໑໐. ປຸຓ຺ຓມສຸຕ຺ຕວຓ຺ຓນາ

໘໒. ທສເມ ຕທຫຸໂປສເຖຕິອາທິ ປວາຣຓສຸຕ຺ເຕ ວິຕ຺ຖາຣິຕເມວ. ກິຎ຺ຈິເທວ ເທສນ຺ຕິ ກິຎ຺ຈິ ກາຣຓໍ. ສເກ ອາສເນ ນິສີທິຕ຺ວາ ປຸຈ຺ຉ ຍທາກງ຺ຂສີຕິ ກສ຺ມາ ເອວມາຫ? ໂສ ກິຣ ຠິກ຺ຂຸ ປຎ຺ຈສຕຠິກ຺ຂຸປຣິວາໂຣ. ອາຈຣິເຍ ປນ ຐິຕເກ ປຸຈ຺ຉນ຺ເຕ ສເຈ ເຕ ຠິກ຺ຂູ ນິສີທນ຺ຕິ, ສຕ຺ຖຣິ ຄາຣວໍ ກຕໍ ໂຫຕິ, ອາຈຣິເຍ ອຄາຣວໍ. ສເຈ ອຸຏ຺ຐຫນ຺ຕິ, ອາຈຣິເຍ ຄາຣວໍ ກຕໍ ໂຫຕິ, ສຕ຺ຖຣິ ອຄາຣວໍ. ອິຕິ ເນສໍ ຈິຕ຺ຕໍ ອເນກຄ຺ຄໍ ຠວິສ຺ສຕິ, ເທສນໍ ສມ຺ປຏິຈ຺ຉິຕຸໍ ນ ສກ຺ຂິສ຺ສນ຺ຕິ. ຕສ຺ມິໍ ປນ ນິສີທິຕ຺ວາ ປຸຈ຺ຉນ຺ເຕ ເຕສໍ ຈິຕ຺ຕໍ ເອກຄ຺ຄໍ ຠວິສ຺ສຕິ, ເທສນໍ ສມ຺ປຏິຈ຺ຉິຕຸໍ ສກ຺ຂິສ຺ສນ຺ຕີຕິ ຎຕ຺ວາ ຠຄວາ ເອວມາຫ. ອິເມ ນຸ ໂຂ, ຠນ຺ເຕຕິ ອຍໍ ເຖໂຣ ປຎ຺ຈນ຺ນໍ ຠິກ຺ຂຸສຕານໍ ອາຈຣິໂຍ, ປຎ຺ຈກ຺ຂນ຺ຘມຕ຺ຕມ຺ປິ ນປ຺ປຊານາຕີຕິ ນ ວຕ຺ຕພ຺ໂພ. ປຎ຺ຫໍ ປຸຈ຺ຉນ຺ເຕນ ປນ ‘‘ອິເມ ປຎ຺ຈຸປາທານກ຺ຂນ຺ຘາ, ນ ອຎ຺ເຎ’’ຕິ ເອວໍ ຊານນ຺ເຕນ ວິຍ ຫຸຕ຺ວາ ປຸຈ຺ຉິຕຸໍ ນ ວຏ຺ຏຕິ, ຕສ຺ມາ ອຊານນ຺ໂຕ ວິຍ ປຸຈ຺ຉຕິ. ເຕປິ ຈສ຺ສ ອນ຺ເຕວາສິກາ ‘‘ອມ຺ຫາກໍ ອາຈຣິໂຍ ‘ອຫໍ ຊານາມີ’ຕິ ນ ກເຖຕິ, ສພ຺ພຎ຺ຎຸຕຎ຺ຎາເຓນ ປນ ສທ຺ຘິໍ ສໍສນ຺ທິຕ຺ວາວ ກເຖຕີ’’ຕິ ໂສຕພ຺ພໍ ສທ຺ຘາຕພ຺ພໍ ມຎ຺ຎິສ຺ສນ຺ຕີຕິປິ ອຊານນ຺ໂຕ ວິຍ ປຸຈ຺ຉຕິ.

ຉນ຺ທມູລກາຕິ ຕຓ຺ຫາຉນ຺ທມູລກາ. ນ ໂຂ ຠິກ຺ຂຸ ຕຎ຺ເຎວ ອຸປາທານໍ ເຕ ປຎ຺ຈຸປາທານກ຺ຂນ຺ຘາຕິ ຍສ຺ມາ ຉນ຺ທຣາຄມຕ຺ຕໍ ປຎ຺ຈກ຺ຂນ຺ຘາ ນ ໂຫຕິ, ຕສ຺ມາ ອິທໍ ວຸຕ຺ຕໍ. ຍສ຺ມາ ປນ ສຫຊາຕໂຕ ວາ ອາຣມ຺ມຓໂຕ ວາ ຂນ຺ເຘ ມຸຎ຺ຈິຕ຺ວາ ອຸປາທານໍ ນຕ຺ຖິ, ຕສ຺ມາ ນາປິ ອຎ຺ຎຕ຺ຣ ປຎ຺ຈຫິ ອຸປາທານກ຺ຂນ຺ເຘຫິ ອຸປາທານນ຺ຕິ ວຸຕ຺ຕໍ. ຕຓ຺ຫາສມ຺ປຍຸຕ຺ຕສ຺ມິຎ຺ຫິ ຈິຕ຺ເຕ ວຕ຺ຕມາເນ ຕໍຈິຕ຺ຕສມຸຏ຺ຐານຣູປໍ ຣູປກ຺ຂນ຺ໂຘ, ຐເປຕ຺ວາ ຕໍ ຕຓ຺ຫໍ ເສສາ ອຣູປຘມ຺ມາ ຈຕ຺ຕາໂຣ ຂນ຺ຘາຕິ ສຫຊາຕໂຕປິ ຂນ຺ເຘ ມຸຎ຺ຈິຕ຺ວາ ອຸປາທານໍ ນຕ຺ຖິ. ອຸປາທານສ຺ສ ປນ ຣູປາທີສຸ ອຎ຺ຎຕຣໍ ອາຣມ຺ມຓໍ ກຕ຺ວາ ອຸປ຺ປຊ຺ຊນໂຕ ອາຣມ຺ມຓໂຕປິ ປຎ຺ຈກ຺ຂນ຺ເຘ ມຸຎ຺ຈິຕ຺ວາ ອຸປາທານໍ ນຕ຺ຖິ. ຉນ຺ທຣາຄເວມຕ຺ຕຕາຕິ ຉນ຺ທຣາຄນານຕ຺ຕໍ. ເອວໍ ໂຂ ຠິກ຺ຂູຕິ ເອວໍ ຣູປາຣມ຺ມຓສ຺ສ ຉນ຺ທຣາຄສ຺ສ ເວທນາທີສຸ ອຎ຺ຎຕຣໍ ອາຣມ຺ມຓໍ ອກຣຓໂຕ ສິຍາ ຉນ຺ທຣາຄເວມຕ຺ຕຕາ. ຂນ຺ຘາຘິວຈນນ຺ຕິ ຂນ຺ຘາຕິ ອຍໍ ປຎ຺ຎຕ຺ຕິ. ອຍໍ ປນ ອນຸສນ຺ຘິ ນ ຆຏິຍຕິ, ກິຎ຺ຈາປິ ນ ຆຏິຍຕິ, ສານຸສນ຺ຘິກາວ ປຸຈ຺ຉາ, ສານຸສນ຺ຘິກໍ ວິສ຺ສຊ຺ຊນໍ. ອຍຎ຺ຫິ ເຖໂຣ ເຕສໍ ເຕສໍ ຠິກ຺ຂູນໍ ອຊ຺ຌາສເຍນ ປຸຈ຺ຉຕິ, ສຕ຺ຖາປິ ເຕສໍ ເຕສໍ ອຊ຺ຌາສເຍເນວ ວິສ຺ສຊ຺ເຊຕິ. ເສສໍ ສພ຺ພຕ຺ຖ ອຸຕ຺ຕານເມວ. ທສມໍ.

ອິມສ຺ສ ຈ ປນ ວຄ຺ຄສ຺ສ ເອເກກສ຺ມິໍ ສຸຕ຺ເຕ ປຎ຺ຈສຕາ ປຎ຺ຈສຕາ ຠິກ຺ຂູ ອຣຫຕ຺ຕໍ ປຕ຺ຕາຕິ.

ຂຊ຺ຊນີຍວຄ຺ໂຄ ອຏ຺ຐໂມ.