໔໐. ປິລິນ຺ທວຈ຺ຉວຄ຺ໂຄ

໑. ປິລິນ຺ທວຈ຺ຉຕ຺ເຖຣອປທານໍ

໑. ‘‘ນຄເຣ ຫໍສວຕິຍາ, ອາສິໍ ໂທວາຣິໂກ ອຫໍ;

ອກ຺ໂຂຠໍ ອມິຕໍ ໂຠຄໍ, ຆເຣ ສນ຺ນິຈິຕໍ ມມ.

໒. ‘‘ຣໂຫຄໂຕ ນິສີທິຕ຺ວາ, ປຫໍສິຕ຺ວານ ມານສໍ [ສມ຺ປຫໍສິຕ຺ວ ມານສໍ (ສີ.)];

ນິສຊ຺ຊ ປາສາທວເຣ, ເອວໍ ຈິນ຺ເຕສຫໍ ຕທາ.

(ຈິນ຺ຕນາກາໂຣ)

໓. ‘‘‘ພຫູ ເມຘິຄຕາ ໂຠຄາ, ຜີຕໍ ອນ຺ເຕປຸຣໍ ມມ;

ຣາຊາປິ [ຣາຊິສິ (ກ.)] ສນ຺ນິມນ຺ເຕສິ, ອານນ຺ໂທ ປຖວິສ຺ສໂຣ.

໔. ‘‘‘ອຍຎ຺ຈ ພຸທ຺ໂຘ ອຸປ຺ປນ຺ໂນ, ອຘິຈ຺ຈຸປ຺ປຕ຺ຕິໂກ ມຸນິ;

ສໍວິຊ຺ຊນ຺ຕິ ຈ ເມ ໂຠຄາ, ທານໍ ທສ຺ສາມິ ສຕ຺ຖຸໂນ.

໕. ‘‘‘ປທຸເມນ ຣາຊປຸຕ຺ເຕນ, ທິນ຺ນໍ ທານວຣໍ ຊິເນ;

ຫຕ຺ຖິນາເຄ ຈ ປລ຺ລງ຺ເກ, ອປສ຺ເສນຎ຺ຈນປ຺ປກໍ.

໖. ‘‘‘ອຫມ຺ປິ ທານໍ ທສ຺ສາມິ, ສງ຺ເຆ ຄຓວຣຸຕ຺ຕເມ;

ອທິນ຺ນປຸພ຺ພມຎ຺ເຎສໍ, ຠວິສ຺ສໍ ອາທິກມ຺ມິໂກ.

໗. ‘‘‘ຈິນ຺ເຕຕ຺ວາຫໍ ພຫຸວິຘໍ, ຍາເຄ ຍສ຺ສ ສຸຂໍຜລໍ;

ປຣິກ຺ຂາຣທານມທ຺ທກ຺ຂິໍ, ມມ ສງ຺ກປ຺ປປູຣຓໍ.

໘. ‘‘‘ປຣິກ຺ຂາຣານິ ທສ຺ສາມິ, ສງ຺ເຆ ຄຓວຣຸຕ຺ຕເມ;

ອທິນ຺ນປຸພ຺ພມຎ຺ເຎສໍ, ຠວິສ຺ສໍ ອາທິກມ຺ມິໂກ’.

(ທານວຕ຺ຖຸສມ຺ປາທນໍ)

໙. ‘‘ນຬກາເຣ ອຸປາຄມ຺ມ, ຉຕ຺ຕໍ ກາເຣສິ ຕາວເທ;

ຉຕ຺ຕສຕສຫສ຺ສານິ, ເອກໂຕ ສນ຺ນິປາຕຍິໍ.

໑໐. ‘‘ທຸສ຺ສສຕສຫສ຺ສານິ, ເອກໂຕ ສນ຺ນິປາຕຍິໍ;

ປຕ຺ຕສຕສຫສ຺ສານິ, ເອກໂຕ ສນ຺ນິປາຕຍິໍ.

໑໑. ‘‘ວາສິໂຍ ສຕ຺ຖເກ ຈາປິ, ສູຈິໂຍ ນຂເຉທເນ;

ເຫຏ຺ຐາຉຕ຺ເຕ ຐປາເປສິໍ, ກາເຣຕ຺ວາ ຕທນຸຈ຺ຉເວ.

໑໒. ‘‘ວິຘູປເນ ຕາລວຓ຺ເຏ, ໂມຣຫຕ຺ເຖ ຈ ຈາມເຣ;

ປຣິສ຺ສາວເນ ເຕລຘາເຣ [ເຕລຘເຣ (ສີ.)], ກາຣຍິໍ ຕທນຸຈ຺ຉເວ.

໑໓. ‘‘ສູຈິຆເຣ ອໍສພທ຺ເຘ, ອໂຖປິ ກາຍພນ຺ຘເນ;

ອາຘາຣເກ ຈ ສຸກເຕ, ກາຣຍິໍ ຕທນຸຈ຺ຉເວ.

໑໔. ‘‘ປຣິໂຠຄຠາຊເນ ຈ, ອໂຖປິ ໂລຫຖາລເກ;

ເຠສຊ຺ເຊ ປູຣຍິຕ຺ວານ, ເຫຏ຺ຐາຉຕ຺ເຕ ຐເປສຫໍ.

໑໕. ‘‘ວຈໍ ອຸສີຣໍ ລຏ຺ຐິມຘຸໍ, ປິປ຺ຜລີ ມຣິຈານິ ຈ;

ຫຣີຕກິໍ ສິງ຺ຄີເວຣໍ, ສພ຺ພໍ ປູເຣສິ ຠາຊເນ.

໑໖. ‘‘ອຸປາຫນາ ປາທຸກາໂຍ, ອໂຖ ອຸທກປຸຎ຺ຉເນ;

ກຕ຺ຕຣທຓ຺ເຑ ສຸກເຕ, ກາຣຍິໍ ຕທນຸຈ຺ຉເວ.

໑໗. ‘‘ໂອສຘຎ຺ຊນນາຬີ ຈ [ໂອສຘໍ ອຎ຺ຊນາປິຈ (ສ຺ຍາ.)], ສລາກາ ຘມ຺ມກຸຕ຺ຕຣາ;

ກຸຎ຺ຈິກາ ປຎ຺ຈວຓ຺ເຓຫິ, ສິພ຺ພິເຕ ກຸຎ຺ຈິກາຆເຣ.

໑໘. ‘‘ອາໂຍເຄ ຘູມເນຕ຺ເຕ ຈ, ອໂຖປິ ທີປຘາຣເກ;

ຕຸມ຺ພເກ ຈ ກຣຓ຺ເຑ ຈ, ກາຣຍິໍ ຕທນຸຈ຺ຉເວ.

໑໙. ‘‘ສຓ຺ຑາເສ ປິປ຺ຜເລ ເຈວ, ອໂຖປິ ມລຫາຣເກ;

ເຠສຊ຺ຊຖວິເກ ເຈວ, ກາຣຍິໍ ຕທນຸຈ຺ຉເວ.

໒໐. ‘‘ອາສນ຺ທິໂຍ ປີຐເກ ຈ, ປລ຺ລງ຺ເກ ຈຕຸໂຣມເຍ;

ຕທນຸຈ຺ຉເວ ກາຣຍິຕ຺ວາ, ເຫຏ຺ຐາຉຕ຺ເຕ ຐເປສຫໍ.

໒໑. ‘‘ອຸຓ຺ຓາຠິສີ ຕູລຠິສີ, ອໂຖປິ ປີຐິກາຠິສີ [ປີຐກາຠິສີ (ສ຺ຍາ. ກ.)];

ພິມ຺ໂພຫເນ [ພິພ຺ໂພຫເນ (ສ຺ຍາ. ກ.)] ຈ ສຸກເຕ, ກາຣຍິໍ ຕທນຸຈ຺ຉເວ.

໒໒. ‘‘ກຸຣຸວິນ຺ເທ ມຘຸສິຕ຺ເຖ, ເຕລໍ ຫຕ຺ຖປ຺ປຕາປກໍ;

ສິປາຏິຜລເກ ສຸຈີ, ມຎ຺ຈໍ ອຕ຺ຖຣເຓນ ຈ.

໒໓. ‘‘ເສນາສເນ ປາທປຸຎ຺ເຉ, ສຍນາສນທຓ຺ຑເກ;

ທນ຺ຕໂປເຓ ຈ ອາຏລີ [ກຖລິໍ (ສ຺ຍາ.)], ສີສາເລປນຄນ຺ຘເກ.

໒໔. ‘‘ອຣຓີ ຜລປີເຐ [ປລາລປີເຐ (ສີ.)] ຈ, ປຕ຺ຕປິຘານຖາລເກ;

ອຸທກສ຺ສ ກຏຈ຺ຉູ ຈ, ຈຸຓ຺ຓກໍ ຣຊນມ຺ພຓໍ [ຣຊນມ຺ມຓໍ (ສີ.)].

໒໕. ‘‘ສມ຺ມຊ຺ຊນໍ [ສມ຺ມຸຎ຺ຊນໍ (ສ຺ຍາ.), ສມ຺ມຊ຺ຊນິໍ, ສມ຺ມຸຎ຺ຊນິໍ (?)] ອຸທປຕ຺ຕໍ, ຕຖາ ວສ຺ສິກສາຏິກໍ;

ນິສີທນໍ ກຓ຺ຑຸຈ຺ຉາທິ, ອຖ ອນ຺ຕຣວາສກໍ.

໒໖. ‘‘ອຸຕ຺ຕຣາສງ຺ຄສງ຺ຆາຏີ, ນຕ຺ຖຸກໍ ມຸຂໂສຘນໍ;

ພິຬງ຺ຄໂລຓໍ ປຫູຕຎ຺ຈ [ໂລຓຠູຕຎ຺ຈ (ກ.)], ມຘຸຎ຺ຈ ທຘິປານກໍ.

໒໗. ‘‘ຘູປໍ [ຘູມໍ (ກ.)] ສິຕ຺ຖໍ ປິໂລຕິຎ຺ຈ, ມຸຂປຸຎ຺ຉນສຸຕ຺ຕກໍ;

ທາຕພ຺ພໍ ນາມ ຍໍ ອຕ຺ຖິ, ຍຎ຺ຈ ກປ຺ປຕິ ສຕ຺ຖຸໂນ.

໒໘. ‘‘ສພ຺ພເມຕໍ ສມາເນຕ຺ວາ, ອານນ຺ທໍ ອຸປສງ຺ກມິໍ;

ອຸປສງ຺ກມ຺ມ ຣາຊານໍ, ຊເນຕາຣໍ ມເຫສິໂນ [ມເຫສິນໍ (ສີ.), ມຫາຍສໍ (ສ຺ຍາ.), ມຫິສ຺ສຣໍ (ກ.)];

ສິຣສາ ອຠິວາເທຕ຺ວາ, ອິທໍ ວຈນມພ຺ຣວິໍ.

(ທາໂນກາສຍາຈນາ)

໒໙. ‘‘‘ເອກໂຕ ຊາຕສໍວທ຺ຘາ, ອຸຠິນ຺ນໍ ເອກໂຕ ມນໍ [ຍໂສ (ສ຺ຍາ.), ມໂນ (?)];

ສາຘາຣຓາ ສຸຂທຸກ຺ເຂ, ອຸໂຠ ຈ ອນຸວຕ຺ຕກາ.

໓໐. ‘‘‘ອຕ຺ຖິ ເຈຕສິກໍ ທຸກ຺ຂໍ, ຕວາເຘຍ຺ຍໍ ອຣິນ຺ທມ;

ຍທິ ສກ຺ໂກສິ ຕໍ ທຸກ຺ຂໍ, ວິໂນເທຍ຺ຍາສິ ຂຕ຺ຕິຍ.

໓໑. ‘‘‘ຕວ ທຸກ຺ຂໍ ມມ ທຸກ຺ຂໍ, ອຸຠິນ຺ນໍ ເອກໂຕ ມໂນ [ມນໍ (ສີ. ສ຺ຍາ.)];

ນິຏ຺ຐິຕນ຺ຕິ ວິຊານາຫິ, ມມາເຘຍ຺ຍໍ ສເຈ ຕຸວໍ.

໓໒. ‘‘‘ຊານາຫິ ໂຂ ມຫາຣາຊ, ທຸກ຺ຂໍ ເມ ທຸພ຺ພິໂນທຍໍ;

ປຫຸ ສມາໂນ ຄຊ຺ຊສຸ, ເອກໍ ເຕ ທຸຈ຺ຈຊໍ ວຣໍ.

໓໓. ‘‘‘ຍາວຕາ ວິຊິເຕ ອຕ຺ຖິ, ຍາວຕາ ມມ ຊີວິຕໍ;

ເອເຕຫິ ຍທິ ເຕ ອຕ຺ໂຖ, ທສ຺ສາມິ ອວິກມ຺ປິໂຕ.

໓໔. ‘‘‘ຄຊ຺ຊິຕໍ ໂຂ ຕຍາ ເທວ, ມິຈ຺ຉາ ຕໍ ພຫຸ ຄຊ຺ຊິຕໍ;

ຊານິສ຺ສາມິ ຕຸວໍ ອຊ຺ຊ, ສພ຺ພຘມ຺ເມ [ສຈ຺ຈຘມ຺ເມ (?)] ປຕິຏ຺ຐິຕໍ.

໓໕. ‘‘‘ອຕິພາຬ຺ຫໍ ນິປີເຬສິ, ທທມານສ຺ສ ເມ ສໂຕ;

ກິໍ ເຕ ເມ ປີຬິເຕນຕ຺ໂຖ, ປຕ຺ຖິຕໍ ເຕ ກເຖຫິ ເມ.

໓໖. ‘‘‘ອິຈ຺ຉາມຫໍ ມຫາຣາຊ, ພຸທ຺ຘເສຏ຺ຐໍ ອນຸຕ຺ຕຣໍ;

ໂຠຊຍິສ຺ສາມິ ສມ຺ພຸທ຺ຘໍ, ວຊ຺ຊໍ [ວຎ຺ຈຸໍ (?)] ເມ ມາຫຸ ຊີວິຕໍ.

໓໗. ‘‘‘ອຎ຺ຎໍ ເຕຫໍ ວຣໍ ທມ຺ມິ, ມາ ຍາຈິຕ຺ໂຖ ຕຖາຄຕໍ [ອຍາຈິໂຕ ຕຖາຄໂຕ (ສ຺ຍາ. ກ.)];

ອເທຍ຺ໂຍ ກສ຺ສຈິ ພຸທ຺ໂຘ, ມຓິ ໂຊຕິຣໂສ ຍຖາ.

໓໘. ‘‘‘ນນຸ ເຕ ຄຊ຺ຊິຕໍ ເທວ, ຍາວ ຊີວິຕມຕ຺ຕໂນ [ວິຊິຕມຕ຺ຖິຕໍ (ກ.), ຊີວິຕມຕ຺ຖິກໍ (ສ຺ຍາ.)];

ຊີວິຕໍ [ວິຊິຕໍ (ກ.)] ທທມາເນນ, ຍຸຕ຺ຕໍ ທາຕຸໍ ຕຖາຄຕໍ.

໓໙. ‘‘‘ຐປນີໂຍ ມຫາວີໂຣ, ອເທຍ຺ໂຍ ກສ຺ສຈິ ຊິໂນ;

ນ ເມ ປຏິສ຺ສຸໂຕ ພຸທ຺ໂຘ, ວຣສ຺ສຸ ອມິຕໍ ຘນໍ.

໔໐. ‘‘‘ວິນິຈ຺ຉຍໍ ປາປຸຓາມ, ປຸຈ຺ຉິສ຺ສາມ ວິນິຈ຺ຉເຍ;

ຍຖາສຓ຺ຐໍ [ຍຖາສນ຺ຕໍ (ສີ.)] ກເຖສ຺ສນ຺ຕິ, ປຏິປຸຈ຺ຉາມ ຕໍ ຕຖາ.

໔໑. ‘‘‘ຣຎ຺ໂຎ ຫຕ຺ເຖ ຄເຫຕ຺ວານ, ອຄມາສິໍ ວິນິຈ຺ຉຍໍ;

ປຸຣໂຕ ອກ຺ຂທສ຺ສານໍ, ອິທໍ ວຈນມພ຺ຣວິໍ.

໔໒. ‘‘‘ສຸຓນ຺ຕຸ ເມ ອກ຺ຂທສ຺ສາ, ຣາຊາ ວຣມທາສິ ເມ;

ນ ກິຎ຺ຈິ ຐປຍິຕ຺ວານ, ຊີວິຕມ຺ປິ [ວິຊິຕໍປິ (ກ.)] ປວາຣຍິ.

໔໓. ‘‘‘ຕສ຺ສ ເມ ວຣທິນ຺ນສ຺ສ, ພຸທ຺ຘເສຏ຺ຐໍ ວຣິໍ ອຫໍ;

ສຸທິນ຺ໂນ ໂຫຕິ ເມ ພຸທ຺ໂຘ, ຉິນ຺ທຖ ສໍສຍໍ ມມ.

໔໔. ‘‘‘ໂສສ຺ສາມ ຕວ ວຈນໍ, ຠູມິປາລສ຺ສ ຣາຊິໂນ;

ອຸຠິນ຺ນໍ ວຈນໍ ສຸຕ຺ວາ, ຉິນ຺ທິສ຺ສາເມຕ຺ຖ ສໍສຍໍ.

໔໕. ‘‘‘ສພ຺ພໍ ເທວ ຕຍາ ທິນ຺ນໍ, ອິມສ຺ສ ສພ຺ພຄາຫິກໍ [ສພ຺ພຄາຫິຕໍ (ສ຺ຍາ. ກ.)];

ນ ກິຎ຺ຈິ ຐປຍິຕ຺ວານ, ຊີວິຕມ຺ປິ ປວາຣຍິ.

໔໖. ‘‘‘ກິຈ຺ຉປ຺ປຕ຺ໂຕວ ຫຸຕ຺ວານ, ຍາຈີ ວຣມນຸຕ຺ຕຣໍ [ຍາວຊີວມນຸຕ຺ຕຣໍ (ສ຺ຍາ. ກ.)];

ອິມໍ ສຸທຸກ຺ຂິຕໍ ຎຕ຺ວາ, ອທາສິໍ ສພ຺ພຄາຫິກໍ.

໔໗. ‘‘‘ປຣາຊໂຍ ຕຸວໍ [ຕວໍ (ສີ.)] ເທວ, ອສ຺ສ ເທຍ຺ໂຍ ຕຖາຄໂຕ;

ອຸຠິນ຺ນໍ ສໍສໂຍ ຉິນ຺ໂນ, ຍຖາສຓ຺ຐມ຺ຫິ [ຍຖາສນ຺ຕມ຺ຫິ (ສີ.)] ຕິຏ຺ຐຖ.

໔໘. ‘‘‘ຣາຊາ ຕຕ຺ເຖວ ຐຕ຺ວານ, ອກ຺ຂທສ຺ເສຕທພ຺ຣວິ;

ສມ຺ມາ ມຍ຺ຫມ຺ປິ ເທຍ຺ຍາຖ, ປຸນ ພຸທ຺ຘໍ ລຠາມຫໍ.

໔໙. ‘‘‘ປູເຣຕ຺ວາ ຕວ ສງ຺ກປ຺ປໍ, ໂຠຊຍິຕ຺ວາ ຕຖາຄຕໍ;

ປຸນ ເທຍ຺ຍາສິ [ເທຍ຺ຍາຖ (ກ.)] ສມ຺ພຸທ຺ຘໍ, ອານນ຺ທສ຺ສ ຍສສ຺ສິໂນ’.

(ນິມນ຺ຕນກຖາ)

໕໐. ‘‘ອກ຺ຂທສ຺ເສຠິວາເທຕ຺ວາ, ອານນ຺ທຎ຺ຈາປິ ຂຕ຺ຕິຍໍ;

ຕຸຏ຺ໂຐ ປມຸທິໂຕ ຫຸຕ຺ວາ, ສມ຺ພຸທ຺ຘມຸປສງ຺ກມິໍ.

໕໑. ‘‘ອຸປສງ຺ກມ຺ມ ສມ຺ພຸທ຺ຘໍ, ໂອຆຕິຓ຺ຓມນາສວໍ;

ສິຣສາ ອຠິວາເທຕ຺ວາ, ອິທໍ ວຈນມພ຺ຣວິໍ.

໕໒. ‘ວສີສຕສຫສ຺ເສຫິ, ອຘິວາເສຫິ ຈກ຺ຂຸມ;

ຫາສຍນ຺ໂຕ ມມ ຈິຕ຺ຕໍ, ນິເວສນມຸເປຫິ ເມ’.

໕໓. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມ ສງ຺ກປ຺ປມຎ຺ຎາຍ, ອຘິວາເສສິ ຈກ຺ຂຸມາ.

໕໔. ‘‘ອຘິວາສນມຎ຺ຎາຍ, ອຠິວາທິຍ ສຕ຺ຖຸໂນ;

ຫຏ຺ໂຐ ອຸທຄ຺ຄຈິຕ຺ໂຕຫໍ, ນິເວສນມຸປາຄມິໍ.

(ທານປຏິຍາທນໍ)

໕໕. ‘‘ມິຕ຺ຕາມຈ຺ເຈ ສມາເນຕ຺ວາ, ອິທໍ ວຈນມພ຺ຣວິໍ;

‘ສຸທຸລ຺ລໂຠ ມຍາ ລທ຺ໂຘ, ມຓິ ໂຊຕິຣໂສ ຍຖາ.

໕໖. ‘‘‘ເກນ ຕໍ ປູຊຍິສ຺ສາມ, ອປ຺ປເມຍ຺ໂຍ ອນູປໂມ;

ອຕຸໂລ ອສໂມ ຘີໂຣ, ຊິໂນ ອປ຺ປຏິປຸຄ຺ຄໂລ.

໕໗. ‘‘‘ຕຖາສມສໂມ ເຈວ, ອທຸຕິໂຍ ນຣາສໂຠ;

ທຸກ຺ກຣໍ ອຘິກາຣຎ຺ຫິ, ພຸທ຺ຘານຸຈ຺ຉວິກໍ ມຍາ.

໕໘. ‘‘‘ນານາປຸປ຺ເຜ ສມາເນຕ຺ວາ, ກໂຣມ ປຸປ຺ຜມຓ຺ຑປໍ;

ພຸທ຺ຘານຸຈ຺ຉວິກໍ ເອຕໍ, ສພ຺ພປູຊາ ຠວິສ຺ສຕິ’.

໕໙. ‘‘ອຸປ຺ປລໍ ປທຸມໍ ວາປິ, ວສ຺ສິກໍ ອຘິມຸຕ຺ຕກໍ [ອຕິມຸຕ຺ຕກໍ (?)];

ຈມ຺ປກໍ [ຈນ຺ທນໍ (ກ.)] ນາຄປຸປ຺ຜຎ຺ຈ, ມຓ຺ຑປໍ ກາຣຍິໍ ອຫໍ.

໖໐. ‘‘ສຕາສນສຫສ຺ສານິ, ຉຕ຺ຕຈ຺ຉາຍາຍ ປຎ຺ຎປິໍ;

ປຈ຺ຉິມໍ ອາສນໍ ມຍ຺ຫໍ, ອຘິກໍ ສຕມຄ຺ຆຕິ.

໖໑. ‘‘ສຕາສນສຫສ຺ສານິ, ຉຕ຺ຕຈ຺ຉາຍາຍ ປຎ຺ຎປິໍ;

ປຏິຍາເທຕ຺ວາ ອນ຺ນປານໍ, ກາລໍ ອາໂຣຈຍິໍ ອຫໍ.

໖໒. ‘‘ອາໂຣຈິຕມ຺ຫິ ກາລມ຺ຫິ, ປທຸມຸຕ຺ຕໂຣ ມຫາມຸນິ;

ວສີສຕສຫສ຺ເສຫິ, ນິເວສນມຸເປສິ ເມ.

໖໓. ‘‘ຘາເຣນ຺ຕໍ ອຸປຣິຈ຺ຉຕ຺ຕໍ [ຘາເຣນ຺ຕມຸປຣິຈ຺ຉຕ຺ເຕ (ສີ.)], ສຸຜຸລ຺ລປຸປ຺ຜມຓ຺ຑເປ;

ວສີສຕສຫສ຺ເສຫິ, ນິສີທິ ປຸຣິສຸຕ຺ຕໂມ.

໖໔. ‘‘‘ຉຕ຺ຕສຕສຫສ຺ສານິ, ສຕສຫສ຺ສມາສນໍ;

ກປ຺ປິຍໍ ອນວຊ຺ຊຎ຺ຈ, ປຏິຄຓ຺ຫາຫິ ຈກ຺ຂຸມ’.

໖໕. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ມມໍ ຕາເຣຕຸກາໂມ ໂສ, ສມ຺ປຏິຈ຺ຉິ ມຫາມຸນິ.

(ທານກຖາ)

໖໖. ‘‘ຠິກ຺ຂຸໂນ ເອກເມກສ຺ສ, ປຈ຺ເຈກໍ ປຕ຺ຕມທາສຫໍ;

ຊຫິໍສຸ ສຸມ຺ຠກໍ [ປຸພ຺ພກໍ (ສີ.), ສມ຺ຠຕໍ (ສ຺ຍາ.), ມຕ຺ຕິກໍ (?)] ປຕ຺ຕໍ, ໂລຫປຕ຺ຕໍ ອຘາຣຍຸໍ.

໖໗. ‘‘ສຕ຺ຕຣຕ຺ຕິນ຺ທິວໍ ພຸທ຺ໂຘ, ນິສີທິ ປຸປ຺ຜມຓ຺ຑເປ;

ໂພຘຍນ຺ໂຕ ພຫູ ສຕ຺ເຕ, ຘມ຺ມຈກ຺ກໍ ປວຕ຺ຕຍິ.

໖໘. ‘‘ຘມ຺ມຈກ຺ກໍ ປວຕ຺ເຕນ຺ໂຕ, ເຫຏ຺ຐໂຕ ປຸປ຺ຜມຓ຺ຑເປ;

ຈຸລ຺ລາສີຕິສຫສ຺ສານໍ, ຘມ຺ມາຠິສມໂຍ ອຫຸ.

໖໙. ‘‘ສຕ຺ຕເມ ທິວເສ ປຕ຺ເຕ, ປທຸມຸຕ຺ຕໂຣ ມຫາມຸນິ;

ຉຕ຺ຕຈ຺ຉາຍາຍມາສີໂນ, ອິມາ ຄາຖາ ອຠາສຖ.

(ພ຺ຍາກຣຓໍ)

໗໐. ‘‘‘ອນູນກໍ ທານວຣໍ, ໂຍ ເມ ປາທາສິ ມາຓໂວ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.