໘. ປິຓ຺ໂຑລ຺ຍສຸຕ຺ຕວຓ຺ຓນາ

໘໐. ອຏ຺ຐເມ ກິສ຺ມິຎ຺ຈິເທວ ປກຣເຓຕິ ກິສ຺ມິຎ຺ຈິເທວ ກາຣເຓ. ປຓາເມຕ຺ວາຕິ ນີຫຣິຕ຺ວາ. ກິສ຺ມິໍ ປນ ກາຣເຓ ເອເຕ ຠຄວຕາ ປຓາມິຕາຕິ? ເອກສ຺ມິຎ຺ຫິ ອນ຺ໂຕວສ຺ເສ ຠຄວາ ສາວຕ຺ຖິຍໍ ວສິຕ຺ວາ ວຸຕ຺ຖວສ຺ໂສ ປວາເຣຕ຺ວາ ມຫາຠິກ຺ຂຸສງ຺ຆປຣິວາໂຣ ສາວຕ຺ຖິໂຕ ນິກ຺ຂມິຕ຺ວາ ຊນປທຈາຣິກໍ ຈຣນ຺ໂຕ ກປິລວຕ຺ຖຸໍ ປຕ຺ວາ ນິຄ຺ໂຣຘາຣາມໍ ປາວິສິ. ສກ຺ຍຣາຊາໂນ ‘‘ສຕ຺ຖາ ອາຄໂຕ’’ຕິ ສຸຕ຺ວາ ປຈ຺ຉາຠຕ຺ເຕ ກປ຺ປິຍານິ ເຕລມຘຸຜາຓິຕາທີນິ ເຈວ ປານການິ ຈ ກາຊສເຕຫິ ຄາຫາເປຕ຺ວາ ວິຫາຣໍ ຄນ຺ຕ຺ວາ ສງ຺ຆສ຺ສ ນິຍ຺ຍາເຕຕ຺ວາ ສຕ຺ຖາຣໍ ວນ຺ທິຕ຺ວາ ປຏິສນ຺ຖາຣໍ ກໂຣນ຺ຕາ ເອກມນ຺ເຕ ນິສີທິໍສຸ. ສຕ຺ຖາ ເຕສໍ ມຘຸຣຘມ຺ມກຖໍ ກເຖນ຺ໂຕ ນິສີທິ. ຕສ຺ມິໍ ຂເຓ ເອກຈ຺ເຈ ຠິກ຺ຂູ ເສນາສນໍ ປຏິຊຄ຺ຄນ຺ຕິ, ເອກຈ຺ເຈ ມຎ຺ຈປີຐາທີນິ ປຎ຺ຎາເປນ຺ຕິ, ສາມເຓຣາ ອປ຺ປຫຣິຕໍ ກໂຣນ຺ຕິ. ຠາຊນີຍຏ຺ຐາເນ ສມ຺ປຕ຺ຕຠິກ຺ຂູປິ ອຕ຺ຖິ, ອສມ຺ປຕ຺ຕຠິກ຺ຂູປິ ອຕ຺ຖິ. ສມ຺ປຕ຺ຕາ ອສມ຺ປຕ຺ຕານໍ ລາຠໍ ຄຓ຺ຫນ຺ຕາ, ‘‘ອມ຺ຫາກໍ ເທຖ, ອມ຺ຫາກໍ ອາຈຣິຍສ຺ສ ເທຖ ອຸປຊ຺ຌາຍສ຺ສ ເທຖາ’’ຕິ ກເຖນ຺ຕາ ມຫາສທ຺ທມກໍສຸ. ສຕ຺ຖາ ສຸຕ຺ວາ ເຖຣໍ ປຸຈ຺ຉິ ‘‘ເກ ປນ ເຕ, ອານນ຺ທ, ອຸຈ຺ຈາສທ຺ທາ ມຫາສທ຺ທາ ເກວຏ຺ຏາ ມຎ຺ເຎ ມຈ຺ຉວິໂລເປ’’ຕິ? ເຖໂຣ ເອຕມຕ຺ຖໍ ອາໂຣເຈສິ. ສຕ຺ຖາ ສຸຕ຺ວາ ‘‘ອາມິສເຫຕຸ, ອານນ຺ທ, ຠິກ຺ຂູ ມຫາສທ຺ທໍ ກໂຣນ຺ຕີ’’ຕິ ອາຫ. ‘‘ອາມ, ຠນ຺ເຕ’’ຕິ. ‘‘ອນນຸຈ຺ຉວິກໍ, ອານນ຺ທ, ອປ຺ປຕິຣູປໍ. ນ ຫິ ມຍາ ກປ຺ປສຕສຫສ຺ສາຘິການິ ຈຕ຺ຕາຣິ ອສງ຺ຂ຺ເຍຍ຺ຍານິ ຈີວຣາທິເຫຕຸ ປາຣມິໂຍ ປູຣິຕາ, ນາປິ ອິເມ ຠິກ຺ຂູ ຈີວຣາທິເຫຕຸ ອຄາຣສ຺ມາ ອນຄາຣິຍໍ ປພ຺ພຊິຕາ, ອຣຫຕ຺ຕເຫຕຸ ປພ຺ພຊິຕ຺ວາ ອນຕ຺ຖໍ ອຕ຺ຖສທິສໍ ອສາຣໍ ສາຣສທິສໍ ກໂຣນ຺ຕິ, ຄຈ຺ຉານນ຺ທ, ເຕ ຠິກ຺ຂູ ປຓາເມຫີ’’ຕິ.

ປຸພ຺ພຓ຺ຫສມຍນ຺ຕິ ທຸຕິຍທິວເສ ປຸພ຺ພຓ຺ຫສມຍໍ. ເພລຸວລຏ຺ຐິກາຍ ມູເລຕິ ຕຣຸຓເພລຸວຣຸກ຺ຂມູເລ. ປພາຬ຺ໂຫຕິ ປພາຫິໂຕ. ປວາຬ຺ໂຫຕິປິ ປາໂຐ, ປວາຫິໂຕຕິ ອຕ຺ໂຖ. ອຸຠຍມ຺ປິ ນີຫຏຠາວເມວ ທີເປຕິ. ສິຍາ ອຎ຺ຎຖຕ຺ຕນ຺ຕິ ປສາທຎ຺ຎຖຕ຺ຕໍ ວາ ຠາວຎ຺ຎຖຕ຺ຕໍ ວາ ຠເວຍ຺ຍ. ກຖໍ? ‘‘ສມ຺ມາສມ຺ພຸທ຺ເຘນ ມຍໍ ລຫຸເກ ກາຣເຓ ປຓາມິຕາ’’ຕິ ປສາທໍ ມນ຺ທໍ ກໂຣນ຺ຕານໍ ປສາທຎ຺ຎຖຕ຺ຕໍ ນາມ ໂຫຕິ. ສລິງ຺ເຄເນວ ຕິຕ຺ຖາຍຕນໍ ປກ຺ກມນ຺ຕານໍ ຠາວຎ຺ຎຖຕ຺ຕໍ ນາມ. ສິຍາ ວິປຣິຓາໂມຕິ ເອຕ຺ຖ ປນ ‘‘ມຍໍ ສຕ຺ຖຸ ອຊ຺ຌາສຍໍ ຄຓ຺ຫິຕຸໍ ສກ຺ຂິສ຺ສາມາຕິ ປພ຺ພຊິຕາ, ນໍ ຄເຫຕຸໍ ອສກ຺ໂກນ຺ຕານໍ ກິໍ ອມ຺ຫາກໍ ປພ຺ພຊ຺ຊາຍາ’’ຕິ? ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕນໍ ວິປຣິຓາໂມຕິ ເວທິຕພ຺ໂພ. ວຈ຺ຉສ຺ສາຕິ ຂີຣູປກວຈ຺ຉສ຺ສ. ອຎ຺ຎຖຕ຺ຕນ຺ຕິ ມິລາຍນອຎ຺ຎຖຕ຺ຕໍ. ຂີຣູປໂກ ຫິ ວຈ຺ໂຉ ມາຕຸ ອທສ຺ສເນນ ຂີຣໍ ອລຠນ຺ໂຕ ມິລາຍຕິ ກມ຺ປຕິ ປເວຘຕິ. ວິປຣິຓາໂມຕິ ມຣຓໍ. ໂສ ຫິ ຂີຣໍ ອລຠມາໂນ ຂີຣປິປາສາຍ ສຸສ຺ສນ຺ໂຕ ປຕິຕ຺ວາ ມຣຕິ.

ພີຊານໍ ຕຣຸຓານນ຺ຕິ ອຸທເກນ ອນຸຄ຺ຄເຫຕພ຺ພານໍ ວິຣູຬ຺ຫພີຊານໍ. ອຎ຺ຎຖຕ຺ຕນ຺ຕິ ມິລາຍນຎ຺ຎຖຕ຺ຕເມວ. ຕານິ ຫິ ອຸທກໍ ອລຠນ຺ຕານິ ມິລາຍນ຺ຕິ. ວິປຣິຓາໂມຕິ ວິນາໂສ. ຕານິ ຫິ ອຸທກໍ ອລຠນ຺ຕານິ ສຸກ຺ຂິຕ຺ວາ ວິນສ຺ສນ຺ຕິ, ປລາລເມວ ໂຫນ຺ຕິ. ອນຸຄ຺ຄຫິໂຕຕິ ອາມິສານຸຄ຺ຄເຫນ ເຈວ ຘມ຺ມານຸຄ຺ຄເຫນ ຈ ອນຸຄ຺ຄຫິໂຕ. ອນຸຄ຺ຄຓ຺ເຫຍ຺ຍນ຺ຕິ ທ຺ວີຫິປິ ເອເຕຫິ ອນຸຄ຺ຄເຫຫິ ອນຸຄ຺ຄຓ຺ເຫຍ຺ຍໍ. ອຈິຣປພ຺ພຊິຕາ ຫິ ສາມເຓຣາ ເຈວ ທຫຣຠິກ຺ຂູ ຈ ຈີວຣາທິປຈ຺ຈຍເວກລ຺ເລ ວາ ສຕິ ເຄລຎ຺ເຎ ວາ ສຕ຺ຖາຣາ ວາ ອາຈຣິຍຸປຊ຺ຌາເຍຫິ ວາ ອາມິສານຸຄ຺ຄເຫນ ອນນຸຄ຺ຄຫິຕາ ກິລມນ຺ຕາ ນ ສກ຺ໂກນ຺ຕິ ສຊ຺ຌາຍໍ ວາ ມນສິກາຣໍ ວາ ກາຕຸໍ, ຘມ຺ມານຸຄ຺ຄເຫນ ອນນຸຄ຺ຄຫິຕາ ອຸທ຺ເທເສນ ເຈວ ໂອວາທານຸສາສນິຍາ ຈ ປຣິຫາຍມານາ ນ ສກ຺ໂກນ຺ຕິ ອກຸສລໍ ປຣິວຊ຺ເຊຕ຺ວາ ກຸສລໍ ຠາເວຕຸໍ. ອິເມຫິ ປນ ທ຺ວີຫິ ອນຸຄ຺ຄເຫຫິ ອນຸຄ຺ຄຫິຕາ ກາເຍນ ອກິລມນ຺ຕາ ສຊ຺ຌາຍມນສິກາເຣ ປວຕ຺ຕິຕ຺ວາ ຍຖານຸສິຏ຺ຐໍ ປຏິປຊ຺ຊມານາ ອປຣຠາເຄ ຕໍ ອນຸຄ຺ຄຫໍ ອລຠນ຺ຕາປິ ເຕເນວ ປຸຣິມານຸຄ຺ຄເຫນ ລທ຺ຘພລາ ສາສເນ ປຕິຏ຺ຐຫນ຺ຕິ, ຕສ຺ມາ ຠຄວໂຕ ເອວໍ ປຣິວິຕກ຺ໂກ ອຸທປາທິ.

ຠຄວໂຕ ປຸຣໂຕ ປາຕຸຣໂຫສີຕິ ສຕ຺ຖຸ ຈິຕ຺ຕໍ ຎຕ຺ວາ – ‘‘ອິເມ ຠິກ຺ຂູ ຠຄວຕາ ປຓາມິຕາ, ອິທານິ ເນສໍ ອນຸຄ຺ຄຫໍ ກາຕຸກາໂມ ເອວໍ ຈິນ຺ເຕສິ, ກາຣຓໍ ຠຄວາ ຈິນ຺ເຕສິ, ອຫເມຕ຺ຖ ອຸສ຺ສາຫໍ ຊເນສ຺ສາມີ’’ຕິ ປຸຣໂຕ ປາກໂຏ ອໂຫສິ. ສນ຺ເຕຕ຺ຖ ຠິກ຺ຂູຕິ ອິທໍ ໂສ ມຫາພ຺ຣຫ຺ມາ ຍຖາ ນາມ ພ຺ຍຕ຺ໂຕ ສູໂທ ຍເທວ ອມ຺ພິລຄ຺ຄາທີສຸ ຣສຊາຕໍ ຣຎ຺ໂຎ ຣຸຈ຺ຈຕິ, ຕໍ ອຠິສງ຺ຂາເຣນ ສາທຸຕຣໍ ກຕ຺ວາ ປຸນທິວເສ ອຸປນາເມຕິ, ເອວເມວ ອຕ຺ຕໂນ ພ຺ຍຕ຺ຕຕາຍ ຠຄວຕາ ອາຫຏອຸປມໍເຍວ ເອວເມຕໍ ຠຄວາຕິອາທິວຈເນຫິ ອຠິສງ຺ຂຣິຕ຺ວາ ຠຄວນ຺ຕໍ ຍາຈນ຺ໂຕ ຠິກ຺ຂຸສງ຺ຆສ຺ສ ອນຸຄ຺ຄຫກຣຓຕ຺ຖໍ ວທຕິ. ຕຕ຺ຖ ອຠິນນ຺ທຕູຕິ ‘‘ມມ ສນ຺ຕິກໍ ຠິກ຺ຂຸສງ຺ໂຆ ອາຄຈ຺ຉຕູ’’ຕິ. ເອວມສ຺ສ ອາຄມນໍ ສມ຺ປິຍາຍມາໂນ ອຠິນນ຺ທຕຸ. ອຠິວທຕູຕິ ອາຄຕສ຺ສ ຈ ໂອວາທານຸສາສນິໍ ທທນ຺ໂຕ ອຠິວທຕຸ.

ປຏິສລ຺ລານາຕິ ເອກີຠາວາ. ອິທ຺ຘາຠິສງ຺ຂາຣໍ ອຠິສງ຺ຂາສີຕິ ອິທ຺ຘິໍ ອກາສິ. ເອກທ຺ວີຫິກາຍາຕິ ເອເກໂກ ເຈວ ທ຺ເວ ທ຺ເວ ຈ ຫຸຕ຺ວາ. ສາຣຊ຺ຊມານຣູປາຕິ ໂອຕ຺ຕປ຺ປມານສຠາວາ ຠາຍມານາ. ກສ຺ມາ ປນ ຠຄວາ ເຕສໍ ຕຖາ ອຸປສງ຺ກມນາຍ ອິທ຺ຘິມກາສີຕິ? ຫິຕປຕ຺ຖນາຍ. ຍທິ ຫິ ເຕ ວຄ຺ຄວຄ຺ຄາ ຫຸຕ຺ວາ ອາຄຈ຺ເຉຍ຺ຍຸໍ, ‘‘ຠຄວາ ຠິກ຺ຂຸສງ຺ຆໍ ປຓາເມຕ຺ວາ ອຣຎ຺ຎໍ ປວິຏ຺ໂຐ ເອກທິວສມ຺ປິ ຕຕ຺ຖ ວສິຕຸໍ ນາສກ຺ຂິ, ເວເຄເນວ ອາຄໂຕ’’ຕິ ເກຬິມ຺ປິ ກເຣຍ຺ຍຸໍ. ອຖ ເນສໍ ເນວ ພຸທ຺ຘຄາຣວໍ ປຈ຺ຈຸປຏ຺ຐເຫຍ຺ຍ, ນ ຘມ຺ມເທສນໍ ສມ຺ປຏິຈ຺ຉິຕຸໍ ສມຕ຺ຖາ ຠເວຍ຺ຍຸໍ. ສຠຍານໍ ປນ ສສາຣຊ຺ຊານໍ ເອກທ຺ວີຫິກາຍ ອາຄຈ຺ຉນ຺ຕານໍ ພຸທ຺ຘຄາຣວຎ຺ເຈວ ປຈ຺ຈຸປຏ຺ຐິຕໍ ຠວິສ຺ສຕິ, ຘມ຺ມເທສນຎ຺ຈ ສມ຺ປຏິຈ຺ຉິຕຸໍ ສກ຺ຂິສ຺ສນ຺ຕີຕິ ຈິນ຺ເຕຕ຺ວາ ເຕສໍ ຫິຕປຕ຺ຖນາຍ ຕຖາຣູປໍ ອິທ຺ຘິໍ ອກາສິ.

ນິສີທິໍສູຕິ ເຕສຸ ຫິ ສາຣຊ຺ຊມານຣູເປສຸ ອາຄຈ຺ຉນ຺ເຕສຸ ເອໂກ ຠິກ຺ຂຸ ‘‘ມມໍເຍວ ສຕ຺ຖາ ໂອໂລເກຕິ, ມໍເຍວ ມຎ຺ເຎ ນິຄ຺ຄຓ຺ຫິຕຸກາໂມ’’ຕິ ສຓິກໍ ອາຄນ຺ຕ຺ວາ ວນ຺ທິຕ຺ວາ ນິສີທິ, ອຖຎ຺ໂຎ ອຖຎ຺ໂຎຕິ ເອວໍ ປຎ຺ຈຠິກ຺ຂຸສຕານິ ນິສີທິໍສຸ. ເອວໍ ນິສິນ຺ນໍ ປນ ຠິກ຺ຂຸສງ຺ຆໍ ສີທນ຺ຕເຣ ສນ຺ນິສິນ຺ນໍ ມຫາສມຸທ຺ທໍ ວິຍ ນິວາເຕ ປທີປໍ ວິຍ ຈ ນິຈ຺ຈລໍ ທິສ຺ວາ ສຕ຺ຖາ ຈິນ຺ເຕສິ – ‘‘ອິເມສໍ ຠິກ຺ຂູນໍ ກີທິສີ ຘມ຺ມເທສນາ ວຏ຺ຏຕີ’’ຕິ? ອຖສ຺ສ ເອຕທໂຫສິ – ‘‘ອິເມ ອາຫາຣເຫຕຸ ປຓາມິຕາ, ປິຓ຺ຑິຍາໂລປຘມ຺ມເທສນາວ ເນສໍ ສປ຺ປາຍາ, ຕໍ ທສ຺ເສຕ຺ວາ ມຕ຺ຖເກ ຕິປຣິວຏ຺ຏເທສນໍ ເທເສສ຺ສາມິ, ເທສນາປຣິໂຍສາເນ ສພ຺ເພ ອຣຫຕ຺ຕໍ ປາປຸຓິສ຺ສນ຺ຕີ’’ຕິ. ອຖ ເນສໍ ຕໍ ຘມ຺ມເທສນໍ ເທເສນ຺ໂຕ ອນ຺ຕມິທໍ, ຠິກ຺ຂເວຕິອາທິມາຫ.

ຕຕ຺ຖ ອນ຺ຕນ຺ຕິ ປຈ຺ຉິມໍ ລາມກໍ. ຍທິທໍ ປິຓ຺ໂຑລ຺ຍນ຺ຕິ ຍໍ ເອວໍ ປິຓ຺ຑປຣິເຍສເນນ ຊີວິກໍ ກປ຺ເປນ຺ຕສ຺ສ ຊີວິຕໍ. ອຍໍ ປເນຕ຺ຖ ປທຕ຺ໂຖ – ປິຓ຺ຑາຍ ອຸລຕີຕິ ປິຓ຺ໂຑໂລ, ປິຓ຺ໂຑລສ຺ສ ກມ຺ມໍ ປິຓ຺ໂຑລ຺ຍໍ, ປິຓ຺ຑປຣິເຍສເນນ ນິປ຺ຜາທິຕຊີວິຕນ຺ຕິ ອຕ຺ໂຖ. ອຠິສາໂປຕິ ອກ຺ໂກໂສ. ກຸປິຕາ ຫິ ມນຸສ຺ສາ ອຕ຺ຕໂນ ປຈ຺ຈຕ຺ຖິກໍ ‘‘ຈີວຣໍ ນິວາເສຕ຺ວາ ກປາລໍ ຄເຫຕ຺ວາ ປິຓ຺ຑໍ ປຣິເຍສມາໂນ ຈຣິສ຺ສຕີ’’ຕິ ອກ຺ໂກສນ຺ຕິ. ອຖ ວາ ປນ ‘‘ກິໍ ຕຸຍ຺ຫໍ ອກາຕພ຺ພໍ ອຕ຺ຖິ, ໂຍ ຕ຺ວໍ ເອວໍ ພລວາ ວີຣິຍສມ຺ປນ຺ໂນປິ ຫິໂຣຕ຺ຕປ຺ປໍ ປຫາຍ ກປໂຓ ວິຍ ປິຓ຺ໂຑໂລ ວິຈຣສິ ປຕ຺ຕປາຓີ’’ຕິ? ເອວມ຺ປິ ອກ຺ໂກສນ຺ຕິເຍວ. ຕຎ຺ຈ ໂຂ ເອຕນ຺ຕິ ເອວໍ ຕໍ ອຠິສາປໍ ສມານມ຺ປິ ປິຓ຺ໂຑລ຺ຍໍ. ກຸລປຸຕ຺ຕາ ອຸເປນ຺ຕິ ອຕ຺ຖວສິກາຕິ ມມ ສາສເນ ຊາຕິກຸລປຸຕ຺ຕາ ຈ ອາຈາຣກຸລປຸຕ຺ຕາ ຈ ອຕ຺ຖວສິກາ ກາຣຓວສິກາ ຫຸຕ຺ວາ ກາຣຓວສໍ ປຏິຈ຺ຈ ອຸເປນ຺ຕິ.

ຣາຊາຠິນີຕາຕິອາທີສຸ ເຍ ຣຎ຺ໂຎ ສນ຺ຕກໍ ຂາທິຕ຺ວາ ຣຎ຺ຎາ ພນ຺ຘນາຄາເຣ ພນ຺ຘາປິຕາ ປລາຍິຕ຺ວາ ປພ຺ພຊນ຺ຕິ, ເຕ ຣາຊາຠິນີຕາ ນາມ. ເຕ ຫິ ຣຎ຺ຎາ ພນ຺ຘນໍ ອຠິນີຕຕ຺ຕາ ຣາຊາຠິນີຕາ ນາມ. ເຍ ປນ ໂຈເຣຫິ ອຏວິຍໍ ຄເຫຕ຺ວາ ເອກຈ຺ເຈສຸ ມາຣິຍມາເນສຸ ເອກຈ຺ເຈ ‘‘ມຍໍ ສາມິ ຕຸມ຺ເຫຫິ ວິສ຺ສຏ຺ຐາ ເຄຫໍ ອນຊ຺ຌາວສິຕ຺ວາ ປພ຺ພຊິສ຺ສາມ, ຕຕ຺ຖ ຍໍ ຍໍ ພຸທ຺ຘປູຊາທິປຸຎ຺ຎໍ ກຣິສ຺ສາມ, ຕໂຕ ຕຸມ຺ຫາກໍ ປຕ຺ຕິໍ ທສ຺ສາມາ’’ຕິ ເຕຫິ ວິສ຺ສຏ຺ຐາ ປພ຺ພຊນ຺ຕິ, ເຕ ໂຈຣາຠິນີຕາ ນາມ. ເຕປິ ຫິ ໂຈເຣຫິ ມາເຣຕພ຺ພຕໍ ອຠິນີຕາຕິ ໂຈຣາຠິນີຕາ ນາມ. ເຍ ປນ ອິຓໍ ຄເຫຕ຺ວາ ປຏິທາຕຸໍ ອສກ຺ໂກນ຺ຕາ ປລາຍິຕ຺ວາ ປພ຺ພຊນ຺ຕິ, ເຕ ອິຓຏ຺ຏາ ນາມ, ອິຓປີຬິຕາຕິ ອຕ຺ໂຖ. ອິຓຏ຺ຐາຕິປິ ປາໂຐ, ອິເຓ ຐິຕາຕິ ອຕ຺ໂຖ. ເຍ ຣາຊໂຈຣຉາຕກໂຣຄຠຍານໍ ອຎ຺ຎຕເຣນ ອຠິຠູຕາ ອຸປທ຺ທຸຕາ ປພ຺ພຊນ຺ຕິ, ເຕ ຠຍຏ຺ຏາ ນາມ, ຠຍປີຬິຕາຕິ ອຕ຺ໂຖ. ຠຍຏ຺ຐາຕິປິ ປາໂຐ, ຠເຍ ຐິຕາຕິ ອຕ຺ໂຖ. ອາຊີວິກາປກຕາຕິ ອາຊີວິກາຍ ອຸປທ຺ທຸຕາ ອຠິຠູຕາ, ປຸຕ຺ຕທາຣໍ ໂປເສຕຸໍ ອສກ຺ໂກນ຺ຕາຕິ ອຕ຺ໂຖ. ໂອຕິຓ຺ຓາມ຺ຫາຕິ ອນ຺ໂຕ ອນຸປວິຏ຺ຐາ.

ໂສ ຈ ໂຫຕິ ອຠິຊ຺ຌາລູຕິ ອິທໍ ໂສ ກຸລປຸຕ຺ໂຕ ‘‘ທຸກ຺ຂສ຺ສ ອນ຺ຕໍ ກຣິສ຺ສາມີ’’ຕິອາທິວເສນ ຈິຕ຺ຕໍ ອຸປ຺ປາເທຕ຺ວາ ປພ຺ພຊິໂຕ, ອປຣຠາເຄ, ຕໍ ປພ຺ພຊ຺ຊໍ ຕຖາຣູປໍ ກາຕຸໍ ນ ສກ຺ໂກຕິ, ຕໍ ທສ຺ເສຕຸໍ ວຸຕ຺ຕໍ. ຕຕ຺ຖ ອຠິຊ຺ຌາລູຕິ ປຣຠຓ຺ຑານໍ ອຠິຊ຺ຌາຍິຕາ. ຕິພ຺ພສາຣາໂຄຕິ ພຫລຣາໂຄ. ພ຺ຍາປນ຺ນຈິຕ຺ໂຕຕິ ປູຕິຠາເວນ ວິປນ຺ນຈິຕ຺ໂຕ. ປທຸຏ຺ຐມນສງ຺ກປ຺ໂປຕິ ຕິຂິຓສິງ຺ໂຄ ວິຍ ໂຄໂຓ ທຸຏ຺ຐຈິຕ຺ໂຕ. ມຸຏ຺ຐສ຺ສຕີຕິ ຠຕ຺ຕນິກ຺ຂິຕ຺ຕກາໂກ ວິຍ ນຏ຺ຐສ຺ສຕິ, ອິຘ ກຕໍ ເອຕ຺ຖ ນສ຺ສຕິ. ອສມ຺ປຊາໂນຕິ ນິປ຺ປຎ຺ໂຎ. ຂນ຺ຘາທິປຣິຈ຺ເຉທຣຫິໂຕ. ອສມາຫິໂຕຕິ ຈຓ຺ຑໂສເຕ ພທ຺ຘນາວາ ວິຍ ອຸປຈາຣປ຺ປນາຠາເວນ ອສຓ຺ຐິໂຕ. ວິພ຺ຠນ຺ຕຈິຕ຺ໂຕຕິ ພນ຺ຘາຣຸຬ຺ຫມໂຄ ວິຍ ສນ຺ຕມໂນ. ປາກຕິນ຺ທ຺ຣິໂຍຕິ ຍຖາ ຄິຫີ ປຸຕ຺ຕຘີຕໂຣ ໂອໂລເກນ຺ໂຕ ອສໍວຸຕິນ຺ທ຺ຣິໂຍ ໂຫຕິ, ເອວໍ ອສໍວຸຕິນ຺ທ຺ຣິໂຍ.

ຉວາລາຕນ຺ຕິ ຉວານໍ ທຑ຺ຒຏ຺ຐາເນ ອລາຕໍ. ອຸຠໂຕປທິຕ຺ຕໍ ມຊ຺ເຌ ຄູຖຄຕນ຺ຕິ ປມາເຓນ ອຏ຺ຐງ຺ຄຸລມຕ຺ຕໍ ທ຺ວີສຸ ຐາເນສຸ ອາທິຕ຺ຕໍ ມຊ຺ເຌ ຄູຖມກ຺ຂິຕໍ. ເນວ ຄາເມຕິ ສເຈ ຫິ ຕໍ ຍຸຄນງ຺ຄລໂຄປານສິປກ຺ຂປາສກາທີນໍ ອຕ຺ຖາຍ ອຸປເນຕຸໍ ສກ຺ກາ ອສ຺ສ, ຄາເມ ກຏ຺ຐຕ຺ຖໍ ຜເຣຍ຺ຍ. ສເຈ ເຂຕ຺ຕກຸຏິຍໍ ກຏ຺ຐຕ຺ຖຣມຎ຺ຈກາທີນໍ ອຕ຺ຖາຍ ອຸປເນຕຸໍ ສກ຺ກາ, ອຣຎ຺ເຎ ກຏ຺ຐຕ຺ຖໍ ຜເຣຍ຺ຍ. ຍສ຺ມາ ປນ ອຸຠຍຖາປິ ນ ສກ຺ກາ, ຕສ຺ມາ ເອວໍ ວຸຕ຺ຕໍ. ຄິຫິໂຠຄາ ຈ ປຣິຫີໂນຕິ ໂຍ ອຄາເຣ ວສນ຺ເຕຫິ ຄິຫີຫິ ທາຍຊ຺ເຊ ຠາຊິຍມາເນ ໂຠໂຄ ລທ຺ຘພ຺ໂພ ອສ຺ສ, ຕໂຕ ຈ ປຣິຫີໂນ. ສາມຎ຺ຎຕ຺ຖຎ຺ຈາຕິ ອາຈຣິຍຸປຊ຺ຌາຍານໍ ໂອວາເທ ຐຕ຺ວາ ປຣິຍຕ຺ຕິປຏິເວຘວເສນ ປຕ຺ຕພ຺ພໍ ສາມຎ຺ຎຕ຺ຖຎ຺ຈ. ອິມຎ຺ຈ ປນ ອຸປມໍ ສຕ຺ຖາ ນ ທຸສ຺ສີລສ຺ສ ວເສນ ອາຫຣິ, ປຣິສຸທ຺ຘສີລສ຺ສ ປນ ອລສສ຺ສ ອຠິຊ຺ຌາທີຫິ ໂທເສຫິ ອຸປຫຕສ຺ສ ປຸຄ຺ຄລສ຺ສ ອິມໍ ອຸປມໍ ອາຫຣິ.

ຕໂຍເມ, ຠິກ຺ຂເວຕິ ກສ຺ມາ ອາຣທ຺ຘໍ? ອິມສ຺ສ ປຸຄ຺ຄລສ຺ສ ຉວາລາຕສທິສຠາໂວ ເນວ ມາຕາປິຕູຫິ ກໂຕ, ນ ອາຈຣິຍຸປຊ຺ຌາເຍຫິ, ອິເມຫິ ປນ ປາປວິຕກ຺ເກຫິ ກໂຕຕິ ທສ຺ສນຕ຺ຖໍ ອາຣທ຺ຘໍ. ອນິມິຕ຺ຕໍ ວາ ສມາຘິນ຺ຕິ ວິປສ຺ສນາສມາຘິໍ. ໂສ ຫິ ນິຈ຺ຈນິມິຕ຺ຕາທີນໍ ສມຸຄ຺ຆາຕເນນ ອນິມິຕ຺ໂຕຕິ ວຸຈ຺ຈຕິ. ເອຕ຺ຖ ຈ ຈຕ຺ຕາໂຣ ສຕິປຏ຺ຐານາ ມິສ຺ສກາ, ອນິມິຕ຺ຕສມາຘິ ປຸພ຺ພຠາໂຄ. ອນິມິຕ຺ຕສມາຘິ ວາ ມິສ຺ສໂກ, ສຕິປຏ຺ຐານາ ປຸພ຺ພຠາຄາຕິ ເວທິຕພ຺ພາ.

ທ຺ເວມາ, ຠິກ຺ຂເວ, ທິຏ຺ຐິໂຍຕິ ອິທໍ ປນ ນ ເກວລໍ ອນິມິຕ຺ຕສມາຘິຠາວນາ ອິເມສໍເຍວ ຕິຓ຺ຓໍ ມຫາວິຕກ຺ການໍ ປຫານາຍ ສໍວຕ຺ຕຕິ, ສສ຺ສຕຸຈ຺ເຉທທິຏ຺ຐີນມ຺ປິ ປນ ສມຸຄ຺ຆາຕໍ ກໂຣຕີຕິ ທສ຺ສນຕ຺ຖໍ ວຸຕ຺ຕໍ. ນ ວຊ຺ຊວາ ອສ຺ສນ຺ຕິ ນິທ຺ໂທໂສ ຠເວຍ຺ຍໍ. ເສສເມຕ຺ຖ ອຸຕ຺ຕານເມວ. ອິຕິ ຠຄວາ ອິມສ຺ມິມ຺ປິ ສຸຕ຺ເຕ ເທສນໍ ຕີຫິ ຠເວຫິ ວິນິວຕ຺ເຕຕ຺ວາ ອຣຫຕ຺ເຕນ ກູຏໍ ຄຓ຺ຫິ. ເທສນາວສາເນ ປຎ຺ຈສຕາ ຠິກ຺ຂູ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິໍສູຕິ. ອຏ຺ຐມໍ.