໙. ສພ຺ພທາຍກຕ຺ເຖຣອປທານໍ

໔໕໖. ‘‘ມຫາສມຸທ຺ທໍ ໂອຄຍ຺ຫ, ຠວນໍ ເມ ສຸນິມ຺ມິຕໍ;

ສຸນິມ຺ມິຕາ ໂປກ຺ຂຣຓີ, ຈກ຺ກວາກປກູຊິຕາ.

໔໕໗. ‘‘ມນ຺ທາລເກຫິ ສຎ຺ຉນ຺ນາ, ປທຸມຸປ຺ປລເກຫິ ຈ;

ນທີ ຈ ສນ຺ທເຕ ຕຕ຺ຖ, ສຸປຕິຕ຺ຖາ ມໂນຣມາ.

໔໕໘. ‘‘ມຈ຺ຉກຈ຺ຉປສຎ຺ຉນ຺ນາ, ນານາທິຊສໂມຕ຺ຖຕາ;

ມຍູຣໂກຎ຺ຈາຠິຣຸທາ, ໂກກິລາທີຫິ ວຄ຺ຄຸຫິ.

໔໕໙. ‘‘ປາເຣວຕາ ຣວິຫໍສາ ຈ, ຈກ຺ກວາກາ ນທີຈຣາ;

ທິນ຺ທິຠາ ສາຬິກາ ເຈຕ຺ຖ, ປມ຺ມກາ [ປມ຺ປກາ (ສີ.), ຈປ຺ປກາ (ສ຺ຍາ.)] ຊີວຊີວກາ.

໔໖໐. ‘‘ຫໍສາ ໂກຎ຺ຈາປິ ນທິຕາ [ໂກຎ຺ຈາຠິນທິຕາ (ສີ. ສ຺ຍາ.)], ໂກສິຍາ ປິງ຺ຄລາ ພຫູ;

ສຕ຺ຕຣຕນສມ຺ປນ຺ນາ, ມຓິມຸຕ຺ຕິກວາລຸກາ.

໔໖໑. ‘‘ສພ຺ພໂສຓ຺ຓມຍາ ຣຸກ຺ຂາ, ນານາຄນ຺ຘສເມຣິຕາ;

ອຸຊ຺ໂຊເຕນ຺ຕິ ທິວາຣຕ຺ຕິໍ, ຠວນໍ ສພ຺ພກາລິກໍ.

໔໖໒. ‘‘ສຏ຺ຐິ ຕູຣິຍສຫສ຺ສານິ, ສາຍໍ ປາໂຕ ປວຊ຺ຊເຣ;

ໂສຬສິຕ຺ຖິສຫສ຺ສານິ, ປຣິວາເຣນ຺ຕິ ມໍ ສທາ.

໔໖໓. ‘‘ອຠິນິກ຺ຂມ຺ມ ຠວນາ, ສຸເມຘໍ ໂລກນາຍກໍ;

ປສນ຺ນຈິຕ຺ໂຕ ສຸມໂນ, ວນ຺ທຍິໍ ຕໍ ມຫາຍສໍ.

໔໖໔. ‘‘ສມ຺ພຸທ຺ຘໍ ອຠິວາເທຕ຺ວາ, ສສງ຺ຆໍ ຕໍ ນິມນ຺ຕຍິໍ;

ອຘິວາເສສິ ໂສ ຘີໂຣ, ສຸເມໂຘ ໂລກນາຍໂກ.

໔໖໕. ‘‘ມມ ຘມ຺ມກຖໍ ກຕ຺ວາ, ອຸຍ຺ໂຍເຊສິ ມຫາມຸນິ;

ສມ຺ພຸທ຺ຘໍ ອຠິວາເທຕ຺ວາ, ຠວນໍ ເມ ອຸປາຄມິໍ.

໔໖໖. ‘‘ອາມນ຺ຕຍິໍ ປຣິຊນໍ, ສພ຺ເພ ສນ຺ນິປຕາຖ [ສນ຺ນິປຕຕ຺ຖ (ກ.)] ໂວ;

ປຸພ຺ພຓ຺ຫສມຍໍ ພຸທ຺ໂຘ, ຠວນໍ ອາຄມິສ຺ສຕິ.

໔໖໗. ‘‘ລາຠາ ອມ຺ຫໍ ສຸລທ຺ຘໍ ໂນ, ເຍ ວສາມ ຕວນ຺ຕິເກ;

ມຍມ຺ປິ ພຸທ຺ຘເສຏ຺ຐສ຺ສ, ປູຊໍ ກສ຺ສາມ ສຕ຺ຖຸໂນ.

໔໖໘. ‘‘ອນ຺ນປນໍ ປຏ຺ຐເປຕ຺ວາ, ກາລໍ ອາໂຣຈຍິໍ ອຫໍ;

ວສີສຕສຫສ຺ເສຫິ, ອຸເປສິ ໂລກນາຍໂກ.

໔໖໙. ‘‘ປຎ຺ຈງ຺ຄິເກຫິ ຕູຣິເຍຫິ, ປຈ຺ຈຸຄ຺ຄມນມກາສຫໍ;

ສພ຺ພໂສຓ຺ຓມເຍ ປີເຐ, ນິສີທິ ປຸຣິສຸຕ຺ຕໂມ.

໔໗໐. ‘‘ອຸປຣິຈ຺ຉທນໍ ອາສິ, ສພ຺ພໂສຓ຺ຓມຍໍ ຕທາ;

ພີຊນິໂຍ ປວາຍນ຺ຕິ, ຠິກ຺ຂຸສງ຺ຆສ຺ສ ອນ຺ຕເຣ.

໔໗໑. ‘‘ປຫູເຕນນ຺ນປາເນນ, ຠິກ຺ຂຸສງ຺ຆມຕປ຺ປຍິໍ;

ປຈ຺ເຈກທຸສ຺ສຍຸຄເຬ, ຠິກ຺ຂຸສງ຺ຆສ຺ສທາສຫໍ.

໔໗໒. ‘‘ຍໍ ວທນ຺ຕິ ສຸເມໂຘຕິ, ໂລກາຫຸຕິປຏິຄ຺ຄຫໍ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໔໗໓. ‘‘ໂຍ ເມ ອນ຺ເນນ ປາເນນ, ສພ຺ເພ ອິເມ ຈ ຕປ຺ປຍິໍ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໔໗໔. ‘‘ອຏ຺ຐາຣເສ ກປ຺ປສເຕ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

໔໗໕. ‘‘ອຸປ຺ປຊ຺ຊຕິ [ອຸປຄຈ຺ຉຕິ (ສີ.)] ຍໍ ໂຍນິໍ, ເທວຕ຺ຕໍ ອຖ ມານຸສໍ;

ສພ຺ພທາ ສພ຺ພໂສວຓ຺ຓໍ, ຉທນໍ ຘາຣຍິສ຺ສຕິ.

໔໗໖. ‘‘ຕິໍສກປ຺ປສຫສ຺ສມ຺ຫິ, ໂອກ຺ກາກກຸສລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໔໗໗. ‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໔໗໘. ‘‘‘ຠິກ຺ຂຸສງ຺ເຆ ນິສີທິຕ຺ວາ, ສີຫນາທໍ ນທິສ຺ສຕິ;

ຈິຕເກ ຉຕ຺ຕໍ ຘາເຣນ຺ຕິ, ເຫຏ຺ຐາ ຉຕ຺ຕມ຺ຫິ ຑຍ຺ຫຖ’.

໔໗໙. ‘‘ສາມຎ຺ຎໍ ເມ ອນຸປ຺ປຕ຺ຕໍ, ກິເລສາ ຌາປິຕາ ມຍາ;

ມຓ຺ຑເປ ຣຸກ຺ຂມູເລ ວາ, ສນ຺ຕາໂປ ເມ ນ ວິຊ຺ຊຕິ.

໔໘໐. ‘‘ຕິໍສກປ຺ປສຫສ຺ສມ຺ຫິ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ສພ຺ພທານສ຺ສິທໍ ຜລໍ.

໔໘໑. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໘໒. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໘໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສພ຺ພທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສພ຺ພທາຍກຕ຺ເຖຣສ຺ສາປທານໍ ນວມໍ.