໓. ກຸມ຺ໂມປມສຸຕ຺ຕວຓ຺ຓນາ

໒໔໐. ຕຕິເຍ ກຸມ຺ໂມຕິ ອຏ຺ຐິກຸມ຺ໂມ. ກຈ຺ຉໂປຕິ ຕສ຺ເສວ ເວວຈນໍ. ອນຸນທີຕີເຣຕິ ນທິຍາ ອນຸຕີເຣ. ໂຄຈຣປສຸໂຕຕິ ‘‘ສເຈ ກິຎ຺ຈິ ຜລາຜລໍ ລຠິສ຺ສາມິ, ຂາທິສ຺ສາມີ’’ຕິ ໂຄຈຣຕ຺ຖາຍ ປສຸໂຕ ອຸສ຺ສຸກ຺ໂກ ຕນ຺ນິພນ຺ໂຘ. ສໂມທຫິຕ຺ວາຕິ ສມຸຄ຺ເຄ ວິຍ ປກ຺ຂິປິຕ຺ວາ. ສງ຺ກສາຍຕີຕິ ອຈ຺ຉຕິ. ສໂມທຫນ຺ຕິ ສໂມທຫນ຺ໂຕ ຐເປນ຺ໂຕ. ອິທໍ ວຸຕ຺ຕໍ ໂຫຕິ – ຍຖາ ກຸມ຺ໂມ ອງ຺ຄານິ ສເກ ກປາເລ ສໂມທຫນ຺ໂຕ ສິງ຺ຄາລສ຺ສ ໂອຕາຣໍ ນ ເທຕິ, ນ ຈ ນໍ ສິງ຺ຄາໂລ ປສຫຕິ, ເອວໍ ຠິກ຺ຂຸ ອຕ຺ຕໂນ ມໂນວິຕກ຺ເກ ສເກ ອາຣມ຺ມຓກປາເລ ສໂມທຫນ຺ໂຕ ກິເລສມາຣສ຺ສ ໂອຕາຣໍ ນ ເທຕິ, ນ ຈ ນໍ ມາໂຣ ປສຫຕິ.

ອນິສ຺ສິໂຕຕິ ຕຓ຺ຫາທິຏ຺ຐິນິສ຺ສເຍຫິ ອນິສ຺ສິໂຕ. ອຎ຺ຎມເຫຐຍາໂນຕິ ອຎ຺ຎໍ ກຎ຺ຈິ ປຸຄ຺ຄລໍ ອວິເຫເຐນ຺ໂຕ. ປຣິນິພ຺ພຸໂຕຕິ ກິເລສປຣິນິພ຺ພາເນນ ປຣິນິພ຺ພຸໂຕ. ນູປວເທຍ຺ຍ ກຎ຺ຈີຕິ ອຎ຺ຎໍ ກຎ຺ຈິ ປຸຄ຺ຄລໍ ສີລວິປຕ຺ຕິຍາ ວາ ອາຈາຣວິປຕ຺ຕິຍາ ວາ ອຕ຺ຕານໍ ອຸກ຺ກໍເສຕຸກາມຕາຍ ວາ ປຣໍ ວມ຺ເຠຕຸກາມຕາຍ ວາ ນ ອຸປວເທຍ຺ຍ, ອຎ຺ຎທຕ຺ຖຸ ປຎ຺ຈ ຘມ຺ເມ ອຊ຺ຌຕ຺ຕໍ ອຸປຏ຺ຐເປຕ຺ວາ, ‘‘ກາເລນ ວກ຺ຂາມິ, ໂນ ອກາເລນ, ຠູເຕນ ວກ຺ຂາມິ, ໂນ ອຠູເຕນ, ສຓ຺ເຫນ ວກ຺ຂາມິ, ໂນ ຜຣຸເສນ, ອຕ຺ຖສໍຫິເຕນ ວກ຺ຂາມິ, ໂນ ອນຕ຺ຖສໍຫິເຕນ, ເມຕ຺ຕຈິຕ຺ໂຕ ວກ຺ຂາມິ, ໂນ ໂທສນ຺ຕໂຣ’’ຕິ ເອວໍ ອຸລ຺ລຸມ຺ປນສຠາວສຓ຺ຐິເຕເນວ ຈິຕ຺ເຕນ ວິຫຣຕິ.