໑. ສນງ຺ກຸມາຣສຸຕ຺ຕວຓ຺ຓນາ

໑໘໒. ທຸຕິຍວຄ຺ຄສ຺ສ ປຐເມ ສປ຺ປິນີຕີເຣຕິ ສປ຺ປິນີນາມິກາຍ ນທິຍາ ຕີເຣ. ສນງ຺ກຸມາໂຣຕິ ໂສ ກິຣ ປຎ຺ຈສິຂກຸມາຣກກາເລ ຌານໍ ຠາເວຕ຺ວາ ພ຺ຣຫ຺ມໂລເກ ນິພ຺ພຕ຺ໂຕ ກຸມາຣກວຓ຺ເຓເນວ ວິຈຣຕິ. ເຕນ ນໍ ‘‘ກຸມາໂຣ’’ຕິ ສຎ຺ຊານນ຺ຕິ, ໂປຣາຓກຕ຺ຕາ ປນ ‘‘ສນງ຺ກຸມາໂຣ’’ຕິ ວຸຈ຺ຈຕິ. ຊເນຕສ຺ມິນ຺ຕິ ຊນິຕສ຺ມິໍ, ປຊາຍາຕິ ອຕ຺ໂຖ. ເຍ ໂຄຕ຺ຕປຏິສາຣິໂນຕິ ເຍ ຊເນຕສ຺ມິໍ ໂຄຕ຺ຕໍ ປຏິສຣນ຺ຕິ ເຕສຸ ໂລເກ ໂຄຕ຺ຕປຏິສາຣີສຸ ຂຕ຺ຕິໂຍ ເສຏ຺ໂຐ. ວິຊ຺ຊາຈຣຓສມ຺ປນ຺ໂນຕິ ຠຍເຠຣວສຸຕ຺ຕປຣິຍາເຍນ (ມ. ນິ. ໑.໓໔ ອາທໂຍ) ປຸພ຺ເພນິວາສາທີຫິ ວາ ຕີຫິ, ອມ຺ພຏ຺ຐສຸຕ຺ຕປຣິຍາເຍນ (ທີ. ນິ. ໑.໒໗໘ ອາທໂຍ) ວິປສ຺ສນາຎາຓໍ ມໂນມຍິທ຺ຘິ ຉ ອຠິຎ຺ຎາໂຍຕິ ອິມາຫິ ວາ ອຏ຺ຐຫິ ວິຊ຺ຊາຫິ, ສີເລສຸ ປຣິປູຣກາຣິຕາ ອິນ຺ທ຺ຣິເຍສຸ ຄຸຕ຺ຕທ຺ວາຣຕາ ໂຠຊເນ ມຕ຺ຕຎ຺ຎຸຕາ ຊາຄຣິຍານຸໂຍໂຄ ສຕ຺ຕ ສທ຺ຘມ຺ມາ ຈຕ຺ຕາຣິ ຣູປາວຈຣຊ຺ຌານານີຕິ ເອວໍ ປນ຺ນຣສຘມ຺ມເຠເທນ ຈຣເຓນ ຈ ສມນ຺ນາຄໂຕ. ໂສ ເສຏ຺ໂຐ ເທວມານຸເສຕິ ໂສ ຂີຓາສວພ຺ຣາຫ຺ມໂຓ ເທເວສຸ ຈ ມນຸສ຺ເສສຸ ຈ ເສຏ຺ໂຐ ອຸຕ຺ຕໂມຕິ. ປຐມໍ.