໒. ອຸທຍສຸຕ຺ຕວຓ຺ຓນາ

໑໙໘. ທຸຕິເຍ ໂອທເນນ ປູເຣສີຕິ ອຕ຺ຕໂນ ອຕ຺ຖາຍ ສມ຺ປາທິເຕນ ສູປພ຺ຍຎ຺ຊເນນ ໂອທເນນ ປູເຣຕ຺ວາ ອທາສິ. ຠຄວາ ກິຣ ປຈ຺ຈູສສມເຍ ໂລກໍ ໂອໂລເກນ຺ໂຕວ ຕໍ ພ຺ຣາຫ຺ມຓໍ ທິສ຺ວາ, ປາໂຕວ ສຣີຣປຏິຊຄ຺ຄນໍ ກຕ຺ວາ, ຄນ຺ຘກຸຏິໍ ປວິສິຕ຺ວາ, ທ຺ວາຣໍ ປິຘາຍ, ນິສິນ຺ໂນ ຕສ຺ສ ໂຠຊນໍ ອຸປສໍຫຣິຍມານໍ ທິສ຺ວາ, ເອກໂກວ ປຕ຺ຕໍ ອໍສກູເຏ ລຄ຺ເຄຕ຺ວາ, ຄນ຺ຘກຸຏິໂຕ ນິກ຺ຂມ຺ມ, ນຄຣທ຺ວາເຣ ປຕ຺ຕໍ ນີຫຣິຕ຺ວາ, ອນ຺ໂຕນຄຣໍ ປວິສິຕ຺ວາ, ປຏິປາຏິຍາ ຄຈ຺ຉນ຺ໂຕ ພ຺ຣາຫ຺ມຓສ຺ສ ທ຺ວາຣໂກຏ຺ຐເກ ອຏ຺ຐາສິ. ພ຺ຣາຫ຺ມໂຓ ຠຄວນ຺ຕໍ ທິສ຺ວາ, ອຕ຺ຕໂນ ສຊ຺ຊິຕໍ ໂຠຊນໍ ອທາສິ. ຕໍ ສນ຺ຘາເຍຕໍ ວຸຕ຺ຕໍ. ທຸຕິຍມ຺ປີຕິ ທຸຕິຍທິວເສປິ. ຕຕິຍມ຺ປີຕິ ຕຕິຍທິວເສປິ. ຕານິ ກິຣ ຕີຓິ ທິວສານິ ນິຣນ຺ຕຣໍ ພ຺ຣາຫ຺ມຓສ຺ສ ຆຣທ຺ວາຣໍ ຄຈ຺ຉນ຺ຕສ຺ສ ຠຄວໂຕ ອນ຺ຕຣາ ອຎ຺ໂຎ ໂກຈິ ອຸຏ຺ຐາຍ ປຕ຺ຕໍ ຄເຫຕຸໍ ສມຕ຺ໂຖ ນາມ ນາໂຫສິ, ມຫາຊໂນ ໂອໂລເກນ຺ໂຕວ ອຏ຺ຐາສິ.

ເອຕທໂວຈາຕິ ພ຺ຣາຫ຺ມໂຓ ຕີຓິ ທິວສານິ ປຕ຺ຕໍ ປູເຣຕ຺ວາ ເທນ຺ໂຕປິ ນ ສທ຺ຘາຍ ອທາສິ, ‘‘ຆຣທ຺ວາຣໍ ອາຄນ຺ຕ຺ວາ ຐິຕສ຺ສ ປພ຺ພຊິຕສ຺ສ ຠິກ຺ຂາມຕ຺ຕມ຺ປິ ອທຕ຺ວາ ຠຸຎ຺ຊຕີ’’ຕິ ອຸປາຣມ຺ຠຠເຍນ ອທາສິ. ທທນ຺ໂຕ ຈ ທ຺ເວ ທິວສານິ ທຕ຺ວາ ກິຎ຺ຈິ ອວຕ຺ວາວ ນິວຕ຺ໂຕ. ຠຄວາປິ ກິຎ຺ຈິ ອວຕ຺ວາວ ປກ຺ກນ຺ໂຕ. ຕຕິຍທິວເສ ປນ ອຘິວາເສຕຸໍ ອສກ຺ໂກນ຺ໂຕ ເອຕໍ ‘‘ປກຏ຺ຐໂກ’’ຕິອາທິວຈນໍ ອໂວຈ. ຠຄວາປິ ເອຕໍ ວຈນໍ ນິຈ຺ຉາຣາປນຕ຺ຖເມວ ຍາວ ຕຕິຍມຄມາສິ. ຕຕ຺ຖ ປກຏ຺ຐໂກຕິ ຣສຄິທ຺ໂຘ.

ປຸນປ຺ປຸນໍ ເຈວ ວປນ຺ຕິ ພີຊນ຺ຕິ ສຕ຺ຖາ ພ຺ຣາຫ຺ມຓສ຺ສ ວຈນໍ ສຸຕ຺ວາ, ‘‘ພ຺ຣາຫ຺ມຓ, ຕ຺ວໍ ຕີຓິ ທິວສານິ ປິຓ຺ຑປາຕໍ ທຕ຺ວາ ໂອສກ຺ກສິ, ປຸນປ຺ປຸນໍ ກາຕພ຺ພາ ນາມ ໂລກສ຺ມິໍ ໂສຬສ ຘມ຺ມາ’’ຕິ ວຕ຺ວາ ເຕ ຘມ຺ເມ ທສ຺ເສຕຸໍ ອິມໍ ເທສນໍ ອາຣຠິ. ຕຕ຺ຖ ປຸນປ຺ປຸນໍ ເຈວ ວປນ຺ຕີຕິ ເອກສ຺ມິໍ ສສ຺ສວາເຣ ວຸຕ຺ຕໍ ‘‘ອລເມຕ຺ຕາວຕາ’’ຕິ ອໂນສກ຺ກິຕ຺ວາ ອປຣາປເຣສຸປິ ສສ຺ສວາເຣສຸ ຈ ວປນ຺ຕິເຍວ. ປຸນປ຺ປຸນໍ ວສ຺ສຕີຕິ ນ ເອກທິວສໍ ວສ຺ສິຕ຺ວາ ຕິຏ຺ຐຕິ, ປຸນປ຺ປຸນທິວເສສຸປິ ປຸນປ຺ປຸນສໍວຈ຺ຉເຣສຸປິ ວສ຺ສຕິເຍວ, ເອວໍ ຊນປທາ ອິທ຺ຘາ ໂຫນ຺ຕິ. ເອເຕນຸປາເຍນ ສພ຺ພຕ຺ຖ ນໂຍ ເວທິຕພ຺ໂພ.

ຍາຈກາຕິ ອິມສ຺ມິໍ ປເທ ສຕ຺ຖາ ເທສນາກຸສລຕາຍ ອຕ຺ຕານມ຺ປິ ປກ຺ຂິປິຕ຺ວາ ທສ຺ເສຕິ. ຂີຣນິກາຕິ ຂີຣກາຣກາ ໂຄໂທຫກາ. ນ ຫິ ເຕ ເອກວາຣເມວ ຖນໍ ອຎ຺ຉນ຺ຕິ, ປຸນປ຺ປຸນໍ ອຎ຺ຉນ຺ຕາ ເຘນຸໍ ທຸຫນ຺ຕີຕິ ອຕ຺ໂຖ. ກິລມຕິ ຜນ຺ທຕິ ຈາຕິ ອຍໍ ສຕ຺ໂຕ ເຕນ ອິຣິຍາປເຖນ ກິລມຕິ ເຈວ ຜນ຺ທຕິ ຈ. ຄພ຺ຠນ຺ຕິ ໂສຓສິງ຺ຄາລາທີນມ຺ປິ ຕິຣຈ຺ຉານຄຕານໍ ກຸຈ຺ຉິໍ. ສິວຖິກນ຺ຕິ ສຸສານໍ, ມຕໍ ມຕໍ ສຕ຺ຕໍ ຕຕ຺ຖ ປຸນປ຺ປຸນໍ ຫຣນ຺ຕີຕິ ອຕ຺ໂຖ. ມຄ຺ຄຎ຺ຈ ລທ຺ຘາ ອປຸນພ຺ຠວາຍາຕິ ອປຸນພ຺ຠວາຍ ມຄ຺ໂຄ ນາມ ນິພ຺ພານໍ, ຕໍ ລຠິຕ຺ວາຕິ ອຕ຺ໂຖ.

ເອວໍ ວຸຕ຺ເຕຕິ ເອວໍ ຠຄວຕາ ອນ຺ຕຣວີຖິຍໍ ຐຕ຺ວາວ ໂສຬສ ປຸນປ຺ປຸນຘມ຺ເມ ເທເສນ຺ເຕນ ວຸຕ຺ເຕ. ເອຕທໂວຈາຕິ ເທສນາປຣິໂຍສາເນ ປສນ຺ໂນ ສທ຺ຘິໍ ປຸຕ຺ຕທາຣມິຕ຺ຕຎາຕິວຄ຺ເຄນ ຠຄວໂຕ ປາເທ ວນ຺ທິຕ຺ວາ ເອຕໍ ‘‘ອຠິກ຺ກນ຺ຕໍ ໂຠ’’ຕິອາທິວຈນໍ ອໂວຈ. ທຸຕິຍໍ.