໓. ເທວຫິຕສຸຕ຺ຕວຓ຺ຓນາ

໑໙໙. ຕຕິເຍ ວາເຕຫີຕິ ອຸທຣວາເຕຫິ. ຠຄວໂຕ ກິຣ ຉພ຺ພສ຺ສານິ ທຸກ຺ກຣກາຣິກໍ ກໂຣນ຺ຕສ຺ສ ປສຕມຸຄ຺ຄຍູສາທີນິ ອາຫາຣຍໂຕ ທຸພ຺ໂຠຊເນນ ເຈວ ທຸກ຺ຂເສຍ຺ຍາຍ ຈ ອຸທຣວາໂຕ ກຸປ຺ປິ. ອປຣຠາເຄ ສມ຺ໂພຘິໍ ປຕ຺ວາ ປຓີຕໂຠຊນໍ ຠຸຎ຺ຊນ຺ຕສ຺ສາປິ ອນ຺ຕຣນ຺ຕຣາ ໂສ ອາພາໂຘ ອຕ຺ຕານໍ ທສ຺ເສຕິເຍວ. ຕໍ ສນ຺ຘາເຍຕໍ ວຸຕ຺ຕໍ. ອຸປຏ຺ຐາໂກ ໂຫຕີຕິ ປຐມໂພຘິຍໍ ອນິພທ຺ຘຸປຏ຺ຐາກກາເລ ອຸປຏ຺ຐາໂກ ໂຫຕິ. ຕສ຺ມິໍ ກິຣ ກາເລ ສຕ຺ຖຸອສີຕິມຫາເຖເຣສຸ ອຸປຏ຺ຐາໂກ ອຠູຕປຸພ຺ໂພ ນາມ ນຕ຺ຖິ. ນາຄສມາໂລ ອຸປວາໂນ ສຸນກ຺ຂຕ຺ໂຕ ຈຸນ຺ໂທ ສມຓຸທ຺ເທໂສ ສາຄໂຕ ໂພຘິ ເມຆິໂຍຕິ ອິເມ ປນ ປາຬິຍໍ ອາຄຕຸປຏ຺ຐາກາ. ອິມສ຺ມິໍ ປນ ກາເລ ອຸປວານຕ຺ເຖໂຣ ປາໂຕວ ອຸຏ຺ຐາຍ ປຣິເວຓສມ຺ມຊ຺ຊນໍ ທນ຺ຕກຏ຺ຐທານໍ ນ຺ຫາໂນທກປຣິຍາທນໍ ປຕ຺ຕຈີວຣໍ ຄເຫຕ຺ວາ ອນຸຄມນນ຺ຕິ ສພ຺ພໍ ຠຄວໂຕ ອຸປຏ຺ຐານມກາສິ. ອຸປສງ຺ກມີຕິ ປຐມໂພຘິຍໍ ກິຣ ວີສຕິ ວສ຺ສານິ ນິທ຺ຘູມໍ ອຣຎ຺ຎເມວ ໂຫຕິ, ຠິກ຺ຂຸສງ຺ຆສ຺ສ ອຸທກຕາປນມ຺ປິ ນ ຠຄວຕາ ອນຸຎ຺ຎາຕໍ. ໂສ ຈ ພ຺ຣາຫ຺ມໂຓ ອຸທ຺ຘນປາຬິໍ ພນ຺ຘາເປຕ຺ວາ ມຫາຈາຏິໂຍ ອຸທ຺ຘນມາໂຣເປຕ຺ວາ ອຸຓ຺ໂຫທກໍ ກາເຣຕ຺ວາ, ນ຺ຫານີຍຈຸຓ຺ຓາທີຫິ ສທ຺ຘິໍ ຕໍ ວິກ຺ກິຓນ຺ໂຕ ຊີວິກໍ ກປ຺ເປຕິ. ນ຺ຫາຍິຕຸກາມາ ຕຕ຺ຖ ຄນ຺ຕ຺ວາ ມູລໍ ທຕ຺ວາ ນ຺ຫາຍິຕ຺ວາ ຄນ຺ເຘ ວິລິມ຺ປິຕ຺ວາ ມາລໍ ປິຬນ຺ຘິຕ຺ວາ ປກ຺ກມນ຺ຕິ. ຕສ຺ມາ ເຖໂຣ ຕຕ຺ຖ ອຸປສງ຺ກມິ.

ກິໍ ປຕ຺ຖຍາໂນຕິ ກິໍ ອິຈ຺ຉນ຺ໂຕ. ກິໍ ເອສນ຺ຕິ ກິໍ ຄເວສນ຺ໂຕ. ປູຊິໂຕ ປູຊເນຍ຺ຍານນ຺ຕິ ອິທໍ ເຖໂຣ ທສພລສ຺ສ ວຓ຺ຓໍ ກເຖຕຸມາຣຠິ. ຄິລານເຠສຊ຺ຊຕ຺ຖໍ ຄເຕນ ກິຣ ຄິລານສ຺ສ ວຓ຺ໂຓ ກເຖຕພ຺ໂພຕິ ວຕ຺ຕເມຕໍ. ວຓ຺ຓໍ ຫິ ສຸຕ຺ວາ ມນຸສ຺ສາ ສກ຺ກຈ຺ຈໍ ເຠສຊ຺ຊໍ ທາຕພ຺ພໍ ມຎ຺ຎນ຺ຕິ. ສປ຺ປາຍເຠສຊ຺ຊໍ ລທ຺ຘາ ຄິລາໂນ ຂິປ຺ປເມວ ວຸຏ຺ຐາຕິ. ກເຖນ຺ເຕນ ຈ ຌານວິໂມກ຺ຂສມາປຕ຺ຕິມຄ຺ຄຜລານິ ອາຣພ຺ຠ ກເຖຕຸໍ ນ ວຏ຺ຏຕິ. ‘‘ສີລວາ ລຊ຺ຊີ ກຸກ຺ກຸຈ຺ຈໂກ ພຫຸສ຺ສຸໂຕ ອາຄມຘໂຣ ວໍສານຸຣກ຺ຂໂກ’’ຕິ ເອວໍ ປນ ອາຄມນີຍປຏິປທໍເຍວ ກເຖຕຸໍ ວຏ຺ຏຕິ. ປູຊເນຍ຺ຍານນ຺ຕິ ອສີຕິມຫາເຖຣາ ສເທວເກນ ໂລເກນ ປູເຊຕພ຺ພາຕິ ປູຊເນຍ຺ຍາ. ເຕເຍວ ສກ຺ກາຕພ຺ພາຕິ ສກ຺ກເຣຍ຺ຍາ. ເຕສໍເຍວ ອປຈິຕິ ກຕ຺ຕພ຺ພາຕິ ອປເຈຍ຺ຍາ. ຠຄວາ ເຕສໍ ປູຊິໂຕ ສກ຺ກໂຕ ອປຈິໂຕ ຈ, ອິຈ຺ຈສ຺ສ ຕໍ ຄຸຓໍ ປກາເສນ຺ໂຕ ເຖໂຣ ເອວມາຫ. ຫາຕເວຕິ ຫຣິຕຸໍ.

ຜາຓິຕສ຺ສ ຈ ປຸຏນ຺ຕິ ມຫນ຺ຕໍ ນິຈ຺ຉາຣິກໍ ຄຸຬປິຓ຺ຑໍ. ໂສ ກິຣ ‘‘ກິໍ ສມຓສ຺ສ ໂຄຕມສ຺ສ ອຜາສຸກ’’ນ຺ຕິ? ປຸຈ຺ຉິຕ຺ວາ, ‘‘ອຸທຣວາໂຕ’’ຕິ ສຸຕ຺ວາ, ‘‘ເຕນ ຫິ ມຍເມຕ຺ຖ ເຠສຊ຺ຊໍ ຊານາມ, ອິໂຕ ໂຖເກນ ອຸທເກນ ອິທໍ ຜາຓິຕໍ ອາໂລເຬຕ຺ວາ ນ຺ຫານປຣິໂຍສາເນ ປາຕຸໍ ເທຖ, ອິຕິ ອຸຓ຺ໂຫທເກນ ພຫິ ປຣິເສໂທ ຠວິສ຺ສຕິ, ອິມິນາ ອນ຺ໂຕຕິ ເອວໍ ສມຓສ຺ສ ໂຄຕມສ຺ສ ຜາສຸກໍ ຠວິສ຺ສຕີ’’ຕິ ວຕ຺ວາ ເຖຣສ຺ສ ປຕ຺ເຕ ປກ຺ຂິປິຕ຺ວາ ອທາສິ.

ອຸປສງ຺ກມີຕິ ຕສ຺ມິໍ ກິຣ ອາພາເຘ ປຏິປ຺ປສ຺ສທ຺ເຘ ‘‘ເທວຫິເຕນ ຕຖາຄຕສ຺ສ ເຠສຊ຺ຊໍ ທິນ຺ນໍ, ເຕເນວ ໂຣໂຄ ວູປສນ຺ໂຕ, ອໂຫ ທານໍ ປຣມທານໍ ພ຺ຣາຫ຺ມຓສ຺ສາ’’ຕິ ກຖາ ວິຕ຺ຖາຣິຕາ ຊາຕາ. ຕໍ ສຸຕ຺ວາ ກິຕ຺ຕິກາໂມ ພ຺ຣາຫ຺ມໂຓ ‘‘ເອຕ຺ຕເກນປິ ຕາວ ເມ ອຍໍ ກິຕ຺ຕິສທ຺ໂທ ອພ຺ຠຸຄ຺ຄໂຕ’’ຕິ ໂສມນສ຺ສຊາໂຕ ອຕ຺ຕນາ ກຕຠາວໍ ຊານາເປຕຸກາໂມ ຕາວຕເກເນວ ທສພເລ ວິສ຺ສາສໍ ອາປຊ຺ຊິຕ຺ວາ ອຸປສງ຺ກມິ.

ທຊ຺ຊາຕິ ທເທຍ຺ຍ. ກຖໍ ຫິ ຍຊມານສ຺ສາຕິ ເກນ ກາຣເຓນ ຍຊນ຺ຕສ຺ສ. ອິຊ຺ຌຕີຕິ ສມິຊ຺ຌຕິ ມຫປ຺ຜໂລ ໂຫຕິ. ໂຍເວທີຕິ ໂຍ ອເວທິ ອຎ຺ຎາສິ, ວິທິຕໍ ປາກຏມກາສິ ‘‘ໂຍເວຕີ’’ຕິປິ ປາໂຐ, ໂຍ ອເວຕິ ຊານາຕີຕິ ອຕ຺ໂຖ. ປສ຺ສຕີຕິ ທິພ຺ພຈກ຺ຂຸນາ ປສ຺ສຕິ. ຊາຕິກ຺ຂຍນ຺ຕິ ອຣຫຕ຺ຕໍ. ອຠິຎ຺ຎາໂວສິໂຕຕິ ຊານິຕ຺ວາ ໂວສິໂຕ ໂວສານໍ ກຕກິຈ຺ຈຕໍ ປຕ຺ໂຕ. ເອວໍ ຫິ ຍຊມານສ຺ສາຕິ ອິມິນາ ຂີຓາສເວ ຍຊນາກາເຣນ ຍຊນ຺ຕສ຺ສ. ຕຕິຍໍ.