໔. ອນຸຣາຘສຸຕ຺ຕວຓ຺ຓນາ

໘໖. ຈຕຸຕ຺ເຖ ອຣຎ຺ຎກຸຏິກາຍນ຺ຕິ ຕສ຺ເສວ ວິຫາຣສ຺ສ ປຈ຺ຈນ຺ເຕ ປຓ຺ຓສາລາຍໍ. ຕໍ ຕຖາຄໂຕຕິ ຕຸມ຺ຫາກໍ ສຕ຺ຖາ ຕຖາຄໂຕ ຕໍ ສຕ຺ຕໍ ຕຖາຄຕໍ. ອຎ຺ຎຕ຺ຣ ອິເມຫີຕິ ຕສ຺ສ ກິຣ ເອວໍ ອໂຫສິ ‘‘ອິເມ ສາສນສ຺ສ ປຏິປກ຺ຂາ ປຏິວິໂລມາ, ຍຖາ ອິເມ ຠຓນ຺ຕິ, ນ ເອວໍ ສຕ຺ຖາ ປຎ຺ຎາເປສ຺ສຕິ, ອຎ຺ຎຖາ ປຎ຺ຎາເປສ຺ສຕີ’’ຕິ. ຕສ຺ມາ ເອວມາຫ. ເອວໍ ວຸຕ຺ເຕ ເຕ ອຎ຺ຎຕິຕ຺ຖິຍາຕິ ເອວໍ ເຖເຣນ ອຕ຺ຕໂນ ຈ ປເຣສຎ຺ຈ ສມຍໍ ອຊານິຕ຺ວາ ວຸຕ຺ເຕ ເອກເທເສນ ສາສນສມຍໍ ຊານນ຺ຕາ ເຖຣສ຺ສ ວາເທ ໂທສໍ ທາຕຸກາມາ ເຕ ອຎ຺ຎຕິຕ຺ຖິຍາ ປຣິພ຺ພາຊກາ ອາຍສ຺ມນ຺ຕໍ ອນຸຣາຘໍ ເອຕທໂວຈຸໍ.

ຕໍ ກິໍ ມຎ຺ຎສິ ອນຸຣາຘາຕິ ສຕ຺ຖາ ຕສ຺ສ ກຖໍ ສຸຕ຺ວາ ຈິນ຺ເຕສິ – ‘‘ອຍໍ ຠິກ຺ຂຸ ອຕ຺ຕໂນ ລທ຺ຘິຍໍ ໂທສໍ ນ ຊານາຕິ, ກາຣໂກ ປເນສ ຍຸຕ຺ຕໂຍໂຄ, ຘມ຺ມເທສນາຍ ເອວ ນໍ ຊານາເປສ຺ສາມີ’’ຕິ ຕິປຣິວຏ຺ຏໍ ເທສນໍ ເທເສຕຸກາໂມ ‘‘ຕໍ ກິໍ ມຎ຺ຎສິ, ອນຸຣາຘາ’’ຕິອາທິມາຫ. ອຖສ຺ສ ຕາຍ ເທສນາຍ ອຣຫຕ຺ຕປ຺ປຕ຺ຕສ຺ສ ອນຸໂຍຄວຕ຺ຕໍ ອາໂຣເປນ຺ໂຕ ຕໍ ກິໍ ມຎ຺ຎສິ, ອນຸຣາຘ? ຣູປໍ ຕຖາຄໂຕຕິອາທິມາຫ. ທຸກ຺ຂຎ຺ເຈວ ປຎ຺ຎເປມິ, ທຸກ຺ຂສ຺ສ ຈ ນິໂຣຘນ຺ຕິ ວຏ຺ຏທຸກ຺ຂຎ຺ເຈວ ວຏ຺ຏທຸກ຺ຂສ຺ສ ຈ ນິໂຣຘໍ ນິພ຺ພານໍ ປຎ຺ຎເປມິ. ທຸກ຺ຂນ຺ຕິ ວາ ວຈເນນ ທຸກ຺ຂສຈ຺ຈໍ ຄຫິຕໍ. ຕສ຺ມິໍ ຄຫິເຕ ສມຸທຍສຈ຺ຈໍ ຄຫິຕເມວ ໂຫຕິ, ຕສ຺ສ ມູລຕ຺ຕາ. ນິໂຣຘນ຺ຕິ ວຈເນນ ນິໂຣຘສຈ຺ຈໍ ຄຫິຕໍ. ຕສ຺ມິໍ ຄຫິເຕ ມຄ຺ຄສຈ຺ຈໍ ຄຫິຕເມວ ໂຫຕິ ຕສ຺ສ ອຸປາຍຕ຺ຕາ. ອິຕິ ປຸພ຺ເພ ຈາຫໍ, ອນຸຣາຘ, ເອຕຣຫິ ຈ ຈຕຸສຈ຺ຈເມວ ປຎ຺ຎເປມີຕິ ທສ຺ເສຕິ. ເອວໍ ອິມສ຺ມິໍ ສຸຕ຺ເຕ ວຏ຺ຏວິວຏ຺ຏເມວ ກຖິຕໍ. ຈຕຸຕ຺ຖໍ.