໗. ເຂມກສຸຕ຺ຕວຓ຺ຓນາ

໘໙. ສຕ຺ຕເມ ອຕ຺ຕນິຍນ຺ຕິ ອຕ຺ຕໂນ ປຣິກ຺ຂາຣຊາຕໍ. ອສ຺ມີຕິ ອຘິຄຕນ຺ຕິ ອສ຺ມີຕິ ເອວໍ ປວຕ຺ຕາ ຕຓ຺ຫາມານາ ອຘິຄຕາ. ສນ຺ຘາວນິກາຍາຕິ ປຸນປ຺ປຸນໍ ຄມນາຄມເນນ. ອຸປສງ຺ກມີຕິ ພທຣິກາຣາມໂຕ ຄາວຸຕມຕ຺ຕໍ ໂຆສິຕາຣາມໍ ອຄມາສິ. ທາສກຕ຺ເຖໂຣ ປນ ຈຕຸກ຺ຂຕ຺ຕຸໍ ຄມນາຄມເນນ ຕໍທິວສໍ ທ຺ວິໂຍຊນໍ ອທ຺ຘານໍ ອາຫິຓ຺ຑິ. ກສ຺ມາ ປນ ຕໍ ເຖຣາ ປຫິຓິໍສຸ? ວິສ຺ສຸຕສ຺ສ ຘມ຺ມກຖິກສ຺ສ ສນ຺ຕິກາ ຘມ຺ມໍ ສຸຓິສ຺ສາມາຕິ. ສຍໍ ກສ຺ມາ ນ ຄຕາຕິ? ເຖຣສ຺ສ ວສນຏ຺ຐານໍ ອຣຎ຺ຎໍ ສມ຺ພາຘໍ, ຕຕ຺ຖ ສຏ຺ຐິມຕ຺ຕານໍ ເຖຣານໍ ຐາຕຸໍ ວາ ນິສີທິຕຸໍ ວາ ໂອກາໂສ ນຕ຺ຖີຕິ ນ ຄຕາ. ‘‘ອິຘາຄນ຺ຕ຺ວາ ອມ຺ຫາກໍ ຘມ຺ມໍ ກເຖຕູ’’ຕິປິ ກສ຺ມາ ປນ ນ ປຫິຓິໍສູຕິ? ເຖຣສ຺ສ ອາພາຘິກຕ຺ຕາ. ອຖ ກສ຺ມາ ປຸນປ຺ປຸນໍ ປຫິຓິໍສູຕິ? ສຍເມວ ຎຕ຺ວາ ອມ຺ຫາກໍ ກເຖຕຸໍ ອາຄມິສ຺ສຕີຕິ. ເຖໂຣປິ ເຕສໍ ອຊ຺ຌາສຍໍ ຎຕ຺ວາວ ອຄມາສີຕິ.

ນ ຂ຺ວາຫໍ, ອາວຸໂສ, ຣູປນ຺ຕິ ໂຍ ຫິ ຣູປເມວ ອສ຺ມີຕິ ວທຕິ, ເຕນ ອິຕເຣ ຈຕ຺ຕາໂຣ ຂນ຺ຘາ ປຈ຺ຈກ຺ຂາຕາ ໂຫນ຺ຕິ. ໂຍ ອຎ຺ຎຕ຺ຣ ຣູປາ ວທຕິ, ເຕນ ຣູປໍ ປຈ຺ຈກ຺ຂາຕໍ ໂຫຕິ. ເວທນາທີສຸປິ ເອເສວ ນໂຍ. ເຖຣສ຺ສ ປນ ສມູຫໂຕ ປຎ຺ຈສຸປິ ຂນ຺ເຘສຸ ອສ຺ມີຕິ ອຘິຄໂຕ, ຕສ຺ມາ ເອວມາຫ. ໂຫເຕວາຕິ ໂຫຕິເຍວ. ອນຸສຫຄໂຕຕິ ສຸຂຸໂມ. ອູເສຕິ ຉາຣິກາຂາເຣ. ຂາເຣຕິ ອູສຂາເຣ. ສມ຺ມທ຺ທິຕ຺ວາຕິ ເຕເມຕ຺ວາ ຂາເທຕ຺ວາ.

ເອວເມວ ໂຂຕິ ເອຕ຺ຖ ອິທໍ ໂອປມ຺ມສໍສນ຺ທນໍ – ກິລິຏ຺ຐວຕ຺ຖໍ ວິຍ ຫິ ປຸຖຸຊ຺ຊນສ຺ສ ຈິຕ຺ຕາຈາໂຣ, ຕໂຍ ຂາຣາ ວິຍ ຕິສ຺ໂສ ອນຸປສ຺ສນາ, ຕີຫິ ຂາເຣຫິ ໂຘຕວຕ຺ຖໍ ວິຍ ເທສນາຍ ມທ຺ທິຕ຺ວາ ຐິໂຕ ອນາຄາມິໂນ ຈິຕ຺ຕາຈາໂຣ, ອນຸສຫຄໂຕ ອູສາທິຄນ຺ໂຘ ວິຍ ອຣຫຕ຺ຕມຄ຺ຄວຊ຺ຌາ ກິເລສາ, ຄນ຺ຘກຣຓ຺ຑໂກ ວິຍ ອຣຫຕ຺ຕມຄ຺ຄຎາຓໍ ຄນ຺ຘກຣຓ຺ຑກໍ ອາຄມ຺ມ ອນຸສຫຄຕານໍ ອູສຄນ຺ຘາທີນໍ ສມຸຄ຺ຆາໂຕ ວິຍ ອຣຫຕ຺ຕມຄ຺ເຄນ ສພ຺ພກິເລສກ຺ຂໂຍ, ຄນ຺ຘປຣິຠາວິຕວຕ຺ຖໍ ນິວາເສຕ຺ວາ ຉຓທິວເສ ອນ຺ຕຣວີຖິຍໍ ສຸຄນ຺ຘຄນ຺ຘິໂນ ວິຈຣຓໍ ວິຍ ຂີຓາສວສ຺ສ ສີລຄນ຺ຘາທີຫິ ທສ ທິສາ ອຸປວາຍນ຺ຕສ຺ສ ຍຖາກາມຈາໂຣ.

ອາຈິກ຺ຂິຕຸນ຺ຕິ ກເຖຕຸໍ. ເທເສຕຸນ຺ຕິ ປກາເສຕຸໍ. ປຎ຺ຎາເປຕຸນ຺ຕິ ຊານາເປຕຸໍ. ປຏ຺ຐເປຕຸນ຺ຕິ ປຕິຏ຺ຐາເປຕຸໍ. ວິວຣິຕຸນ຺ຕິ ວິວຏໍ ກາຕຸໍ. ວິຠຊິຕຸນ຺ຕິ ສຸວິຠຕ຺ຕໍ ກາຕຸໍ. ອຸຕ຺ຕານີກາຕຸນ຺ຕິ ອຸຕ຺ຕານກໍ ກາຕຸໍ. ສຏ຺ຐິມຕ຺ຕານໍ ເຖຣານນ຺ຕິ ເຕ ກິຣ ເຖເຣນ ກຖິຕກຖິຕຏ຺ຐາເນ ວິປສ຺ສນໍ ປຏ຺ຐເປຕ຺ວາ ອຸປຣູປຣິ ສມ຺ມສນ຺ຕາ ເທສນາປຣິໂຍສາເນ ອຣຫຕ຺ຕໍ ປາປຸຓິໍສຸ. ເຖໂຣປິ ອຎ຺ເຎນ ນີຫາເຣນ ອກເຖຕ຺ວາ ວິປສ຺ສນາສຫຄຕຈິຕ຺ເຕເນວ ກເຖສິ. ຕສ຺ມາ ໂສປິ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ – ‘‘ສຏ຺ຐິມຕ຺ຕານໍ ເຖຣານໍ ຠິກ຺ຂູນໍ ອນຸປາທາຍ ອາສເວຫິ ຈິຕ຺ຕານິ ວິມຸຈ຺ຈິໍສຸ ອາຍສ຺ມໂຕ ເຂມກສ຺ສ ຈາ’’ຕິ. ສຕ຺ຕມໍ.