໕. ປທຸມກູຏາຄາຣິຍຕ຺ເຖຣອປທານໍ

໓໕໓. ‘‘ປິຍທສ຺ສີ ນາມ ຠຄວາ, ສຍມ຺ຠູ ໂລກນາຍໂກ;

ວິເວກກາໂມ ສມ຺ພຸທ຺ໂຘ, ສມາຘິກຸສໂລ ມຸນິ.

໓໕໔. ‘‘ວນສຓ຺ຑໍ ສໂມຄຍ຺ຫ, ປິຍທສ຺ສີ ມຫາມຸນິ;

ປໍສຸກູລໍ ປຕ຺ຖຣິຕ຺ວາ, ນິສີທິ ປຸຣິສຸຕ຺ຕໂມ.

໓໕໕. ‘‘ມິຄລຸທ຺ໂທ ປຸເຣ ອາສິໍ, ອຣຎ຺ເຎ [ວິປິເນ (ສີ.), ອິຣິເນ (ສ຺ຍາ. ກ.)] ການເນ ອຫໍ;

ປສທໍ ມິຄເມສນ຺ໂຕ, ອາຫິຓ຺ຑາມິ ອຫໍ ຕທາ.

໓໕໖. ‘‘ຕຕ຺ຖທ຺ທສາສິໍ ສມ຺ພຸທ຺ຘໍ, ໂອຆຕິຓ຺ຓມນາສວໍ;

ປຸປ຺ຜິຕໍ ສາລຣາຊໍວ, ສຕຣໍສິໍວ ອຸຄ຺ຄຕໍ.

໓໕໗. ‘‘ທິສ຺ວານຫໍ ເທວເທວໍ, ປິຍທສ຺ສິໍ ມຫາຍສໍ;

ຊາຕສ຺ສຣໍ ສໂມຄຍ຺ຫ, ປທຸມໍ ອາຫຣິໍ ຕທາ.

໓໕໘. ‘‘ອາຫຣິຕ຺ວານ ປທຸມໍ, ສຕປຕ຺ຕໍ ມໂນຣມໍ;

ກູຏາຄາຣໍ ກຣິຕ຺ວານ, ຉາທຍິໍ ປທຸເມນຫໍ.

໓໕໙. ‘‘ອນຸກມ຺ປໂກ ກາຣຸຓິໂກ, ປິຍທສ຺ສີ ມຫາມຸນິ;

ສຕ຺ຕຣຕ຺ຕິນ຺ທິວໍ ພຸທ຺ໂຘ, ກູຏາຄາເຣ ວສີ ຊິໂນ.

໓໖໐. ‘‘ປຸຣາຓໍ ຉຑ຺ຑຍິຕ຺ວານ, ນເວນ ຉາທຍິໍ ອຫໍ;

ອຎ຺ຊລິໍ ປຄ຺ຄເຫຕ຺ວານ, ອຏ຺ຐາສິໍ ຕາວເທ ອຫໍ.

໓໖໑. ‘‘ວຸຏ຺ຐຫິຕ຺ວາ ສມາຘິມ຺ຫາ, ປິຍທສ຺ສີ ມຫາມຸນິ;

ທິສໍ ອນຸວິໂລເກນ຺ໂຕ, ນິສີທິ ໂລກນາຍໂກ.

໓໖໒. ‘‘ຕທາ ສຸທສ຺ສໂນ ນາມ, ອຸປຏ຺ຐາໂກ ມຫິທ຺ຘິໂກ;

ຈິຕ຺ຕມຎ຺ຎາຍ ພຸທ຺ຘສ຺ສ, ປິຍທສ຺ສິສ຺ສ ສຕ຺ຖຸໂນ.

໓໖໓. ‘‘ອສີຕິຍາ ສຫສ຺ເສຫິ, ຠິກ຺ຂູຫິ ປຣິວາຣິໂຕ;

ວນນ຺ເຕ ສຸຂມາສີນໍ, ອຸເປສິ ໂລກນາຍກໍ.

໓໖໔. ‘‘ຍາວຕາ ວນສຓ຺ຑມ຺ຫິ, ອຘິວຕ຺ຖາ ຈ ເທວຕາ;

ພຸທ຺ຘສ຺ສ ຈິຕ຺ຕມຎ຺ຎາຍ, ສພ຺ເພ ສນ຺ນິປຕຸໍ ຕທາ.

໓໖໕. ‘‘ສມາຄເຕສຸ ຍກ຺ເຂສຸ, ກຸມ຺ຠຓ຺ເຑ ສຫຣກ຺ຂເສ;

ຠິກ຺ຂຸສງ຺ເຆ ຈ ສມ຺ປຕ຺ເຕ, ຄາຖາ ປພ຺ຍາຫຣີ [ສພ຺ຍາຫຣີ (ສ຺ຍາ.), ມາພ຺ຍາຫຣີ (ສີ.)] ຊິໂນ.

໓໖໖. ‘‘‘ໂຍ ມໍ ສຕ຺ຕາຫໍ ປູເຊສິ, ອາວາສຎ຺ຈ ອກາສິ ເມ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໖໗. ‘‘‘ສຸທຸທ຺ທສໍ ສຸນິປຸຓໍ, ຄມ຺ຠີຣໍ ສຸປ຺ປກາສິຕໍ;

ຎາເຓນ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໖໘. ‘‘‘ຈຕຸທ຺ທສານິ ກປ຺ປານິ, ເທວຣຊ຺ຊໍ ກຣິສ຺ສຕິ;

ກູຏາຄາຣໍ ມຫນ຺ຕສ຺ສ [ພ຺ຣຫໍ ຕສ຺ສ (ສີ. ສ຺ຍາ.)], ປທ຺ມປຸປ຺ເຜຫິ ຉາທິຕໍ.

໓໖໙. ‘‘‘ອາກາເສ ຘາຣຍິສ຺ສຕິ, ປຸປ຺ຜກມ຺ມສ຺ສິທໍ [ປຸພ຺ພກມ຺ມສ຺ສິທໍ (ສ຺ຍາ.)] ຜລໍ;

ຈຕຸພ຺ພີເສ [ຈຕຸທ຺ທເສ (ສ຺ຍາ.)] ກປ຺ປສເຕ, ໂວກິຓ຺ຓໍ ສໍສຣິສ຺ສຕິ.

໓໗໐. ‘‘‘ຕຕ຺ຖ ປຸປ຺ຜມຍໍ ພ຺ຍມ຺ຫໍ, ອາກາເສ ຘາຣຍິສ຺ສຕິ;

ຍຖາ ປທຸມປຕ຺ຕມ຺ຫິ, ໂຕຍໍ ນ ອຸປລິມ຺ປຕິ.

໓໗໑. ‘‘‘ຕເຖວີມສ຺ສ ຎາຓມ຺ຫິ, ກິເລສາ ໂນປລິມ຺ປເຣ;

ມນສາ ວິນິວຏ຺ເຏຕ຺ວາ, ປຎ຺ຈ ນີວຣເຓ ອຍໍ.

໓໗໒. ‘‘‘ຈິຕ຺ຕໍ ຊເນຕ຺ວາ ເນກ຺ຂມ຺ເມ, ອຄາຣາ ປພ຺ພຊິສ຺ສຕິ;

ຕໂຕ ປຸປ຺ຜມເຍ ພ຺ຍມ຺ເຫ, ຘາເຣນ຺ເຕ [ປຸປ຺ຜມຍໍ ພ຺ຍມ຺ຫໍ, ຘາເຣນ຺ຕໍ (ສ຺ຍາ. ກ.)] ນິກ຺ຂມິສ຺ສຕິ.

໓໗໓. ‘‘‘ຣຸກ຺ຂມູເລ ວສນ຺ຕສ຺ສ, ນິປກສ຺ສ ສຕີມໂຕ;

ຕຕ຺ຖ ປຸປ຺ຜມຍໍ ພ຺ຍມ຺ຫໍ, ມຕ຺ຖເກ ຘາຣຍິສ຺ສຕິ.

໓໗໔. ‘‘‘ຈີວຣໍ ປິຓ຺ຑປາຕຎ຺ຈ, ປຈ຺ຈຍໍ ສຍນາສນໍ;

ທຕ຺ວານ ຠິກ຺ຂຸສງ຺ຆສ຺ສ, ນິພ຺ພາຍິສ຺ສຕິນາສໂວ’.

໓໗໕. ‘‘ກູຏາຄາເຣນ ຈຣຕາ [ຈຣຓາ (ສີ. ປີ. ກ.), ຈຣິເຕ (ສ຺ຍາ.)], ປພ຺ພຊ຺ຊໍ ອຠິນິກ຺ຂມິໍ;

ຣຸກ຺ຂມູເລ ວສນ຺ຕມ຺ປິ [ວສນ຺ຕມ຺ຫິ (ສີ.), ວສໂຕປິ (?)], ກູຏາຄາຣໍ ຘຣີຍຕິ.

໓໗໖. ‘‘ຈີວເຣ ປິຓ຺ຑປາເຕ ຈ, ເຈຕນາ ເມ ນ ວິຊ຺ຊຕິ;

ປຸຎ຺ຎກມ຺ເມນ ສໍຍຸຕ຺ໂຕ, ລຠາມິ ປຣິນິຏ຺ຐິຕໍ.

໓໗໗. ‘‘ຄຓນາໂຕ ອສງ຺ເຂຍ຺ຍາ, ກປ຺ປໂກຏີ ພຫູ ມມ;

ຣິຕ຺ຕກາ ເຕ ອຕິກ຺ກນ຺ຕາ, ປມຸຕ຺ຕາ ໂລກນາຍກາ.

໓໗໘. ‘‘ອຏ຺ຐາຣເສ ກປ຺ປສເຕ, ປິຍທສ຺ສີ ວິນາຍໂກ;

ຕມຫໍ ປຍິຣຸປາສິຕ຺ວາ, ອິມໍ ໂຍນິໍ ອຸປາຄໂຕ.

໓໗໙. ‘‘ອິຘ ປສ຺ສາມິ [ອິຘທ຺ທສາສິໍ (ສີ.)] ສມ຺ພຸທ຺ຘໍ, ອໂນມໍ ນາມ ຈກ຺ຂຸມໍ;

ຕມຫໍ ອຸປຄນ຺ຕ຺ວານ, ປພ຺ພຊິໍ ອນຄາຣິຍໍ.

໓໘໐. ‘‘ທຸກ຺ຂສ຺ສນ຺ຕກໂຣ ພຸທ຺ໂຘ, ມຄ຺ຄໍ ເມ ເທສຍີ ຊິໂນ;

ຕສ຺ສ ຘມ຺ມໍ ສຸຓິຕ຺ວານ, ປຕ຺ໂຕມ຺ຫິ ອຈລໍ ປທໍ.

໓໘໑. ‘‘ໂຕສຍິຕ຺ວານ ສມ຺ພຸທ຺ຘໍ, ໂຄຕມໍ ສກ຺ຍປຸງ຺ຄວໍ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໓໘໒. ‘‘ອຏ຺ຐາຣເສ ກປ຺ປສເຕ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

໓໘໓. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໓໘໔. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໘໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ປທຸມກູຏາຄາຣິໂຍ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ປທຸມກູຏາຄາຣິຍຕ຺ເຖຣສ຺ສາປທານໍ ປຎ຺ຈມໍ.