໓. ຍມກສຸຕ຺ຕວຓ຺ຓນາ

໘໕. ຕຕິເຍ ທິຏ຺ຐິຄຕນ຺ຕິ ສເຈ ຫິສ຺ສ ເອວໍ ຠເວຍ຺ຍ ‘‘ສງ຺ຂາຣາ ອຸປ຺ປຊ຺ຊນ຺ຕິ ເຈວ ນິຣຸຊ຺ຌນ຺ຕິ ຈ, ສງ຺ຂາຣປ຺ປວຕ຺ຕເມວ ອປ຺ປວຕ຺ຕໍ ໂຫຕີ’’ຕິ, ທິຏ຺ຐິຄຕໍ ນາມ ນ ຠເວຍ຺ຍ, ສາສນາວຈຣິກໍ ຎາຓໍ ຠເວຍ຺ຍ. ຍສ຺ມາ ປນສ຺ສ ‘‘ສຕ຺ໂຕ ອຸຈ຺ຉິຊ຺ຊຕິ ວິນສ຺ສຕີ’’ຕິ ອໂຫສິ, ຕສ຺ມາ ທິຏ຺ຐິຄຕໍ ນາມ ຊາຕໍ. ຖາມສາ ປຣາມາສາຕິ ທິຏ຺ຐິຖາເມນ ເຈວ ທິຏ຺ຐິປຣາມາເສນ ຈ.

ເຍນາຍສ຺ມາ ສາຣິປຸຕ຺ໂຕຕິ ຍຖາ ນາມ ປຈ຺ຈນ຺ເຕ ກຸປິເຕ ຕໍ ວູປສເມຕຸໍ ອສກ຺ໂກນ຺ຕາ ຣາຊປຸຣິສາ ເສນາປຕິສ຺ສ ວາ ຣຎ຺ໂຎ ວາ ສນ຺ຕິກໍ ຄຈ຺ຉນ຺ຕິ, ເອວໍ ທິຏ຺ຐິຄຕວເສນ ຕສ຺ມິໍ ເຖເຣ ກຸປິເຕ ຕໍ ວູປສເມຕຸໍ ອສກ຺ໂກນ຺ຕາ ເຕ ຠິກ຺ຂູ ເຍນ ຘມ຺ມຣາຊສ຺ສ ຘມ຺ມເສນາປຕິ ອາຍສ຺ມາ ສາຣິປຸຕ຺ໂຕ, ເຕນຸປສງ຺ກມິໍສຸ. ເອວໍພ຺ຍາໂຂຕິ ເຕສໍ ຠິກ຺ຂູນໍ ສນ຺ຕິເກ ວິຍ ເຖຣສ຺ສ ສມ຺ມຸຂາ ປຄ຺ຄຍ຺ຫ ວຕ຺ຕຸໍ ອສກ຺ໂກນ຺ໂຕ ໂອລມ຺ພນ຺ເຕນ ຫທເຍນ ‘‘ເອວໍພ຺ຍາໂຂ’’ຕິ ອາຫ. ຕໍ ກິໍ ມຎ຺ຎສິ, ອາວຸໂສຕິ? ອິທໍ ເຖໂຣ ຕສ຺ສ ວຈນໍ ສຸຕ຺ວາ, ‘‘ນາຍໍ ອຕ຺ຕໂນ ລທ຺ຘິຍໍ ໂທສໍ ປສ຺ສຕິ, ຘມ຺ມເທສນາຍ ອສ຺ສ ຕໍ ປາກຏໍ ກຣິສ຺ສາມີ’’ຕິ ຈິນ຺ເຕຕ຺ວາ ຕິປຣິວຏ຺ຏໍ ເທສນໍ ເທເສຕຸໍ ອາຣຠິ.

ຕໍ ກິໍ ມຎ຺ຎສິ, ອາວຸໂສ ຍມກ, ຣູປໍ ຕຖາຄໂຕຕິ ອິທໍ ກສ຺ມາ ອາຣທ຺ຘໍ? ອນຸໂຍຄວຕ຺ຕໍ ທາປນຕ຺ຖໍ. ຕິປຣິວຏ຺ຏເທສນາວສານສ຺ມິຎ຺ຫິ ເຖໂຣ ໂສຕາປນ຺ໂນ ຊາໂຕ. ອຖ ນໍ ອນຸໂຍຄວຕ຺ຕໍ ທາເປຕຸໍ ‘‘ຕໍ ກິໍ ມຎ຺ຎສີ’’ຕິອາທິມາຫ? ຕຖາຄໂຕຕິ ສຕ຺ໂຕ. ຣູປໍ ເວທນາ ສຎ຺ຎາ ສງ຺ຂາຣາ ວິຎ຺ຎາຓນ຺ຕິ ອິເມ ປຎ຺ຈກ຺ຂນ຺ເຘ ສມ຺ປິຓ຺ເຑຕ຺ວາ ‘‘ຕຖາຄໂຕ’’ຕິ ສມນຸປສ຺ສສີຕິ ປຸຈ຺ຉຕິ. ເອຕ຺ຖ ຈ ເຕ, ອາວຸໂສຕິ ອິທໍ ເຖຣສ຺ສ ອນຸໂຍເຄ ຠຸມ຺ມໍ. ອິທໍ ວຸຕ຺ຕໍ ໂຫຕິ – ເອຕ຺ຖ ຈ ເຕ ເອຕ຺ຕເກ ຐາເນ ທິຏ຺ເຐວ ຘມ຺ເມ ສຈ຺ຈໂຕ ຖິຣໂຕ ສຕ຺ເຕ ອນຸປລພ຺ຠິຍມາເນຕິ. ສເຈ ຕໍ, ອາວຸໂສຕິ ອິທເມຕໍ ອຎ຺ຎໍ ພ຺ຍາກຣາເປຕຸກາໂມ ປຸຈ຺ຉຕິ. ຍໍ ທຸກ຺ຂໍ ຕໍ ນິຣຸທ຺ຘນ຺ຕິ ຍໍ ທຸກ຺ຂໍ, ຕເທວ ນິຣຸທ຺ຘໍ, ອຎ຺ໂຎ ສຕ຺ໂຕ ນິຣຸຊ຺ຌນໂກ ນາມ ນຕ຺ຖິ, ເອວໍ ພ຺ຍາກເຣຍ຺ຍນ຺ຕິ ອຕ຺ໂຖ.

ເອຕສ຺ເສວ ອຕ຺ຖສ຺ສາຕິ ເອຕສ຺ສ ປຐມມຄ຺ຄສ຺ສ. ຠິຍ຺ໂຍໂສມຕ຺ຕາຍ ຎາຓາຍາຕິ ອຕິເຣກປ຺ປມາຓສ຺ສ ຎາຓສ຺ສ ອຕ຺ຖາຍ, ສຫວິປສ຺ສນການໍ ອຸປຣິ ຈ ຕິຓ຺ຓໍ ມຄ຺ຄານໍ ອາວິຠາວຕ຺ຖາຍາຕິ ອຕ຺ໂຖ. ອາຣກ຺ຂສມ຺ປນ຺ໂນຕິ ອນ຺ໂຕອາຣກ຺ເຂນ ເຈວ ພຫິອາຣກ຺ເຂນ ຈ ສມນ຺ນາຄໂຕ. ອໂຍຄກ຺ເຂມກາໂມຕິ ຈຕູຫິ ໂຍເຄຫິ ເຂມຠາວໍ ອນິຈ຺ຉນ຺ໂຕ. ປສຍ຺ຫາຕິ ປສຍ຺ຫິຕ຺ວາ ອຠິຠວິຕ຺ວາ. ອນຸປຂຊ຺ຊາຕິ ອນຸປວິສິຕ຺ວາ.

ປຸພ຺ພຸຏ຺ຐາຍີຕິອາທີສຸ ທູຣໂຕວ ອາຄຈ຺ຉນ຺ຕໍ ທິສ຺ວາ ອາສນໂຕ ປຐມຕຣໍ ວຸຏ຺ຐາຕີຕິ ປຸພ຺ພຸຏ຺ຐາຍີ. ຕສ຺ສ ອາສນໍ ທຕ຺ວາ ຕສ຺ມິໍ ນິສິນ຺ເນ ປຈ຺ຉາ ນິປຕຕິ ນິສີທຕີຕິ, ປຈ຺ຉານິປາຕີ. ປາໂຕວ ວຸຏ຺ຐາຍ ‘‘ເອຕ຺ຕກາ ກສິຕຸໍ ຄຈ຺ຉຖ, ເອຕ຺ຕກາ ວປິຕຸ’’ນ຺ຕິ ວາ ສພ຺ພປຐມໍ ວຸຏ຺ຐາຕີຕິ ປຸພ຺ພຸຏ຺ຐາຍີ. ສາຍໍ ສພ຺ເພສຸ ອຕ຺ຕໂນ ອຕ຺ຕໂນ ວສນຏ຺ຐານໍ ຄເຕສຸ ເຄຫສ຺ສ ສມນ຺ຕໂຕ ອາຣກ຺ຂໍ ສໍວິຘາຍ ທ຺ວາຣານິ ຖເກຕ຺ວາ ສພ຺ພປຈ຺ຉາ ນິປຊ຺ຊນໂຕປິ ປຈ຺ຉານິປາຕີ. ‘‘ກິໍ ກໂຣມິ, ອຍ຺ຍປຸຕ຺ຕ? ກິໍ ກໂຣມິ ອຍ຺ຍປຸຕ຺ຕາ’’ຕິ? ມຸຂໍ ໂອໂລເກນ຺ໂຕ ກິໍກາຣໍ ປຏິສາເວຕີຕິ ກິໍກາຣປຏິສ຺ສາວີ. ມນາປໍ ຈຣຕີຕິ ມນາປຈາຣີ. ປິຍໍ ວທຕີຕິ ປິຍວາທີ. ມິຕ຺ຕໂຕປິ ນໍ ສທ຺ທເຫຍ຺ຍາຕິ ມິຕ຺ໂຕ ເມ ອຍນ຺ຕິ ສທ຺ທເຫຍ຺ຍ. ວິສ຺ສາສໍ ອາປຊ຺ເຊຍ຺ຍາຕິ ເອກໂຕ ປານໂຠຊນາທິໍ ກໂຣນ຺ໂຕ ວິສ຺ສາສິໂກ ຠເວຍ຺ຍ. ສໍວິສ຺ສຕ຺ໂຖຕິ ສຸຏ຺ຐຸ ວິສ຺ສຕ຺ໂຖ.

ເອວເມວ ໂຂຕິ ເອຕ຺ຖ ອິທໍ ໂອປມ຺ມສໍສນ຺ທນໍ – ພາລຄຫປຕິປຸຕ຺ໂຕ ວິຍ ຫິ ວຏ຺ຏສນ຺ນິສ຺ສິຕກາເລ ອສ຺ສຸຕວາ ປຸຖຸຊ຺ຊໂນ, ວຘກປຈ຺ຈາມິຕ຺ໂຕ ວິຍ ອພລທຸພ຺ພລາ ປຎ຺ຈກ຺ຂນ຺ຘາ, ວຘກປຈ຺ຈາມິຕ຺ຕສ຺ສ ‘‘ພາລຄຫປຕິປຸຕ຺ຕໍ ອຸປຏ຺ຐຫິສ຺ສາມີ’’ຕິ ອຸປຄຕກາໂລ ວິຍ ປຏິສນ຺ຘິກ຺ຂເຓ ອຸປຄຕາ ປຎ຺ຈກ຺ຂນ຺ຘາ, ຕສ຺ສ ຫິ ‘‘ນ ເມ ອຍໍ ສຫາໂຍ, ວຘກປຈ຺ຈຕ຺ຖິໂກ ອຍ’’ນ຺ຕິ ອຊານນກາໂລ ວິຍ ວຏ຺ຏນິສ຺ສິຕປຸຖຸຊ຺ຊນສ຺ສ ປຎ຺ຈກ຺ຂນ຺ເຘ ‘‘ນ ອິເມ ມຍ຺ຫ’’ນ຺ຕິ ອຄເຫຕ຺ວາ ‘‘ມມ ຣູປໍ, ມມ ເວທນາ, ມມ ສຎ຺ຎາ, ມມ ສງ຺ຂາຣາ, ມມ ວິຎ຺ຎາຓ’’ນ຺ຕິ ຄຫິຕກາໂລ, ວຘກປຈ຺ຈຕ຺ຖິກສ຺ສ ‘‘ມິຕ຺ໂຕ ເມ ອຍ’’ນ຺ຕິ ຄເຫຕ຺ວາ ສກ຺ກາຣກຣຓກາໂລ ວິຍ ‘‘ມມ ອິເມ’’ຕິ ຄເຫຕ຺ວາ ປຎ຺ຈນ຺ນໍ ຂນ຺ຘານໍ ນ຺ຫາປນໂຠຊນາທີຫິ ສກ຺ກາຣກຣຓກາໂລ, ‘‘ອຕິວິສ຺ສຕ຺ໂຖ ເມ ອຍ’’ນ຺ຕິ ຎຕ຺ວາ ສກ຺ກາຣໍ ກໂຣນ຺ຕສ຺ເສວ ອສິນາ ສີສຈ຺ຉິນ຺ທນໍ ວິຍ ວິສ຺ສຕ຺ຖສ຺ສ ພາລປຸຖຸຊ຺ຊນສ຺ສ ຕິຂິເຓຫິ ຠິຊ຺ຊມາເນຫິ ຂນ຺ເຘຫິ ຊີວິຕປຣິຍາທານໍ ເວທິຕພ຺ພໍ.

ອຸເປຕີຕິ ອຸປຄຈ຺ຉຕິ. ອຸປາທິຍຕີຕິ ຄຓ຺ຫາຕິ. ອຘິຏ຺ຐາຕີຕິ ອຘິຕິຏ຺ຐຕິ. ອຕ຺ຕາ ເມຕິ ອຍໍ ເມ ອຕ຺ຕາຕິ. ສຸຕວາ ຈ ໂຂ, ອາວຸໂສ, ອຣິຍສາວໂກຕິ ຍຖາ ປນ ປຓ຺ຑິໂຕ ຄຫປຕິປຸຕ຺ໂຕ ເອວໍ ອຸປຄຕໍ ປຈ຺ຈຕ຺ຖິກໍ ‘‘ປຈ຺ຈຕ຺ຖິໂກ ເມ ອຍ’’ນ຺ຕິ ຎຕ຺ວາ ອປ຺ປມຕ຺ໂຕ ຕານິ ຕານິ ກມ຺ມານິ ກາເຣຕ຺ວາ ອນຕ຺ຖໍ ປຣິຫຣຕິ, ອຕ຺ຖໍ ປາປຸຓາຕິ, ເອວໍ ສຸຕວາ ອຣິຍສາວໂກປິ ‘‘ນ ຣູປໍ ອຕ຺ຕໂຕ ສມນຸປສ຺ສຕີ’’ຕິອາທິນາ ນເຍນ ປຎ຺ຈກ຺ຂນ຺ເຘ ອຫນ຺ຕິ ວາ ມມນ຺ຕິ ວາ ອຄເຫຕ຺ວາ, ‘‘ປຈ຺ຈຕ຺ຖິກາ ເມ ເອເຕ’’ຕິ ຎຕ຺ວາ ຣູປສຕ຺ຕກອຣູປສຕ຺ຕກາທິວເສນ ວິປສ຺ສນາຍ ໂຍເຊຕ຺ວາວ ຕໂຕນິທານໍ ທຸກ຺ຂໍ ປຣິວຊ຺ເຊຕ຺ວາ ອຄ຺ຄຜລໍ ອຣຫຕ຺ຕໍ ປາປຸຓາຕິ. ເສສເມຕ຺ຖ ອຸຕ຺ຕານເມວ. ຕຕິຍໍ.