໒. ເສລຕ຺ເຖຣອປທານໍ

໒໐໘. ‘‘ນຄເຣ ຫໍສວຕິຍາ, ວີຖິສາມີ ອໂຫສຫໍ;

ມມ ຎາຕີ ສມາເນຕ຺ວາ, ອິທໍ ວຈນມພ຺ຣວິໍ.

໒໐໙. ‘‘‘ພຸທ຺ໂຘ ໂລເກ ສມຸປ຺ປນ຺ໂນ, ປຸຎ຺ຎກ຺ເຂຕ຺ໂຕ ອນຸຕ຺ຕໂຣ [ປຸຎ຺ຎກ຺ເຂຕ຺ຕໍ ອນຸຕ຺ຕຣໍ (ສີ.)];

ອາສິ ໂສ [ອາສີໂສ (ສີ.), ອາຘາໂຣ (ປີ.)] ສພ຺ພໂລກສ຺ສ, ອາຫຸຕີນໍ ປຏິຄ຺ຄໂຫ.

໒໑໐. ‘‘‘ຂຕ຺ຕິຍາ ເນຄມາ ເຈວ, ມຫາສາລາ ຈ ພ຺ຣາຫ຺ມຓາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໑. ‘‘‘ຫຕ຺ຖາໂຣຫາ ອນີກຏ຺ຐາ, ຣຖິກາ ປຕ຺ຕິກາຣກາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໒. ‘‘‘ອຸຄ຺ຄາ ຈ ຣາຊປຸຕ຺ຕາ ຈ, ເວສິຍານາ ຈ ພ຺ຣາຫ຺ມຓາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໓. ‘‘‘ອາຬາຣິກາ ກປ຺ປກາ [ອາຬາຣິກາ ຈ ສູທາ (ສ຺ຍາ.)] ຈ, ນ຺ຫາປກາ ມາລກາຣກາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໔. ‘‘‘ຣຊກາ ເປສກາຣາ ຈ, ຈມ຺ມກາຣາ ຈ ນ຺ຫາປິຕາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໕. ‘‘‘ອຸສຸກາຣາ ຠມກາຣາ, ຈມ຺ມກາຣາ ຈ ຕຈ຺ຉກາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໖. ‘‘‘ກມ຺ມາຣາ ໂສຓ຺ຓກາຣາ ຈ, ຕິປຸໂລຫກຣາ ຕຖາ;

ປສນ຺ນຈິຕ຺ຕາ ສຸມນາ, ປູຄຘມ຺ມໍ ອກໍສຸ ເຕ.

໒໑໗. ‘‘‘ຠຕກາ ເຈຏກາ ເຈວ, ທາສກມ຺ມກຣາ ພຫູ;

ຍຖາສເກນ ຖາເມນ, ປູຄຘມ຺ມໍ ອກໍສຸ ເຕ.

໒໑໘. ‘‘‘ອຸທຫາຣາ ກຏ຺ຐຫາຣາ, ກສ຺ສກາ ຕິຓຫາຣກາ;

ຍຖາສເກນ ຖາເມນ, ປູຄຘມ຺ມໍ ອກໍສຸ ເຕ.

໒໑໙. ‘‘‘ປຸປ຺ຜິກາ ມາລິກາ ເຈວ, ປຓ຺ຓິກາ ຜລຫາຣກາ;

ຍຖາສເກນ ຖາເມນ, ປູຄຘມ຺ມໍ ອກໍສຸ ເຕ.

໒໒໐. ‘‘‘ຄຓິກາ ກຸມ຺ຠທາສີ ຈ, ປູວິກາ [ສູປິກາ (ກ.)] ມຈ຺ຉິກາປິ ຈ;

ຍຖາສເກນ ຖາເມນ, ປູຄຘມ຺ມໍ ອກໍສຸ ເຕ.

໒໒໑. ‘‘‘ເອຖ ສພ຺ເພ ສມາຄນ຺ຕ຺ວາ, ຄຓໍ ພນ຺ຘາມ ເອກໂຕ;

ອຘິກາຣໍ ກຣິສ຺ສາມ, ປຸຎ຺ຎກ຺ເຂຕ຺ເຕ ອນຸຕ຺ຕເຣ’.

໒໒໒. ‘‘ເຕ ເມ ສຸຕ຺ວານ ວຈນໍ, ຄຓໍ ພນ຺ຘິໍສຸ ຕາວເທ;

ອຸປຏ຺ຐານສາລໍ ສຸກຕໍ, ຠິກ຺ຂຸສງ຺ຆສ຺ສ ກາຣຍຸໍ.

໒໒໓. ‘‘ນິຏ຺ຐາເປຕ຺ວານ ຕໍ ສາລໍ, ອຸທຄ຺ໂຄ ຕຸຏ຺ຐມານໂສ;

ປເຣໂຕ ເຕຫິ ສພ຺ເພຫິ, ສມ຺ພຸທ຺ຘມຸປສງ຺ກມິໍ.

໒໒໔. ‘‘ອຸປສງ຺ກມ຺ມ ສມ຺ພຸທ຺ຘໍ, ໂລກນາຖໍ ນຣາສຠໍ;

ວນ຺ທິຕ຺ວາ ສຕ຺ຖຸໂນ ປາເທ, ອິທໍ ວຈນມພ຺ຣວິໍ.

໒໒໕. ‘‘‘ອິເມ ຕີຓິ ສຕາ ວີຣ, ປຸຣິສາ ເອກໂຕ ຄຓາ;

ອຸປຏ຺ຐານສາລໍ ສຸກຕໍ, ນິຍ຺ຍາເທນ຺ຕິ [ນິຍ຺ຍາເຕນ຺ຕິ (ສີ.)] ຕຸວໍ [ຕວໍ (ສີ.), ຕວ (ສ຺ຍາ.)] ມຸນິ’.

໒໒໖. ‘‘ຠິກ຺ຂຸສງ຺ຆສ຺ສ ປຸຣໂຕ, ສມ຺ປຏິຈ຺ຉຕ຺ວ ຈກ຺ຂຸມາ;

ຕິຓ຺ຓໍ ສຕານໍ ປຸຣໂຕ, ອິມາ ຄາຖາ ອຠາສຖ.

໒໒໗. ‘‘‘ຕິສຕາປິ ຈ ເຊຏ຺ໂຐ ຈ, ອນຸວຕ຺ຕິໍສຸ ເອກໂຕ;

ສມ຺ປຕ຺ຕິຎ຺ຫິ [ສມ຺ປຕ຺ຕີຫິ (ສ຺ຍາ. ກ.)] ກຣິຕ຺ວານ, ສພ຺ເພ ອນຸຠວິສ຺ສຖ.

໒໒໘. ‘‘‘ປຈ຺ຉິເມ ຠເວ ສມ຺ປຕ຺ເຕ, ສີຕິຠາວມນຸຕ຺ຕຣໍ;

ອຊຣໍ ອມຕໍ ສນ຺ຕໍ, ນິພ຺ພານໍ ຜສ຺ສຍິສ຺ສຖ’.

໒໒໙. ‘‘ເອວໍ ພຸທ຺ໂຘ ວິຍາກາສິ, ສພ຺ພຎ຺ຎູ ສມຓຸຕ຺ຕໂຣ;

ພຸທ຺ຘສ຺ສ ວຈນໍ ສຸຕ຺ວາ, ໂສມນສ຺ສໍ ປເວທຍິໍ.

໒໓໐. ‘‘ຕິໍສ ກປ຺ປສຫສ຺ສານິ, ເທວໂລເກ ຣມິໍ ອຫໍ;

ເທວາຘິໂປ ປຎ຺ຈສຕໍ, ເທວຣຊ຺ຊມກາຣຍິໍ.

໒໓໑. ‘‘ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ອໂຫສຫໍ;

ເທວຣຊ຺ຊໍ ກໂຣນ຺ຕສ຺ສ, ມຫາເທວາ ອວນ຺ທິສຸໍ.

໒໓໒. ‘‘ອິຘ ມານຸສເກ ຣຊ຺ຊໍ [ຣຊ຺ເຊ (ສີ.)], ປຣິສາ ໂຫນ຺ຕິ ພນ຺ຘວາ;

ປຈ຺ຉິເມ ຠເວ ສມ຺ປຕ຺ເຕ, ວາເສຏ຺ໂຐ ນາມ ພ຺ຣາຫ຺ມໂຓ.

໒໓໓. ‘‘ອສີຕິໂກຏິ ນິຈໂຍ, ຕສ຺ສ ປຸຕ຺ໂຕ ອໂຫສຫໍ;

ເສໂລ ອິຕິ ມມ ນາມໍ, ຉຬງ຺ເຄ ປາຣມິໍ ຄໂຕ.

໒໓໔. ‘‘ຊງ຺ຆາວິຫາຣໍ ວິຈຣໍ, ສສິສ຺ເສຫິ ປຸຣກ຺ຂໂຕ;

ຊຏາຠາຣິກຠຣິຕໍ, ເກຓິຍໍ ນາມ ຕາປສໍ.

໒໓໕. ‘‘ປຏິຍຕ຺ຕາຫຸຕິໍ ທິສ຺ວາ, ອິທໍ ວຈນມພ຺ຣວິໍ;

‘ອາວາໂຫ ວາ ວິວາໂຫ ວາ, ຣາຊາ ວາ ເຕ ນິມນ຺ຕິໂຕ’.

໒໓໖. ‘‘ອາຫຸຕິໍ [ນາຫຸຕິໍ (?)] ຍິຏ຺ຐຸກາໂມຫໍ, ພ຺ຣາຫ຺ມເຓ ເທວສມ຺ມເຕ;

ນ ນິມນ຺ເຕມິ ຣາຊານໍ, ອາຫຸຕີ ເມ ນ ວິຊ຺ຊຕິ.

໒໓໗. ‘‘ນ ຈຕ຺ຖິ ມຍ຺ຫມາວາໂຫ, ວິວາໂຫ ເມ ນ ວິຊ຺ຊຕິ;

ສກ຺ຍານໍ ນນ຺ທິຊນໂນ, ເສຏ຺ໂຐ ໂລເກ ສເທວເກ.

໒໓໘. ‘‘ສພ຺ພໂລກຫິຕຕ຺ຖາຍ, ສພ຺ພສຕ຺ຕສຸຂາວໂຫ;

ໂສ ເມ ນິມນ຺ຕິໂຕ ອຊ຺ຊ, ຕສ຺ເສຕໍ ປຏິຍາທນໍ.

໒໓໙. ‘‘ຕິມ຺ພຣູສກວຓ຺ຓາໂຠ, ອປ຺ປເມຍ຺ໂຍ ອນູປໂມ;

ຣູເປນາສທິໂສ ພຸທ຺ໂຘ, ສ຺ວາຕນາຍ ນິມນ຺ຕິໂຕ.

໒໔໐. ‘‘ອຸກ຺ກາມຸຂປຫຏ຺ໂຐວ, ຂທິຣງ຺ຄາຣສນ຺ນິໂຠ;

ວິຊ຺ຊູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໑. ‘‘ປພ຺ພຕຄ຺ເຄ ຍຖາ ອຈ຺ຈິ, ປຸຓ຺ຓມາເຍວ ຈນ຺ທິມາ;

ນຬຄ຺ຄິວຓ຺ຓສງ຺ກາໂສ, ໂສ ເມ ພຸທ຺ໂຘ ນິມນ຺ຕິໂຕ.

໒໔໒. ‘‘ອສມ຺ຠີໂຕ ຠຍາຕີໂຕ, ຠວນ຺ຕກຣໂຓ ມຸນິ;

ສີຫູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໓. ‘‘ກຸສໂລ ພຸທ຺ຘຘມ຺ເມຫິ, ອປສຍ຺ໂຫ ປເຣຫິ ໂສ;

ນາຄູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໔. ‘‘ສທ຺ຘມ຺ມາຈາຣກຸສໂລ, ພຸທ຺ຘນາໂຄ ອສາທິໂສ;

ອຸສຠູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໕. ‘‘ອນນ຺ຕວຓ຺ໂຓ ອມິຕຍໂສ, ວິຈິຕ຺ຕສພ຺ພລກ຺ຂໂຓ;

ສກ຺ກູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໖. ‘‘ວສີ ຄຓີ ປຕາປີ ຈ, ເຕຊສ຺ສີ ຈ ທຸຣາສໂທ;

ພ຺ຣຫ຺ມູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໗. ‘‘ປຕ຺ຕຘມ຺ໂມ ທສພໂລ, ພລາຕິພລປາຣໂຄ;

ຘຣຓູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໘. ‘‘ສີລວີຈິສມາກິຓ຺ໂຓ, ຘມ຺ມວິຎ຺ຎາຓໂຂຠິໂຕ;

ອຸທຘູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໔໙. ‘‘ທຸຣາສໂທ ທຸປ຺ປສໂຫ, ອຈໂລ ອຸຄ຺ຄໂຕ ພ຺ຣຫາ;

ເນຣູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໐. ‘‘ອນນ຺ຕຎາໂຓ ອສມສໂມ, ອຕຸໂລ ອຄ຺ຄຕໍ ຄໂຕ;

ຄຄນູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

ປນ຺ນຣສມໍ ຠາຓວາຣໍ.

໒໕໑. ‘‘ປຕິຏ຺ຐາ ຠຍຠີຕານໍ, ຕາໂຓ ສຣຓຄາມິນໍ;

ອສ຺ສາສໂກ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໒. ‘‘ອາສໂຍ ພຸທ຺ຘິມນ຺ຕານໍ, ປຸຎ຺ຎກ຺ເຂຕ຺ຕໍ ສຸເຂສິນໍ;

ຣຕນາກໂຣ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໓. ‘‘ອສ຺ສາສໂກ ເວທກໂຣ, ສາມຎ຺ຎຜລທາຍໂກ;

ເມຆູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໔. ‘‘ໂລກຈກ຺ຂຸ ມຫາເຕໂຊ, ສພ຺ພຕມວິໂນທໂນ;

ສູຣິຍູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໕. ‘‘ອາຣມ຺ມຓວິມຸຕ຺ຕີສຸ, ສຠາວທສ຺ສໂນ ມຸນິ;

ຈນ຺ທູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໖. ‘‘ພຸທ຺ໂຘ ສມຸສ຺ສິໂຕ ໂລເກ, ລກ຺ຂເຓຫິ ອລງ຺ກໂຕ;

ອປ຺ປເມຍ຺ໂຍ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໕໗. ‘‘ຍສ຺ສ ຎາຓໍ ອປ຺ປເມຍ຺ຍໍ, ສີລໍ ຍສ຺ສ ອນູປມໍ;

ວິມຸຕ຺ຕິ ອສທິສາ ຍສ຺ສ, ໂສ ເມ ພຸທ຺ໂຘ ນິມນ຺ຕິໂຕ.

໒໕໘. ‘‘ຍສ຺ສ ຘີຕິ ອສທິສາ, ຖາໂມ ຍສ຺ສ ອຈິນ຺ຕິໂຍ;

ຍສ຺ສ ປຣກ຺ກໂມ ເຊຏ຺ໂຐ, ໂສ ເມ ພຸທ຺ໂຘ ນິມນ຺ຕິໂຕ.

໒໕໙. ‘‘ຣາໂຄ ໂທໂສ ຈ ໂມໂຫ ຈ, ວິສາ ສພ຺ເພ ສມູຫຕາ;

ອຄທູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໖໐. ‘‘ກ຺ເລສພ຺ຍາຘິພຫຸທຸກ຺ຂ ສພ຺ພຕມວິໂນທໂນ [ວິໂນທໂກ (ສີ. ສ຺ຍາ.)];

ເວຊ຺ຊູປໂມ ມຫາວີໂຣ, ໂສ ເມ ພຸທ຺ໂຘ ນິມນ຺ຕິໂຕ.

໒໖໑. ‘‘ພຸທ຺ໂຘຕິ ໂຠ ຍໍ ວເທສິ, ໂຆໂສເປໂສ ສຸທຸລ຺ລໂຠ;

ພຸທ຺ໂຘ ພຸທ຺ໂຘຕິ ສຸຕ຺ວານ, ປີຕິ ເມ ອຸທປຊ຺ຊຖ.

໒໖໒. ‘‘ອພ຺ຠນ຺ຕຣໍ ອຄຓ຺ຫນ຺ຕໍ, ປີຕິ ເມ ພຫິ ນິຈ຺ຉເຣ;

ໂສຫໍ ປີຕິມໂນ ສນ຺ໂຕ, ອິທໍ ວຈນມພ຺ຣວິໍ.

໒໖໓. ‘‘‘ກຫໍ ນຸ ໂຂ ໂສ ຠຄວາ, ໂລກເຊຏ຺ໂຐ ນຣາສໂຠ;

ຕຕ຺ຖ ຄນ຺ຕ຺ວາ ນມສ຺ສິສ຺ສໍ, ສາມຎ຺ຎຜລທາຍກໍ’.

໒໖໔. ‘‘‘ປຄ຺ຄຍ຺ຫ ທກ຺ຂິຓໍ ພາຫຸໍ, ເວທຊາໂຕ ກຕຎ຺ຊລີ;

ອາຈິກ຺ຂິ ເມ ຘມ຺ມຣາຊໍ, ໂສກສລ຺ລວິໂນທນໍ.

໒໖໕. ‘‘‘ອຸເທນ຺ຕໍວ ມຫາເມຆໍ, ນີລໍ ອຎ຺ຊນສນ຺ນິຠໍ;

ສາຄຣໍ ວິຍ ທິສ຺ສນ຺ຕໍ, ປສ຺ສເສຕໍ ມຫາວນໍ.

໒໖໖. ‘‘‘ເອຕ຺ຖ ໂສ ວສເຕ ພຸທ຺ໂຘ, ອທນ຺ຕທມໂກ ມຸນິ;

ວິນຍນ຺ໂຕ ຈ ເວເນຍ຺ເຍ, ໂພເຘນ຺ໂຕ ໂພຘິປກ຺ຂິເຍ.

໒໖໗. ‘‘‘ປິປາສິໂຕວ ອຸທກໍ, ໂຠຊນໍວ ຊິຆຈ຺ຉິໂຕ;

ຄາວີ ຍຖາ ວຈ຺ຉຄິທ຺ຘາ, ເອວາຫໍ ວິຈິນິໍ ຊິນໍ.

໒໖໘. ‘‘‘ອາຈາຣອຸປຈາຣຎ຺ຎູ, ຘມ຺ມານຸຈ຺ຉວິສໍວຣໍ;

ສິກ຺ຂາເປມິ ສເກ ສິສ຺ເສ, ຄຈ຺ຉນ຺ເຕ ຊິນສນ຺ຕິກໍ.

໒໖໙. ‘‘‘ທຸຣາສທາ ຠຄວນ຺ໂຕ, ສີຫາວ ເອກຈາຣິໂນ;

ປເທ ປທໍ ນິກ຺ຂິປນ຺ຕາ, ອາຄຈ຺ເຉຍ຺ຍາຖ ມາຓວາ.

໒໗໐. ‘‘‘ອາສີວິໂສ ຍຖາ ໂຆໂຣ, ມິຄຣາຊາວ ເກສຣີ;

ມຕ຺ໂຕວ ກຸຎ຺ຊໂຣ ທນ຺ຕີ, ເອວໍ ພຸທ຺ຘາ ທຸຣາສທາ.

໒໗໑. ‘‘‘ອຸກ຺ກາສິຕຎ຺ຈ ຂິປິຕໍ, ອຊ຺ຌຸເປກ຺ຂິຍ ມາຓວາ;

ປເທ ປທໍ ນິກ຺ຂິປນ຺ຕາ, ອຸເປຖ ພຸທ຺ຘສນ຺ຕິກໍ.

໒໗໒. ‘‘‘ປຏິສລ຺ລານຄຣຸກາ, ອປ຺ປສທ຺ທາ ທຸຣາສທາ;

ທຸຣູປສງ຺ກມາ ພຸທ຺ຘາ, ຄຣູ ໂຫນ຺ຕິ ສເທວເກ.

໒໗໓. ‘‘‘ຍທາຫໍ ປຎ຺ຫໍ ປຸຈ຺ຉາມິ, ປຏິສມ຺ໂມທຍາມິ ວາ;

ອປ຺ປສທ຺ທາ ຕທາ ໂຫຖ, ມຸນິຠູຕາວ ຕິຏ຺ຐຖ.

໒໗໔. ‘‘‘ຍໍ ໂສ ເທເສຕິ ສມ຺ພຸທ຺ໂຘ [ສທ຺ຘມ຺ມໍ (ສີ. ສ຺ຍາ.)], ເຂມໍ ນິພ຺ພານປຕ຺ຕິຍາ;

ຕເມວຕ຺ຖໍ ນິສາເມຖ, ສທ຺ຘມ຺ມສວນໍ ສຸຂໍ’.

໒໗໕. ‘‘ອຸປສງ຺ກມ຺ມ ສມ຺ພຸທ຺ຘໍ, ສມ຺ໂມທິໍ ມຸນິນາ ອຫໍ;

ຕໍ ກຖໍ ວີຕິສາເຣຕ຺ວາ, ລກ຺ຂເຓ ອຸປຘາຣຍິໍ.

໒໗໖. ‘‘ລກ຺ຂເຓ ທ຺ເວ ຈ ກງ຺ຂາມິ, ປສ຺ສາມິ ຕິໍສລກ຺ຂເຓ;

ໂກໂສຫິຕວຕ຺ຖຄຸຍ຺ຫໍ, ອິທ຺ຘິຍາ ທສ຺ສຍີ ມຸນິ.

໒໗໗. ‘‘ຊິວ຺ຫໍ ນິນ຺ນາມຍິຕ຺ວານ, ກຓ຺ຓໂສເຕ ຈ ນາສິເກ;

ປຏິມສິ ນລາຏນ຺ຕໍ, ເກວລໍ ຉາທຍີ ຊິໂນ.

໒໗໘. ‘‘ຕສ຺ສາຫໍ ລກ຺ຂເຓ ທິສ຺ວາ, ປຣິປຸຓ຺ເຓ ສພ຺ຍຎ຺ຊເນ;

ພຸທ຺ໂຘຕິ ນິຏ຺ຐໍ ຄນ຺ຕ຺ວານ, ສຫ ສິສ຺ເສຫິ ປພ຺ພຊິໍ.

໒໗໙. ‘‘ສເຕຫິ ຕີຫິ ສຫິໂຕ, ປພ຺ພຊິໍ ອນຄາຣິຍໍ;

ອທ຺ຘມາເສ ອສມ຺ປຕ຺ເຕ, ສພ຺ເພ ປຕ຺ຕາມ຺ຫ ນິພ຺ພຸຕິໍ.

໒໘໐. ‘‘ເອກໂຕ ກມ຺ມໍ ກຕ຺ວານ, ປຸຎ຺ຎກ຺ເຂຕ຺ເຕ ອນຸຕ຺ຕເຣ;

ເອກໂຕ ສໍສຣິຕ຺ວານ, ເອກໂຕ ວິນິວຕ຺ຕຍຸໍ.

໒໘໑. ‘‘ໂຄປານສິໂຍ ທຕ຺ວານ, ປູຄຘມ຺ເມ ວສິໍ ອຫໍ;

ເຕນ ກມ຺ເມນ ສຸກເຕນ, ອຏ຺ຐ ເຫຕູ ລຠາມຫໍ.