໗. ຄິຣິມານນ຺ທຕ຺ເຖຣອປທານໍ

໔໑໙. ‘‘ຠຣິຍາ ເມ ກາລງ຺ກຕາ, ປຸຕ຺ໂຕ ສີວຖິກໍ ຄໂຕ;

ມາຕາ ປິຕາ ມຕາ ຠາຕາ, ເອກຈິຕມ຺ຫິ [ມາຕາ ປິຕາ ຈ ຠາຕາ ຈ, ເອກຈິຕກມ຺ຫິ (ສີ. ສ຺ຍາ.)] ຑຍ຺ຫເຣ.

໔໒໐. ‘‘ເຕນ ໂສເກນ ສນ຺ຕຕ຺ໂຕ, ກິໂສ ປຓ຺ຑຸ ອໂຫສຫໍ;

ຈິຕ຺ຕກ຺ເຂໂປ ຈ ເມ ອາສິ, ເຕນ ໂສເກນ ອຏ຺ຏິໂຕ.

໔໒໑. ‘‘ໂສກສລ຺ລປເຣໂຕຫໍ, ວນນ຺ຕມຸປສງ຺ກມິໍ;

ປວຕ຺ຕຜລໍ ຠຸຎ຺ຊິຕ຺ວາ, ຣຸກ຺ຂມູເລ ວສາມຫໍ.

໔໒໒. ‘‘ສຸເມໂຘ ນາມ ສມ຺ພຸທ຺ໂຘ, ທຸກ຺ຂສ຺ສນ຺ຕກໂຣ ຊິໂນ;

ມມຸທ຺ຘຣິຕຸກາໂມ ໂສ, ອາຄຎ຺ຉິ ມມ ສນ຺ຕິກໍ.

໔໒໓. ‘‘ປທສທ຺ທໍ ສຸຓິຕ຺ວານ, ສຸເມຘສ຺ສ ມເຫສິໂນ;

ປຄ຺ຄເຫຕ຺ວານຫໍ ສີສໍ, ອຸລ຺ໂລເກສິໍ ມຫາມຸນິໍ.

໔໒໔. ‘‘ອຸປາຄເຕ ມຫາວີເຣ, ປີຕິ ເມ ອຸທປຊ຺ຊຖ;

ຕທາສິເມກຄ຺ຄມໂນ, ທິສ຺ວາ ຕໍ ໂລກນາຍກໍ.

໔໒໕. ‘‘ສຕິໍ ປຏິລຠິຕ຺ວານ, ປຓ຺ຓມຸຏ຺ຐິມທາສຫໍ;

ນິສີທິ ຠຄວາ ຕຕ຺ຖ, ອນຸກມ຺ປາຍ ຈກ຺ຂຸມາ.

໔໒໖. ‘‘ນິສຊ຺ຊ ຕຕ຺ຖ ຠຄວາ, ສຸເມໂຘ ໂລກນາຍໂກ;

ຘມ຺ມໍ ເມ ກຖຍີ ພຸທ຺ໂຘ, ໂສກສລ຺ລວິໂນທນໍ.

໔໒໗. ‘‘‘ອນວ຺ຫິຕາ ຕໂຕ ອາຄຸໍ, ອນນຸຎ຺ຎາຕາ ອິໂຕ ຄຕາ;

ຍຖາຄຕາ ຕຖາ ຄຕາ, ຕຕ຺ຖ ກາ ປຣິເທວນາ.

໔໒໘. ‘‘‘ຍຖາປິ ປຖິກາ ສຕ຺ຕາ, ວສ຺ສມານາຍ ວຸຏ຺ຐິຍາ;

ສຠຓ຺ຑາ ອຸປຄຈ຺ຉນ຺ຕິ, ວສ຺ສສ຺ສາປຕນາຍ ເຕ.

໔໒໙. ‘‘‘ວສ຺ເສ ຈ ເຕ ໂອຣມິເຕ, ສມ຺ປຍນ຺ຕິ ຍທິຈ຺ຉກໍ;

ເອວໍ ມາຕາ ປິຕາ ຕຸຍ຺ຫໍ, ຕຕ຺ຖ ກາ ປຣິເທວນາ.

໔໓໐. ‘‘‘ອາຄນ຺ຕຸກາ ປາຫຸນກາ, ຈລິເຕຣິຕກມ຺ປິຕາ;

ເອວໍ ມາຕາ ປິຕາ ຕຸຍ຺ຫໍ, ຕຕ຺ຖ ກາ ປຣິເທວນາ.

໔໓໑. ‘‘‘ຍຖາປິ ອຸຣໂຄ ຊິຓ຺ຓໍ, ຫິຕ຺ວາ ຄຈ຺ຉຕິ ສໍ ຕຈໍ [ສໍຕນຸໍ (ສ຺ຍາ. ກ.)];

ເອວໍ ມາຕາ ປິຕາ ຕຸຍ຺ຫໍ, ສໍ ຕນຸໍ ອິຘ ຫີຍເຣ’.

໔໓໒. ‘‘ພຸທ຺ຘສ຺ສ ຄິຣມຎ຺ຎາຍ, ໂສກສລ຺ລໍ ວິວຊ຺ຊຍິໍ;

ປາໂມຊ຺ຊໍ ຊນຍິຕ຺ວານ, ພຸທ຺ຘເສຏ຺ຐໍ ອວນ຺ທຫໍ.

໔໓໓. ‘‘ວນ຺ທິຕ຺ວານ ມຫານາຄໍ, ປູຊຍິໍ ຄິຣິມຎ຺ຊຣິໍ [ຄິຣິມຎ຺ຊຣິມປູຊຍິໍ (ສີ. ສ຺ຍາ.)];

ທິພ຺ພຄນ຺ຘໍ ສມ຺ປວນ຺ຕໍ [ທິພ຺ພຄນ຺ເຘນ ສມ຺ປນ຺ນໍ (ສີ. ສ຺ຍາ.)], ສຸເມຘໍ ໂລກນາຍກໍ.

໔໓໔. ‘‘ປູຊຍິຕ຺ວານ ສມ຺ພຸທ຺ຘໍ, ສິເຣ ກຕ຺ວານ ອຎ຺ຊລິໍ;

ອນຸສ຺ສຣໍ ຄຸຓຄ຺ຄານິ, ສນ຺ຖວິໍ ໂລກນາຍກໍ.

໔໓໕. ‘‘ນິຕ຺ຕິຓ຺ໂຓສິ [ນິຕ຺ຕຓ຺ໂຫສິ (ສີ.), ວິຕິຓ຺ໂຓສິ (ສ຺ຍາ.)] ມຫາວີຣ, ສພ຺ພຎ຺ຎຸ ໂລກນາຍກ;

ສພ຺ເພ ສຕ຺ເຕ ອຸທ຺ຘຣສິ, ຎາເຓນ ຕ຺ວໍ ມຫາມຸເນ.

໔໓໖. ‘‘ວິມຕິໍ ທ຺ເວຬ຺ຫກໍ ວາປິ, ສຎ຺ຉິນ຺ທສິ ມຫາມຸເນ;

ປຏິປາເທສິ ເມ ມຄ຺ຄໍ, ຕວ ຎາເຓນ ຈກ຺ຂຸມ.

໔໓໗. ‘‘ອຣຫາ ວສິປຕ຺ຕາ [ສິທ຺ຘິປຕ຺ຕາ (ສີ. ສ຺ຍາ.)] ຈ, ຉຬຠິຎ຺ຎາ ມຫິທ຺ຘິກາ;

ອນ຺ຕລິກ຺ຂຈຣາ ຘີຣາ, ປຣິວາເຣນ຺ຕິ ຕາວເທ.

໔໓໘. ‘‘ປຏິປນ຺ນາ ຈ ເສຂາ ຈ, ຜລຏ຺ຐາ ສນ຺ຕິ ສາວກາ;

ສູໂຣທເຍວ ປທຸມາ, ປຸປ຺ຜນ຺ຕິ ຕວ ສາວກາ.

໔໓໙. ‘‘ມຫາສມຸທ຺ໂທວກ຺ໂຂໂຠ, ອຕຸໂລປິ [ຍຖາ ສມຸທ຺ໂທ ອກ຺ໂຂໂຠ, ອຕຸໂລ ຈ (ສີ.)] ທຸຣຸຕ຺ຕໂຣ;

ເອວໍ ຎາເຓນ ສມ຺ປນ຺ໂນ, ອປ຺ປເມຍ຺ໂຍສິ ຈກ຺ຂຸມ.

໔໔໐. ‘‘ວນ຺ທິຕ຺ວາຫໍ ໂລກຊິນໍ, ຈກ຺ຂຸມນ຺ຕໍ ມຫາຍສໍ;

ປຸຖຸ ທິສາ ນມສ຺ສນ຺ໂຕ, ປຏິກຸຏິໂກ ອຄຎ຺ຉຫໍ.

໔໔໑. ‘‘ເທວໂລກາ ຈວິຕ຺ວານ, ສມ຺ປຊາໂນ ປຕິສ຺ສໂຕ;

ໂອກ຺ກມິໍ ມາຕຸຍາ ກຸຈ຺ຉິໍ, ສນ຺ຘາວນ຺ໂຕ ຠວາຠເວ.

໔໔໒. ‘‘ອຄາຣາ ອຠິນິກ຺ຂມ຺ມ, ປພ຺ພຊິໍ ອນຄາຣິຍໍ;

ອາຕາປີ ນິປໂກ ຌາຍີ, ປຏິສລ຺ລານໂຄຈໂຣ.

໔໔໓. ‘‘ປຘານໍ ປທຫິຕ຺ວານ, ໂຕສຍິຕ຺ວາ ມຫາມຸນິໍ;

ຈນ຺ໂທວພ຺ຠຆນາ ມຸຕ຺ໂຕ, ວິຈຣາມິ ອຫໍ ສທາ.

໔໔໔. ‘‘ວິເວກມນຸຍຸຕ຺ໂຕມ຺ຫິ, ອຸປສນ຺ໂຕ ນິຣູປຘິ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໔໔໕. ‘‘ຕິໍສກປ຺ປສຫສ຺ສມ຺ຫິ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໔໔໖. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໔໔໗. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໔໘. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ຄິຣິມານນ຺ໂທ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ຄິຣິມານນ຺ທຕ຺ເຖຣສ຺ສາປທານໍ ສຕ຺ຕມໍ.