໘. ສຬລມຓ຺ຑປິຍຕ຺ເຖຣອປທານໍ

໔໔໙. ‘‘ນິພ຺ພຸເຕ ກກຸສນ຺ຘມ຺ຫິ, ພ຺ຣາຫ຺ມຓມ຺ຫິ ວຸສີມຕິ;

ຄເຫຕ຺ວາ ສຬລໍ ມາລໍ, ມຓ຺ຑປໍ ກາຣຍິໍ ອຫໍ.

໔໕໐. ‘‘ຕາວຕິໍສຄໂຕ ສນ຺ໂຕ, ລຠາມິ ພ຺ຍມ຺ຫມຸຕ຺ຕມໍ;

ອຎ຺ເຎ ເທເວຕິໂຣຈາມິ, ປຸຎ຺ຎກມ຺ມສ຺ສິທໍ ຜລໍ.

໔໕໑. ‘‘ທິວາ ວາ ຍທິ ວາ ຣຕ຺ຕິໍ, ຈງ຺ກມນ຺ໂຕ ຐິໂຕ ຈຫໍ;

ຉນ຺ໂນ ສຬລປຸປ຺ເຜຫິ, ປຸຎ຺ຎກມ຺ມສ຺ສິທໍ ຜລໍ.

໔໕໒. ‘‘ອິມສ຺ມິໍເຍວ ກປ຺ປມ຺ຫິ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໔໕໓. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສໂວ.

໔໕໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໕໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສຬລມຓ຺ຑປິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສຬລມຓ຺ຑປິຍຕ຺ເຖຣສ຺ສາປທານໍ ອຏ຺ຐມໍ.