໓. ອນ຺ຘກວິນ຺ທສຸຕ຺ຕວຓ຺ຓນາ

໑໘໔. ຕຕິເຍ ອນ຺ຘກວິນ຺ທນ຺ຕິ ເອວໍນາມກໍ ຄາມໍ. ອຸປສງ຺ກມີຕິ ‘‘ສຕ຺ຖາ ອິທານິປິ ວີຣິຍໍ ກໂຣຕິ ປຘານມນຸຍຸຎ຺ຊຕິ, ຄຈ຺ຉາມິສ຺ສ ສນ຺ຕິເກ ຐຕ຺ວາ ສາສນານຸຈ຺ຉວິກໍ ວີຣິຍປຏິສໍຍຸຕ຺ຕໍ ຄາຖໍ ວກ຺ຂາມີ’’ຕິ ອຸປສງ຺ກມິ.

ປນ຺ຕານີຕິ ຊນຕໍ ອຕິກ຺ກມິຕ຺ວາ ມນຸສ຺ສານໍ ອນຸປຈາເຣ ຐິຕານິ. ສໍໂຍຊນວິປ຺ປໂມກ຺ຂາຕິ ຕານິ ຈ ເສນາສນານິ ເສວມາໂນ ນ ຈີວຣາທີນໍ ອຕ຺ຖາຍ ເສເວຍ຺ຍ, ອຖ ໂຂ ທສສໍໂຍຊນວິປ຺ປໂມກ຺ຂຕ຺ຖາຍ ຈເຣຍ຺ຍ. ສງ຺ເຆ ວເສຕິ ເຕສຸ ເສນາສເນສຸ ຣຕິໍ ອລຠນ຺ໂຕ ອຸປຏ຺ຐາກາທີນໍ ຈິຕ຺ຕານຸຣກ຺ຂຓຕ຺ຖໍ ຄທ຺ຣຠປິຏ຺ເຐ ຣຊໍ ວິຍ ອຸປ຺ປຕນ຺ໂຕ ອຣຎ຺ເຎ ອຈຣິຕ຺ວາ ສງ຺ຆມຊ຺ເຌ ວເສຍ຺ຍ. ຣກ຺ຂິຕຕ຺ໂຕ ສຕີມາຕິ ຕຕ຺ຖ ຈ ວສນ຺ໂຕ ສຄວຈຓ຺ໂຑ ໂຄໂຓ ວິຍ ສພ຺ຣຫ຺ມຈາຣິໂນ ອວິຊ຺ຌນ຺ໂຕ ອຆຏ຺ເຏນ຺ໂຕ ຣກ຺ຂິຕຕ຺ໂຕ ສຕິປຏ຺ຐານປຣາຍໂຓ ຫຸຕ຺ວາ ວເສຍ຺ຍ.

ອິທານິ ສງ຺ເຆ ວສມານສ຺ສ ຠິກ຺ຂຸໂນ ຠິກ຺ຂາຈາຣວຕ຺ຕໍ ອາຈິກ຺ຂນ຺ໂຕ ກຸລາກຸລນ຺ຕິອາທິມາຫ. ຕຕ຺ຖ ປິຓ຺ຑິກາຍ ຈຣນ຺ໂຕຕິ ປິຓ຺ຑຕ຺ຖາຍ ຈຣມາໂນ. ເສເວຖ ປນ຺ຕານິ ເສນາສນານີຕິ ສງ຺ຆມຊ຺ຌໍ ໂອຕຣິຕ຺ວາ ວສມາໂນປິ ຘຸຣປຣິເວເຓ ຕາລນາຬິເກຣອາທີນິ ໂຣເປຕ຺ວາ ອຸປຏ຺ຐາກາທິສໍສຏ຺ໂຐ ນ ວເສຍ຺ຍ, ຈິຕ຺ຕກລ຺ລຕໍ ປນ ຊເນຕ຺ວາ ຈິຕ຺ຕໍ ຫາເສຕ຺ວາ ໂຕເສຕ຺ວາ ປຸນ ປນ຺ຕເສນາສເນ ວເສຍ຺ຍາຕິ ອຣຎ຺ຎສ຺ເສວ ວຓ຺ຓໍ ກເຖຕິ. ຠຍາຕິ ວຏ຺ຏຠຍໂຕ. ອຠເຍຕິ ນິພ຺ພາເນ. ວິມຸຕ຺ໂຕຕິ ອຘິມຸຕ຺ໂຕ ຫຸຕ຺ວາ ວເສຍ຺ຍ.

ຍຕ຺ຖ ເຠຣວາຕິ ຍສ຺ມິໍ ຐາເນ ຠຍຊນກາ ສວິຎ຺ຎາຓກາ ສີຫພ຺ຍຄ຺ຆາທໂຍ, ອວິຎ຺ຎາຓກາ ຣຕ຺ຕິຠາເຄ ຂາຓຸວລ຺ລິອາທໂຍ ພຫູ ອຕ຺ຖິ. ສຣີສປາຕິ ທີຆຊາຕິກາທິສຣີສປາ. ນິສີທິ ຕຕ຺ຖ ຠິກ຺ຂູຕິ ຕາທິເສ ຐາເນ ຠິກ຺ຂຸ ນິສິນ຺ໂນ. ອິມິນາ ອິທໍ ທີເປຕິ – ຠຄວາ ຍຖາ ຕຸມ຺ເຫ ເອຕຣຫິ ຕຕ຺ຣຏ຺ຐກເຠຣວາຣມ຺ມຓານິ ເຈວ ສຣີສເປ ຈ ວິຊ຺ຊຸນິຈ຺ຉາຣຓາທີນິ ຈ ອມນສິກຕ຺ວາ ນິສິນ຺ນາ, ເອວເມວໍ ປຘານມນຸຍຸຕ຺ຕາ ຠິກ຺ຂູ ນິສີທນ຺ຕີຕິ.

ຊາຕຸ ເມ ທິຏ຺ຐນ຺ຕິ ເອກໍເສນ ມຍາ ທິຏ຺ຐໍ. ນ ຍິທໍ ອິຕິຫີຕິຫນ຺ຕິ ອິທໍ ອິຕິຫ ອິຕິຫາຕິ ນ ຕກ຺ກເຫຕຸ ວາ ນຍເຫຕຸ ວາ ປິຏກສມ຺ປທາເນນ ວາ ອຫໍ ວທາມິ. ເອກສ຺ມິໍ ພ຺ຣຫ຺ມຈຣິຍສ຺ມິນ຺ຕິ ເອກາຍ ຘມ຺ມເທສນາຍ. ຘມ຺ມເທສນາ ຫິ ອິຘ ພ຺ຣຫ຺ມຈຣິຍນ຺ຕິ ອຘິປ຺ເປຕາ. ມຈ຺ຈຸຫາຍິນນ຺ຕິ ມຣຓປຣິຈ຺ຈາຄິນໍ ຂີຓາສວານໍ.

ທສາ ຈ ທສຘາ ທສາຕິ ເອຕ຺ຖ ທສາຕິ ທເສວ, ທສຘາ ທສາຕິ ສຕໍ, ອຎ຺ເຎ ຈ ທສຸຕ຺ຕຣໍ ເສຂສຕໍ ປສ຺ສາມີຕິ ວທຕິ. ໂສຕສມາປນ຺ນາຕິ ມຄ຺ຄໂສຕໍ ສມາປນ຺ນາ. ອຕິຣຈ຺ຉານຄາມິໂນຕິ ເທສນາມຕ຺ຕເມຕໍ, ອວິນິປາຕຘມ຺ມາຕິ ອຕ຺ໂຖ. ສງ຺ຂາຕຸໍ ໂນປິ ສກ຺ໂກມີຕິ ມຸສາວາທຠເຍນ ເອຕ຺ຕກາ ນາມ ປຸຎ຺ຎຠາຄິໂນ ສຕ຺ຕາຕິ ຄເຓຕຸໍ ນ ສກ຺ໂກມີຕິ ພຫຸໍ ພ຺ຣຫ຺ມຘມ຺ມເທສນໍ ສນ຺ຘາຍ ເອວມາຫ. ຕຕິຍໍ.