໒. ກາຍສຸຕ຺ຕວຓ຺ຓນາ

໑໘໓. ທຸຕິເຍ ອາຫາຣຏ຺ຐິຕິໂກຕິ ປຈ຺ຈຍຏ຺ຐິຕິໂກ. ອາຫາຣໍ ປຏິຈ຺ຈາຕິ ປຈ຺ຈຍໍ ປຏິຈ຺ຈ. ສຸຠນິມິຕ຺ຕນ຺ຕິ ສຸຠມ຺ປິ ສຸຠນິມິຕ຺ຕໍ, ສຸຠສ຺ສ ອາຣມ຺ມຓມ຺ປິ ສຸຠນິມິຕ຺ຕໍ. ອໂຍນິໂສມນສິກາໂຣຕິ ອນຸປາຍມນສິກາໂຣ ອຸປ຺ປຖມນສິກາໂຣ ອນິຈ຺ເຈ ‘‘ນິຈ຺ຈ’’ນ຺ຕິ ວາ, ທຸກ຺ເຂ ‘‘ສຸຂ’’ນ຺ຕິ, ອນຕ຺ຕນິ ‘‘ອຕ຺ຕາ’’ຕິ ວາ, ອສຸເຠ ‘‘ສຸຠ’’ນ຺ຕິ ວາ, ມນສິກາໂຣ. ຕໍ ຕສ຺ມິໍ ສຸຠາຣມ຺ມເຓ ພຫຸລໍ ປວຕ຺ຕຍໂຕ ກາມຈ຺ຉນ຺ໂທ ອຸປ຺ປຊ຺ຊຕິ. ເຕນ ວຸຕ຺ຕໍ ‘‘ອຕ຺ຖິ, ຠິກ຺ຂເວ, ສຸຠນິມິຕ຺ຕ’’ນ຺ຕິອາທິ. ເອວໍ ສພ຺ພນີວຣເຓສຸ ໂຍຊນາ ເວທິຕພ຺ພາ.

ປຏິຆນິມິຕ຺ຕນ຺ຕິອາທີສຸ ປນ ປຏິໂຆປິ ປຏິຆນິມິຕ຺ຕໍ ປຏິຆາຣມ຺ມຓມ຺ປິ. ອຣຕີຕິ ອຸກ຺ກຓ຺ຐິຕາ. ຍໍ ສນ຺ຘາຍ ວຸຕ຺ຕໍ – ‘‘ຕຕ຺ຖ ກຕມາ ອຣຕິ? ປນ຺ເຕສຸ ວາ ເສນາສເນສຸ ອຎ຺ຎຕຣຎ຺ຎຕເຣສຸ ວາ ອຘິກຸສເລສຸ ຘມ຺ເມສຸ ອຣຕິ ອຣຕິຕາ ອນຠິຣຕິ ອນຠິຣມນາ ອຸກ຺ກຓ຺ຐິຕາ ປຣິຕສ຺ສິຕາ, ອຍໍ ວຸຈ຺ຈຕິ ອຣຕີ’’ຕິ (ວິຠ. ໘໕໖).

ຕນ຺ທີຕິ ອຕິສີຕາທິປຈ຺ຈຍາ ອຸປ຺ປນ຺ນໍ ອາຄນ຺ຕຸກກາຍາລສິຍໍ. ຍສ຺ມິໍ ອຸປ຺ປນ຺ເນ ‘‘ອຕິສີຕໍ ອຕິອຸຓ຺ຫໍ ອຕິຈ຺ຉາໂຕສ຺ມິ ອຕິຘາໂຕສ຺ມິ ອຕິທູຣມຄ຺ຄໍ ຄໂຕສ຺ມີ’’ຕິ ວທຕິ, ຍໍ ສນ຺ຘາຍ ວຸຕ຺ຕໍ ‘‘ຕຕ຺ຖ ກຕມາ ຕນ຺ທິ, ຍາ ຕນ຺ທີ ຕນ຺ທິຍນາ ຕນ຺ທິມນກຕາ ອາລສ຺ຍໍ ອາລສ຺ຍາຍນາ ອາລສ຺ຍາຍິຕຕ຺ຕໍ, ອຍໍ ວຸຈ຺ຈຕິ ຕນ຺ທີ’’ຕິ (ວິຠ. ໘໕໗).

ວິຊມ຺ຠິຕາຕິ ກິເລສວເສນ ກາຍວິນມນາ. ຍໍ ສນ຺ຘາຍ ວຸຕ຺ຕໍ – ‘‘ຕຕ຺ຖ ກຕມາ ວິຊມ຺ຠິຕາ? ຍາ ກາຍສ຺ສ ຊມ຺ຠນາ ວິຊມ຺ຠນາ ອານມນາ ວິນມນາ ສນ຺ນມນາ ປຓມນາ ພ຺ຍາຘິຍກໍ, ອຍໍ ວຸຈ຺ຈຕິ ວິຊມ຺ຠິຕາ’’ຕິ (ວິຠ. ໘໕໘).

ຠຕ຺ຕສມ຺ມໂທຕິ ຠຕ຺ຕປຣິຬາໂຫ. ຍໍ ສນ຺ຘາຍ ວຸຕ຺ຕໍ – ‘‘ຕຕ຺ຖ ກຕໂມ ຠຕ຺ຕສມ຺ມໂທ? ຍາ ຠຸຕ຺ຕາວິສ຺ສ ຠຕ຺ຕມຸຈ຺ຉາ ຠຕ຺ຕກິລມໂຖ ຠຕ຺ຕປຣິຬາໂຫ ກາຍທຸຏ຺ຐຸລ຺ລໍ, ອຍໍ ວຸຈ຺ຈຕິ ຠຕ຺ຕສມ຺ມໂທ’’ຕິ (ວິຠ. ໘໕໙).

ເຈຕໂສ ຈ ລີນຕ຺ຕນ຺ຕິ ຈິຕ຺ຕສ຺ສ ລີຍນາກາໂຣ, ຍໍ ສນ຺ຘາຍ ວຸຕ຺ຕໍ – ‘‘ຕຕ຺ຖ ກຕມໍ ເຈຕໂສ ລີນຕ຺ຕໍ? ຍາ ຈິຕ຺ຕສ຺ສ ອກລ຺ຍຕາ ອກມ຺ມຎ຺ຎຕາ ໂອລີຍນາ ສລ຺ລີຍນາ ລີນໍ ລີຍນາ ລີຍິຕຕ຺ຕໍ ຖິນໍ ຖິຍນາ ຖິຍິຕຕ຺ຕໍ ຈິຕ຺ຕສ຺ສ, ອິທໍ ວຸຈ຺ຈຕິ ເຈຕໂສ ລີນຕ຺ຕ’’ນ຺ຕິ (ວິຠ. ໘໖໐).

ເຈຕໂສ ອວູປສໂມຕິ ຍຖາ ນາມ ວີຕຈ຺ຈິໂກປິ ອງ຺ຄາໂຣ ເນວ ຕາວ ສນ຺ນິສີທຕິ ປຕາປໍ ກໂຣຕິເຍວ, ຍຖາ ຈ ປຕ຺ຕປຈນຏ຺ຐາເນ ເນວ ຕາວ ສນ຺ນິສີທຕິ ປຕາປໍ ກໂຣຕິເຍວ, ເອວໍ ຈິຕ຺ຕສ຺ສ ອວູປສນ຺ຕາກາໂຣ, ອຕ຺ຖໂຕ ປເນຕໍ ອຸທ຺ຘຈ຺ຈກຸກ຺ກຸຈ຺ຈເມວ ໂຫຕິ.

ວິຈິກິຈ຺ຉຏ຺ຐານີຍາ ຘມ຺ມາຕິ ວິຈິກິຈ຺ຉາຍ ອາຣມ຺ມຓຘມ຺ມາ. ອໂຍນິໂສມນສິກາໂຣ ສພ຺ພຕ຺ຖ ວຸຕ຺ຕນໂຍວ. ເອວເມຕ຺ຖ ກາມຈ຺ຉນ຺ໂທ ວິຈິກິຈ຺ຉາຕິ ອິເມ ທ຺ເວ ຘມ຺ມາ ອາຣມ຺ມເຓນ ກຖິຕາ, ພ຺ຍາປາໂທ ອາຣມ຺ມເຓນ ຈ ອຸປນິສ຺ສເຍນ ຈ, ເສສາ ສຫຊາເຕນ ຈ ອຸປນິສ຺ສເຍນ ຈາຕິ.

ສຕິສມ຺ໂພຊ຺ຌງ຺ຄຏ຺ຐານີຍາ ຘມ຺ມາຕິ ສຕິຍາ ອາຣມ຺ມຓຘມ຺ມາ ສຕ຺ຕຕິໍສ ໂພຘິປກ຺ຂິຍາ ຈ ນວ ໂລກຸຕ຺ຕຣຘມ຺ມາ ຈ. ຕຕ຺ຖ ໂຍນິໂສມນສິກາຣພຫຸລີກາໂຣຕິ ຕຕ຺ຖ ອຸປາຍມນສິກາຣສ຺ສ ປຸນປ຺ປຸນໍ ກຣຓໍ.

ກຸສລາກຸສລາ ຘມ຺ມາຕິອາທີສຸ ກຸສລາຕິ ໂກສລ຺ລສມ຺ຠູຕາ ອນວຊ຺ຊສຸຂວິປາກາ. ອກຸສລາຕິ ອໂກສລ຺ລສມ຺ຠູຕາ ສາວຊ຺ຊທຸກ຺ຂວິປາກາ. ສາວຊ຺ຊາຕິ ອກຸສລາ. ອນວຊ຺ຊາຕິ ກຸສລາ. ຫີນປຓີຕກຓ຺ຫສຸກ຺ເກສຸປິ ເອເສວ ນໂຍ. ສປ຺ປຏິຠາຄາຕິ ກຓ຺ຫສຸກ຺ກາເຍວ. ກຓ຺ຫາ ຫິ ກຓ຺ຫວິປາກທານໂຕ, ສຸກ຺ກາ ຈ ສຸກ຺ກວິປາກທານໂຕ ສປ຺ປຏິຠາຄາ ນາມ, ສທິສວິປາກໂກຏ຺ຐາສາຕິ ອຕ຺ໂຖ. ປຏິປກ຺ຂຠູຕສ຺ສ ວາ ຠາຄສ຺ສ ອຕ຺ຖິຕາຍ ສປ຺ປຏິຠາຄາ. ກຓ຺ຫານຎ຺ຫິ ສຸກ຺ກາ ປຏິປກ຺ຂຠາຄາ, ສຸກ຺ການຎ຺ຈ ກຓ຺ຫາ ປຏິປກ຺ຂຠາຄາຕິ ເອວມ຺ປິ ສປ຺ປຏິຠາຄາ. ສປ຺ປຏິພາຫິຕຏ຺ເຐນ ວາ ສປ຺ປຏິຠາຄາ. ອກຸສລຎ຺ຫິ ກຸສລໍ ປຏິພາຫິຕ຺ວາ ອຕ຺ຕໂນ ວິປາກໍ ເທຕິ, ກຸສລຎ຺ຈ ອກຸສລໍ ປຏິພາຫິຕ຺ວາຕິ ເອວມ຺ປິ ກຓ຺ຫສຸກ຺ກາ ສປ຺ປຏິຠາຄາ.

ອາຣມ຺ຠຘາຕູຕິ ປຐມາຣມ຺ຠວີຣິຍໍ. ນິກ຺ກມຘາຕູຕິ ໂກສຊ຺ຊໂຕ ນິກ຺ຂນ຺ຕຕ຺ຕາ ຕໂຕ ພລວຕຣໍ. ປຣກ຺ກມຘາຕູຕິ ປຣໍ ປຣໍ ຐານໍ ອກ຺ກມນຕາຍ ຕໂຕປິ ພລວຕຣນ຺ຕິ ຕີຫິປິ ປເທຫິ ວີຣິຍເມວ ກຖິຕໍ.

ປີຕິສມ຺ໂພຊ຺ຌງ຺ຄຏ຺ຐານີຍາຕິ ປີຕິຍາ ອາຣມ຺ມຓຘມ຺ມາ. ກາຍປສ຺ສທ຺ຘີຕິ ຕິຓ຺ຓໍ ຂນ຺ຘານໍ ທຣຖປສ຺ສທ຺ຘິ. ຈິຕ຺ຕປສ຺ສທ຺ຘີຕິ ວິຎ຺ຎາຓກ຺ຂນ຺ຘສ຺ສ ທຣຖປສ຺ສທ຺ຘິ. ສມຖນິມິຕ຺ຕນ຺ຕິ ສມໂຖປິ ສມຖນິມິຕ຺ຕໍ, ອາຣມ຺ມຓມ຺ປິ. ອພ຺ຍຄ຺ຄນິມິຕ຺ຕນ຺ຕິ ຕສ຺ເສວ ເວວຈນໍ.

ອຸເປກ຺ຂາສມ຺ໂພຊ຺ຌງ຺ຄຏ຺ຐານີຍາຕິ ອຸເປກ຺ຂາຍ ອາຣມ຺ມຓຘມ຺ມາ, ອຕ຺ຖໂຕ ປນ ມຊ຺ຌຕ຺ຕາກາໂຣ ອຸເປກ຺ຂາຏ຺ຐານີຍາ ຘມ຺ໂມຕິ ເວທິຕພ຺ໂພ. ເອວເມຕ຺ຖ ສຕິຘມ຺ມວິຈຍອຸເປກ຺ຂາສມ຺ໂພຊ຺ຌງ຺ຄາ ອາຣມ຺ມເຓນ ກຖິຕາ, ເສສາ ອາຣມ຺ມເຓນປິ ອຸປນິສ຺ສເຍນປິ.