໔. ມຘຸທາຍກຕ຺ເຖຣອປທານໍ

໓໓໓. ‘‘ສິນ຺ຘຸຍາ ນທິຍາ ຕີເຣ, ສຸກໂຕ ອສ຺ສໂມ ມມ;

ຕຕ຺ຖ ວາເຈມຫໍ ສິສ຺ເສ, ອິຕິຫາສໍ ສລກ຺ຂຓໍ.

໓໓໔. ‘‘ຘມ຺ມກາມາ ວິນີຕາ ເຕ, ໂສຕຸກາມາ ສຸສາສນໍ;

ຉຬງ຺ເຄ ປາຣມິປ຺ປຕ຺ຕາ, ສິນ຺ຘຸກູເລ ວສນ຺ຕິ ເຕ.

໓໓໕. ‘‘ອຸປ຺ປາຕຄມເນ ເຈວ, ລກ຺ຂເຓສຸ ຈ ໂກວິທາ;

ອຸຕ຺ຕມຕ຺ຖໍ ຄເວສນ຺ຕາ, ວສນ຺ຕິ ວິປິເນ ຕທາ.

໓໓໖. ‘‘ສຸເມໂຘ ນາມ ສມ຺ພຸທ຺ໂຘ, ໂລເກ ອຸປ຺ປຊ຺ຊິ ຕາວເທ;

ອມ຺ຫາກໍ ອນຸກມ຺ປນ຺ໂຕ, ອຸປາຄຈ຺ຉິ ວິນາຍໂກ.

໓໓໗. ‘‘ອຸປາຄຕໍ ມຫາວີຣໍ, ສຸເມຘໍ ໂລກນາຍກໍ;

ຕິຓສນ຺ຖາຣກໍ ກຕ຺ວາ, ໂລກເຊຏ຺ຐສ຺ສທາສຫໍ.

໓໓໘. ‘‘ວິປິນາໂຕ ມຘຸໍ ຄຍ຺ຫ, ພຸທ຺ຘເສຏ຺ຐສ຺ສທາສຫໍ;

ສມ຺ພຸທ຺ໂຘ ປຣິຠຸຎ຺ຊິຕ຺ວາ, ອິທໍ ວຈນມພ຺ຣວິ.

໓໓໙. ‘‘‘ໂຍ ຕໍ ອທາສິ ມຘຸໍ ເມ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໔໐. ‘‘‘ອິມິນາ ມຘຸທາເນນ, ຕິຓສນ຺ຖາຣເກນ ຈ;

ຕິໍສ ກປ຺ປສຫສ຺ສານິ, ເທວໂລເກ ຣມິສ຺ສຕິ.

໓໔໑. ‘‘‘ຕິໍສ ກປ຺ປສຫສ຺ສມ຺ຫິ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໓໔໒. ‘‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

໓໔໓. ‘‘‘ເທວໂລກາ ອິຘາຄນ຺ຕ຺ວາ, ມາຕຸກຸຈ຺ຉິໍ ອຸປາຄເຕ;

ມຘຸວສ຺ສໍ ປວສ຺ສິຕ຺ຖ, ຉາທຍໍ ມຘຸນາ ມຫິໍ’.

໓໔໔. ‘‘ມຍິ ນິກ຺ຂນ຺ຕມຕ຺ຕມ຺ຫິ, ກຸຈ຺ຉິຍາ ຈ ສຸທຸຕ຺ຕຣາ;

ຕຕ຺ຣາປິ ມຘຸວສ຺ສໍ ເມ, ວສ຺ສເຕ ນິຈ຺ຈກາລິກໍ.

໓໔໕. ‘‘ອຄາຣາ ອຠິນິກ຺ຂມ຺ມ, ປພ຺ພຊິໍ ອນຄາຣິຍໍ;

ລາຠີ ອນ຺ນສ຺ສ ປານສ຺ສ, ມຘຸທານສ຺ສິທໍ ຜລໍ.

໓໔໖. ‘‘ສພ຺ພກາມສມິທ຺ໂຘຫໍ, ຠວິຕ຺ວາ ເທວມານຸເສ;

ເຕເນວ ມຘຸທາເນນ, ປຕ຺ໂຕມ຺ຫິ ອາສວກ຺ຂຍໍ.

໓໔໗. ‘‘ວຸຏ຺ຐມ຺ຫິ ເທເວ ຈຕຸຣງ຺ຄຸເລ ຕິເຓ, ສມ຺ປຸປ຺ຜິເຕ [ສຸປຸປ຺ຜິເຕ (ສ຺ຍາ.)] ຘຣຓີຣຸເຫ ສຎ຺ຉນ຺ເນ [ວປ຺ປເທເສ (ສ຺ຍາ.)];

ສຸຎ຺ເຎ ຆເຣ ມຓ຺ຑປຣຸກ຺ຂມູລເກ, ວສາມິ ນິຈ຺ຈໍ ສຸຂິໂຕ ອນາສໂວ.

໓໔໘. ‘‘ມຊ຺ເຌ ມຫນ຺ເຕ ຫີເນ ຈ [ມຊ຺ເຌ ມຍ຺ຫໍ ຠວາ ອສ຺ສຸ (ສ຺ຍາ. ປີ. ກ.)], ຠເວ ສພ຺ເພ ອຕິກ຺ກມິໍ [ເຍ ຠເວ ສມຕິກ຺ກມິໍ (ສ຺ຍາ. ກ.), ໂຍ ຠເວສຸ ປກິຕ຺ຕຍິ (ກ.)];

ອຊ຺ຊ ເມ ອາສວາ ຂີຓາ, ນຕ຺ຖິ ທານິ ປຸນພ຺ຠໂວ.

໓໔໙. ‘‘ຕິໍສກປ຺ປສຫສ຺ສມ຺ຫິ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ມຘຸທານສ຺ສິທໍ ຜລໍ.

໓໕໐. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໓໕໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໕໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ມຘຸທາຍໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ມຘຸທາຍກຕ຺ເຖຣສ຺ສາປທານໍ ຈຕຸຕ຺ຖໍ.