໒. ຕິສ຺ສສຸຕ຺ຕວຓ຺ຓນາ

໘໔. ທຸຕິເຍ ມຘຸຣກຊາໂຕ ວິຍາຕິ ສຎ຺ຊາຕຄຣຸຠາໂວ ວິຍ ອກມ຺ມຎ຺ໂຎ. ທິສາປິ ເມຕິ ອຍໍ ປຸຣຕ຺ຖິມາ ອຍໍ ທກ຺ຂິຓາຕິ ເອວໍ ທິສາປິ ມຍ຺ຫໍ ນ ປກ຺ຂາຍນ຺ຕິ, ນ ປາກຏາ ໂຫນ຺ຕີຕິ ວທຕິ. ຘມ຺ມາປິ ມໍ ນ ປຏິຠນ຺ຕີຕິ ປຣິຍຕ຺ຕິຘມ຺ມາປິ ມຍ຺ຫໍ ນ ອຸປຏ຺ຐຫນ຺ຕິ, ອຸຄ຺ຄຫິຕໍ ສຊ຺ຌາຍິຕໍ ນ ທິສ຺ສຕີຕິ ວທຕິ. ວິຈິກິຈ຺ຉາຕິ ໂນ ມຫາວິຈິກິຈ຺ຉາ. ນ ຫິ ຕສ຺ສ ‘‘ສາສນໍ ນິຍ຺ຍານິກໍ ນຸ ໂຂ, ນ ນຸ ໂຂ’’ຕິ ວິມຕິ ອຸປ຺ປຊ຺ຊຕິ. ເອວໍ ປນສ຺ສ ໂຫຕິ ‘‘ສກ຺ຂິສ຺ສາມິ ນຸ ໂຂ ສມຓຘມ຺ມໍ ກາຕຸໍ, ອຸທາຫຸ ປຕ຺ຕຈີວຣຘາຣຓມຕ຺ຕເມວ ກຣິສ຺ສາມີ’’ຕິ.

ກາມານເມຕໍ ອຘິວຈນນ຺ຕິ ຍຖາ ຫິ ນິນ຺ນໍ ປລ຺ລລໍ ໂອໂລເກນ຺ຕສ຺ສ ທສ຺ສນຣາມເຓຍ຺ຍກມຕ຺ຕໍ ອຕ຺ຖິ, ໂຍ ປເນຕ຺ຖ ໂອຕຣຕິ, ຕໍ ຈຓ຺ຑມີນາກຸລຕາຍ ອາກຑ຺ຒິຕ຺ວາ ອນຍພ຺ຍສນໍ ປາເປຕິ, ເອວເມວໍ ປຎ຺ຈສຸ ກາມຄຸເຓສຸ ຈກ຺ຂຸທ຺ວາຣາທີນໍ ອາຣມ຺ມເຓ ຣາມເຓຍ຺ຍກມຕ຺ຕໍ ອຕ຺ຖິ, ໂຍ ປເນຕ຺ຖ ເຄຘໍ ອາປຊ຺ຊຕິ, ຕໍ ອາກຑ຺ຒິຕ຺ວາ ນິຣຍາທີສຸ ເອວ ປກ຺ຂິປນ຺ຕິ. ອປ຺ປສ຺ສາທາ ຫິ ກາມາ ພຫຸທຸກ຺ຂາ ພຫຸປາຍາສາ, ອາທີນໂວ ເອຕ຺ຖ ຠິຍ຺ໂຍຕິ ອິມໍ ອຕ຺ຖວສໍ ປຏິຈ຺ຈ ‘‘ກາມານເມຕໍ ອຘິວຈນ’’ນ຺ຕິ ວຸຕ຺ຕໍ. ອຫມນຸຄ຺ຄເຫນາຕິ ອຫໍ ຘມ຺ມາມິສານຸຄ຺ຄເຫຫິ ອນຸຄ຺ຄຓ຺ຫາມິ. ອຠິນນ຺ທີຕິ ສມ຺ປຏິຈ຺ຉິ. ນ ເກວລຎ຺ຈ ອຠິນນ຺ທິ, ອິມໍ ປນ ສຕ຺ຖຸ ສນ຺ຕິກາ ອສ຺ສາສໍ ລຠິຕ຺ວາ ຆເຏນ຺ໂຕ ວາຍມນ຺ໂຕ ກຕິປາເຫນ ອຣຫຕ຺ເຕ ປຕິຏ຺ຐາສິ. ທຸຕິຍໍ.