໕. ສຕ຺ຕຏ຺ຐານສຸຕ຺ຕວຓ຺ຓນາ

໕໗. ປຎ຺ຈເມ ສຕ຺ຕຏ຺ຐານກຸສໂລຕິ ສຕ຺ຕສຸ ໂອກາເສສຸ ເຉໂກ. ວຸສິຕວາຕິ ວຸສິຕວາໂສ. ອຸຕ຺ຕມປຸຣິໂສຕິ ເສຏ຺ຐປຸຣິໂສ. ເສສເມຕ຺ຖ ວຸຕ຺ຕນເຍເນວ ເວທິຕພ຺ພໍ. ອິທໍ ປນ ສຸຕ຺ຕໍ ອຸສ຺ສທນນ຺ທິຍຎ຺ເຈວ ປໂລຠນີຍຎ຺ຈາຕິ ເວທິຕພ຺ພໍ. ຍຖາ ຫິ ຣາຊາ ວິຊິຕສງ຺ຄາໂມ ສງ຺ຄາເມ ວິຊຍິໂນ ໂຍເຘ ອຸຈ຺ຈຏ຺ຐາເນ ຐເປຕ຺ວາ ເຕສໍ ສກ຺ກາຣໍ ກໂຣຕິ. ກິໍ ກາຣຓາ? ເອເຕສໍ ສກ຺ກາຣໍ ທິສ຺ວາ ເສສາປິ ສູຣາ ຠວິຕຸໍ ມຎ຺ຎິສ຺ສນ຺ຕີຕິ, ເອວເມວ ຠຄວາ ອປ຺ປເມຍ຺ຍໍ ກາລໍ ປາຣມິໂຍ ປູເຣຕ຺ວາ ມຫາໂພຘິມຓ຺ເຑ ກິເລສມາຣວິຊຍໍ ກຕ຺ວາ ສພ຺ພຎ຺ຎຸຕໍ ປຕ຺ໂຕ ສາວຕ຺ຖິຍໍ ເຊຕວນມຫາວິຫາເຣ ນິສີທິຕ຺ວາ ອິມໍ ສຸຕ຺ຕໍ ເທເສນ຺ໂຕ ຂີຓາສເວ ອຸກ຺ຂິປິຕ຺ວາ ໂຖເມສິ ວຓ຺ເຓສິ. ກິໍ ກາຣຓາ? ເອວໍ ອວເສສາ ເສກ຺ຂປຸຄ຺ຄລາ ອຣຫຕ຺ຕຜລໍ ປຕ຺ຕພ຺ພໍ ມຎ຺ຎິສ຺ສນ຺ຕີຕິ. ເອວເມຕໍ ສຸຕ຺ຕໍ ຂີຓາສວານໍ ອຸກ຺ຂິປິຕ຺ວາ ປສໍສິຕຕ຺ຕາ ອຸສ຺ສທນນ຺ທິຍໍ, ເສກ຺ຂານໍ ປໂລຠິຕຕ຺ຕາ ປໂລຠນີຍນ຺ຕິ ເວທິຕພ຺ພໍ.

ເອວໍ ໂຂ, ຠິກ຺ຂເວ, ຠິກ຺ຂຸ ສຕ຺ຕຏ຺ຐານກຸສໂລ ໂຫຕີຕິ ເອຕ຺ຕາວຕາ ເຈຕ຺ຖ ມຄ຺ຄຜລປຈ຺ຈເວກ຺ຂຓວເສນ ເທສນໍ ນິຏ຺ຐເປຕ຺ວາປິ ປຸນ ກຖຎ຺ຈ, ຠິກ຺ຂເວ, ຠິກ຺ຂຸ ຕິວິຘູປປຣິກ຺ຂີ ໂຫຕີຕິ ອິທໍ ‘‘ຂີຓາສໂວ ຍສ຺ມິໍ ອາຣມ຺ມເຓ ສຕຕວິຫາເຣນ ວິຫຣຕິ, ຕໍ ສຕ຺ໂຕ ວາ ປຸຄ຺ຄໂລ ວາ ນ ໂຫຕິ, ຘາຕຸອາທິມຕ຺ຕເມວ ປນ ໂຫຕີ’’ຕິ ເອວໍ ຂີຓາສວສ຺ສ ສຕຕວິຫາຣຎ຺ຈ, ‘‘ອິເມສຸ ຘມ຺ເມສຸ ກມ຺ມໍ ກຕ຺ວາ ອຍໍ ອາຄໂຕ’’ຕິ ອາຄມນີຍປຏິປທຎ຺ຈ ທສ຺ເສຕຸໍ ວຸຕ຺ຕໍ. ຕຕ຺ຖ ຘາຕຸໂສ ອຸປປຣິກ຺ຂຕີຕິ ຘາຕຸສຠາເວນ ປສ຺ສຕິ ໂອໂລເກຕິ. ເສສປທທ຺ວເຍປິ ເອເສວ ນໂຍ. ປຎ຺ຈມໍ.