໖. ພ຺ຣຫ຺ມໂລກສຸຕ຺ຕວຓ຺ຓນາ

໑໗໗. ຉຏ຺ເຐ ປຈ຺ເຈກໍ ທ຺ວາຣພາຫນ຺ຕິ ເອເກໂກ ເອເກກໍ ທ຺ວາຣພາຫໍ ນິສ຺ສາຍ ທ຺ວາຣປາລາ ວິຍ ອຏ຺ຐໍສຸ. ອິທ຺ໂຘຕິ ຌານສຸເຂນ ສມິທ຺ໂຘ. ຜີໂຕຕິ ອຠິຎ຺ຎາປຸປ຺ເຜຫິ ສຸປຸປ຺ຜິໂຕ. ອນຘິວາເສນ຺ໂຕຕິ ອສຫນ຺ໂຕ. ເອຕທໂວຈາຕິ ເອເຕສໍ ນິມ຺ມິຕພ຺ຣຫ຺ມານໍ ມຊ຺ເຌ ນິສິນ຺ໂນ ເອຕໍ ‘‘ປສ຺ສສິ ເມ’’ຕິອາທິວຈນໍ ອໂວຈ.

ຕໂຍ ສຸປຓ຺ຓາຕິ ຄາຖາຍ ປຎ຺ຈສຕາຕິ ສຕປທໍ ຣູປວເສນ ວາ ປນ຺ຕິວເສນ ວາ ໂຍເຊຕພ຺ພໍ. ຣູປວເສນ ຕາວ ຕໂຍ ສຸປຓ຺ຓາຕິ ຕີຓິ ສຸປຓ຺ຓຣູປສຕານິ. ຈຕຸໂຣ ຈ ຫໍສາຕິ ຈຕ຺ຕາຣິຫໍສຣູປສຕານິ. ພຸຄ຺ຆີນິສາ ປຎ຺ຈສຕາຕິ ພ຺ຍຄ຺ຆສທິສາ ເອກຈ຺ເຈ ມິຄາ ພ຺ຍຄ຺ຆີນິສາ ນາມ, ເຕສໍ ພ຺ຍຄ຺ຆີນິສາຣູປການໍ ປຎ຺ຈສຕານິ, ປນ຺ຕິວເສນ ຕໂຍ ສຸປຓ຺ຓາຕິ ຕີຓິ ສຸປຓ຺ຓປນ຺ຕິສຕານິ, ຈຕຸໂຣ ຫໍສາຕິ ຈຕ຺ຕາຣິ ຫໍສປນ຺ຕິສຕານິ. ພ຺ຍຄ຺ຆີນິສາ ປຎ຺ຈສຕາຕິ ປຎ຺ຈ ພ຺ຍຄ຺ຆີນິສາ ປນ຺ຕິສຕານິ. ຌາຍິໂນຕິ ຌາຍິສ຺ສ ມຍ຺ຫໍ ວິມາເນ ອຍໍ ວິຠູຕີຕິ ທສ຺ເສຕິ. ໂອຠາສຍນ຺ຕິ ໂອຠາສຍມານໍ. ອຸຕ຺ຕຣສ຺ສໍ ທິສາຍນ຺ຕິ ຕໍ ກິຣ ກນກວິມານໍ ເຕສໍ ມຫາພ຺ຣຫ຺ມານໍ ຐິຕຏ຺ຐານໂຕ ອຸຕ຺ຕຣທິສາຍໍ ໂຫຕິ. ຕສ຺ມາ ເອວມາຫ. ອຍໍ ປນສ຺ສ ອຘິປ຺ປາໂຍ – ເອວຣູເປ ກນກວິມາເນ ວສນ຺ໂຕ ອຫໍ ກສ຺ສ ອຎ຺ຎສ຺ສ ອຸປຏ຺ຐານໍ ຄມິສ຺ສາມີຕິ. ຣູເປ ຣຓໍ ທິສ຺ວາຕິ ຣູປມ຺ຫິ ຊາຕິຊຣາຠງ຺ຄສງ຺ຂາຕໍ ໂທສໍ ທິສ຺ວາ. ສທາ ປເວຘິຕນ຺ຕິ ສີຕາທີຫິ ຈ ນິຈ຺ຈໍ ປເວຘິຕໍ ຈລິຕໍ ຆຏ຺ຏິຕໍ ຣູປໍ ທິສ຺ວາ. ຕສ຺ມາ ນ ຣູເປ ຣມຕິ ສຸເມໂຘຕິ ຍສ຺ມາ ຣູເປ ຣຓໍ ປສ຺ສຕິ, ສທາ ປເວຘິຕຎ຺ຈ ຣູປໍ ປສ຺ສຕິ, ຕສ຺ມາ ສຸເມໂຘ ສຸນ຺ທຣປຎ຺ໂຎ ໂສ ສຕ຺ຖາ ຣູເປ ນ ຣມຕີຕິ. ຉຏ຺ຐໍ.