໔. ພກພ຺ຣຫ຺ມສຸຕ຺ຕວຓ຺ຓນາ

໑໗໕. ຈຕຸຕ຺ເຖ ປາປກໍ ທິຏ຺ຐິຄຕນ຺ຕິ ລາມິກາ ສສ຺ສຕທິຏ຺ຐິ. ອິທໍ ນິຈ຺ຈນ຺ຕິ ອິທໍ ສຫ ກາເຍນ ພ຺ຣຫ຺ມຏ຺ຐານໍ ອນິຈ຺ຈໍ ‘‘ນິຈ຺ຈ’’ນ຺ຕິ ວທຕິ. ຘຸວາທີນິ ຕສ຺ເສວ ເວວຈນານິ. ຕຕ຺ຖ ຘຸວນ຺ຕິ ຖິຣໍ. ສສ຺ສຕນ຺ຕິ ສທາ ວິຊ຺ຊມານໍ. ເກວລນ຺ຕິ ອຂຓ຺ຑໍ ສກລໍ. ອຈວນຘມ຺ມນ຺ຕິ ອຈວນສຠາວໍ. ອິທໍ ຫິ ນ ຊາຍຕີຕິອາທີສຸ ອິມສ຺ມິໍ ຐາເນ ໂກຈິ ຊາຍນໂກ ວາ ຊີຍນໂກ ວາ ມີຍນໂກ ວາ ຈວນໂກ ວາ ອຸປປຊ຺ຊນໂກ ວາ ນຕ຺ຖິ, ຕໍ ສນ຺ຘາຍ ວທຕິ. ອິໂຕ ຈ ປນຎ຺ຎນ຺ຕິ ອິໂຕ ສຫກາຍາ ພ຺ຣຫ຺ມຏ຺ຐານາ ອຸຕ຺ຕຣິ ອຎ຺ຎໍ ນິສ຺ສຣຓໍ ນາມ ນຕ຺ຖີຕິ. ເອວມສ຺ສ ຖາມຄຕາ ສສ຺ສຕທິຏ຺ຐິ ອຸປ຺ປນ຺ນາ ໂຫຕິ. ເອວໍວາທີ ຈ ປນ ໂສ ອຸປຣິ ຕິສ຺ໂສ ຌານຠູມິໂຍ ຈຕ຺ຕາໂຣ ມຄ຺ເຄ ຈຕ຺ຕາຣິ ຜລານິ ນິພ຺ພານນ຺ຕິ ສພ຺ພໍ ປຏິພາຫຕິ. ກທາ ປນສ຺ສ ສາ ທິຏ຺ຐິ ອຸປ຺ປນ຺ນາຕິ? ປຐມຊ຺ຌານຠູມິຍໍ ນິພ຺ພຕ຺ຕກາເລ. ທຸຕິຍຊ຺ຌານຠູມິຍນ຺ຕິ ເອເກ.

ຕຕ຺ຣາຍໍ ອນຸປຸພ຺ພິກຖາ – ເຫຏ຺ຐຸປປຕ຺ຕິໂກ ກິເຣສ ພ຺ຣຫ຺ມາ ອນຸປ຺ປນ຺ເນ ພຸທ຺ຘຸປ຺ປາເທ ອິສິປພ຺ພຊ຺ຊໍ ປພ຺ພຊິຕ຺ວາ ກສິຓປຣິກມ຺ມໍ ກຕ຺ວາ ສມາປຕ຺ຕິໂຍ ນິພ຺ພຕ຺ເຕຕ຺ວາ ອປຣິຫີນຊ຺ຌາໂນ ກາລໍ ກຕ຺ວາ ຈຕຸຕ຺ຖຊ຺ຌານຠູມິຍໍ ເວຫປ຺ຜລພ຺ຣຫ຺ມໂລເກ ປຎ຺ຈກປ຺ປສຕິກໍ ອາຍຸໍ ຄເຫຕ຺ວາ ນິພ຺ພຕ຺ຕິ. ຕຕ຺ຖ ຍາວຕາຍຸກໍ ຐຕ຺ວາ ເຫຏ຺ຐຸປປຕ຺ຕິກໍ ກຕ຺ວາ ຕຕິຍຊ຺ຌານໍ ປຓີຕໍ ຠາເວຕ຺ວາ ສຸຠກິຓ຺ຫພ຺ຣຫ຺ມໂລເກ ຈຕຸສຏ຺ຐິກປ຺ປໍ ອາຍຸໍ ຄເຫຕ຺ວາ ນິພ຺ພຕ຺ຕິ. ຕຕ຺ຖ ທຸຕິຍຊ຺ຌານໍ ຠາເວຕ຺ວາ ອາຠສ຺ສເຣ ອຏ຺ຐ ກປ຺ເປ ອາຍຸໍ ຄເຫຕ຺ວາ ນິພ຺ພຕ຺ຕິ. ຕຕ຺ຖ ປຐມຊ຺ຌານໍ ຠາເວຕ຺ວາ, ປຐມຊ຺ຌານຠູມິຍໍ ກປ຺ປາຍຸໂກ ຫຸຕ຺ວາ ນິພ຺ພຕ຺ຕິ. ໂສ ປຐມກາເລ ອຕ຺ຕນາ ກຕກມ຺ມຎ຺ຈ ນິພ຺ພຕ຺ຕຏ຺ຐານຎ຺ຈ ອຎ຺ຎາສິ, ກາເລ ປນ ຄຈ຺ຉນ຺ເຕ ຄຈ຺ຉນ຺ເຕ ອຸຠຍໍ ປມຸສ຺ສິຕ຺ວາ ສສ຺ສຕທິຏ຺ຐິໍ ອຸປ຺ປາເທສິ.

ອວິຊ຺ຊາຄໂຕຕິ ອວິຊ຺ຊາຍ ຄໂຕ ສມນ຺ນາຄໂຕ ອຎ຺ຎາຓີ ອນ຺ຘີຠູໂຕ. ຍຕ຺ຣ ຫິ ນາມາຕິ ໂຍ ນາມ. ວກ຺ຂຕີຕິ ຠຓຕິ. ‘‘ຍຕ຺ຣາ’’ຕິ ນິປາຕໂຍເຄນ ປນ ອນາຄຕວຈນໍ ກຕໍ.

ເອວໍ ວຸຕ຺ເຕ ໂສ ພ຺ຣຫ຺ມາ ຍຖາ ນາມ ມຄ຺ຄໂຈໂຣ ທ຺ເວ ຕໂຍ ປຫາເຣ ອຘິວາເສນ຺ໂຕ ສຫາເຍ ອນາຈິກ຺ຂິຕ຺ວາປິ ອຸຕ຺ຕຣິໍ ປຫາຣໍ ປຫຣິຍມາໂນ ‘‘ອສຸໂກ ຈ ອສຸໂກ ຈ ມຍ຺ຫໍ ສຫາໂຍ’’ຕິ ອາຈິກ຺ຂຕິ, ເອວເມວ ຠຄວຕາ ສນ຺ຕຊ຺ຊິຍມາໂນ ສຕິໍ ລຠິຕ຺ວາ, ‘‘ຠຄວາ ມຍ຺ຫໍ ປທານຸປທໍ ເປກ຺ຂນ຺ໂຕ ມໍ ນິປ຺ປີຬິຕຸກາໂມ’’ຕິ ຠີໂຕ ອຕ຺ຕໂນ ສຫາເຍ ອາຈິກ຺ຂນ຺ໂຕ ທ຺ວາສຕ຺ຕຕີຕິອາທິມາຫ. ຕສ຺ສຕ຺ໂຖ – ໂຠ ໂຄຕມ, ມຍໍ ທ຺ວາສຕ຺ຕຕິ ຊນາ ປຸຎ຺ຎກມ຺ມາ ເຕນ ປຸຎ຺ຎກມ຺ເມນ ອິຘ ນິພ຺ພຕ຺ຕາ. ວສວຕ຺ຕິໂນ ສຍໍ ອຎ຺ເຎສໍ ວເສ ອວຕ຺ຕິຕ຺ວາ ປເຣ ອຕ຺ຕໂນ ວເສ ວຕ຺ເຕມ, ຊາຕິຎ຺ຈ ຊຣຎ຺ຈ ອຕີຕາ, ອຍໍ ໂນ ເວເທຫິ ຄຕຕ຺ຕາ ‘‘ເວທຄູ’’ຕິ ສງ຺ຂໍ ຄຕາ ຠຄວາ ອນ຺ຕິມາ ພ຺ຣຫ຺ມຸປປຕ຺ຕິ. ອສ຺ມາຠິຊປ຺ປນ຺ຕິ ຊນາ ອເນກາຕິ ອເນກຊນາ ອມ຺ເຫ ອຠິຊປ຺ປນ຺ຕິ. ‘‘ອຍໍ ໂຂ ຠວໍ ພ຺ຣຫ຺ມາ, ມຫາພ຺ຣຫ຺ມາ, ອຠິຠູ, ອນຠິຠູໂຕ, ອຎ຺ຎທຕ຺ຖຸທໂສ, ວສວຕ຺ຕີ, ອິສ຺ສໂຣ, ກຕ຺ຕາ, ນິມ຺ມາຕາ, ເສຏ຺ໂຐ, ສຊິຕາ, ວສີ, ປິຕາ ຠູຕຠພ຺ຍານ’’ນ຺ຕິ ເອວໍ ປຕ຺ເຖນ຺ຕິ ປິເຫນ຺ຕີຕິ.

ອຖ ນໍ ຠຄວາ ອປ຺ປໍ ຫິ ເອຕນ຺ຕິອາທິມາຫ. ຕຕ຺ຖ ເອຕນ຺ຕິ ຍໍ ຕ຺ວໍ ອິຘ ຕວ ອາຍຸໍ ‘‘ທີຆ’’ນ຺ຕິ ມຎ຺ຎສິ, ເອຕໍ ອປ຺ປໍ ປຣິຕ຺ຕກໍ. ສຕໍ ສຫສ຺ສານໍ ນິຣພ຺ພຸທານນ຺ຕິ ນິຣພ຺ພຸທຄຓນາຍ ສຕສຫສ຺ສນິຣພ຺ພຸທານໍ. ອາຍຸໍ ປຊານາມີຕິ, ‘‘ອິທານິ ຕວ ອວສິຏ຺ຐໍ ເອຕ຺ຕກໍ ອາຍູ’’ຕິ ອຫໍ ຊານາມິ. ອນນ຺ຕທສ຺ສີ ຠຄວາ ຫມສ຺ມີຕິ, ຠຄວາ, ຕຸມ຺ເຫ ‘‘ອຫໍ ອນນ຺ຕທສ຺ສີ ຊາຕິອາທີນິ ອຸປາຕິວຕ຺ໂຕ’’ຕິ ວທຖ. ກິໍ ເມ ປຸຣາຓນ຺ຕິ, ຍທິ ຕ຺ວໍ ອນນ຺ຕທສ຺ສີ, ເອວໍ ສນ຺ເຕ ອິທໍ ເມ ອາຈິກ຺ຂ, ກິໍ ມຍ຺ຫໍ ປຸຣາຓໍ? ວຕສີລວຕ຺ຕນ຺ຕິ ສີລເມວ ວຸຈ຺ຈຕິ. ຍມຫໍ ວິຊຎ຺ຎາຕິ ຍໍ ອຫໍ ຕຍາ ກຖິຕໍ ຊາເນຍ຺ຍໍ, ຕໍ ເມ ອາຈິກ຺ຂາຕິ ວທຕິ.

ອິທານິສ຺ສ ອາຈິກ຺ຂນ຺ໂຕ ຠຄວາ ຍໍ ຕ຺ວໍ ອປາເຍສີຕິອາທິມາຫ. ຕຕ຺ຣາຍໍ ອຘິປ຺ປາໂຍ – ປຸພ຺ເພ ກິເຣສ ກຸລຆເຣ ນິພ຺ພຕ຺ຕິຕ຺ວາ ກາເມສຸ ອາທີນວໍ ທິສ຺ວາ – ‘‘ຊາຕິຊຣາມຣຓສ຺ສ ອນ຺ຕໍ ກຣິສ຺ສາມີ’’ຕິ ນິກ຺ຂມ຺ມ ອິສິປພ຺ພຊ຺ຊໍ ປພ຺ພຊິຕ຺ວາ ສມາປຕ຺ຕິໂຍ ນິພ຺ພຕ຺ເຕຕ຺ວາ ອຠິຎ຺ຎາປາທກຊ຺ຌານສ຺ສ ລາຠີ ຫຸຕ຺ວາ ຄງ຺ຄາຕີເຣ ປຓ຺ຓສາລໍ ກາເຣຕ຺ວາ ຌານຣຕິຍາ ວີຕິນາເມຕິ. ຕທາ ຈ ກາເລນກາລໍ ສຕ຺ຖວາຫາ ປຎ຺ຈຫິ ສກຏສເຕຫິ ມຣຸກນ຺ຕາຣໍ ປຏິປຊ຺ຊນ຺ຕິ. ມຣຸກນ຺ຕາເຣ ປນ ທິວາ ນ ສກ຺ກາ ຄນ຺ຕຸໍ, ຣຕ຺ຕິໍ ຄມນໍ ໂຫຕິ. ອຖ ປຸຣິມສກຏສ຺ສ ອຄ຺ຄຍຸເຄ ຍຸຕ຺ຕພລິພທ຺ທາ ຄຈ຺ຉນ຺ຕາ ຄຈ຺ຉນ຺ຕາ ນິວຕ຺ຕິຕ຺ວາ ອາຄຕມຄ຺ຄາຠິມຸຂາ ອເຫສຸໍ, ສພ຺ພສກຏານິ ຕເຖວ ນິວຕ຺ຕິຕ຺ວາ ອຣຸເຓ ອຸຄ຺ຄເຕ ນິວຕ຺ຕິຕຠາວໍ ຊານິໍສຸ. ເຕສຎ຺ຈ ຕທາ ກນ຺ຕາຣໍ ອຕິກ຺ກມນທິວໂສ ອໂຫສິ. ສພ຺ພໍ ທາຣຸທກໍ ປຣິກ຺ຂີຓໍ – ຕສ຺ມາ ‘‘ນຕ຺ຖິ ທານິ ອມ຺ຫາກໍ ຊີວິຕ’’ນ຺ຕິ ຈິນ຺ເຕຕ຺ວາ, ໂຄເຓ ຈກ຺ເກສຸ ພນ຺ຘິຕ຺ວາ, ມນຸສ຺ສາ ສກຏຈ຺ຉາຍໍ ປວິສິຕ຺ວາ ນິປຊ຺ຊິໍສຸ.

ຕາປໂສປິ ກາລສ຺ເສວ ປຓ຺ຓສາລໂຕ ນິກ຺ຂມິຕ຺ວາ ປຓ຺ຓສາລທ຺ວາເຣ ນິສິນ຺ໂນ ຄງ຺ຄໍ ໂອໂລກຍມາໂນ ອທ຺ທສ ຄງ຺ຄໍ ມຫຕາ ອຸທໂກເຆນ ປູຣິຍມານໍ ປວຕ຺ຕິຕມຓິກ຺ຂນ຺ຘໍ ວິຍ ອາຄຈ຺ຉນ຺ຕໍ, ທິສ຺ວາ ຈິນ຺ເຕສິ – ‘‘ອຕ຺ຖິ ນຸ ໂຂ ອິມສ຺ມິໍ ໂລເກ ເອວຣູປສ຺ສ ມຘຸໂຣທກສ຺ສ ອລາເຠນ ກິລິສ຺ສມານາ ສຕ຺ຕາ’’ຕິ? ໂສ ເອວໍ ອາວຊ຺ເຊນ຺ໂຕ ມຣຸກນ຺ຕາເຣ ຕໍ ສຕ຺ຖໍ ທິສ຺ວາ ‘ອິເມ ສຕ຺ຕາ ມາ ນສ຺ສນ຺ຕູ’ຕິ ‘‘ອິໂຕ ຈິໂຕ ຈ ມຫາອຸທກກ຺ຂນ຺ໂຘ ຉິຊ຺ຊິຕ຺ວາ ມຣຸກນ຺ຕາເຣ ສຕ຺ຖາຠິມຸໂຂ ຄຈ຺ຉຕູ’’ຕິ ອຠິຎ຺ຎາຈິຕ຺ເຕນ ອຘິຏ຺ຐາສິ. ສຫ ຈິຕ຺ຕຸປ຺ປາເທນ ມາຕິກາຣຸຬ຺ຫໍ ວິຍ ອຸທກໍ ຕຕ຺ຖ ອຄມາສິ. ມນຸສ຺ສາ ອຸທກສທ຺ເທນ ວຸຏ຺ຐາຍ ອຸທກໍ ທິສ຺ວາ ຫຏ຺ຐຕຸຏ຺ຐາ ນ຺ຫາຍິຕ຺ວາ ປິວິຕ຺ວາ ໂຄເຓປິ ປາເຍຕ຺ວາ ໂສຕ຺ຖິນາ ອິຈ຺ຉິຕຏ຺ຐານໍ ອຄມໍສຸ. ສຕ຺ຖາ ຕໍ ພ຺ຣຫ຺ມຸໂນ ປຸພ຺ພກມ຺ມໍ ທສ຺ເສນ຺ໂຕ ປຐມໍ ຄາຖມາຫ. ຕຕ຺ຖ ອປາເຍສີຕິ ປາເຍສິ. ອ-ກາໂຣ ນິປາຕມຕ຺ຕໍ. ຄມ຺ມນີຕິ ຄິມ຺ເຫ. ສມ຺ປເຣເຕຕິ ຄິມ຺ຫາຕເປນ ຜຸຏ຺ເຐ ອນຸຄເຕ.

ອປຣສ຺ມິມ຺ປິ ສມເຍ ຕາປໂສ ຄງ຺ຄາຕີເຣ ປຓ຺ຓສາລໍ ມາເປຕ຺ວາ ອຣຎ຺ຎຄາມກໍ ນິສ຺ສາຍ ວສຕິ. ເຕນ ຈ ສມເຍນ ໂຈຣາ ຕໍ ຄາມໍ ປຫຣິຕ຺ວາ ຫຕ຺ຖສາຣໍ ຄເຫຕ຺ວາ ຄາວິໂຍ ຈ ກຣມເຣ ຈ ຄເຫຕ຺ວາ ຄຈ຺ຉນ຺ຕິ. ຄາໂວປິ ສຸນຂາປິ ມນຸສ຺ສາປິ ມຫາວິຣວໍ ວິຣວນ຺ຕິ. ຕາປໂສ ຕໍ ສທ຺ທໍ ສຸຕ຺ວາ ‘‘ກິນ຺ນຸ ໂຂ ເອຕ’’ນ຺ຕິ? ອາວຊ຺ເຊນ຺ໂຕ ‘‘ມນຸສ຺ສານໍ ຠຍໍ ອຸປ຺ປນ຺ນ’’ນ຺ຕິ ຎຕ຺ວາ ‘‘ມຍິ ປສ຺ສນ຺ເຕ ອິເມ ສຕ຺ຕາ ມາ ນສ຺ສນ຺ຕູ’’ຕິ ອຠິຎ຺ຎາປາທກຊ຺ຌານໍ ສມາປຊ຺ຊິຕ຺ວາ ວຸຏ຺ຐາຍ ອຠິຎ຺ຎາຈິຕ຺ເຕນ ໂຈຣານໍ ປຏິປເຖ ຈຕຸຣງ຺ຄິນິໍ ເສນໍ ມາເປສິ. ກມ຺ມສຊ຺ຊາ ອາຄຈ຺ຉນ຺ຕາ ໂຈຣາ ທິສ຺ວາ, ‘‘ຣາຊາ ມຎ຺ເຎ ອາຄໂຕ’’ຕິ ວິໂລປໍ ຉຑ຺ເຑຕ຺ວາ ປກ຺ກມິໍສຸ. ຕາປໂສ ‘‘ຍໍ ຍສ຺ສ ສນ຺ຕກໍ, ຕໍ ຕສ຺ເສວ ໂຫຕູ’’ຕິ ອຘິຏ຺ຐາສິ, ຕໍ ຕເຖວ ອໂຫສິ. ມຫາຊໂນ ໂສຕ຺ຖິຠາວໍ ປາປຸຓິ. ສຕ຺ຖາ ອິທມ຺ປິ ຕສ຺ສ ປຸພ຺ພກມ຺ມໍ ທສ຺ເສນ຺ໂຕ ທຸຕິຍໍ ຄາຖມາຫ. ຕຕ຺ຖ ເອຓິກູລສ຺ມິນ຺ຕິ ຄງ຺ຄາຕີເຣ. ຄຍ຺ຫກໍ ນີຍມານນ຺ຕິ ຄເຫຕ຺ວາ ນີຍມານໍ, ກຣມຣໍ ນີຍມານນ຺ຕິປິ ອຕ຺ໂຖ.

ປຸນ ເອກສ຺ມິໍ ສມເຍ ອຸປຣິຄງ຺ຄາວາສິກໍ ເອກໍ ກຸລໍ ເຫຏ຺ຐາຄງ຺ຄາວາສິເກນ ກຸເລນ ສທ຺ຘິໍ ມິຕ຺ຕສນ຺ຖວໍ ກຕ຺ວາ, ນາວາສງ຺ຆາຏໍ ພນ຺ຘິຕ຺ວາ, ພຫຸໍ ຂາທນີຍຎ຺ເຈວ ໂຠຊນີຍຎ຺ຈ ຄນ຺ຘມາລາທີນິ ຈ ອາໂຣເປຕ຺ວາ ຄງ຺ຄາໂສເຕນ ອາຄຈ຺ຉຕິ. ມນຸສ຺ສາ ຂາທມານາ ຠຸຎ຺ຊມານາ ນຈ຺ຈນ຺ຕາ ຄາຍນ຺ຕາ ເທວວິມາເນນ ຄຈ຺ຉນ຺ຕາ ວິຍ ພລວໂສມນສ຺ສາ ອເຫສຸໍ. ຄງ຺ເຄຍ຺ຍໂກ ນາໂຄ ທິສ຺ວາ ກຸປິໂຕ ‘‘ອິເມ ມຍິ ສຎ຺ຎມ຺ປິ ນ ກໂຣນ຺ຕິ. ອິທານິ ເນ ສມຸທ຺ທເມວ ປາເປສ຺ສາມີ’’ຕິ ມຫນ຺ຕໍ ອຕ຺ຕຠາວໍ ມາເປຕ຺ວາ ອຸທກໍ ທ຺ວິຘາ ຠິນ຺ທິຕ຺ວາ ອຸຏ຺ຐາຍ ຜຓໍ ກຕ຺ວາ, ສຸສຸກາຣໍ ກໂຣນ຺ໂຕ ອຏ຺ຐາສິ. ມຫາຊໂນ ທິສ຺ວາ ຠີໂຕ ວິສ຺ສຣມກາສິ. ຕາປໂສ ປຓ຺ຓສາລາຍໍ ນິສິນ຺ໂນ ສຸຕ຺ວາ, ‘‘ອິເມ ຄາຍນ຺ຕາ ນຈ຺ຈນ຺ຕາ ໂສມນສ຺ສຊາຕາ ອາຄຈ຺ຉນ຺ຕິ. ອິທານິ ປນ ຠຍຣວໍ ຣວິໍສຸ, ກິນ຺ນຸ ໂຂ’’ຕິ? ອາວຊ຺ເຊນ຺ໂຕ ນາຄຣາຊໍ ທິສ຺ວາ, ‘‘ມຍິ ປສ຺ສນ຺ເຕ ສຕ຺ຕາ ມາ ນສ຺ສນ຺ຕູ’’ຕິ ອຠິຎ຺ຎາປາທກຊ຺ຌານໍ ສມາປຊ຺ຊິຕ຺ວາ ອຕ຺ຕຠາວໍ ປຊຫິຕ຺ວາ ສຸປຓ຺ຓວຓ຺ຓໍ ມາເປຕ຺ວາ ນາຄຣາຊສ຺ສ ທສ຺ເສສິ. ນາຄຣາຊາ ຠີໂຕ ຜຓໍ ສໍຫຣິຕ຺ວາ ອຸທກໍ ປວິຏ຺ໂຐ, ມຫາຊໂນ ໂສຕ຺ຖິຠາວໍ ປາປຸຓິ. ສຕ຺ຖາ ອິທມ຺ປິ ຕສ຺ສ ປຸພ຺ພກມ຺ມໍ ທສ຺ເສນ຺ໂຕ ຕຕິຍໍ ຄາຖມາຫ. ຕຕ຺ຖ ລຸທ຺ເທນາຕິ ທາຣຸເຓນ. ມນຸສ຺ສກມ຺ຍາຕິ ມນຸສ຺ສກາມຕາຍ, ມນຸສ຺ເສ ວິເຫເຐຕຸກາມຕາຍາຕິ ອຕ຺ໂຖ.

ອປຣສ຺ມິມ຺ປິ ສມເຍ ເອສ ອິສິປພ຺ພຊ຺ຊໍ ປພ຺ພຊິຕ຺ວາ ເກສໂວ ນາມ ຕາປໂສ ອໂຫສິ. ເຕນ ສມເຍນ ອມ຺ຫາກໍ ໂພຘິສຕ຺ໂຕ ກປ຺ໂປ ນາມ ມາຓໂວ ເກສວສ຺ສ ພທ຺ຘຈໂຣ ອນ຺ເຕວາສິໂກ ຫຸຕ຺ວາ ອາຈຣິຍສ຺ສ ກິໍກາຣປຏິສ຺ສາວີ ມນາປຈາຣີ ພຸທ຺ຘິສມ຺ປນ຺ໂນ ອຕ຺ຖຈໂຣ ອໂຫສິ. ເກສໂວ ເຕນ ວິນາ ວສິຕຸໍ ນ ສກ຺ໂກຕິ, ຕໍ ນິສ຺ສາເຍວ ຊີວິກໍ ກປ຺ເປສິ. ສຕ຺ຖາ ອິທມ຺ປິ ຕສ຺ສ ປຸພ຺ພກມ຺ມໍ ທສ຺ເສນ຺ໂຕ ຈຕຸຕ຺ຖໍ ຄາຖມາຫ.

ຕຕ຺ຖ ພທ຺ຘຈໂຣຕິ ອນ຺ເຕວາສິໂກ, ໂສ ປນ ເຊຏ຺ຐນ຺ເຕວາສິໂກ ອໂຫສິ. ສມ຺ພຸທ຺ຘິມນ຺ຕໍ ວຕິນໍ ອມຎ຺ຎີຕິ, ‘‘ສມ຺ມາ ພຸທ຺ຘິມາ ວຕສມ຺ປນ຺ໂນ ອຍ’’ນ຺ຕິ ເອວໍ ມຎ຺ຎມາໂນ ກປ຺ໂປ ຕວ ອນ຺ເຕວາສິໂກ ອໂຫສິໍ ອຫໍ ໂສ ເຕນ ສມເຍນາຕິ ທສ຺ເສຕິ. ອຎ຺ເຎປິ ຊານາສີຕິ ນ ເກວລໍ ມຍ຺ຫໍ ອາຍຸເມວ, ອຎ຺ເຎປິ ຕ຺ວໍ ຊານາສິເຍວ. ຕຖາ ຫິ ພຸທ຺ໂຘຕິ ຕຖາ ຫິ ຕ຺ວໍ ພຸທ຺ໂຘ, ຍສ຺ມາ ພຸທ຺ໂຘ, ຕສ຺ມາ ຊານາສີຕິ ອຕ຺ໂຖ. ຕຖາ ຫິ ຕ຺ຍາຍໍ ຊລິຕານຸຠາໂວຕິ ຍສ຺ມາ ຈ ຕ຺ວໍ ພຸທ຺ໂຘ, ຕສ຺ມາ ເຕ ອຍໍ ຊລິໂຕ ອານຸຠາໂວ. ໂອຠາສຍໍ ຕິຏ຺ຐຕີຕິ ສພ຺ພໍ ພ຺ຣຫ຺ມໂລກໍ ໂອຠາສຍນ຺ໂຕ ຕິຏ຺ຐຕິ. ຈຕຸຕ຺ຖໍ.