໔. ອຸປາທານປຣິປວຕ຺ຕສຸຕ຺ຕວຓ຺ຓນາ

໕໖. ຈຕຸຕ຺ເຖ ຈຕຸປຣິວຏ຺ຏນ຺ຕິ ເອເກກສ຺ມິໍ ຂນ຺ເຘ ຈຕຸນ຺ນໍ ປຣິວຏ຺ຏນວເສນ. ຣູປໍ ອພ຺ຠຎ຺ຎາສິນ຺ຕິ ຣູປໍ ທຸກ຺ຂສຈ຺ຈນ຺ຕິ ອຠິຎ຺ຎາສິໍ. ເອວໍ ສພ຺ພປເທສຸ ຈຕຸສຈ຺ຈວເສເນວ ອຕ຺ໂຖ ເວທິຕພ຺ໂພ. ອາຫາຣສມຸທຍາຕິ ເອຕ຺ຖ ສຈ຺ຉນ຺ທຣາໂຄ ກພຬີກາຣາຫາໂຣ ອາຫາໂຣ ນາມ. ປຏິປນ຺ນາຕິ ສີລໂຕ ປຏ຺ຐາຍ ຍາວ ອຣຫຕ຺ຕມຄ຺ຄາ ປຏິປນ຺ນາ ໂຫນ຺ຕິ. ຄາຘນ຺ຕີຕິ ປຕິຏ຺ຐຫນ຺ຕິ. ເອຕ຺ຕາວຕາ ເສກ຺ຂຠູມິໍ ກເຖຕ຺ວາ ອິທານິ ອເສກ຺ຂຠູມິໍ ກເຖນ຺ໂຕ ເຍ ຈ ໂຂ ເກຈິ, ຠິກ຺ຂເວຕິອາທິມາຫ. ສຸວິມຸຕ຺ຕາຕິ ອຣຫຕ຺ຕຜລວິມຸຕ຺ຕິຍາ ສຸຏ຺ຐຸ ວິມຸຕ຺ຕາ. ເກວລິໂນຕິ ສກລິໂນ ກຕສພ຺ພກິຈ຺ຈາ. ວຏ຺ຏໍ ເຕສໍ ນຕ຺ຖິ ປຎ຺ຎາປນາຍາຕິ ເຍນ ເຕ ອວສິຏ຺ເຐນ ວຏ຺ເຏນ ປຎ຺ຎາເປຍ຺ຍຸໍ, ຕໍ ເນສໍ ວຏ຺ຏໍ ນຕ຺ຖິ ປຎ຺ຎາປນາຍ. ອຖ ວາ ວຏ຺ຏນ຺ຕິ ກາຣຓໍ, ປຎ຺ຎາປນາຍ ກາຣຓໍ ນຕ຺ຖີຕິ. ເອຕ຺ຕາວຕາ ອເສກ຺ຂຠູມິວາໂຣ ກຖິໂຕ. ຈຕຸຕ຺ຖໍ.