໓. ນິສ຺ສຄ຺ຄິຍກຓ຺ຑໍ (ຠິກ຺ຂຸນີວິຠງ຺ຄວຓ຺ຓນາ)
ປຐມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
ຕິໍສ ນິສ຺ສຄ຺ຄິຍາ ຘມ຺ມາ, ຠິກ຺ຂຸນີນໍ ປກາສິຕາ;
ເຍ ເຕສໍ ທານິ ຠວຕິ, ອຍໍ ສໍວຓ຺ຓນາກ຺ກໂມ.
໗໓໓. ອາມຕ຺ຕິກາປຓນ຺ຕິ ອມຕ຺ຕານິ ວຸຈ຺ຈນ຺ຕິ ຠາຊນານິ; ຕານິ ເຍ ວິກ຺ກິຓນ຺ຕິ, ເຕ ວຸຈ຺ຈນ຺ຕິ ອາມຕ຺ຕິກາ; ເຕສໍ ອາປໂຓ ອາມຕ຺ຕິກາປໂຓ; ຕໍ ວາ ປສາເຣສ຺ສນ຺ຕີຕິ ອຕ຺ໂຖ.
໗໓໔. ປຕ຺ຕສນ຺ນິຈຍໍ ກເຣຍ຺ຍາຕິ ປຕ຺ຕສນ຺ນິຘິໍ ກເຣຍ຺ຍ; ເອກາຫໍ ອນຘິຏ຺ຐຫິຕ຺ວາ ວາ ອວິກປ຺ເປຕ຺ວາ ວາ ປຕ຺ຕໍ ຐເປຍ຺ຍາຕິ ອຕ຺ໂຖ. ເສສໍ ມຫາວິຠງ຺ເຄ ວຸຕ຺ຕນເຍເນວ ເວທິຕພ຺ພໍ. ອຍເມວ ຫິ ວິເສໂສ – ຕຕ຺ຖ ທສາຫໍ ປຣິຫາໂຣ, ອິຘ ເອກາຫມ຺ປິ ນຕ຺ຖິ. ເສສໍ ຕາທິສເມວ.
ອິທມ຺ປິ ກຖິນສມຸຏ຺ຐານໍ – ກາຍວາຈໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ອກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.
ປຐມສິກ຺ຂາປທໍ.
ທຸຕິຍນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໓໘. ທຸຕິເຍ – ທຸຈ຺ໂຈຬາຕິ ວິຣູປໂຈຬາ; ຊິຓ຺ຓໂຈຬາຕິ ອຕ຺ໂຖ. ອປຍ຺ຍາຫີຕິ ອປິ ອຍ຺ຍາຫິ.
໗໔໐. ອາທິສ຺ສ ທິນ຺ນນ຺ຕິ ສມ຺ປຕ຺ຕາ ຠາເຊນ຺ຕູຕິ ວຕ຺ວາປິ ອິທໍ ຄຓສ຺ສ ອິທໍ ຕຸມ຺ຫາກໍ ທມ຺ມີຕິ ວຕ຺ວາ ວາ ທາຕຸກມ຺ຍຕາຍ ປາທມູເລ ຐເປຕ຺ວາ ວາ ທິນ຺ນມ຺ປິ ອາທິສ຺ສ ທິນ຺ນໍ ນາມ ໂຫຕິ. ເອຕໍ ສພ຺ພມ຺ປິ ອກາລຈີວຣໍ. ອຍ຺ຍາຍ ທມ຺ມີຕິ ເອວໍ ປຏິລທ຺ຘໍ ປນ ຍຖາທາເນເຍວ ອຸປເນຕພ຺ພໍ. ເສສໍ ອຸຕ຺ຕານເມວ.
ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.
ທຸຕິຍສິກ຺ຂາປທໍ.
ຕຕິຍນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໔໓-໕. ຕຕິເຍ – ຫນ຺ທາຕິ ຄຓ຺ຫ. ສຍໍ ອຈ຺ຉິນ຺ທຕີຕິ ເອກໍ ທຕ຺ວາ ເອກໍ ອຈ຺ຉິນ຺ທນ຺ຕິຍາ ເອກໍ ນິສ຺ສຄ຺ຄິຍໍ, ພຫູສຸ ພຫູນິ. ສເຈ ສໍຫຣິຕ຺ວາ ຐປິຕານິ ເອກໂຕ ອຈ຺ຉິນ຺ທຕິ, ວຕ຺ຖຸຄຓນາຍ ອາປຕ຺ຕິໂຍ. ພນ຺ຘິຕ຺ວາ ຐປິເຕສຸ ປນ ເອກາວ ອາປຕ຺ຕິ. ເສສໍ ອຸຕ຺ຕານເມວ.
ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທຸກ຺ຂເວທນນ຺ຕິ.
ຕຕິຍສິກ຺ຂາປທໍ.
ຈຕຸຕ຺ຖນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໔໘. ຈຕຸຕ຺ເຖ – ກເຍນາຕິ ມູເລນ. ນ ເມ ອາວຸໂສ ສປ຺ປິນາ ອຕ຺ໂຖ; ເຕເລນ ເມ ອຕ຺ໂຖຕິ ອິທໍ ກິຣ ສາ ອາຫຏສປ຺ປິໍ ທຕ຺ວາ ເຕລມ຺ປິ ອາຫຣິສ຺ສຕີຕິ ມຎ຺ຎມານາ ອາຫ. ວິຎ຺ຎາເປຕ຺ວາຕິ ຊານາເປຕ຺ວາ; ອິທໍ ນາມ ອາຫຣາຕິ ຍາຈິຕ຺ວາ ວາ.
໗໕໒. ຕຎ຺ເຎວ ວິຎ຺ຎາເປຕີຕິ ຍໍ ປຐມໍ ວິຎ຺ຎຕ຺ຕໍ ຕໍ ໂຖກໍ ນປ຺ປໂຫຕິ, ຕສ຺ມາ ປຸນ ຕຎ຺ເຎວ ວິຎ຺ຎາເປຕີຕິ ອຕ຺ໂຖ. ອຎ຺ຎຎ຺ຈ ວິຎ຺ຎາເປຕີຕິ ສເຈ ປຐມໍ ສປ຺ປິວິຎ຺ຎຕ຺ຕໍ, ຍມກໍ ປຈິຕພ຺ພນ຺ຕິ ຈ ເວຊ຺ເຊນ ວຸຕ຺ຕຕ຺ຕາ ເຕເລນ ອຕ຺ໂຖ ໂຫຕິ, ຕໂຕ ເຕເລນາປິ ເມ ອຕ຺ໂຖຕິ ເອວໍ ອຎ຺ຎຎ຺ຈ ວິຎ຺ຎາເປຕິ. ອານິສໍສໍ ທສ຺ເສຕ຺ວາຕິ ສເຈ ກຫາປຓສ຺ສ ສປ຺ປິ ອາຠຕໍ ໂຫຕິ, ອິມິນາ ມູເລນ ທິຄຸຓໍ ເຕລໍ ລພ຺ຠຕິ, ເຕນາປິ ຈ ອິທໍ ກິຈ຺ຈໍ ນິປ຺ຜຊ຺ຊຕິ, ຕສ຺ມາ ເຕລໍ ອາຫຣາຕິ ເອວໍ ອານິສໍສໍ ທສ຺ເສຕ຺ວາ ວິຎ຺ຎາເປຕີຕິ. ເສສໍ ອຸຕ຺ຕານເມວ.
ຉສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.
ຈຕຸຕ຺ຖສິກ຺ຂາປທໍ.
ປຎ຺ຈມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໕໓. ປຎ຺ຈເມ – ນ ເມ ສິກ຺ຂມາເນຕິ ອິທໍ ກິຣ ສາ ກຸລຘີຕາ ‘‘ອຍໍ ອທ຺ຘາ ເອວໍ ວຸຕ຺ຕາ ອິທໍ ເຕລໍ ຐເປຕ຺ວາ ສປ຺ປິມ຺ປິ ເມ ອຕ຺ຕໂນ ກຸລຆຣາ ອາຫຣິສ຺ສຕີ’’ຕິ ມຎ຺ຎມານາ ອາຫ. ເຈຕາເປຕ຺ວາຕິ ຊານາເປຕ຺ວາ ອິຈ຺ເຈວ ອຕ຺ໂຖ. ເສສໍ ສພ຺ພຕ຺ຖ ຈຕຸຕ຺ຖສທິສເມວາຕິ.
ປຎ຺ຈມສິກ຺ຂາປທໍ.
ຉຏ຺ຐນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໕໘. ຉຏ຺ເຐ – ຉນ຺ທກນ຺ຕິ ‘‘ອິທໍ ນາມ ຘມ຺ມກິຈ຺ຈໍ ກຣິສ຺ສາມ, ຍໍ ສກ຺ໂກຖ; ຕໍ ເທຖາ’’ຕິ ເອວໍ ປເຣສໍ ຉນ຺ທຎ຺ຈ ຣຸຈິຎ຺ຈ ອຸປ຺ປາເທຕ຺ວາ ຄຫິຕປຣິກ຺ຂາຣສ຺ເສຕໍ ອຘິວຈນໍ. ອຎ຺ຎທຕ຺ຖິເກນາຕິ ອຎ຺ຎສ຺ສຕ຺ຖາຍ ທິນ຺ເນນ. ອຎ຺ຎຸທ຺ທິສິເກນາຕິ ອຎ຺ຎໍ ອຸທ຺ທິສິຕ຺ວາ ທິນ຺ເນນ. ສງ຺ຆິເກນາຕິ ສງ຺ຆສ຺ສ ປຣິຈ຺ຈຕ຺ເຕນ.
໗໖໒. ເສສກໍ ອຸປເນຕີຕິ ຍທຕ຺ຖາຍ ທິນ຺ໂນ, ຕໍ ເຈຕາເປຕ຺ວາ ອວເສສໍ ອຎ຺ຎສ຺ສຕ຺ຖາຍ ອຸປເນຕິ. ສາມິເກ ອປໂລເກຕ຺ວາຕິ ‘‘ຕຸມ຺ເຫຫິ ຈີວຣຕ຺ຖາຍ ທິນ຺ໂນ, ອມ຺ຫາກຎ຺ຈ ຈີວຣໍ ອຕ຺ຖິ, ເຕລາທີຫິ ປນ ອຕ຺ໂຖ’’ຕິ ເອວໍ ອາປຸຈ຺ຉິຕ຺ວາ ອຸປເນຕິ. ອາປທາສູຕິ ຕຖາຣູເປສຸ ອຸປທ຺ທເວສຸ; ຠິກ຺ຂຸນິໂຍ ວິຫາຣໍ ຉຑ຺ເຑຕ຺ວາ ປກ຺ກມນ຺ຕິ, ເອວຣູປາສຸ ອາປທາສຸ ຍໍ ວາ ຕໍ ວາ ເຈຕາເປຕຸໍ ວຏ຺ຏຕິ. ເສສໍ ອຸຕ຺ຕານເມວ.
ຉສມຸຏ຺ຐານໍ – ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.
ຉຏ຺ຐສິກ຺ຂາປທໍ.
ສຕ຺ຕມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໖໔. ສຕ຺ຕເມ – ສຎ຺ຎາຈິເກນາຕິ ສຍໍ ຍາຈິຕເກນ. ເອຕເທເວຕ຺ຖ ນານາກຣຓໍ. ເສສໍ ຉຏ຺ຐສທິສເມວາຕິ.
ສຕ຺ຕມສິກ຺ຂາປທໍ.
ອຏ຺ຐມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໖໙. ອຏ຺ຐເມ – ມຫາຊນິເກນາຕິ ຄຓສ຺ສ ປຣິຈ຺ຈຕ຺ເຕນ. ເອຕເທເວຕ຺ຖ ນານາກຣຓໍ.
ອຏ຺ຐມສິກ຺ຂາປທໍ.
ນວມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໗໔. ນວມສິກ຺ຂາປເທ – ສຎ຺ຎາຈິເກນາຕິ ອິທໍ ປທໍ ອິໂຕ ອຘິກຕຣໍ.
ນວມສິກ຺ຂາປທໍ.
ທສມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໗໘. ທສເມ – ປຣິເວຓໍ ອຸນ຺ທ຺ຣິຍຕີຕິ ປຣິເວຓໍ ວິນສ຺ສຕິ; ປຣິປຕຕີຕິ ອຕ຺ໂຖ. ອິທຎ຺ຈ ປທໍ ປຸຄ຺ຄລິເກນ ສຎ຺ຎາຈິເກນາຕິ ອິທຎ຺ຈ ເອຕ຺ຕກເມວ ນານາກຣຓໍ. ເສສໍ ປຸພ຺ພສທິສເມວາຕິ.
ທສມສິກ຺ຂາປທໍ.
ເອກາທສມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໘໔. ເອກາທສເມ – ຄຣຸປາວຸຣຓນ຺ຕິ ສີຕກາເລ ປາວຸຣຓໍ. ຈຕຸກ຺ກໍສປຣມນ຺ຕິ ເອຕ຺ຖ ກໍໂສ ນາມ ຈຕຸກ຺ກຫາປຓິໂກ ໂຫຕິ; ຕສ຺ມາ ປທຠາຊເນ ‘‘ໂສຬສກຫາປຓຄ຺ຆນກ’’ນ຺ຕິ ວຸຕ຺ຕໍ.
ເອກາທສມສິກ຺ຂາປທໍ.
ທ຺ວາທສມນິສ຺ສຄ຺ຄິຍປາຈິຕ຺ຕິຍສິກ຺ຂາປທວຓ຺ຓນາ
໗໘໙. ທ຺ວາທສເມ – ລຫຸປາວຸຣຓນ຺ຕິ ອຸຓ຺ຫກາເລ ປາວຸຣຓໍ. ເສສໍ ສິກ຺ຂາປທທ຺ວເຍປິ ອຸຕ຺ຕານເມວ.
ຉສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.
ທ຺ວາທສມສິກ຺ຂາປທໍ.
ອຸທ຺ທິຏ຺ຐາ ໂຂ ອຍ຺ຍາໂຍ ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ຘມ຺ມາຕິ ເອຕ຺ຖ ມຫາວິຠງ຺ເຄ ຈີວຣວຄ຺ຄໂຕ ໂຘວນຎ຺ຈ ປຏິຄ຺ຄຫຓຎ຺ຈາຕິ ທ຺ເວ ສິກ຺ຂາປທານິ ອປເນຕ຺ວາ ອກາລຈີວຣໍ ກາລຈີວຣນ຺ຕິ ອຘິຏ຺ຐຫິຕ຺ວາ ຠາຊິຕສິກ຺ຂາປເທນ ຈ ປຣິວຕ຺ເຕຕ຺ວາ ອຈ຺ຉິນ຺ນຈີວເຣນ ຈ ປຐມວຄ຺ໂຄ ປູເຣຕພ຺ໂພ. ປຸນ ເອຬກໂລມວຄ຺ຄສ຺ສ ອາທິໂຕ ສຕ຺ຕ ສິກ຺ຂາປທານິ ອປເນຕ຺ວາ ສຕ຺ຕ ອຎ຺ຎທຕ຺ຖິການິ ປກ຺ຂິປິຕ຺ວາ ທຸຕິຍວຄ຺ໂຄ ປູເຣຕພ຺ໂພ. ຕຕິຍວຄ຺ຄໂຕ ປຐມປຕ຺ຕໍ ວສ຺ສິກສາຏິກໍ ອາຣຎ຺ຎກສິກ຺ຂາປທນ຺ຕິ ອິມານິ ຕີຓິ ອປເນຕ຺ວາ ປຕ຺ຕສນ຺ນິຈຍຄຣຸປາວຸຣຓລຫຸປາວຸຣຓສິກ຺ຂາປເທຫິ ຕຕິຍວຄ຺ໂຄ ປູເຣຕພ຺ໂພ. ອິຕິ ຠິກ຺ຂຸນີນໍ ທ຺ວາທສ ສິກ຺ຂາປທານິ ເອກໂຕປຎ຺ຎຕ຺ຕານິ, ອຏ຺ຐາຣສ ອຸຠໂຕປຎ຺ຎຕ຺ຕານີຕິ ເອວໍ ສພ຺ເພປິ ປາຕິໂມກ຺ຂຸທ຺ເທສມຄ຺ເຄນ ‘‘ອຸທ຺ທິຏ຺ຐາ ໂຂ ອຍ຺ຍາໂຍ ຕິໍສ ນິສ຺ສຄ຺ຄິຍາ ປາຈິຕ຺ຕິຍາ ຘມ຺ມາ’’ຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ເສສໍ ວຸຕ຺ຕນຍເມວາຕິ.
ສມນ຺ຕປາສາທິກາຍ ວິນຍສໍວຓ຺ຓນາຍ ຠິກ຺ຂຸນີວິຠງ຺ເຄ
ຕິໍສກວຓ຺ຓນາ ນິຏ຺ຐິຕາ.
ນິສ຺ສຄ຺ຄິຍກຓ຺ຑໍ ນິຏ຺ຐິຕໍ.