໕. ອຎ຺ຎຕຣພ຺ຣຫ຺ມສຸຕ຺ຕວຓ຺ຓນາ

໑໗໖. ປຎ຺ຈເມ ເຕໂຊຘາຕຸໍ ສມາປຊ຺ຊິຕ຺ວາຕິ ເຕໂຊກສິຓປຣິກມ຺ມໍ ກຕ຺ວາ ປາທກຊ຺ຌານໂຕ ວຸຏ຺ຐາຍ, ‘‘ສຣີຣໂຕ ຊາລາ ນິກ຺ຂມນ຺ຕູ’’ຕິ ອຘິຏ຺ຐຫນ຺ໂຕ ອຘິຏ຺ຐານຈິຕ຺ຕານຸຠາເວນ ສກລສຣີຣໂຕ ຊາລາ ນິກ຺ຂມນ຺ຕິ, ເອວໍ ເຕໂຊຘາຕຸໍ ສມາປນ຺ໂນ ນາມ ໂຫຕິ, ຕຖາ ສມາປຊ຺ຊິຕ຺ວາ. ຕສ຺ມິໍ ພ຺ຣຫ຺ມໂລເກຕິ ກສ຺ມາ ເຖໂຣ ຕຕ຺ຖ ອຄມາສິ? ເຖຣສ຺ສ ກິຣ ເຕໂຊຘາຕຸໍ ສມາປຊ຺ຊິຕ຺ວາ ຕສ຺ສ ພ຺ຣຫ຺ມຸໂນ ອຸປຣິ ນິສິນ຺ນໍ ຕຖາຄຕໍ ທິສ຺ວາ ‘‘ອຏ຺ຐິເວຘີ ອຍໍ ປຸຄ຺ຄໂລ, ມຍາເປຕ຺ຖ ຄນ຺ຕພ຺ພ’’ນ຺ຕິ ອໂຫສິ, ຕສ຺ມາ ອຄມາສິ. ເສສານໍ ຄມເນປິ ເອເສວ ນໂຍ. ໂສ ຫິ ພ຺ຣຫ຺ມາ ຕຖາຄຕສ຺ສ ເຈວ ຕຖາຄຕສາວການຎ຺ຈ ອານຸຠາວໍ ອທິສ຺ວາ ອຠພ຺ໂພ ວິນຍໍ ອຸປຄນ຺ຕຸໍ, ເຕນ ໂສ ສນ຺ນິປາໂຕ ອໂຫສິ. ຕຕ຺ຖ ຕຖາຄຕສ຺ສ ສຣີຣໂຕ ອຸຄ຺ຄຕຊາລາ ສກລພ຺ຣຫ຺ມໂລກໍ ອຕິກ຺ກມິຕ຺ວາ ອຊຏາກາເສ ປກ຺ຂນ຺ທາ, ຕາ ຈ ປນ ຉພ຺ພຓ຺ຓາ ອເຫສຸໍ, ຕຖາຄຕສ຺ສ ສາວການໍ ອາຠາ ປກຕິວຓ຺ຓາວ.

ປສ຺ສສິ ວີຕິວຕ຺ຕນ຺ຕນ຺ຕິ ອິມສ຺ມິໍ ພ຺ຣຫ຺ມໂລເກ ອຎ຺ຎພ຺ຣຫ຺ມສຣີຣວິມານາລງ຺ກາຣາທີນໍ ປຠາ ອຕິກ຺ກມມານໍ ພຸທ຺ຘສ຺ສ ຠຄວໂຕ ປຠສ຺ສຣໍ ປຠໍ ປສ຺ສສີຕິ ປຸຈ຺ຉຕິ. ນ ເມ, ມາຣິສ, ສາ ທິຏ຺ຐີຕິ ຍາ ເມສາ, ‘‘ອິຘາຄນ຺ຕຸໍ ສມຕ຺ໂຖ ອຎ຺ໂຎ ສມໂຓ ວາ ພ຺ຣາຫ຺ມໂຓ ວາ ນຕ຺ຖີ’’ຕິ ປຸເຣ ທິຏ຺ຐິ, ນຕ຺ຖິ ເມ ສາ. ກຖໍ ວຊ຺ຊນ຺ຕິ ເກນ ກາຣເຓນ ວເທຍ຺ຍໍ. ນິຈ຺ໂຈມ຺ຫິ ສສ຺ສໂຕຕິ ອິມສ຺ສ ກິຣ ພ຺ຣຫ຺ມຸໂນ ລທ຺ຘິທິຏ຺ຐິ ສສ຺ສຕທິຏ຺ຐິ ຈາຕິ ທ຺ເວ ທິຏ຺ຐິໂຍ. ຕຕ຺ຣາສ຺ສ ຕຖາຄຕຎ຺ເຈວ ຕຖາຄຕສາວເກ ຈ ປສ຺ສໂຕ ລທ຺ຘິທິຏ຺ຐິ ປຫີນາ. ຠຄວາ ປເນຕ຺ຖ ມຫນ຺ຕໍ ຘມ຺ມເທສນໍ ເທເສສິ. ພ຺ຣຫ຺ມາ ເທສນາປຣິໂຍສາເນ ໂສຕາປຕ຺ຕິຜເລ ປຕິຏ຺ຐຫິ. ອິຕິສ຺ສ ມຄ຺ເຄນ ສສ຺ສຕທິຏ຺ຐິ ປຫີນາ, ຕສ຺ມາ ເອວມາຫ.

ພ຺ຣຫ຺ມປາຣິສຊ຺ຊນ຺ຕິ ພ຺ຣຫ຺ມປາຣິຈາຣິກໍ. ເຖຣານຎ຺ຫິ ຠຓ຺ຑຄາຫກທຫຣາ ວິຍ ພ຺ຣຫ຺ມານມ຺ປິ ປາຣິສຊ຺ຊາ ພ຺ຣຫ຺ມາໂນ ນາມ ໂຫນ຺ຕິ. ເຕນຸປສງ຺ກມາຕິ ກສ຺ມາ ເຖຣສ຺ເສວ ສນ຺ຕິກໍ ເປເສສິ? ເຖເຣ ກິຣສ຺ສ ຕຕ຺ຕເກເນວ ກຖາສລ຺ລາເປນ ວິສ຺ສາໂສ ອຸທປາທິ, ຕສ຺ມາ ຕສ຺ເສວ ສນ຺ຕິກໍ ເປເສສິ ອຎ຺ເຎປີຕິ ຍຖາ ຕຸມ຺ເຫ ຈຕ຺ຕາໂຣ ຊນາ, ກິນ຺ນຸ ໂຂ ເອວຣູປາ ອຎ຺ເຎປິ ອຕ຺ຖິ, ອຸທາຫຸ ຕຸມ຺ເຫ ຈຕ຺ຕາໂຣ ເອວ ມຫິທ຺ຘິກາຕິ? ເຕວິຊ຺ຊາຕິ ປຸພ຺ເພນິວາສທິພ຺ພຈກ຺ຂຸອາສວກ຺ຂຍສງ຺ຂາຕາຫິ ຕີຫິ ວິຊ຺ຊາຫິ ສມນ຺ນາຄຕາ. ອິທ຺ຘິປຕ຺ຕາຕິ ອິທ຺ຘິວິຘຎາຓໍ ປຕ຺ຕາ. ເຈໂຕປຣິຍາຍໂກວິທາຕິ ປເຣສໍ ຈິຕ຺ຕາຈາເຣ ກຸສລາ. ເອວເມຕ຺ຖ ປຎ຺ຈ ອຠິຎ຺ຎາປິ ສຣູເປນ ວຸຕ຺ຕາ. ທິພ຺ພໂສຕໍ ປນ ຕາສໍ ວເສນ ອາຄຕເມວ ໂຫຕິ. ພຫູຕິ ເອວຣູປາ ຉຬຠິຎ຺ຎາ ພຸທ຺ຘສາວກາ ພຫູ ຄຓນປຖໍ ອຕິກ຺ກນ຺ຕາ, ສກລໍ ຊມ຺ພຸທີປໍ ກາສາວປຊ຺ໂຊຕໍ ກຕ຺ວາ ວິຈຣນ຺ຕີຕິ. ປຎ຺ຈມໍ.