໓. ສພ຺ພກິຕ຺ຕິກຕ຺ເຖຣອປທານໍ

໓໐໔. ‘‘ກຓິກາຣໍວ ຊລິຕໍ [ໂຊຕນ຺ຕໍ (ສີ.)], ທີປຣຸກ຺ຂໍວ ອຸຊ຺ຊລໍ [ໂຊຕິຕໍ (ສ຺ຍາ.)];

ໂອສຘິໍວ ວິໂຣຈນ຺ຕໍ, ວິຊ຺ຊຸຕໍ ຄຄເນ ຍຖາ.

໓໐໕. ‘‘ອສມ຺ຠີຕໍ ອນຸຕ຺ຕາສິໍ, ມິຄຣາຊໍວ ເກສຣິໍ;

ຎາຓາໂລກໍ ປກາເສນ຺ຕໍ, ມທ຺ທນ຺ຕໍ ຕິຕ຺ຖິເຍ ຄເຓ.

໓໐໖. ‘‘ອຸທ຺ຘຣນ຺ຕໍ ອິມໍ ໂລກໍ, ຉິທ຺ທນ຺ຕໍ ສພ຺ພສໍສຍໍ;

ຄຊ຺ຊນ຺ຕໍ [ອສມ຺ຠີຕໍ (ສ຺ຍາ.), ຄຈ຺ຉນ຺ຕໍ (ກ.)] ມິຄຣາຊໍວ, ອທ຺ທສໍ ໂລກນາຍກໍ.

໓໐໗. ‘‘ຊຏາຊິນຘໂຣ ອາສິໍ, ພ຺ຣຫາ ອຸຊຸ ປຕາປວາ;

ວາກຈີຣໍ ຄເຫຕ຺ວານ, ປາທມູເລ ອປຕ຺ຖຣິໍ.

໓໐໘. ‘‘ກາຬານຸສາຣິຍໍ ຄຍ຺ຫ, ອນຸລິມ຺ປິໍ ຕຖາຄຕໍ;

ສມ຺ພຸທ຺ຘມນຸລິມ຺ເປຕ຺ວາ, ສນ຺ຖວິໍ ໂລກນາຍກໍ.

໓໐໙. ‘‘ສມຸທ຺ຘຣສິມໍ ໂລກໍ, ໂອຆຕິຓ຺ຓ [ໂອຆຕິຓ຺ໂຓ (ສ຺ຍາ. ກ.)] ມຫາມຸນິ;

ຎາຓາໂລເກນ ໂຊເຕສິ, ນາວຏໍ [ປວຣໍ (ສ຺ຍາ.), ວຊິຣ (ປີ.)] ຎາຓມຸຕ຺ຕມໍ.

໓໑໐. ‘‘ຘມ຺ມຈກ຺ກໍ [ຕຸວໍ ຈກ຺ກໍ (ກ.)] ປວຕ຺ເຕສິ, ມທ຺ທເສ ປຣຕິຕ຺ຖິເຍ;

ອຸສໂຠ ຊິຕສງ຺ຄາໂມ, ສມ຺ປກມ຺ເປສິ ເມທນິໍ.

໓໑໑. ‘‘ມຫາສມຸທ຺ເທ ອູມິໂຍ, ເວລນ຺ຕມ຺ຫິ ປຠິຊ຺ຊເຣ;

ຕເຖວ ຕວ ຎາຓມ຺ຫິ, ສພ຺ພທິຏ຺ຐີ ປຠິຊ຺ຊເຣ.

໓໑໒. ‘‘ສຸຂຸມຈ຺ຉິກຊາເລນ, ສຣມ຺ຫິ ສມ຺ປຕານິເຕ;

ອນ຺ໂຕຊາລິກຕາ [ຊາລຄຕາ (ສີ.)] ປາຓາ, ປີຬິຕາ ໂຫນ຺ຕິ ຕາວເທ.

໓໑໓. ‘‘ຕເຖວ ຕິຕ຺ຖິຍາ ໂລເກ, ປຸຖຸປາສຓ຺ຑນິສ຺ສິຕາ [ມູຬ຺ຫາ ສຈ຺ຈວິນິສ຺ສຏາ (ສ຺ຍາ.), ມຸຏ຺ຐສຈ຺ຈວິນິສ຺ສຏາ (ກ.)];

ອນ຺ໂຕຎາຓວເຣ ຕຸຍ຺ຫໍ, ປຣິວຕ຺ຕນ຺ຕິ ມາຣິສ.

໓໑໔. ‘‘ປຕິຏ຺ຐາ ວຸຍ຺ຫຕໍ ໂອເຆ, ຕ຺ວຎ຺ຫິ ນາໂຖ ອພນ຺ຘຸນໍ;

ຠຍຏ຺ຏິຕານໍ ສຣຓໍ, ມຸຕ຺ຕິຕ຺ຖີນໍ ປຣາຍຓໍ.

໓໑໕. ‘‘ເອກວີໂຣ ອສທິໂສ, ເມຕ຺ຕາກຣຸຓສຎ຺ຈໂຍ [ສຎ຺ຎຸໂຕ (ສ຺ຍາ.)];

ອສໂມ ສຸສໂມ ສນ຺ໂຕ [ສຸສີໂລ ອສໂມ ສນ຺ໂຕ (ສີ.), ປຎ຺ຎວາ ຍຸຕ຺ຕຈາໂຄ ຈ (ສ຺ຍາ.)], ວສີ ຕາທີ ຊິຕຎ຺ຊໂຍ.

໓໑໖. ‘‘ຘີໂຣ ວິຄຕສມ຺ໂມໂຫ, ອເນໂຊ ອກຖໍກຖີ;

ຕຸສິໂຕ [ວຸສິໂຕ (ສີ.)] ວນ຺ຕໂທໂສສິ, ນິມ຺ມໂລ ສໍຍໂຕ ສຸຈິ.

໓໑໗. ‘‘ສງ຺ຄາຕິໂຄ ຫຕມໂທ [ຄຕມໂທ (ສ຺ຍາ.), ຕມນຸໂທ (ກ.)], ເຕວິຊ຺ໂຊ ຕິຠວນ຺ຕໂຄ;

ສີມາຕິໂຄ ຘມ຺ມຄຣຸ, ຄຕຕ຺ໂຖ ຫິຕວພ຺ຠຸໂຕ [ຫິຕວປ຺ປໂຖ (ສີ. ສ຺ຍາ.)].

໓໑໘. ‘‘ຕາຣໂກ ຕ຺ວໍ ຍຖາ ນາວາ, ນິຘີວສ຺ສາສກາຣໂກ;

ອສມ຺ຠີໂຕ ຍຖາ ສີໂຫ, ຄຊຣາຊາວ ທປ຺ປິໂຕ.

໓໑໙. ‘‘ໂຖເມຕ຺ວາ ທສຄາຖາຫິ, ປທຸມຸຕ຺ຕຣໍ ມຫາຍສໍ;

ວນ຺ທິຕ຺ວາ ສຕ຺ຖຸໂນ ປາເທ, ຕຸຓ຺ຫີ ອຏ຺ຐາສຫໍ ຕທາ.

໓໒໐. ‘‘ປທຸມຸຕ຺ຕໂຣ ໂລກວິທູ, ອາຫຸຕີນໍ ປຏິຄ຺ຄໂຫ;

ຠິກ຺ຂຸສງ຺ເຆ ຐິໂຕ ສຕ຺ຖາ, ອິມາ ຄາຖາ ອຠາສຖ.

໓໒໑. ‘‘‘ໂຍ ເມ ສີລຎ຺ຈ ຎາຓຎ຺ຈ, ສທ຺ຘມ຺ມຎ຺ຈາປິ ວຓ຺ຓຍິ [ຘມ຺ມຎ຺ຈາປິ ປກິຕ຺ຕຍິ (ສີ. ສ຺ຍາ.)];

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

໓໒໒. ‘‘‘ສຏ຺ຐິ ກປ຺ປສຫສ຺ສານິ, ເທວໂລເກ ຣມິສ຺ສຕິ;

ອຎ຺ເຎ ເທເວຠິຠວິຕ຺ວາ, ອິສ຺ສຣໍ ກາຣຍິສ຺ສຕິ.

໓໒໓. ‘‘‘ໂສ ປຈ຺ຉາ ປພ຺ພຊິຕ຺ວານ, ສຸກ຺ກມູເລນ ໂຈທິໂຕ;

ໂຄຕມສ຺ສ ຠຄວໂຕ, ສາສເນ ປພ຺ພຊິສ຺ສຕິ.

໓໒໔. ‘‘‘ປພ຺ພຊິຕ຺ວານ ກາເຍນ, ປາປກມ຺ມໍ ວິວຊ຺ຊິຍ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ’.

໓໒໕. ‘‘ຍຖາປິ ເມໂຆ ຖນຍໍ, ຕປ຺ເປຕິ ເມທິນິໍ ອິມໍ;

ຕເຖວ ຕ຺ວໍ ມຫາວີຣ, ຘມ຺ເມນ ຕປ຺ປຍີ ມມໍ.

໓໒໖. ‘‘ສີລໍ ປຎ຺ຎຎ຺ຈ ຘມ຺ມຎ຺ຈ, ຖວິຕ຺ວາ ໂລກນາຍກໍ;

ປຕ຺ໂຕມ຺ຫິ ປຣມໍ ສນ຺ຕິໍ, ນິພ຺ພານໍ ປທມຈ຺ຈຸຕໍ.

໓໒໗. ‘‘ອໂຫ ນູນ ສ ຠຄວາ, ຈິຣໍ ຕິຏ຺ເຐຍ຺ຍ ຈກ຺ຂຸມາ;

ອຎ຺ຎາຕຎ຺ຈ ວິຊາເນຍ຺ຍຸໍ, ຜຸເສຍ຺ຍຸໍ [ອຎ຺ຎາຕຎ຺ຈາປິ ຊາເນຍ຺ຍ, ປສ຺ເສຍ຺ຍ (ກ.)] ອມຕໍ ປທໍ.

໓໒໘. ‘‘ອຍໍ ເມ ປຈ຺ຉິມາ ຊາຕິ, ຠວາ ສພ຺ເພ ສມູຫຕາ;

ສພ຺ພາສເວ ປຣິຎ຺ຎາຍ, ວິຫຣາມິ ອນາສໂວ.

໓໒໙. ‘‘ສຕສຫສ຺ສິໂຕ ກປ຺ເປ, ຍໍ ພຸທ຺ຘມຠິໂຖມຍິໍ

ທຸຄ຺ຄຕິໍ ນາຠິຊານາມິ, ກິຕ຺ຕນາຍ ອິທໍ ຜລໍ.

໓໓໐. ‘‘ກິເລສາ ຌາປິຕາ ມຍ຺ຫໍ, ຠວາ ສພ຺ເພ ສມູຫຕາ;

ສພ຺ພາສວາ ປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໓໓໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໓໓໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອາຍສ຺ມາ ສພ຺ພກິຕ຺ຕິໂກ ເຖໂຣ ອິມາ ຄາຖາໂຍ ອຠາສິຕ຺ຖາຕິ.

ສພ຺ພກິຕ຺ຕິກຕ຺ເຖຣສ຺ສາປທານໍ ຕຕິຍໍ.