໑. ສຕ຺ຕຘາຕຸສຸຕ຺ຕວຓ຺ຓນາ

໙໕. ທຸຕິຍວຄ຺ຄສ຺ສ ປຐເມ ອາຠາຘາຕູຕິ ອາໂລກຘາຕຸ. ອາໂລກສ຺ສປິ ອາໂລກກສິເຓ ປຣິກມ຺ມໍ ກຕ຺ວາ ອຸປ຺ປນ຺ນຊ຺ຌານສ຺ສາປີຕິ ສຫາຣມ຺ມຓສ຺ສ ຌານສ຺ສ ເອຕໍ ນາມໍ. ສຸຠຘາຕູຕິ ສຸຠກສິເຓ ອຸປ຺ປນ຺ນຊ຺ຌານວເສນ ສຫາຣມ຺ມຓຊ຺ຌານເມວ. ອາກາສານຎ຺ຈາຍຕນເມວ ອາກາສານຎ຺ຈາຍຕນຘາຕຸ. ສຎ຺ຎາເວທຍິຕນິໂຣໂຘວ ສຎ຺ຎາເວທຍິຕນິໂຣຘຘາຕຸ. ອິຕິ ຠຄວາ ອນຸສນ຺ຘິກຸສລສ຺ສ ຠິກ຺ຂຸໂນ ຕຕ຺ຖ ນິສີທິຕ຺ວາ ປຎ຺ຫໍ ປຸຈ຺ຉິຕຸກາມສ຺ສ ໂອກາສໍ ເທນ຺ໂຕ ເທສນໍ ນິຏ຺ຐາເປສິ.

ອນ຺ຘກາຣໍ ປຏິຈ຺ຈາຕິ ອນ຺ຘກາໂຣ ຫິ ອາໂລເກນ ປຣິຈ຺ຉິນ຺ໂນ, ອາໂລໂກປິ ອນ຺ຘກາເຣນ. ອນ຺ຘກາເຣນ ຫິ ໂສ ປາກໂຏ ໂຫຕິ. ຕສ຺ມາ ‘‘ອນ຺ຘກາຣໍ ປຏິຈ຺ຈ ປຎ຺ຎາຍຕີ’’ຕິ ອາຫ. ອສຸຠໍ ປຏິຈ຺ຈາຕິ ເອຕ຺ຖາປິ ເອເສວ ນໂຍ. ອສຸຠຎ຺ຫິ ສຸເຠນ, ສຸຠຎ຺ຈ ອສຸເຠນ ປຣິຈ຺ຉິນ຺ນໍ, ອສຸເຠ ສຕິ ສຸຠໍ ປຎ຺ຎາຍຕິ, ຕສ຺ມາ ເອວມາຫ. ຣູປໍ ປຏິຈ຺ຈາຕິ ຣູປາວຈຣສມາປຕ຺ຕິໍ ປຏິຈ຺ຈ. ຣູປາວຈຣສມາປຕ຺ຕິຍາ ຫິ ສຕິ ອາກາສານຎ຺ຈາຍຕນສມາປຕ຺ຕິ ນາມ ໂຫຕິ ຣູປສມຕິກ຺ກໂມ ວາ, ຕສ຺ມາ ເອວມາຫ. ວິຎ຺ຎາຓຎ຺ຈາຍຕນຘາຕຸອາທີສຸປິ ເອເສວ ນໂຍ. ນິໂຣຘໍ ປຏິຈ຺ຈາຕິ ຈຕຸນ຺ນໍ ຂນ຺ຘານໍ ປຏິສງ຺ຂາອປ຺ປວຕ຺ຕິໍ ປຏິຈ຺ຈ. ຂນ຺ຘນິໂຣຘຎ຺ຫິ ປຏິຈ຺ຈ ນິໂຣຘສມາປຕ຺ຕິ ນາມ ປຎ຺ຎາຍຕິ, ນ ຂນ຺ຘປວຕ຺ຕິໍ, ຕສ຺ມາ ເອວມາຫ. ເອຕ຺ຖ ຈ ຈຕຸນ຺ນໍ ຂນ຺ຘານໍ ນິໂຣໂຘວ ນິໂຣຘສມາປຕ຺ຕີຕິ ເວທິຕພ຺ໂພ.

ກຖໍ ສມາປຕ຺ຕິ ປຕ຺ຕພ຺ພາຕິ ກຖໍ ສມາປຕ຺ຕິໂຍ ກີທິສາ ສມາປຕ຺ຕິໂຍ ນາມ ຫຸຕ຺ວາ ປຕ຺ຕພ຺ພາຕິ? ສຎ຺ຎາສມາປຕ຺ຕິ ປຕ຺ຕພ຺ພາຕິ ສຎ຺ຎາຍ ອຕ຺ຖິຠາເວນ ສຎ຺ຎາສມາປຕ຺ຕິໂຍ ສຎ຺ຎາສມາປຕ຺ຕິໂຍ ນາມ ຫຸຕ຺ວາ ປຕ຺ຕພ຺ພາ. ສງ຺ຂາຣາວເສສສມາປຕ຺ຕິ ປຕ຺ຕພ຺ພາຕິ ສຸຂຸມສງ຺ຂາຣານໍ ອວສິຏ຺ຐຕາຍ ສງ຺ຂາຣາວເສສສມາປຕ຺ຕິ ນາມ ຫຸຕ຺ວາ ປຕ຺ຕພ຺ພາ. ນິໂຣຘສມາປຕ຺ຕິ ປຕ຺ຕພ຺ພາຕິ ນິໂຣໂຘວ ນິໂຣຘສມາປຕ຺ຕິ ນິໂຣຘສມາປຕ຺ຕິ ນາມ ຫຸຕ຺ວາ ປຕ຺ຕພ຺ພາຕິ ອຕ຺ໂຖ. ປຐມໍ.