໑໐. ອຊິຕຕ຺ເຖຣອປທານໍ

໔໘໔. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອຊ຺ໂຌຄາເຫຕ຺ວາ ຫິມວນ຺ຕໍ, ນິສີທິ ໂລກນາຍໂກ.

໔໘໕. ‘‘ນາຫໍ ອທ຺ທກ຺ຂິໍ [ປສ຺ສາມິ (?)] ສມ຺ພຸທ຺ຘໍ, ນປິ ສທ຺ທໍ ສຸໂຓມຫໍ;

ມມ ຠກ຺ຂໍ ຄເວສນ຺ໂຕ, ອາຫິຓ຺ຑາມິ ວເນ ອຫໍ [ຕທາ (ສີ.)].

໔໘໖. ‘‘ຕຕ຺ຖທ຺ທສ຺ສາສິໍ ສມ຺ພຸທ຺ຘໍ, ທ຺ວຕ຺ຕິໍສວຣລກ຺ຂຓໍ;

ທິສ຺ວານ ວິຕ຺ຕິມາປຊ຺ຊິໍ [ຈິຕ຺ຕມາປຊ຺ຊິ (ສີ.), ຈິຕ຺ຕມາປຊ຺ຊິໍ (ສ຺ຍາ.)], ສຕ຺ໂຕ ໂກ ນາມຍໍ ຠເວ.

໔໘໗. ‘‘ລກ຺ຂຓານິ ວິໂລເກຕ຺ວາ, ມມ ວິຊ຺ຊໍ ອນຸສ຺ສຣິໍ;

ສຸຕຎ຺ຫິ ເມຕໍ ວຸຑ຺ຒານໍ, ປຓ຺ຑິຕານໍ ສຸຠາສິຕໍ.

໔໘໘. ‘‘ເຕສໍ ຍຖາ ຕໍ ວຈນໍ, ອຍໍ ພຸທ຺ໂຘ ຠວິສ຺ສຕິ;

ຍໍນູນາຫໍ ສກ຺ກເຣຍ຺ຍໍ, ຄຕິໍ ເມ ໂສຘຍິສ຺ສຕິ.

໔໘໙. ‘‘ຂິປ຺ປໍ ອສ຺ສມມາຄນ຺ຕ຺ວາ, ມຘຸເຕລໍ ຄຫິໍ ອຫໍ;

ໂກລມ຺ພກໍ ຄເຫຕ຺ວານ, ອຸປຄຈ຺ຉິໍ ວິນາຍກໍ [ນຣາສຠໍ (ສີ.)].

໔໙໐. ‘‘ຕິທຓ຺ຑເກ ຄເຫຕ຺ວານ, ອພ຺ໂຠກາເສ ຐເປສຫໍ;

ປທີປໍ ປຊ຺ຊລິຕ຺ວານ, ອຏ຺ຐກ຺ຂຕ຺ຕຸໍ ອວນ຺ທຫໍ.

໔໙໑. ‘‘ສຕ຺ຕຣຕ຺ຕິນ຺ທິວໍ ພຸທ຺ໂຘ, ນິສີທິ ປຸຣິສຸຕ຺ຕໂມ;

ຕໂຕ ຣຕ຺ຍາ ວິວສາເນ, ວຸຏ຺ຐາສິ ໂລກນາຍໂກ.

໔໙໒. ‘‘ປສນ຺ນຈິຕ຺ໂຕ ສຸມໂນ, ສພ຺ພຣຕ຺ຕິນ຺ທິວໍ ອຫໍ;

ທີປໍ ພຸທ຺ຘສ຺ສ ປາທາສິໍ, ປສນ຺ໂນ ເສຫິ ປາຓິຠິ.

໔໙໓. ‘‘ສພ຺ເພ ວນາ ຄນ຺ຘມຍາ, ປພ຺ພເຕ ຄນ຺ຘມາທເນ;

ພຸທ຺ຘສ຺ສ ອານຸຠາເວນ, ອາຄຈ຺ຉຸໍ ພຸທ຺ຘສນ຺ຕິກໍ [ອຸປຄຈ຺ຉຸໍ ຕທາ ຊິນໍ (ສີ.)].

໔໙໔. ‘‘ເຍ ເກຈິ ປຸປ຺ຜຄນ຺ຘາເສ, ປຸປ຺ຜິຕາ ຘຣຓີຣຸຫາ;

ພຸທ຺ຘສ຺ສ ອານຸຠາເວນ, ສພ຺ເພ ສນ຺ນິປຕຸໍ ຕທາ.

໔໙໕. ‘‘ຍາວຕາ ຫິມວນ຺ຕມ຺ຫິ, ນາຄາ ຈ ຄຣຸຬາ ອຸໂຠ;

ຘມ຺ມຎ຺ຈ ໂສຕຸກາມາ ເຕ, ອາຄຈ຺ຉຸໍ ພຸທ຺ຘສນ຺ຕິກໍ.

໔໙໖. ‘‘ເທວໂລ ນາມ ສມໂຓ, ພຸທ຺ຘສ຺ສ ອຄ຺ຄສາວໂກ;

ວສີສຕສຫສ຺ເສຫິ, ພຸທ຺ຘສນ຺ຕິກຸປາຄມິ.

໔໙໗. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ຠິກ຺ຂຸສງ຺ເຆ ນິສີທິຕ຺ວາ, ອິມາ ຄາຖາ ອຠາສຖ.

໔໙໘. ‘‘‘ໂຍ ເມ ທີປໍ ປທີເປສິ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໔໙໙. ‘‘‘ສຏ຺ຐິ ກປ຺ປສຫສ຺ສານິ, ເທວໂລເກ ຣມິສ຺ສຕິ;

ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ.

ໂສຬສມໍ ຠາຓວາຣໍ.

໕໐໐. ‘‘‘ຉຕ຺ຕິສກ຺ຂຕ຺ຕຸໍ ເທວິນ຺ໂທ, ເທວຣຊ຺ຊໍ ກຣິສ຺ສຕິ;

ປຖວິຍໍ ສຕ຺ຕສຕໍ, ວິປຸລໍ ຣຊ຺ຊໍ ກຣິສ຺ສຕິ.

໕໐໑. ‘‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ອິມິນາ ທີປທາເນນ, ທິພ຺ພຈກ຺ຂຸ ຠວິສ຺ສຕິ.

໕໐໒. ‘‘‘ສມນ຺ຕໂຕ ອຏ຺ຐໂກສໍ [ອຑ຺ຒໂກສໍ (ສີ. ສ຺ຍາ.)], ປສ຺ສິສ຺ສຕິ ອຍໍ ສທາ;

ເທວໂລກາ ຈວນ຺ຕສ຺ສ, ນິພ຺ພຕ຺ຕນ຺ຕສ຺ສ ຊນ຺ຕຸໂນ.

໕໐໓. ‘‘‘ທິວາ ວາ ຍທິ ວາ ຣຕ຺ຕິໍ, ປທີປໍ ຘາຣຍິສ຺ສຕິ;

ຊາຍມານສ຺ສ ສຕ຺ຕສ຺ສ, ປຸຎ຺ຎກມ຺ມສມງ຺ຄິໂນ.

໕໐໔. ‘‘‘ຍາວຕາ ນຄຣໍ ອາສິ, ຕາວຕາ ໂຊຕຍິສ຺ສຕິ;

ອຸປປຊ຺ຊຕິ ຍໍ ໂຍນິໍ, ເທວຕ຺ຕໍ ອຖ ມານຸສໍ.

໕໐໕. ‘‘‘ອສ຺ເສວ ທີປທານສ຺ສ, [ອຏ຺ຐທີປຜເລນ ຫິ; ອຸປຏ຺ຐິສ຺ສນ຺ຕິມໍ ຊນ຺ຕຸໍ (ສ຺ຍາ.), ອຏ຺ຐ ທີປາ ຜເລນ ຫິ; ນ ຊຫິສ຺ສນ຺ຕິ’ມໍ ຊນ຺ຕຸໍ (?)] ອຏ຺ຐທີປຜເລນ ຫິ;

ນ ຊຍິສ຺ສນ຺ຕິມໍ ຊນ຺ຕູ [ອຏ຺ຐທີປຜເລນ ຫິ; ອຸປຏ຺ຐິສ຺ສນ຺ຕິມໍ ຊນ຺ຕຸໍ (ສ຺ຍາ.), ອຏ຺ຐ ທີປາ ຜເລນ ຫິ; ນ ຊຫິສ຺ສນ຺ຕິ’ມໍ ຊນ຺ຕຸໍ (?)], ທີປທານສ຺ສິທໍ ຜລໍ.

໕໐໖. ‘‘‘ກປ຺ປສຕສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໕໐໗. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໕໐໘. ‘‘‘ໂຕສຍິຕ຺ວານ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ອຊິໂຕ ນາມ ນາເມນ, ເຫສ຺ສຕິ ສຕ຺ຖຸ ສາວໂກ’.

໕໐໙. ‘‘ສຏ຺ຐິ ກປ຺ປສຫສ຺ສານິ, ເທວໂລເກ ຣມິໍ ອຫໍ;

ຕຕ຺ຣາປິ ເມ ທີປສຕໍ, ໂຊຕເຕ ນິຈ຺ຈກາລິກໍ [ສພ຺ພກາລິກໍ (ສີ.)].

໕໑໐. ‘‘ເທວໂລເກ ມນຸສ຺ເສ ວາ, ນິທ຺ຘາວນ຺ຕິ ປຠາ ມມ;

ພຸທ຺ຘເສຏ຺ຐໍ ສຣິຕ຺ວານ, ຠິຍ຺ໂຍ ຫາສໍ ຊເນສຫໍ.

໕໑໑. ‘‘ຕຸສິຕາຫໍ ຈວິຕ຺ວານ, ໂອກ຺ກມິໍ ມາຕຸກຸຈ຺ຉິຍໍ;

ຊາຍມານສ຺ສ ສນ຺ຕສ຺ສ, ອາໂລໂກ ວິປຸໂລ ອຫຸ.

໕໑໒. ‘‘ອຄາຣາ ອຠິນິກ຺ຂມ຺ມ, ປພ຺ພຊິໍ ອນຄາຣິຍໍ;

ພາວຣິໍ ອຸປສງ຺ກມ຺ມ, ສິສ຺ສຕ຺ຕໍ ອຊ຺ຌຸປາຄມິໍ.

໕໑໓. ‘‘ຫິມວນ຺ເຕ ວສນ຺ໂຕຫໍ, ອສ຺ໂສສິໍ ໂລກນາຍກໍ;

ອຸຕ຺ຕມຕ຺ຖໍ ຄເວສນ຺ໂຕ, ອຸປຄຈ຺ຉິໍ ວິນາຍກໍ.

໕໑໔. ‘‘ທນ຺ໂຕ ພຸທ຺ໂຘ ທເມຕາວີ, ໂອຆຕິຓ຺ໂຓ ນິຣູປຘິ;

ນິພ຺ພານໍ ກຖຍີ ພຸທ຺ໂຘ, ສພ຺ພທຸກ຺ຂປ຺ປໂມຈນໍ.

໕໑໕. ‘‘ຕໍ ເມ ອາຄມນໍ ສິທ຺ຘໍ, ໂຕສິໂຕຫໍ ມຫາມຸນິໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ກຕໍ ພຸທ຺ຘສ຺ສ ສາສນໍ.

໕໑໖. ‘‘ສຕສຫສ຺ສິໂຕ ກປ຺ເປ, ຍໍ ທີປມທທິໍ ຕທາ;

ທຸຄ຺ຄຕິໍ ນາຠິຊານາມິ, ທີປທານສ຺ສິທໍ ຜລໍ.

໕໑໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໕໑໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໕໑໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ອຊິໂຕ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ອຊິຕຕ຺ເຖຣສ຺ສາປທານໍ ທສມໍ.

ປິລິນ຺ທວຈ຺ຉວຄ຺ໂຄ ຈຕ຺ຕາລີສໂມ.

ຕສ຺ສຸທ຺ທານໍ –

ປິລິນ຺ທວຈ຺ໂຉ ເສໂລ ຈ, ສພ຺ພກິຕ຺ຕີ ມຘຸໍທໂທ;

ກູຏາຄາຣີ ພາກຸໂລ ຈ, ຄິຣິ ສຬລສວ຺ຫໂຍ.

ສພ຺ພໂທ ອຊິໂຕ ເຈວ, ຄາຖາໂຍ ຄຓິຕາ ອິຫ;

ສຕານິ ປຎ຺ຈ ຄາຖານໍ, ວີສຕິ ຈ ຕທຸຕ຺ຕຣີຕິ.

ອຖ ວຄ຺ຄຸທ຺ທານໍ –

ປທຸມາຣກ຺ຂໂທ ເຈວ, ອຸມາ ຄນ຺ໂຘທເກນ ຈ;

ເອກປທ຺ມ ສທ຺ທສຎ຺ຎີ, ມນ຺ທາຣໍ ໂພຘິວນ຺ທໂກ.

ອວຏຎ຺ຈ ປິລິນ຺ທິ [ເອວເມວ ທິສ຺ສຕິ] ຈ, ຄາຖາໂຍ ຄຓິຕາ ອິຫ;

ຈຕຸສຕ຺ຕຕິ ຄາຖາໂຍ, ເອກາທສ ສຕານິ ຈ.

ປທຸມວຄ຺ຄທສກໍ.