໔. ປາຈິຕ຺ຕິຍກຓ຺ຑໍ (ຠິກ຺ຂຸນີວິຠງ຺ຄວຓ຺ຓນາ)

໑. ລສຸຓວຄ຺ໂຄ

໑. ປຐມລສຸຓສິກ຺ຂາປທວຓ຺ຓນາ

ຕິໍສການນ຺ຕຣໍ ຘມ຺ມາ, ຉສຏ຺ຐິສຕສງ຺ຄຫາ;

ສງ຺ຄີຕາ ເຍ ອຍໍ ທານິ, ໂຫຕິ ເຕສມ຺ປິ ວຓ຺ຓນາ.

໗໙໓. ຕຕ຺ຖ ລສຸຓວຄ຺ຄສ຺ສ ຕາວ ປຐມສິກ຺ຂາປເທ – ທ຺ເວ ຕໂຍ ຠຓ຺ຑິເກຕິ ທ຺ເວ ວາ ຕໂຍ ວາ ໂປຏ຺ຏລິເກ; ສມ຺ປຸຓ຺ຓມິຎ຺ຊານເມຕໍ ອຘິວຈນໍ. ນ ມຕ຺ຕໍ ຊານິຕ຺ວາຕິ ປມາຓໍ ອຊານິຕ຺ວາ ເຂຕ຺ຕປາລສ຺ສ ວາເຣນ຺ຕສ຺ສ ພຫຸໍ ລສຸຓໍ ຫຣາເປສິ.

ອຎ຺ຎຕຣໍ ຫໍສໂຍນິນ຺ຕິ ສຸວຓ຺ຓຫໍສໂຍນິໍ. ໂສ ຕາສໍ ເອເກກນ຺ຕິ ໂສ ຫໍໂສ ຊາຕິສ຺ສໂຣ ອໂຫສິ, ອຖ ປຸພ຺ພສິເນເຫນ ອາຄນ຺ຕ຺ວາ ຕາສໍ ເອເກກໍ ປຕ຺ຕໍ ເທຕິ, ຕໍ ຕາປນຕາລນຈ຺ເຉທນກ຺ຂມໍ ສຸວຓ຺ຓເມວ ໂຫຕິ.

໗໙໕. ມາຄຘກນ຺ຕິ ມຄເຘສຸ ຊາຕໍ. ມຄຘຣຏ຺ເຐ ຊາຕລສຸຓເມວ ຫິ ອິຘ ລສຸຓນ຺ຕິ ອຘິປ຺ເປຕໍ, ຕມ຺ປິ ຠຓ຺ຑິກລສຸຓເມວ, ນ ເອກທ຺ວິຕິມິຎ຺ຊກໍ. ກຸຣຸນ຺ທິຍໍ ປນ ຊາຕເທສໍ ອວຕ຺ວາ ‘‘ມາຄຘກໍ ນາມ ຠຓ຺ຑິກລສຸຓ’’ນ຺ຕິ ວຸຕ຺ຕໍ. ອຊ຺ໂຌຫາເຣ ອຊ຺ໂຌຫາເຣຕິ ເອຕ຺ຖ ສເຈ ທ຺ເວ ຕໂຍ ຠຓ຺ຑິເກ ເອກໂຕເຍວ ສງ຺ຂາທິຕ຺ວາ ອຊ຺ໂຌຫຣຕິ, ເອກໍ ປາຈິຕ຺ຕິຍໍ. ຠິນ຺ທິຕ຺ວາ ເອເກກໍ ມິຎ຺ຊໍ ຂາທນ຺ຕິຍາ ປນ ປໂຍຄຄຓນາຍ ປາຈິຕ຺ຕິຍານີຕິ.

໗໙໗. ປລຓ຺ຑຸກາທີນໍ ວຓ຺ເຓນ ວາ ມິຎ຺ຊາຍ ວາ ນານຕ຺ຕໍ ເວທິຕພ຺ພໍ – ວຓ຺ເຓນ ຕາວ ປລຓ຺ຑຸໂກ ປຓ຺ຑຸວຓ຺ໂຓ ໂຫຕິ. ຠຎ຺ຊນໂກ ໂລຫິຕວຓ຺ໂຓ. ຫຣິຕໂກ ຫຣິຕປຓ຺ຓວຓ຺ໂຓ. ມິຎ຺ຊາຍ ປນ ປລຓ຺ຑຸກສ຺ສ ເອກາ ມິຎ຺ຊາ ໂຫຕິ, ຠຎ຺ຊນກສ຺ສ ທ຺ເວ, ຫຣິຕກສ຺ສ ຕິສ຺ໂສ. ຈາປລສຸໂຓ ອມິຎ຺ຊໂກ, ອງ຺ກຸຣມຕ຺ຕເມວ ຫິ ຕສ຺ສ ໂຫຕິ. ມຫາປຈ຺ຈຣິຍາທີສຸ ປນ ‘‘ປລຓ຺ຑຸກສ຺ສ ຕີຓິ ມິຎ຺ຊານິ, ຠຎ຺ຊນກສ຺ສ ທ຺ເວ, ຫຣິຕກສ຺ສ ເອກ’’ນ຺ຕິ ວຸຕ຺ຕໍ. ເອເຕ ປລຓ຺ຑຸກາທໂຍ ສຠາເວເນວ ວຏ຺ຏນ຺ຕິ. ສູປສມ຺ປາກາທີສຸ ປນ ມາຄຘກມ຺ປິ ວຏ຺ຏຕິ. ຕຎ຺ຫິ ປຈ຺ຈມາເນສຸ ມຸຄ຺ຄສູປາທີສຸ ວາ ມຈ຺ຉມໍສວິກຕິຍາ ວາ ເຕລາທີສຸ ວາ ພທຣສາຬວາທີສຸ ວາ ອມ຺ພິລສາກາທີສຸ ວາ ອຸຕ຺ຕຣິຠງ຺ເຄສຸ ວາ ຍຕ຺ຖ ກຕ຺ຖຈິ ອນ຺ຕມໂສ ຍາຄຸຠຕ຺ເຕປິ ປກ຺ຂິປິຕຸໍ ວຏ຺ຏຕິ. ເສສເມຕ຺ຖ ອຸຕ຺ຕານເມວ.

ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ລສຸຓສິກ຺ຂາປທໍ ປຐມໍ.

໒. ທຸຕິຍສິກ຺ຂາປທວຓ຺ຓນາ

໗໙໙. ທຸຕິເຍ – ສມ຺ພາເຘຕິ ປຏິຈ຺ຉນ຺ໂນກາເສ. ຕສ຺ສ ວິຠາຄທສ຺ສນຕ຺ຖໍ ປນ ‘‘ອຸໂຠ ອຸປກຈ຺ຉກາ ມຸຕ຺ຕກຣຓ’’ນ຺ຕິ ວຸຕ຺ຕໍ. ເອກມ຺ປິ ໂລມນ຺ຕິ ກຕ຺ຕຣິຍາ ວາ ສຓ຺ຑາສເກນ ວາ ຂຸເຣນ ວາ ເຍນ ເກນຈິ ເອກປໂຍເຄນ ວາ ນານາປໂຍເຄນ ວາ ເອກໍ ວາ ພຫູນິ ວາ ສໍຫຣາເປນ຺ຕິຍາ ປໂຍຄຄຓນາຍ ປາຈິຕ຺ຕິຍານິ, ນ ໂລມຄຓນາຍ.

໘໐໑. ອາພາຘປຈ຺ຈຍາຕິ ກຓ຺ຑຸກຈ຺ຉຸອາທິອາພາຘປຈ຺ຈຍາ ສໍຫຣາເປນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ. ຈຕຸສມຸຏ຺ຐານໍ – ກາຍໂຕ ກາຍວາຈໂຕ ກາຍຈິຕ຺ຕໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ທຸຕິຍສິກ຺ຂາປທໍ.

໓. ຕຕິຍສິກ຺ຂາປທວຓ຺ຓນາ

໘໐໓-໔. ຕຕິເຍ – ຕລຆາຕເກຕິ ມຸຕ຺ຕກຣຓຕລຆາຕເນ. ອນ຺ຕມໂສ ອຸປ຺ປລປຕ຺ເຕນາປີຕິ ເອຕ຺ຖ ປຕ຺ຕໍ ຕາວ ມຫນ຺ຕໍ, ເກສເຣນາປິ ປຫາຣໍ ເທນ຺ຕິຍາ ອາປຕ຺ຕິເຍວ.

໘໐໕. ອາພາຘປຈ຺ຈຍາຕິ ຄຓ຺ຑໍ ວາ ວຓໍ ວາ ປຫຣິຕຸໍ ວຏ຺ຏຕິ. ເສສໍ ອຸຕ຺ຕານເມວ. ປຐມປາຣາຊິກສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ຕຕິຍສິກ຺ຂາປທໍ.

໔. ຈຕຸຕ຺ຖສິກ຺ຂາປທວຓ຺ຓນາ

໘໐໖. ຈຕຸຕ຺ເຖ – ປຸຣາຓຣາໂຊໂຣຘາຕິ ປຸຣາເຓ ຄິຫິຠາເວ ຣຎ຺ໂຎ ໂອໂຣຘາ. ຈິຣາຈິຣໍ ຄຈ຺ຉຕີຕິ ຈິເຣນ ຈິເຣນ ຄຈ຺ຉຕິ. ຘາເຣຖາຕິ ສກ຺ໂກຖ. ກສ຺ສິທໍ ກມ຺ມນ຺ຕິ ວຸຕ຺ເຕ ອນາໂຣຈິເຕປິ ເອຕາ ມຍິ ອາສງ຺ກໍ ກຣິສ຺ສນ຺ຕີຕິ ມຎ຺ຎມານາ ເອວມາຫ – ‘‘ມຍ຺ຫິທໍ ກມ຺ມ’’ນ຺ຕິ.

໘໐໗. ຊຕຸມຏ຺ຐເກຕິ ຊຕຸນາ ກເຕ ມຏ຺ຐທຓ຺ຑເກ. ວຕ຺ຖຸວເສເນເວຕໍ ວຸຕ຺ຕໍ, ຍໍກິຎ຺ຈິ ປນ ທຓ຺ຑກໍ ປເວເສນ຺ຕິຍາ ອາປຕ຺ຕິເຍວ. ເຕນາຫ – ‘‘ອນ຺ຕມໂສ ອຸປ຺ປລປຕ຺ຕມ຺ປິ ມຸຕ຺ຕກຣຓໍ ປເວເສຕີ’’ຕິ. ເອຕມ຺ປິ ຈ ອຕິມຫນ຺ຕໍ, ເກສຣມຕ຺ຕມ຺ປິ ປນ ປເວເສນ຺ຕິຍາ ອາປຕ຺ຕິ ເອວ. ເສສໍ ອຸຕ຺ຕານເມວ. ສມຸຏ຺ຐານາທີນິ ຕລຆາຕເກ ວຸຕ຺ຕສທິສາເນວາຕິ.

ຈຕຸຕ຺ຖສິກ຺ຂາປທໍ.

໕. ປຎ຺ຈມສິກ຺ຂາປທວຓ຺ຓນາ

໘໑໐. ປຎ຺ຈເມ – ອຕິຄມ຺ຠີຣໍ ອຸທກສຸທ຺ຘິກໍ ອາທິຍນ຺ຕີຕິ ອຕິອນ຺ໂຕ ປເວເສຕ຺ວາ ອຸທເກນ ໂຘວນໍ ກຸຣຸມານາ.

໘໑໒. ເກສຄ຺ຄມຕ຺ຕມ຺ປິ ອຕິກ຺ກາເມຕີຕິ ວິຕ຺ຖາຣໂຕ ຕຕິຍໍ ວາ ຈຕຸຕ຺ຖໍ ວາ ອງ຺ຄຸລໍ ຄມ຺ຠີຣໂຕ ທ຺ວິນ຺ນໍ ປພ຺ພານໍ ອຸປຣິ ເກສຄ຺ຄມຕ຺ຕມ຺ປິ ປເວເສນ຺ຕິຍາ ປາຈິຕ຺ຕິຍນ຺ຕິ ອຕ຺ໂຖ. ວຸຕ຺ຕຎ຺ເຫຕໍ ມຫາປຈ຺ຈຣິຍໍ – ‘‘ເອກິສ຺ສາ ອງ຺ຄຸລິຍາ ຕີຓິ ປພ຺ພານິ ອາທາຕຸໍ ນ ລຠຕິ, ຕິຓ຺ຓໍ ວາ ຈຕຸນ຺ນໍ ວາ ເອເກກມ຺ປິ ປພ຺ພໍ ອາທາຕຸໍ ນ ລຠຕີ’’ຕິ. ເສສໍ ອຸຕ຺ຕານເມວ. ສມຸຏ຺ຐານາທີນິປິ ຕລຆາຕເກ ວຸຕ຺ຕສທິສາເນວາຕິ.

ປຎ຺ຈມສິກ຺ຂາປທໍ.

໖. ຉຏ຺ຐສິກ຺ຂາປທວຓ຺ຓນາ

໘໑໕. ຉຏ຺ເຐ – ຠຕ຺ຕວິສ຺ສຄ຺ຄນ຺ຕິ ຠຕ຺ຕກິຈ຺ຈໍ. ປານີເຍນ ຈ ວິຘູປເນນ ຈ ອຸປຕິຏ຺ຐິຕ຺ວາຕິ ເອເກນ ຫຕ຺ເຖນ ປານີຍຖາລກໍ ເອເກນ ພີຊນິໍ ຄເຫຕ຺ວາ ພີຊມານາ ສມີເປ ຐຕ຺ວາຕິ ອຕ຺ໂຖ. ອຈ຺ຈາວທຕີຕິ ປຸພ຺ເພປິ ຕຸມ຺ເຫ ເອວໍ ຠຸຎ຺ຊຖ, ອຫໍ ເອວໍ ອຸປຏ຺ຐານໍ ກໂຣມີ’’ຕິ ປພ຺ພຊິຕຈາຣິຕ຺ຕໍ ອຕິກ຺ກມິຕ຺ວາ ເຄຫສ຺ສິຕກຖໍ ກເຖຕີຕິ ອຕ຺ໂຖ.

໘໑໗. ຍໍກິຎ຺ຈິ ປານີຍນ຺ຕິ ສຸທ຺ຘອຸທກໍ ວາ ໂຫຕຸ, ຕກ຺ກທຘິມຕ຺ຖຸຣສຂີຣາທີນໍ ວາ ອຎ຺ຎຕຣໍ. ຍາ ກາຈິ ພີຊນີຕິ ອນ຺ຕມໂສ ຈີວຣກຓ຺ໂຓປິ. ຫຕ຺ຖປາເສ ຕິຏ຺ຐຕິ ອາປຕ຺ຕິ ປາຈິຕ຺ຕິຍສ຺ສາຕິ ອິຘ ຐານປຈ຺ຈຍາວ ປາຈິຕ຺ຕິຍໍ ວຸຕ຺ຕໍ. ປຫາຣປຈ຺ຈຍາ ປນ ຂນ຺ຘເກ ທຸກ຺ກຏໍ ປຎ຺ຎຕ຺ຕໍ.

໘໑໙. ເທຕິ ທາເປຕີຕິ ປານີຍໍ ວາ ສູປາທິໍ ວາ ອິມໍ ປິວຖ, ອິມິນາ ຠຸຎ຺ຊຖາຕິ ເທຕິ; ຕາລວຓ຺ຏໍ ອິມິນາ ພີຊນ຺ຕາ ຠຸຎ຺ຊຖາຕິ ເທຕິ; ອຎ຺ເຎນ ວາ ອຸຠຍມ຺ປິ ທາເປຕິ, ອນາປຕ຺ຕິ. ອນຸປສມ຺ປນ຺ນໍ ອາຓາເປຕີຕິ ອຸປຕິຏ຺ຐນຕ຺ຖໍ ສາມເຓຣິໍ ອາຓາເປຕິ, ອນາປຕ຺ຕິ. ເສສໍ ອຸຕ຺ຕານເມວ.

ຉຏ຺ຐສິກ຺ຂາປທໍ.

໗. ສຕ຺ຕມສິກ຺ຂາປທວຓ຺ຓນາ

໘໒໒. ສຕ຺ຕເມ – ຠຸຎ຺ຊິສ຺ສາມີຕິ ປຏິຄ຺ຄຓ຺ຫາຕິ ອາປຕ຺ຕິ ທຸກ຺ກຏສ຺ສາຕິ ອິທໍ ປໂຍຄທຸກ຺ກຏໍ ນາມ, ຕສ຺ມາ ນ ເກວລໍ ປຏິຄ຺ຄຫເຓເຍວ ໂຫຕິ, ປຏິຄ຺ຄຓ຺ຫິຕ຺ວາ ປນ ອຣຎ຺ຎໂຕ ອາຫຣເຓປິ ສຸກ຺ຂາປເນປິ ວທ຺ທລິທິວເສ ຠຊ຺ຊນຕ຺ຖາຍ ອຸທ຺ຘນສຊ຺ຊເນປິ ກປລ຺ລສຊ຺ຊເນປິ ທພ຺ພິສຊ຺ຊເນປິ ທາຣູນິ ອາທາຍ ອຄ຺ຄິກຣເຓປິ ກປລ຺ລມ຺ຫິ ຘຎ຺ຎປກ຺ຂິປເນປິ ທພ຺ພິຍາ ສງ຺ຆຏ຺ຏເນສຸປິ ໂກຏ຺ຏນຕ຺ຖໍ ອຸທຸກ຺ຂລມຸສລາທິສຊ຺ຊເນສຸປິ ໂກຏ຺ຏນປປ຺ໂຜຏນໂຘວນາທີສຸປິ ຍາວ ມຸເຂ ຐເປຕ຺ວາ ອຊ຺ໂຌຫຣຓຕ຺ຖໍ ທນ຺ເຕຫິ ສງ຺ຂາທຕິ, ຕາວ ສພ຺ພປໂຍເຄສຸ ທຸກ຺ກຏານິ, ອຊ຺ໂຌຫຣຓກາເລ ປນ ອຊ຺ໂຌຫຣຓຄຓນາຍ ປາຈິຕ຺ຕິຍານິ. ເອຕ຺ຖ ຈ ວິຎ຺ຎຕ຺ຕິ ເຈວ ໂຠຊນຎ຺ຈ ປມາຓໍ. ຕສ຺ມາ ສຍໍ ວິຎ຺ຎາເປຕ຺ວາ ອຎ຺ຎາຍ ຠຊ຺ຊນໂກຏ຺ຏນປຈນານິ ກາຣາເປຕ຺ວາ ຠຸຎ຺ຊນ຺ຕິຍາປິ ອາປຕ຺ຕິ. ອຎ຺ຎາຍ ວິຎ຺ຎາເປຕ຺ວາ ສຍໍ ຠຊ຺ຊນາທີນິ ກຕ຺ວາ ຠຸຎ຺ຊນ຺ຕິຍາປິ ອາປຕ຺ຕິ. ມຫາປຈ຺ຈຣິຍໍ ປນ ວຸຕ຺ຕໍ – ‘‘ອິທໍ ອາມກຘຎ຺ຎໍ ນາມ ມາຕຣມ຺ປິ ວິຎ຺ຎາເປຕ຺ວາ ຠຸຎ຺ຊນ຺ຕິຍາ ປາຈິຕ຺ຕິຍເມວ, ອວິຎ຺ຎຕ຺ຕິຍາ ລທ຺ຘໍ ສຍໍ ຠຊ຺ຊນາທີນິ ກຕ຺ວາ ວາ ກາຣາເປຕ຺ວາ ວາ ຠຸຎ຺ຊນ຺ຕິຍາ ທຸກ຺ກຏໍ. ອຎ຺ຎາຍ ວິຎ຺ຎຕ຺ຕິຍາ ລທ຺ຘໍ ສຍໍ ວາ ຠຊ຺ຊນາທີນິ ກຕ຺ວາ ຕາຍ ວາ ກາຣາເປຕ຺ວາ ອຎ຺ຎາຍ ວາ ກາຣາເປຕ຺ວາ ຠຸຎ຺ຊນ຺ຕິຍາປິ ທຸກ຺ກຏເມວາ’’ຕິ. ປຸນປິ ວຸຕ຺ຕໍ ‘‘ອຎ຺ຎາຍ ວິຎ຺ຎຕ຺ຕິຍາ ລທ຺ຘໍ, ສຍໍ ຠຊ຺ຊນາທີນິ ກຕ຺ວາ ຠຸຎ຺ຊນ຺ຕິຍາ ປາຈິຕ຺ຕິຍເມວ. ຠຊ຺ຊນາທີນິ ກາຣາເປຕ຺ວາ ຠຸຎ຺ຊນ຺ຕິຍາ ປນ ທຸກ຺ກຏ’’ນ຺ຕິ. ຕໍ ປຸພ຺ພາປຣວິຣຸທ຺ຘໍ ໂຫຕິ, ນ ຫິ ຠຊ຺ຊນາທີນໍ ກຣເຓ ວາ ກາຣາປເນ ວາ ວິເສໂສ ອຕ຺ຖິ. ມຫາອຏ຺ຐກຖາຍໍ ປນ ‘‘ອຎ຺ຎາຍ ວິຎ຺ຎຕ຺ຕໍ ຠຸຎ຺ຊນ຺ຕິຍາ ທຸກ຺ກຏ’’ນ຺ຕິ ອວິເສເສນ ວຸຕ຺ຕໍ.

໘໒໓. ອາພາຘປຈ຺ຈຍາຕິ ເສທກມ຺ມາທີນໍ ອຕ຺ຖາຍ ຘຎ຺ຎວິຎ຺ຎຕ຺ຕິຍາ ອນາປຕ຺ຕິ. ‘‘ອວິຎ຺ຎຕ຺ຕິຍາ ລພ຺ຠມານໍ ປນ ນວກມ຺ມຕ຺ຖາຍ ສມ຺ປຏິຈ຺ຉິຕຸໍ ວຏ຺ຏຕີ’’ຕິ ມຫາປຈ຺ຈຣິຍໍ ວຸຕ຺ຕໍ. ອປຣຓ຺ຓໍ ວິຎ຺ຎາເປຕີຕິ ຐເປຕ຺ວາ ສຕ຺ຕ ຘຎ຺ຎານິ ມຸຄ຺ຄມາສາທິໍ ວາ ລາພຸກຸມ຺ຠຓ຺ຑາທິໍ ວາ ອຎ຺ຎໍ ຍໍກິຎ຺ຈິ ຎາຕກປວາຣິຕຏ຺ຐາເນ ວິຎ຺ຎາເປນ຺ຕິຍາ ອນາປຕ຺ຕິ. ອາມກຘຎ຺ຎໍ ປນ ຎາຕກປວາຣິຕຏ຺ຐາເນ ນ ວຏ຺ຏຕິ. ເສສໍ ອຸຕ຺ຕານເມວ.

ຈຕຸສມຸຏ຺ຐານໍ – ກາຍໂຕ ກາຍວາຈໂຕ ກາຍຈິຕ຺ຕໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ສຕ຺ຕມສິກ຺ຂາປທໍ.

໘. ອຏ຺ຐມສິກ຺ຂາປທວຓ຺ຓນາ

໘໒໔. ອຏ຺ຐເມ – ນິພ຺ພິຏ຺ໂຐ ຣາຊຠໂຏ ຣຎ຺ໂຎ ຠຕິ ເກຓິ ເອເຕນາຕິ ນິພ຺ພິຏ຺ຐຣາຊຠໂຏ, ເອກໍ ຐານນ຺ຕຣໍ ເກຓິຍາ ຄເຫຕ຺ວາ ຕໂຕ ລທ຺ຘອຸທໂຍຕິ ອຕ຺ໂຖ. ຕຎ຺ເຎວ ຠຏປຖໍ ຍາຈິສ຺ສາມີຕິ ຣຎ຺ໂຎ ເກຓິໍ ທຕ຺ວາ ປຸນ ຕໍເຍວ ຐານນ຺ຕຣໍ ຍາຈິສ຺ສາມີຕິ ຈິນ຺ເຕນ຺ໂຕ. ປຣິຠາສີຕິ ຕາ ຠິກ຺ຂຸນິໂຍ ‘‘ມາ ປຸນ ເອວໍ ກຣິຕ຺ຖາ’’ຕິ ສນ຺ຕຊ຺ເຊສິ.

໘໒໖. ສຍໍ ຉຑ຺ເຑຕີຕິ ຈຕ຺ຕາຣິປິ ວຕ຺ຖູນິ ເອກປໂຍເຄນ ຉຑ຺ເຑນ຺ຕິຍາ ເອກາວ ອາປຕ຺ຕິ, ປາເຏກ຺ກໍ ຉຑ຺ເຑນ຺ຕິຍາ ວຕ຺ຖຸຄຓນາຍ ອາປຕ຺ຕິໂຍ. ອາຓຕ຺ຕິຍມ຺ປິ ເອເສວ ນໂຍ. ທນ຺ຕກຏ຺ຐຉຑ຺ຑເນປິ ຠິກ຺ຂຸນິຍາ ປາຈິຕ຺ຕິຍເມວ. ຠິກ຺ຂຸສ຺ສ ສພ຺ພຕ຺ຖ ທຸກ຺ກຏໍ. ເສສໍ ອຸຕ຺ຕານເມວ.

ຉສມຸຏ຺ຐານໍ – ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ອຏ຺ຐມສິກ຺ຂາປທໍ.

໙. ນວມສິກ຺ຂາປທວຓ຺ຓນາ

໘໓໐-໒. ນວເມ – ຍໍ ມນຸສ຺ສານໍ ອຸປໂຠຄປຣິໂຠຄໍ ໂຣປິມນ຺ຕິ ເຂຕ຺ຕໍ ວາ ໂຫຕຸ ນາຬິເກຣາທິອາຣາໂມ ວາ, ຍຕ຺ຖ ກຕ຺ຖຈິ ໂຣປິມຫຣິຕຏ຺ຐາເນ ເອຕານິ ວຕ຺ຖູນິ ຉຑ຺ເຑນ຺ຕິຍາ ປຸຣິມນເຍເນວ ອາປຕ຺ຕິເຠໂທ ເວທິຕພ຺ໂພ. ເຂຕ຺ເຕ ວາ ອາຣາເມ ວາ ນິສີທິຕ຺ວາ ຠຸຎ຺ຊມານາ ອຸຈ຺ຉຸອາທີນິ ວາ ຂາທນ຺ຕີ; ຄຈ຺ຉມານາ ອຸຈ຺ຉິຏ຺ໂຐທກຈລກາທີນິ ຫຣິຕຏ຺ຐາເນ ຉຑ຺ເຑຕິ, ອນ຺ຕມໂສ ອຸທກໍ ປິວິຕ຺ວາ ມຕ຺ຖກຈ຺ຉິນ຺ນນາຬິເກຣມ຺ປິ ຉຑ຺ເຑຕິ, ປາຈິຕ຺ຕິຍເມວ. ຠິກ຺ຂຸໂນ ທຸກ຺ກຏໍ. ກສິຕຏ຺ຐາເນ ປນ ນິກ຺ຂິຕ຺ຕພີເຊ ຍາວ ອງ຺ກຸຣໍ ນ ອຸຏ຺ຐຫຕິ, ຕາວ ສພ຺ເພສໍ ທຸກ຺ກຏໍ. ອນິກ຺ຂິຕ຺ຕພີເຊສຸ ເຂຕ຺ຕໂກຓາທີສຸ ວາ ອສຎ຺ຊາຕໂຣປິເມສຸ ເຂຕ຺ຕມຣິຍາທາທີສຸ ວາ ຉຑ຺ເຑຕຸໍ ວຏ຺ຏຕິ. ມນຸສ຺ສານໍ ກຈວຣຉຑ຺ຑນຏ຺ຐາເນປິ ວຏ຺ຏຕິ. ຉຑ຺ຑິຕເຂຕ຺ເຕຕິ ມນຸສ຺ເສສຸ ສສ຺ສໍ ອຸທ຺ຘຣິຕ຺ວາ ຄເຕສຸ ຉຑ຺ຑິຕເຂຕ຺ຕໍ ນາມ ໂຫຕິ, ຕຕ຺ຖ ວຏ຺ຏຕິ. ຍຕ຺ຖ ປນ ລາຍິຕມ຺ປິ ປຸພ຺ພຓ຺ຓາທິ ປຸນ ອຸຏ຺ຐຫິສ຺ສຕີຕິ ຣກ຺ຂນ຺ຕິ, ຕຕ຺ຖ ຍຖາວຕ຺ຖຸກເມວ. ເສສໍ ອຸຕ຺ຕານເມວ. ຉສມຸຏ຺ຐານໍ – ກິຣິຍາກິຣິຍໍ…ເປ… ຕິເວທນນ຺ຕິ.

ນວມສິກ຺ຂາປທໍ.

໑໐. ທສມສິກ຺ຂາປທວຓ຺ຓນາ

໘໓໕. ທສເມ – ຍໍກິຎ຺ຈິ ນຈ຺ຈນ຺ຕິ ນຏາທໂຍ ວາ ນຈ຺ຈນ຺ຕຸ ໂສຓ຺ຑາ ວາ, ອນ຺ຕມໂສ ໂມຣສຸວມກ຺ກຏາທໂຍປິ, ສພ຺ພມ຺ເປຕໍ ນຈ຺ຈເມວ. ຍໍກິຎ຺ຈິ ຄີຕນ຺ຕິ ຍໍກິຎ຺ຈິ ນຏາທີນໍ ວາ ຄີຕໍ ໂຫຕຸ, ອຣິຍານໍ ປຣິນິພ຺ພານກາເລ ຣຕນຕ຺ຕຍຄຸຓູປສໍຫິຕໍ ສາຘຸກີຬິຕຄີຕໍ ວາ ອສໍຍຕຠິກ຺ຂູນໍ ຘມ຺ມຠາຓກຄີຕໍ ວາ, ສພ຺ພມ຺ເປຕໍ ຄີຕເມວ. ຍໍກິຎ຺ຈິ ວາທິຕນ຺ຕິ ຕນ຺ຕິພທ຺ຘາທິວາທນີຍຠຓ຺ຑວາທິຕໍ ວາ ໂຫຕຸ, ກຸຏເຠຣິວາທິຕໍ ວາ, ອນ຺ຕມໂສ ອຸທກເຠຣິວາທິຕມ຺ປິ, ສພ຺ພມ຺ເປຕໍ ວາທິຕເມວ.

໘໓໖. ທສ຺ສນາຍ ຄຈ຺ຉຕິ ອາປຕ຺ຕິ ທຸກ຺ກຏສ຺ສາຕິ ປທວາຣຄຓນາຍ ອາປຕ຺ຕິ ທຸກ຺ກຏສ຺ສ. ຍຕ຺ຖ ຐິຕາ ປສ຺ສຕິ ວາ ສຸຓາຕິ ວາຕິ ເອກປໂຍເຄນ ໂອໂລເກນ຺ຕີ ປສ຺ສຕິ, ເຕສໍເຍວ ຄີຕວາທິຕໍ ສຸຓາຕິ, ເອກເມວ ປາຈິຕ຺ຕິຍໍ. ສເຈ ປນ ເອກໍ ທິສໍ ໂອໂລເກຕ຺ວາ ນຈ຺ຈໍ ປສ຺ສຕິ, ປຸນ ອຎ຺ຎໂຕ ໂອໂລເກຕ຺ວາ ຄາຍນ຺ເຕ ປສ຺ສຕິ ອຎ຺ຎໂຕ ວາເທນ຺ເຕ, ປາເຏກ຺ກາ ອາປຕ຺ຕິໂຍ. ຠິກ຺ຂຸນີ ສຍມ຺ປິ ນຈ຺ຈິຕຸໍ ວາ ຄາຍິຕຸໍ ວາ ວາທິຕຸໍ ວາ ນ ລຠຕິ, ອຎ຺ເຎ ‘‘ນຈ຺ຈ, ຄາຍ, ວາເທຫີ’’ຕິ ວຕ຺ຕຸມ຺ປິ ນ ລຠຕິ. ‘‘ເຈຕິຍສ຺ສ ອຸປຫາຣໍ ເທຖ, ອຸປາສກາ’’ຕິ ວຕ຺ຕຸມ຺ປິ ‘‘ຕຸມ຺ຫາກໍ ເຈຕິຍສ຺ສ ອຸປຏ຺ຐານໍ ກໂຣມາ’’ຕິ ວຸຕ຺ເຕ ‘‘ສາຘູ’’ຕິ ສມ຺ປຏິຈ຺ຉິຕຸມ຺ປິ ນ ລຠຕິ. ສພ຺ພຕ຺ຖ ປາຈິຕ຺ຕິຍນ຺ຕິ ສພ຺ພອຏ຺ຐກຖາສຸ ວຸຕ຺ຕໍ. ຠິກ຺ຂຸໂນ ທຸກ຺ກຏໍ. ‘‘ຕຸມ຺ຫາກໍ ເຈຕິຍສ຺ສ ອຸປຏ຺ຐານໍ ກໂຣມາ’’ຕິ ວຸຕ຺ເຕ ປນ ‘‘ອຸປຏ຺ຐານກຣຓໍ ນາມ ສຸນ຺ທຣ’’ນ຺ຕິ ວຕ຺ຕຸໍ ວຏ຺ຏຕິ.

໘໓໗. ອາຣາເມ ຐິຕາຕິ ອາຣາເມ ຐຕ຺ວາ ອນ຺ຕຣາຣາເມ ວາ ພຫິອາຣາເມ ວາ ນຈ຺ຈາທີນິ ປສ຺ສຕິ ວາ ສຸຓາຕິ ວາ, ອນາປຕ຺ຕິ. ສຕິ ກຣຓີເຍຕິ ສລາກຠຕ຺ຕາທີນໍ ວາ ອຕ຺ຖາຍ ອຎ຺ເຎນ ວາ ເກນຈິ ກຣຓີເຍນ ຄນ຺ຕ຺ວາ ຄຕຏ຺ຐາເນ ປສ຺ສຕິ ວາ ສຸຓາຕິ ວາ, ອນາປຕ຺ຕິ. ອາປທາສູຕິ ຕາທິເສນ ອຸປທ຺ທເວນ ອຸປທ຺ທຸຕາ ສມຊ຺ຊຏ຺ຐານໍ ປວິສຕິ, ເອວໍ ປວິສິຕ຺ວາ ປສ຺ສນ຺ຕິຍາ ວາ ສຸຓນ຺ຕິຍາ ວາ ອນາປຕ຺ຕິ. ເສສໍ ອຸຕ຺ຕານເມວ.

ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ທສມສິກ຺ຂາປທໍ.

ລສຸຓວຄ຺ໂຄ ປຐໂມ.

໒. ອນ຺ຘກາຣວຄ຺ໂຄ

໑. ປຐມສິກ຺ຂາປທວຓ຺ຓນາ

໘໓໙. ອນ຺ຘກາຣວຄ຺ຄສ຺ສ ປຐມສິກ຺ຂາປເທ – ອປ຺ປທີເປຕິ ປທີປຈນ຺ທສູຣິຍອຄ຺ຄີສຸ ເອເກນາປິ ອໂນຠາສິເຕ. ເຕເນວສ຺ສ ປທຠາຊເນ ‘‘ອນາໂລເກ’’ຕິ ວຸຕ຺ຕໍ. ສລ຺ລເປຍ຺ຍ ວາຕິ ເຄຫສ຺ສິຕກຖໍ ກເຖຍ຺ຍ.

໘໔໑. ອຣໂຫເປກ຺ຂາ ອຎ຺ຎວິຫິຕາຕິ ນ ຣໂຫອສ຺ສາທາເປກ຺ຂາ ຣໂຫອສ຺ສາທໂຕ ອຎ຺ຎວິຫິຕາວ ຫຸຕ຺ວາ ຎາຕິໍ ວາ ປຸຈ຺ຉຕິ, ທາເນ ວາ ປູຊາຍ ວາ ມນ຺ເຕຕິ. ເສສໍ ອຸຕ຺ຕານເມວ. ເຖຍ຺ຍສຕ຺ຖສມຸຏ຺ຐານໍ – ກາຍຈິຕ຺ຕໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທ຺ວິເວທນນ຺ຕິ.

ປຐມສິກ຺ຂາປທໍ.

໒. ທຸຕິຍສິກ຺ຂາປທວຓ຺ຓນາ

໘໔໒. ທຸຕິເຍ – ປຏິຈ຺ຉນ຺ເນ ໂອກາເສຕິ ອິທເມວ ນານໍ. ເສສໍ ສພ຺ພໍ ປຸຣິມສທິສເມວາຕິ.

ທຸຕິຍສິກ຺ຂາປທໍ.

໓. ຕຕິຍສິກ຺ຂາປທວຓ຺ຓນາ

໘໔໖. ຕຕິເຍ – ອຊ຺ໂຌກາເສຕິ ນານໍ, ເສສໍ ສພ຺ພໍ ຕາທິສເມວາຕິ.

ຕຕິຍສິກ຺ຂາປທໍ.

໔. ຈຕຸຕ຺ຖສິກ຺ຂາປທວຓ຺ຓນາ

໘໕໐-໓. ຈຕຸຕ຺ເຖ – ນິກຓ຺ຓິກນ຺ຕິ ກຓ຺ຓມູລໍ ວຸຈ຺ຈຕິ; ກຓ຺ຓມູເລ ຊປ຺ເປຍ຺ຍາຕິ ວຸຕ຺ຕໍ ໂຫຕິ. ສຕິ ກຣຓີເຍຕິ ສລາກຠຕ຺ຕາທີນໍ ອາຫຣຓຕ຺ຖາຍ ວິຫາເຣ ວາ ທຸນ຺ນິກ຺ຂິຕ຺ຕໍ ປຏິສາມນຕ຺ຖາຍ. ເສສໍ ອຸຕ຺ຕານເມວ. ສມຸຏ຺ຐານາທີນິ ປຸຣິມສທິສາເນວາຕິ.

ຈຕຸຕ຺ຖສິກ຺ຂາປທໍ.

໕. ປຎ຺ຈມສິກ຺ຂາປທວຓ຺ຓນາ

໘໕໔. ປຎ຺ຈເມ – ຆຣໍ ໂສເຘນ຺ຕາຕິ ເຕສໍ ກິຣ ເອຕທໂຫສິ – ‘‘ເຖຣິຍາ ໂກຈິ ກາຍິກວາຈສິໂກ ວີຕິກ຺ກໂມ ນ ທິສ຺ສຕິ, ຆຣມ຺ປິ ຕາວ ໂສເຘມາ’’ຕິ, ຕໂຕ ຆຣໍ ໂສເຘນ຺ຕາ ນໍ ອທ຺ທສໍສຸ.

໘໕໖. ອໂນວສ຺ສກໍ ອຕິກ຺ກາເມນ຺ຕິຍາຕິ ປຐມໍ ປາທໍ ອຕິກ຺ກາເມນ຺ຕິຍາ ທຸກ຺ກຏໍ, ທຸຕິຍໍ ອຕິກ຺ກາເມນ຺ຕິຍາ ປາຈິຕ຺ຕິຍໍ, ອຸປຈາຣາຕິກ຺ກເມ ເອເສວ ນໂຍ.

໘໕໘. ຄິລານາຍາຕິ ຍາ ຕາທິເສນ ເຄລຎ຺ເຎນ ອາປຸຈ຺ຉິຕຸໍ ນ ສກ຺ໂກຕິ. ອາປທາສູຕິ ຆເຣ ອຄ຺ຄິ ວາ ອຸຏ຺ຐິໂຕ ໂຫຕິ, ໂຈຣາ ວາ; ເອວຣູເປ ອຸປທ຺ທເວ ອນາປຸຈ຺ຉາ ປກ຺ກມຕິ, ອນາປຕ຺ຕິ. ເສສເມຕ຺ຖ ອຸຕ຺ຕານເມວ.

ກຖິນສມຸຏ຺ຐານໍ – ກາຍວາຈໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ປຎ຺ຈມສິກ຺ຂາປທໍ.

໖. ຉຏ຺ຐສິກ຺ຂາປທວຓ຺ຓນາ

໘໖໐. ຉຏ຺ເຐ – ອຠິນິສີເທຍ຺ຍາຕິ ນິສີເທຍ຺ຍ. ນິສີທິຕ຺ວາ ຄຈ຺ຉນ຺ຕິຍາ ເອກາ ອາປຕ຺ຕິ, ອນິສີທິຕ຺ວາ ນິປຊ຺ຊິຕ຺ວາ ຄຈ຺ຉນ຺ຕິຍາ ເອກາ, ນິສີທິຕ຺ວາ ນິປຊ຺ຊິຕ຺ວາ ຄຈ຺ຉນ຺ຕິຍາ ທ຺ເວ.

໘໖໓. ຘຸວປຎ຺ຎຕ຺ເຕຕິ ຠິກ຺ຂຸນີນໍ ອຕ຺ຖາຍ ນິຈ຺ຈປຎ຺ຎຕ຺ເຕ. ເສສໍ ອຸຕ຺ຕານເມວ. ກຖິນສມຸຏ຺ຐານໍ…ເປ… ຕິເວທນນ຺ຕິ.

ຉຏ຺ຐສິກ຺ຂາປທໍ.

໗. ສຕ຺ຕມສິກ຺ຂາປທວຓ຺ຓນາ

໘໖໔. ສຕ຺ຕເມປິ – ສພ຺ພໍ ຉຏ຺ເຐ ວຸຕ຺ຕນເຍເນວ ເວທິຕພ຺ພໍ.

ສຕ຺ຕມສິກ຺ຂາປທໍ.

໘. ອຏ຺ຐມສິກ຺ຂາປທວຓ຺ຓນາ

໘໖໙. ອຏ຺ຐເມ – ສພ຺ພໍ ອຸຕ຺ຕານເມວ. ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ ອກຸສລຈິຕ຺ຕໍ, ທຸກ຺ຂເວທນນ຺ຕິ.

ອຏ຺ຐມສິກ຺ຂາປທໍ.

໙. ນວມສິກ຺ຂາປທວຓ຺ຓນາ

໘໗໕. ນວເມ – ອຠິສເປຍ຺ຍາຕິ ສປຖໍ ກເຣຍ຺ຍ. ນິຣເຍນ ອຠິສປຕິ ນາມ ‘‘ນິຣເຍ ນິພ຺ພຕ຺ຕາມິ, ອວີຈິມ຺ຫິ ນິພ຺ພຕ຺ຕາມິ, ນິຣເຍ ນິພ຺ພຕ຺ຕຕຸ, ອວີຈິມ຺ຫິ ນິພ຺ພຕ຺ຕຕູ’’ຕິ ເອວມາທິນາ ນເຍນ ອກ຺ໂກສຕິ. ພ຺ຣຫ຺ມຈຣິເຍນ ອຠິສປຕິ ນາມ ‘‘ຄິຫິນີ ໂຫມິ, ໂອທາຕວຕ຺ຖາ ໂຫມິ, ປຣິພ຺ພາຊິກາ ໂຫມິ, ອິຕຣາ ວາ ເອທິສາ ໂຫຕູ’’ຕິ ເອວມາທິນາ ນເຍນ ອກ຺ໂກສຕິ; ວາຈາຍ ວາຈາຍ ປາຈິຕ຺ຕິຍໍ. ຐເປຕ຺ວາ ປນ ນິຣຍຎ຺ຈ ພ຺ຣຫ຺ມຈຣິຍຎ຺ຈ ‘‘ສຸນຂີ ສູກຣີ ກາຓາ ກຸຓີ’’ຕິອາທິນາ ນເຍນ ອກ຺ໂກສນ຺ຕິຍາ ວາຈາຍ ວາຈາຍ ທຸກ຺ກຏໍ.

໘໗໘. ອຕ຺ຖປຸເຣກ຺ຂາຣາຍາຕິ ອຏ຺ຐກຖໍ ກເຖນ຺ຕິຍາ. ຘມ຺ມປຸເຣກ຺ຂາຣາຍາຕິ ປາຬິໍ ວາເຈນ຺ຕິຍາ. ອນຸສາສນິປຸເຣກ຺ຂາຣາຍາຕິ ‘‘ອິທານິປິ ຕ຺ວໍ ເອທິສາ, ສາຘຸ ວິຣມສ຺ສຸ, ໂນ ເຈ ວິຣມສິ, ອທ຺ຘາ ປຸນ ເອວຣູປານິ ກມ຺ມານິ ກຕ຺ວາ ນິຣເຍ ອຸປ຺ປຊ຺ຊິສ຺ສສິ, ຕິຣຈ຺ຉານໂຍນິຍາ ອຸປ຺ປຊ຺ຊິສ຺ສສີ’’ຕິ ເອວໍ ອນຸສາສນິຍໍ ຐຕ຺ວາ ວທນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ.

ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທຸກ຺ຂເວທນນ຺ຕິ.

ນວມສິກ຺ຂາປທໍ.

໑໐. ທສມສິກ຺ຂາປທວຓ຺ຓນາ

໘໗໙. ທສເມ – ສພ຺ພໍ ອຸຕ຺ຕານເມວ. ຘຸຣນິກ຺ເຂປສມຸຏ຺ຐານໍ – ກາຍວາຈາຈິຕ຺ຕໂຕ ສມຸຏ຺ຐາຕິ, ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລກມ຺ມໍ, ທຸກ຺ຂເວທນນ຺ຕິ.

ທສມສິກ຺ຂາປທໍ.

ອນ຺ຘກາຣວຄ຺ໂຄ ທຸຕິໂຍ.

໓. ນຄ຺ຄວຄ຺ໂຄ

໑. ປຐມສິກ຺ຂາປທວຓ຺ຓນາ

໘໘໓-໖. ນຄ຺ຄວຄ຺ຄສ຺ສ ປຐມສິກ຺ຂາປເທ – ພ຺ຣຫ຺ມຈຣິຍໍ ຈິຓ຺ເຓນາຕິ ພ຺ຣຫ຺ມຈຣິເຍນ ຈິຓ຺ເຓນ; ອຖ ວາ ພ຺ຣຫ຺ມຈຣິຍສ຺ສ ຈຣເຓນາຕິ; ເອວໍ ກຣຓຕ຺ເຖ ວາ ສາມິອຕ຺ເຖ ວາ ອຸປໂຍຄວຈນໍ ເວທິຕພ຺ພໍ. ອຈ຺ຉິນ຺ນຈີວຣິກາຍາຕິ ອິທໍ ອຸທກສາຏິກໍ ສນ຺ຘາຍ ວຸຕ຺ຕໍ, ນ ອຎ຺ຎໍ ຈີວຣໍ. ຕສ຺ມາ ອຸທກສາຏິກາຍ ອຈ຺ຉິນ຺ນາຍ ວາ ນຏ຺ຐາຍ ວາ ນຄ຺ຄາຍ ນ຺ຫາຍນ຺ຕິຍາ ອນາປຕ຺ຕິ. ສເຈປິ ອຸທກສາຏິກຈີວຣໍ ມຫຄ຺ຆໍ ໂຫຕິ, ນ ສກ຺ກາ ນິວາເສຕ຺ວາ ພຫິ ຄນ຺ຕຸໍ, ເອວມ຺ປິ ນຄ຺ຄາຍ ນ຺ຫາຍິຕຸໍ ວຏ຺ຏຕິ. ເສສເມຕ຺ຖ ອຸຕ຺ຕານເມວ.

ປຐມສິກ຺ຂາປທໍ.

໒. ທຸຕິຍສິກ຺ຂາປທວຓ຺ຓນາ

໘໘໗. ທຸຕິເຍ – ສພ຺ພໍ ອຸຕ຺ຕານເມວ. ຉສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ທຸຕິຍສິກ຺ຂາປທໍ.

໓. ຕຕິຍສິກ຺ຂາປທວຓ຺ຓນາ

໘໙໓-໔. ຕຕິເຍ – ອນນ຺ຕຣາຍິກິນີຕິ ທສສຸ ອນ຺ຕຣາເຍສຸ ເອເກນປິ ອນ຺ຕຣາເຍນ ອນນ຺ຕຣາຍາ. ຘຸຣໍ ນິກ຺ຂິຕ຺ຕມຕ຺ເຕຕິ ຘຸຣໍ ນິກ຺ຂິປິຕ຺ວາ ສເຈປິ ປຈ຺ຉາ ສິພ຺ພຕິ, ອາປຕ຺ຕິເຍວາຕິ ອຕ຺ໂຖ. ເສສໍ ອຸຕ຺ຕານເມວ.

ຘຸຣນິກ຺ເຂປສມຸຏ຺ຐານໍ – ອກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທຸກ຺ຂເວທນນ຺ຕິ.

ຕຕິຍສິກ຺ຂາປທໍ.

໔. ຈຕຸຕ຺ຖສິກ຺ຂາປທວຓ຺ຓນາ

໘໙໘-໙. ຈຕຸຕ຺ເຖ – ປຎ຺ຈ ອຫານິ ປຎ຺ຈາຫໍ, ປຎ຺ຈາຫເມວ ປຎ຺ຈາຫິກໍ. ສງ຺ຆາຏີນໍ ຈາໂຣ ສງ຺ຆາຏິຈາໂຣ; ປຣິໂຠຄວເສນ ວາ ໂອຕາປນວເສນ ວາ ສງ຺ຆຏິຕຏ຺ເຐນ ສງ຺ຆາຏີຕິ ລທ຺ຘນາມານໍ ປຎ຺ຈນ຺ນໍ ຈີວຣານໍ ປຣິວຕ຺ຕນນ຺ຕິ ອຕ຺ໂຖ. ຕສ຺ມາເຍວ ປທຠາຊເນ ‘‘ປຎ຺ຈມໍ ທິວສໍ ປຎ຺ຈ ຈີວຣານີ’’ຕິອາທິມາຫ. ອາປຕ຺ຕິ ປາຈິຕ຺ຕິຍສ຺ສາຕິ ເອຕ຺ຖ ຈ ເອກສ຺ມິໍ ຈີວເຣ ເອກາ ອາປຕ຺ຕິ; ປຎ຺ຈສຸ ປຎ຺ຈ.

໙໐໐. ອາປທາສູຕິ ມຫຄ຺ຆໍ ຈີວຣໍ, ນ ສກ຺ກາ ໂຫຕິ ໂຈຣຠຍາທີສຸ ປຣິຠຸຎ຺ຊິຕຸໍ; ເອວຣູເປ ອຸປທ຺ທເວ ອນາປຕ຺ຕິ. ເສສໍ ອຸຕ຺ຕານເມວ. ກຖິນສມຸຏ຺ຐານໍ – ອກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ຈຕຸຕ຺ຖສິກ຺ຂາປທໍ.

໕. ປຎ຺ຈມສິກ຺ຂາປທວຓ຺ຓນາ

໙໐໓. ປຎ຺ຈເມ – ຈີວຣສງ຺ກມນີຍນ຺ຕິ ສງ຺ກເມຕພ຺ພໍ ຈີວຣໍ; ອຎ຺ຎິສ຺ສາ ສນ຺ຕກໍ ອນາປຸຈ຺ຉາ ຄຫິຕໍ ປຸນ ປຏິທາຕພ຺ພຈີວຣນ຺ຕິ ອຕ຺ໂຖ.

໙໐໖. ອາປທາສູຕິ ສເຈ ອປາຣຸຕໍ ວາ ອນິວຕ຺ຖໍ ວາ ໂຈຣາ ຫຣນ຺ຕິ, ເອວຣູປາສຸ ອາປທາສຸ ຘາເຣນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ. ກຖິນສມຸຏ຺ຐານໍ – ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ປຎ຺ຈມສິກ຺ຂາປທໍ.

໖. ຉຏ຺ຐສິກ຺ຂາປທວຓ຺ຓນາ

໙໐໙-໑໐. ຉຏ຺ເຐ – ອຎ຺ຎໍ ປຣິກ຺ຂາຣນ຺ຕິ ຍໍກິຎ຺ຈິ ຖາລກາທີນໍ ວາ ສປ຺ປິເຕລາທີນໍ ວາ ອຎ຺ຎຕຣໍ. ອານິສໍສນ຺ຕິ ‘‘ກິຕ຺ຕກໍ ອຄ຺ຆນກໍ ທາຕຸກາມຕ຺ຖາ’’ຕິ ປຸຈ຺ຉຕິ, ‘‘ເອຕ຺ຕກໍ ນາມາ’’ຕິ ວທນ຺ຕິ, ‘‘ອາຄເມຖ ຕາວ, ອິທານິ ວຕ຺ຖໍ ມຫຄ຺ຆໍ, ກຕິປາເຫນ ກປ຺ປາເສ ອາຄເຕ ສມຄ຺ຆໍ ຠວິສ຺ສຕີ’’ຕິ ເອວໍ ວຕ຺ວາ ນິວາເຣນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ.

ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ຉຏ຺ຐສິກ຺ຂາປທໍ.

໗. ສຕ຺ຕມສິກ຺ຂາປທວຓ຺ຓນາ

໙໑໑. ສຕ຺ຕເມ – ປກ຺ກມິໍສູຕິ ອຎ຺ຎາສມ຺ປິ ອາຄມນໍ ອາຄເມນ຺ຕີ ‘‘ອທ຺ຘາ ອມ຺ຫາກມ຺ປິ ອາຄເມສ຺ສຕີ’’ຕິ ຕຕ຺ຖ ຕຕ຺ຖ ອຄມໍສຸ. ປຏິພາເຫຍ຺ຍາຕິ ປຏິເສເຘຍ຺ຍ.

໙໑໕. ອານິສໍສນ຺ຕິ ‘‘ເອກິສ຺ສາ ເອກໍ ສາຏກໍ ນປ຺ປໂຫຕິ, ອາຄເມຖ ຕາວ, ກຕິປາເຫນ ອຸປ຺ປຊ຺ຊິສ຺ສຕິ, ຕໂຕ ຠາເຊສ຺ສາມີ’’ຕິ ເອວໍ ອານິສໍສໍ ທສ຺ເສຕ຺ວາ ປຏິພາຫນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ.

ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ສຕ຺ຕມສິກ຺ຂາປທໍ.

໘. ອຏ຺ຐມສິກ຺ຂາປທວຓ຺ຓນາ

໙໑໖-໘. ອຏ຺ຐເມ – ນຏາ ນາມ ເຍ ນາຏກໍ ນາເຏນ຺ຕິ. ນຏກາ ນາມ ເຍ ນຈ຺ຈນ຺ຕິ. ລງ຺ຆກາ ນາມ ເຍ ວໍສວຣຕ຺ຕາທີສຸ ລງ຺ຆນກມ຺ມໍ ກໂຣນ຺ຕິ. ໂສກຊ຺ຌາຍິກາ ນາມ ມາຍາກາຣາ. ກຸມ຺ຠຖູຓິກາ ນາມ ຆຏເກນ ກີຬນກາ; ພິມ຺ພິສກວາທກາຕິປິ ວທນ຺ຕິ. ເທຕິ ອາປຕ຺ຕິ ປາຈິຕ຺ຕິຍສ຺ສາຕິ ເອຕ຺ຖ ຈີວຣຄຓນາຍ ອາປຕ຺ຕິໂຍ ເວທິຕພ຺ພາ. ເສສໍ ອຸຕ຺ຕານເມວ.

ຉສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ອຏ຺ຐມສິກ຺ຂາປທໍ.

໙. ນວມສິກ຺ຂາປທວຓ຺ຓນາ

໙໒໑-໔. ນວເມ – ທຸພ຺ພລຈີວຣປຈ຺ຈາສາຍາຕິ ທຸພ຺ພລາຍ ຈີວຣປຈ຺ຈາສາຍ. ອານິສໍສນ຺ຕິ ກິຎ຺ຈາປິ ‘‘ນ ມຍໍ ອຍ຺ເຍ ສກ຺ໂກມາ’’ຕິ ວທນ຺ຕິ, ‘‘ອິທານິ ປນ ເຕສໍ ກປ຺ປາໂສ ອາຄມິສ຺ສຕິ, ສທ຺ໂຘ ປສນ຺ໂນ ປຸຣິໂສ ອາຄມິສ຺ສຕິ, ອທ຺ຘາ ທສ຺ສຕີ’’ຕິ ເອວໍ ອານິສໍສໍ ທສ຺ເສຕ຺ວາ ນິວາເຣນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ.

ນວມສິກ຺ຂາປທໍ.

໑໐. ທສມສິກ຺ຂາປທວຓ຺ຓນາ

໙໒໗. ທສເມ – ກຖິນຸທ຺ຘາຣໍ ນ ທສ຺ສນ຺ຕີຕິ ກີທິໂສ ກຖິນຸທ຺ຘາໂຣ ທາຕພ຺ໂພ, ກີທິໂສ ນ ທາຕພ຺ໂພຕິ? ຍສ຺ສ ອຕ຺ຖາຣມູລໂກ ອານິສໍໂສ ມຫາ, ອຸພ຺ຠາຣມູລໂກ ອປ຺ໂປ, ເອວຣູໂປ ນ ທາຕພ຺ໂພ. ຍສ຺ສ ປນ ອຕ຺ຖາຣມູລໂກ ອານິສໍໂສ ອປ຺ໂປ, ອຸພ຺ຠາຣມູລໂກ ມຫາ, ເອວຣູໂປ ທາຕພ຺ໂພ. ສມານິສໍໂສປິ ສທ຺ຘາປຣິປາລນຕ຺ຖໍ ທາຕພ຺ໂພວ.

໙໓໑. ອານິສໍສນ຺ຕິ ຠິກ຺ຂຸນິສງ຺ໂຆ ຊິຓ຺ຓຈີວໂຣ, ກຖິນານິສໍສມູລໂກ ມຫາລາໂຠຕິ ເອວຣູປໍ ອານິສໍສໍ ທສ຺ເສຕ຺ວາ ປຏິພາຫນ຺ຕິຍາ ອນາປຕ຺ຕິ. ເສສໍ ອຸຕ຺ຕານເມວ.

ທສມສິກ຺ຂາປທໍ.

ນຄ຺ຄວຄ຺ໂຄ ຕຕິໂຍ.

໔. ຕຸວຏ຺ຏວຄ຺ໂຄ

໑. ປຐມສິກ຺ຂາປທວຓ຺ຓນາ

໙໓໓. ຕຸວຏ຺ຏວຄ຺ຄສ຺ສ ປຐມສິກ຺ຂາປເທ – ຕຸວຏ຺ເຏຍ຺ຍຸນ຺ຕິ ນິປຊ຺ເຊຍ຺ຍຸໍ. ເສສໍ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ປຐມສິກ຺ຂາປທໍ.

໒. ທຸຕິຍສິກ຺ຂາປທວຓ຺ຓນາ

໙໓໗. ທຸຕິເຍ – ເອກໍ ອຕ຺ຖຣຓຎ຺ເຈວ ປາວຸຣຓຎ຺ຈ ເອຕາສນ຺ຕິ ເອກຕ຺ຖຣຓປາວຸຣຓາ; ສໍຫາຣິມານໍ ປາວາຣຕ຺ຖຣຓກຏສາຣກາທີນໍ ເອກໍ ອນ຺ຕໍ ອຕ຺ຖຣິຕ຺ວາ ເອກໍ ປາຣຸປິຕ຺ວາ ຕຸວຏ຺ເຏນ຺ຕີນເມຕໍ ອຘິວຈນໍ.

໙໔໐. ວວຕ຺ຖານໍ ທສ຺ເສຕ຺ວາຕິ ມຊ຺ເຌ ກາສາວໍ ວາ ກຕ຺ຕຣຍຏ຺ຐິໍ ວາ ອນ຺ຕມໂສ ກາຍພນ຺ຘນມ຺ປິ ຐເປຕ຺ວາ ນິປຊ຺ຊນ຺ຕີນໍ ອນາປຕ຺ຕີຕິ ອຕ຺ໂຖ. ເສສໍ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ທຸຕິຍສິກ຺ຂາປທໍ.

໓. ຕຕິຍສິກ຺ຂາປທວຓ຺ຓນາ

໙໔໑. ຕຕິເຍ – ອຸຬາຣສມ຺ຠາວິຕາຕິ ອຸຬາຣກຸລາ ປພ຺ພຊິຕຕ຺ຕາ ຄຸເຓຫິ ຈ ອຸຬາຣຕ຺ຕາ ອຸຬາຣາຕິ ສມ຺ຠາວິຕາ. ອິສ຺ສາປກຕາຕິ ອິສ຺ສາຍ ອປກຕາ; ອຠິຠູຕາຕິ ອຕ຺ໂຖ. ສຎ຺ຎຕ຺ຕິ ພຫຸລາ ເອຕາສນ຺ຕິ ສຎ຺ຎຕ຺ຕິພຫຸລາ; ທິວສໍ ມຫາຊນໍ ສຎ຺ຎາປຍມານາຕິ ອຕ຺ໂຖ. ວິຎ຺ຎຕ຺ຕິ ພຫຸລາ ເອຕາສນ຺ຕິ ວິຎ຺ຎຕ຺ຕິພຫຸລາ. ວິຎ຺ຎຕ຺ຕີຕິ ເຫຕູທາຫຣຓາທີຫິ ວິວິເຘຫິ ນເຍຫິ ຎາປນາ ເວທິຕພ຺ພາ, ນ ຍາຈນາ.

໙໔໓. ຈງ຺ກມເນ ນິວຕ຺ຕນຄຓນາຍ ອາປຕ຺ຕິໂຍ ເວທິຕພ຺ພາ. ຕິຏ຺ຐຕິ ວາຕິອາທີສຸ ປໂຍຄຄຓນາຍ. ອຸທ຺ທິສຕິ ວາຕິອາທີສຸ ປທາທິຄຓນາຍ. ເສສໍ ອຸຕ຺ຕານເມວ.

ຕິສມຸຏ຺ຐານໍ – ກິຣິຍາກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທຸກ຺ຂເວທນນ຺ຕິ.

ຕຕິຍສິກ຺ຂາປທໍ.

໔. ຈຕຸຕ຺ຖສິກ຺ຂາປທວຓ຺ຓນາ

໙໔໙. ຈຕຸຕ຺ເຖ – ສຕິ ອນ຺ຕຣາເຍຕິ ທສວິເຘ ອນ຺ຕຣາເຍ ສຕິ. ປຣິເຍສິຕ຺ວາ ນ ລຠຕີຕິ ອຎ຺ຎໍ ອຸປຏ຺ຐາຍິກໍ ນ ລຠຕິ. ຄິລານາຍາຕິ ສຍໍ ຄິລານາຍ. ອາປທາສູຕິ ຕຖາຣູເປ ອຸປທ຺ທເວ ສຕິ ອນາປຕ຺ຕິ. ເສສໍ ອຸຕ຺ຕານເມວ.