘‘ຄຕິ ເຕສໍ ອຸປຈ຺ຉິນ຺ນາ, ສຸວິມຸຕ຺ຕານ ຕາທິນໍ;

ປິຓ຺ຑາຍ ເຕ ນ ຄຈ຺ຉນ຺ຕິ, ໂອຣຸທ຺ຘນທິຕາຍ ຫິ [ໂອຣຸທ຺ຘນທິກາຍຕິໍ (ສ຺ຍາ.)].

໑໕໒. ‘‘ປສນ຺ນຈິຕ຺ໂຕ ສຸມໂນ, ເວທຊາໂຕ ກຕຎ຺ຊລີ;

ຕຓ຺ຑຸລໍ ເມ ຄເຫຕ຺ວານ, ຍາຄຸທານໍ ອທາສຫໍ.

໑໕໓. ‘‘ປຎ຺ຈນ຺ນໍ ຍາຄຸໍ ທຕ຺ວານ, ປສນ຺ໂນ ເສຫິ ປາຓິຠິ;

ສກກມ຺ມາຠິຣທ຺ໂຘຫໍ, ຕາວຕິໍສມຄຈ຺ຉຫໍ.

໑໕໔. ‘‘ມຓິມຍຎ຺ຈ ເມ ພ຺ຍມ຺ຫໍ, ນິພ຺ພຕ຺ຕິ ຕິທເສ ຄເຓ;

ນາຣີຄເຓຫິ ສຫິໂຕ, ໂມທາມິ ພ຺ຍມ຺ຫມຸຕ຺ຕເມ.

໑໕໕. ‘‘ເຕຕ຺ຕິໍສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊມກາຣຍິໍ;

ຕິໍສກ຺ຂຕ຺ຕຸໍ ຈກ຺ກວຕ຺ຕີ, ມຫາຣຊ຺ຊມກາຣຍິໍ.

໑໕໖. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ເທວໂລເກ ມນຸສ຺ເສ ວາ, ອນຸໂຠຕ຺ວາ ສຍໍ [ຍສໍ (ສ຺ຍາ.)] ອຫໍ.

໑໕໗. ‘‘ປຈ຺ຉິເມ ຠເວ ສມ຺ປຕ຺ເຕ, ປພ຺ພຊິໍ ອນຄາຣິຍໍ;

ສຫ ໂອໂຣປິເຕ ເກເສ, ສພ຺ພໍ ສມ຺ປຏິວິຊ຺ຌຫໍ.

໑໕໘. ‘‘ຂຍໂຕ ວຍໂຕ ຈາປິ, ສມ຺ມສນ຺ໂຕ ກເຬວຣໍ;

ປຸເຣ ສິກ຺ຂາປທາທານາ, ອຣຫຕ຺ຕມປາປຸຓິໍ.

໑໕໙. ‘‘ສຸທິນ຺ນໍ ເມ ທານວຣໍ, ວາຓິຊ຺ຊໍ ສມ຺ປໂຍຊິຕໍ;

ເຕເນວ ຍາຄຸທາເນນ, ປຕ຺ໂຕມ຺ຫິ ອຈລໍ ປທໍ.

໑໖໐. ‘‘ໂສກໍ ປຣິທ຺ທວໍ ພ຺ຍາຘິໍ, ທຣຖໍ ຈິຕ຺ຕຕາປນໍ;

ນາຠິຊານາມິ ອຸປ຺ປນ຺ນໍ, ຍາຄຸທານສ຺ສິທໍ ຜລໍ.

໑໖໑. ‘‘ຍາຄຸໍ ສງ຺ຆສ຺ສ ທຕ຺ວານ, ປຸຎ຺ຎກ຺ເຂຕ຺ເຕ ອນຸຕ຺ຕເຣ;

ປຎ຺ຈານິສໍເສ ອນຸໂຠມິ, ອໂຫ ຍາຄຸສຸຍິຏ຺ຐຕາ.

໑໖໒. ‘‘ອພ຺ຍາຘິຕາ ຣູປວຕາ, ຂິປ຺ປໍ ຘມ຺ມນິສນ຺ຕິຕາ [ນິພຸຊ຺ຌິຕາ (ສ຺ຍາ.)];

ລາຠິຕາ ອນ຺ນປານສ຺ສ, ອາຍຸ ປຎ຺ຈມກໍ ມມ.

໑໖໓. ‘‘ໂຍ ໂກຈິ ເວທໍ ຊນຍໍ, ສງ຺ເຆ ຍາຄຸໍ ທເທຍ຺ຍ ໂສ;

ອິມານິ ປຎ຺ຈ ຐານານິ, ປຏິຄຓ຺ເຫຍ຺ຍ ປຓ຺ຑິໂຕ.

໑໖໔. ‘‘ກຣຓີຍໍ ກຕໍ ສພ຺ພໍ, ຠວາ ອຸຄ຺ຆາຏິຕາ ມຍາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໖໕. ‘‘ໂສ ອຫໍ ວິຈຣິສ຺ສາມິ, ຄາມາ ຄາມໍ ປຸຣາ ປຸຣໍ;

ນມສ຺ສມາໂນ ສມ຺ພຸທ຺ຘໍ, ຘມ຺ມສ຺ສ ຈ ສຸຘມ຺ມຕໍ.

໑໖໖. ‘‘ຕິໍສກປ຺ປສຫສ຺ສມ຺ຫິ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ຍາຄຸທານສ຺ສິທໍ ຜລໍ.

໑໖໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໑໖໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໖໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຍາຄຸທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຍາຄຸທາຍກຕ຺ເຖຣສ຺ສາປທານໍ ອຏ຺ຐມໍ.