໙. ຕຸຣູພ຺ຣຫ຺ມສຸຕ຺ຕວຓ຺ຓນາ

໑໘໐. ນວເມ ອາພາຘິໂກຕິ ‘‘ສາສປມຕ຺ຕີຫິ ປີຬກາຫີ’’ຕິອາທິນາ ນເຍນ ອນນ຺ຕຣສຸຕ຺ເຕ ອາຄເຕນ ອາພາເຘນ ອາພາຘິໂກ. ພາຬ຺ຫຄິລາໂນຕິ ອຘິມຕ຺ຕຄິລາໂນ. ຕຸຣູຕິ ໂກກາລິກສ຺ສ ອຸປຊ຺ຌາໂຍ ຕຸຣຸຕ຺ເຖໂຣ ນາມ ອນາຄາມິຜລໍ ປຕ຺ວາ ພ຺ຣຫ຺ມໂລເກ ນິພ຺ພຕ຺ໂຕ. ໂສ ຠູມຏ຺ຐກເທວຕາ ອາທິໍ ກຕ຺ວາ, ‘‘ອຍຸຕ຺ຕໍ ໂກກາລິເກນ ກຕໍ ອຄ຺ຄສາວເກ ອນ຺ຕິມວຕ຺ຖຸນາ ອພ຺ຠາຈິກ຺ຂນ຺ເຕນາ’’ຕິ ປຣມ຺ປຣາຍ ພ຺ຣຫ຺ມໂລກສມ຺ປຕ຺ຕໍ ໂກກາລິກສ຺ສ ປາປກມ຺ມໍ ສຸຕ຺ວາ – ‘‘ມາ ມຍ຺ຫໍ ປສ຺ສນ຺ຕສ຺ເສວ ວຣາໂກ ນສ຺ສິ, ໂອວທິສ຺ສາມິ ນໍ ເຖເຣສຸ ຈິຕ຺ຕປສາທຕ຺ຖາຍາ’’ຕິ ອາຄນ຺ຕ຺ວາ ຕສ຺ສ ປຸຣໂຕ ອຏ຺ຐາສິ. ຕໍ ສນ຺ຘາຍ ວຸຕ຺ຕໍ ‘‘ຕຸຣູ ປຈ຺ເຈກພ຺ຣຫ຺ມາ’’ຕິ. ເປສລາຕິ ປິຍສີລາ. ໂກສິ ຕ຺ວໍ, ອາວຸໂສຕິ ນິປນ຺ນໂກວ ກພຣກ຺ຂີນິ ອຸມ຺ມີເລຕ຺ວາ ເອວມາຫ. ປສ຺ສ ຍາວຎ຺ຈ ເຕຕິ ປສ຺ສ ຍຕ຺ຕກໍ ຕຍາ ອປຣທ຺ຘໍ, ອຕ຺ຕໂນ ນລາເຏ ມຫາຄຓ຺ຑໍ ອປສ຺ສນ຺ໂຕ ສາສປມຕ຺ຕາຍ ປີຬກາຍ ມໍ ໂຈເທຕພ຺ພໍ ມຎ຺ຎສີຕິ ອາຫ.

ອຖ ນໍ ‘‘ອທິຏ຺ຐິປ຺ປຕ຺ໂຕ ອຍໍ ວຣາໂກ, ຄິລວິໂສ ວິຍ ກສ຺ສຈິ ວຈນໍ ນ ກຣິສ຺ສຕີ’’ຕິ ຎຕ຺ວາ ປຸຣິສສ຺ສ ຫີຕິອາທິມາຫ. ຕຕ຺ຖ ກຸຐາຣີຕິ ກຸຐາຣິສທິສາ ຜຣຸສາ ວາຈາ. ຉິນ຺ທຕີຕິ ກຸສລມູລສງ຺ຂາເຕ ມູເລເຍວ ນິກນ຺ຕຕິ. ນິນ຺ທິຍນ຺ຕິ ນິນ຺ທິຕພ຺ພໍ ທຸສ຺ສີລປຸຄ຺ຄລໍ. ປສໍສຕີຕິ ອຸຕ຺ຕມຕ຺ເຖ ສມ຺ຠາເວຕ຺ວາ ຂີຓາສໂວຕິ ວທຕິ. ຕໍ ວາ ນິນ຺ທຕິ ໂຍ ປສໍສິໂຍຕິ, ໂຍ ວາ ປສໍສິຕພ຺ໂພ ຂີຓາສໂວ, ຕໍ ອນ຺ຕິມວຕ຺ຖຸນາ ໂຈເທນ຺ໂຕ ‘‘ທຸສ຺ສີໂລ ອຍ’’ນ຺ຕິ ວທຕິ. ວຈິນາຕິ ມຸເຂນ ໂສ ກລິນ຺ຕິ, ໂສ ຕໍ ອປຣາຘໍ ມຸເຂນ ວິຈິນາຕິ ນາມ. ກລິນາ ເຕນາຕິ ເຕນ ອປຣາເຘນ ສຸຂໍ ນ ວິນ຺ທຕິ. ນິນ຺ທິຍປສໍສາຍ ຫິ ປສໍສິຍນິນ຺ທາຍ ຈ ສມໂກວ ວິປາໂກ.

ສພ຺ພສ຺ສາປິ ສຫາປິ ອຕ຺ຕນາຕິ ສພ຺ເພນ ສເກນປິ ອຕ຺ຕນາປິ ສທ຺ຘິໍ ໂຍ ອກ຺ເຂສຸ ຘນປຣາຊໂຍ ນາມ, ອຍໍ ອປ຺ປມຕ຺ຕໂກ ອປຣາໂຘ. ໂຍ ສຸຄເຕສູຕິ ໂຍ ປນ ສມ຺ມຄ຺ຄເຕສຸ ປຸຄ຺ຄເລສຸ ຈິຕ຺ຕໍ ປທຸສ຺ເສຍ຺ຍ, ອຍໍ ຈິຕ຺ຕປໂທໂສວ ຕໂຕ ກລິໂຕ ມຫນ຺ຕຕໂຣ ກລິ.

ອິທານິ ຕສ຺ສ ມຫນ຺ຕຕຣຠາວໍ ທສ຺ເສນ຺ໂຕ ສຕໍ ສຫສ຺ສານນ຺ຕິອາທິມາຫ. ຕຕ຺ຖ ສຕໍ ສຫສ຺ສານນ຺ຕິ ນິຣພ຺ພຸທຄຓນາຍ ສຕສຫສ຺ສໍ. ຉຕ຺ຕິໍສຕີຕິ ອປຣານິ ຉຕ຺ຕິໍສຕິ ນິຣພ຺ພຸທານິ. ປຎ຺ຈ ຈາຕິ ອພ຺ພຸທຄຓນາຍ ປຎ຺ຈ ອພ຺ພຸທານິ. ຍມຣິຍຄຣຫີຕິ ຍໍ ອຣິເຍ ຄຣຫນ຺ໂຕ ນິຣຍໍ ອຸປປຊ຺ຊຕິ, ຕຕ຺ຖ ເອຕ຺ຕກໍ ອາຍຸປ຺ປມາຓນ຺ຕິ. ນວມໍ.