໑໑. ຍວກລາປິສຸຕ຺ຕວຓ຺ຓນາ

໒໔໘. ເອກາທສເມ ຍວກລາປີຕິ ລາຍິຕ຺ວາ ຐປິຕຍວປຸຎ຺ໂຊ. ພ຺ຍາຠງ຺ຄິຫຕ຺ຖາຕິ ກາຊຫຕ຺ຖາ. ຉຫິ ພ຺ຍາຠງ຺ຄີຫິ ຫເນຍ຺ຍຸນ຺ຕິ ຉຫິ ປຸຖຸລກາຊທຓ຺ຑເກຫິ ໂປເຖຍ຺ຍຸໍ. ສຕ຺ຕໂມຕິ ເຕສຸ ຉສຸ ຊເນສຸ ຍເວ ໂປເຖຕ຺ວາ ປສິພ຺ພເກ ປູເຣຕ຺ວາ ອາທາຍ ຄເຕສຸ ອຎ຺ໂຎ ສຕ຺ຕໂມ ອາຄຈ຺ເຉຍ຺ຍ. ສຸຫຕຕຣາ ອສ຺ສາຕິ ຍໍ ຕຕ຺ຖ ອວສິຏ຺ຐໍ ອຕ຺ຖິ ຠຸສປລາປມຕ຺ຕມ຺ປິ, ຕສ຺ສ ຄຫຓຕ຺ຖໍ ສຸຏ຺ຐຸຕຣໍ ຫຕາ.

ເອວເມວ ໂຂຕິ ເອຕ຺ຖ ຈຕຸມຫາປໂຖ ວິຍ ຉ ອາຍຕນານິ ທຏ຺ຐພ຺ພານິ, ຈຕຸມຫາປເຖ ນິກ຺ຂິຕ຺ຕຍວກລາປີ ວິຍ ສຕ຺ໂຕ, ຉ ພ຺ຍາຠງ຺ຄິໂຍ ວິຍ ອິຏ຺ຐານິຏ຺ຐມຊ຺ຌຕ຺ຕວເສນ ອຏ຺ຐາຣສ ອາຣມ຺ມຓານິ, ສຕ຺ຕມາ ພ຺ຍາຠງ຺ຄີ ວິຍ ຠວປຕ຺ຖນາ ກິເລສາ. ຍຖາ ຈຕຸມຫາປເຖ ຐປິຕາ ຍວກລາປີ ຉຫິ ພ຺ຍາຠງ຺ຄີຫິ ຫຎ຺ຎຕິ, ເອວມິເມ ສຕ຺ຕາ ອຏ຺ຐາຣສຫິ ອາຣມ຺ມຓທຓ຺ຑເກຫິ ຉສຸ ອາຍຕເນສຸ ຫຎ຺ຎນ຺ຕິ. ຍຖາ ສຕ຺ຕເມນ ສຸຫຕຕຣາ ໂຫນ຺ຕິ, ເອວໍ ສຕ຺ຕາ ຠວປຕ຺ຖນກິເລເສຫິ ສຸຫຕຕຣາ ໂຫນ຺ຕິ ຠເວມູລກໍ ທຸກ຺ຂໍ ອນຸຠວມານາ.

ອິທານິ ເນສໍ ຕໍ ຠວປຕ຺ຖນກິເລສໍ ທສ຺ເສຕຸໍ ຠູຕປຸພ຺ພໍ, ຠິກ຺ຂເວຕິອາທິມາຫ. ຕຕ຺ຣາຕິ ສຸຘມ຺ມາຍໍ ຠຸມ຺ມໍ, ສຸຘມ຺ມາຍ ເທວສຠາຍ ທ຺ວາເຣຕິ ອຕ຺ໂຖ. ຘມ຺ມິກາ ໂຂ ເທວາຕິ ຘມ຺ມິກາ ເອເຕ ເທວາ ນາມ, ເຍຫິ ມາທິສໍ ອສຸຣາຘິປຕິໍ ຄເຫຕ຺ວາ ມຍ຺ຫໍ ເຠທນມຕ຺ຕມ຺ປິ ນ ກຕນ຺ຕິ ສນ຺ຘາຍ ວທຕິ. ອຘມ຺ມິກາ ເທວາຕິ ອຘມ຺ມິກາ ເອເຕ ເທວາ ນາມ, ເຍ ມາທິສໍ ອສຸຣາຘິປຕິໍ ນວຄູຖສູກຣໍ ວິຍ ກຓ຺ຐປຎ຺ຈເມຫິ ພນ຺ຘເນຫິ ພນ຺ຘິຕ຺ວາ ນິສີທາເປນ຺ຕິ. ເອວໍ ສຸຂຸມໍ ໂຂ, ຠິກ຺ຂເວ, ເວປຈິຕ຺ຕິພນ຺ຘນນ຺ຕິ ຕໍ ກິຣ ປທຸມນາຬສຸຕ຺ຕໍ ວິຍ ມກ຺ກຏຊາລສຸຕ຺ຕໍ ວິຍ ຈ ສຸຂຸມໍ ໂຫຕິ, ເຉຕ຺ຕຸໍ ປນ ເນວ ວາສິຍາ ນ ຜຣສຸນາ ສກ຺ກາ. ຍສ຺ມາ ປນ ຈິຕ຺ເຕເນວ ພຊ຺ຌຕິ, ຈິຕ຺ເຕນ ມຸຈ຺ຈຕິ, ຕສ຺ມາ ‘‘ເວປຈິຕ຺ຕິພນ຺ຘນ’’ນ຺ຕິ ວຸຕ຺ຕໍ.

ຕໂຕ ສຸຂຸມຕຣໍ ມາຣພນ຺ຘນນ຺ຕິ ກິເລສພນ຺ຘນໍ ປເນສໍ ຕໂຕປິ ສຸຂຸມຕຣໍ, ເນວ ຈກ຺ຂຸສ຺ສ ອາປາຖໍ ຄຈ຺ຉຕິ, ນ ອິຣິຍາປຖໍ ນິວາເຣຕິ. ເຕນ ຫິ ພທ຺ຘາ ສຕ຺ຕາ ປຖວິຕເລປິ ອາກາເສປິ ໂຍຊນສຕມ຺ປິ ໂຍຊນສຫສ຺ສມ຺ປິ ຄຈ຺ຉນ຺ຕິປິ ອາຄຈ຺ຉນ຺ຕິປິ. ຉິຊ຺ຊມານໍ ປເນຕໍ ຎາເຓເນວ ຉິຊ຺ຊຕິ, ນ ອຎ຺ເຎນາຕິ ‘‘ຎາຓໂມກ຺ຂໍ ພນ຺ຘນ’’ນ຺ຕິປິ ວຸຈ຺ຈຕິ.

ມຎ຺ຎມາໂນຕິ ຕຓ຺ຫາທິຏ຺ຐິມານານໍ ວເສນ ຂນ຺ເຘ ມຎ຺ຎນ຺ໂຕ. ພທ຺ໂຘ ມາຣສ຺ສາຕິ ມາຣພນ຺ຘເນນ ພທ຺ໂຘ. ກຣຓຕ຺ເຖ ວາ ເອຕໍ ສາມິວຈນໍ, ກິເລສມາເຣນ ພທ຺ໂຘຕິ ອຕ຺ໂຖ. ມຸຕ຺ໂຕ ປາປິມໂຕຕິ ມາຣສ຺ສ ພນ຺ຘເນນ ມຸຕ຺ໂຕ. ກຣຓຕ຺ເຖເຍວ ວາ ອິທໍ ສາມິວຈນໍ, ປາປິມຕາ ກິເລສພນ຺ຘເນນ ມຸຕ຺ໂຕຕິ ອຕ຺ໂຖ.

ອສ຺ມີຕິ ປເທນ ຕຓ຺ຫາມຎ຺ຎິຕໍ ວຸຕ຺ຕໍ. ອຍມຫສ຺ມີຕິ ທິຏ຺ຐິມຎ຺ຎິຕໍ. ຠວິສ຺ສນ຺ຕິ ສສ຺ສຕວເສນ ທິຏ຺ຐິມຎ຺ຎິຕເມວ. ນ ຠວິສ຺ສນ຺ຕິ ອຸຈ຺ເຉທວເສນ. ຣູປີຕິອາທີນິ ສສ຺ສຕສ຺ເສວ ປເຠທທີປນານິ. ຕສ຺ມາຕິ ຍສ຺ມາ ມຎ຺ຎິຕໍ ອາພາຘໍ ອນ຺ໂຕໂທສນິກນ຺ຕນວເສນ ໂຣໂຄ ເຈວ ຄຓ຺ໂຑ ຈ ສລ຺ລຎ຺ຈ, ຕສ຺ມາ. ອິຎ຺ຊິຕນ຺ຕິອາທີນິ ຍສ຺ມາ ອິເມຫິ ກິເລເສຫິ ສຕ຺ຕາ ອິຎ຺ຊນ຺ຕິ ເຈວ ຜນ຺ທນ຺ຕິ ຈ ປປຎ຺ຈິຕາ ຈ ໂຫນ຺ຕິ ປມຕ຺ຕາກາຣປຕ຺ຕາ, ຕສ຺ມາ ເຕສໍ ອາກາຣທສ຺ສນຕ຺ຖໍ ວຸຕ຺ຕານິ.

ມານຄຕວາເຣ ປນ ມານສ຺ສ ຄຕໍ ມານຄຕໍ, ມານປວຕ຺ຕີຕິ ອຕ຺ໂຖ. ມາໂນເຍວ ມານຄຕໍ ຄູຖຄຕໍ ມຸຕ຺ຕຄຕໍ ວິຍ. ຕຕ຺ຖ ອສ຺ມີຕິ ອິທໍ ຕຓ຺ຫາຍ ສມ຺ປຍຸຕ຺ຕມານວເສນ ວຸຕ຺ຕໍ. ອຍມຫມສ຺ມີຕິ ທິຏ຺ຐິວເສນ. ນນຸ ຈ ທິຏ຺ຐິສມ຺ປຍຸຕ຺ໂຕ ນາມ ມາໂນ ນຕ຺ຖີຕິ? ອາມ ນຕ຺ຖິ, ມານສ຺ສ ປນ ອປ຺ປຫີນຕ຺ຕາ ທິຏ຺ຐິ ນາມ ໂຫຕິ. ມານມູລກໍ ທິຏ຺ຐິໍ ສນ຺ຘາເຍຕໍ ວຸຕ຺ຕໍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອາສີວິສວຄ຺ໂຄ.

ຈຕຸຕ຺ໂຖ ປຓ຺ຓາສໂກ.

ສຬາຍຕນສໍຍຸຕ຺ຕວຓ຺ຓນາ ນິຏ຺ຐິຕາ.