໔. ສຕ຺ຕວສ຺ສານຸພນ຺ຘສຸຕ຺ຕວຓ຺ຓນາ

໑໖໐. ຈຕຸຕ຺ເຖ ສຕ຺ຕ ວສ຺ສານີຕິ ປຸເຣ ໂພຘິຍາ ຉພ຺ພສ຺ສານິ, ໂພຘິໂຕ ປຈ຺ຉາ ເອກໍ ວສ຺ສໍ. ໂອຕາຣາເປກ຺ໂຂຕິ ‘‘ສເຈ ສມຓສ຺ສ ໂຄຕມສ຺ສ ກາຍທ຺ວາຣາທີສຸ ກິຎ຺ຈິເທວ ອນນຸຈ຺ຉວິກໍ ປສ຺ສາມິ, ໂຈເທສ຺ສາມິ ນ’’ນ຺ຕິ ເອວໍ ວິວຣໍ ອເປກ຺ຂມາໂນ. ອລຠມາໂນຕິ ຣຖເຣຓຸມຕ຺ຕມ຺ປິ ອວກ຺ຂລິຕໍ ອປສ຺ສນ຺ໂຕ. ເຕນາຫ –

‘‘ສຕ຺ຕ ວສ຺ສານິ ຠຄວນ຺ຕໍ, ອນຸພນ຺ຘິໍ ປທາປທໍ;

ໂອຕາຣໍ ນາຘິຄຈ຺ຉິສ຺ສໍ, ສມ຺ພຸທ຺ຘສ຺ສ ສຕີມໂຕ’’ຕິ. (ສຸ. ນິ. ໔໔໘);

ອຸປສງ຺ກມີຕິ ‘‘ອຊ຺ຊ ສມຓໍ ໂຄຕມໍ ອຕິຄເຫຕ຺ວາ ຄມິສ຺ສາມີ’’ຕິ ອຸປສງ຺ກມິ.

ຌາຍສີຕິ ຌາຍນ຺ໂຕ ອວຊ຺ຌາຍນ຺ໂຕ ນິສິນ຺ໂນສີຕິ ວທຕິ. ວິຕ຺ຕໍ ນຸ ຊີໂນຕິ ສຕໍ ວາ ສຫສ຺ສໍ ວາ ຊິໂຕສິ ນຸ. ອາຄຸໍ ນຸ ຄາມສ຺ມິນ຺ຕິ, ກິໍ ນຸ ອນ຺ໂຕຄາເມ ປມາຓາຕິກ຺ກນ຺ຕໍ ປາປກມ຺ມໍ ອກາສິ, ເຍນ ອຎ຺ເຎສໍ ມຸຂໍ ໂອໂລເກຕຸໍ ອວິສຫນ຺ໂຕ ອຣຎ຺ເຎ ວິຈຣສິ? ສກ຺ຂິນ຺ຕິ ມິຕ຺ຕຠາວໍ.

ປລິຂາຍາຕິ ຂຓິຕ຺ວາ. ຠວໂລຠຊປ຺ປນ຺ຕິ ຠວໂລຠສງ຺ຂາຕໍ ຕຓ຺ຫໍ. ອນາສໂວ ຌາຍາມີຕິ ນິຕ຺ຕຓ຺ໂຫ ຫຸຕ຺ວາ ທ຺ວີຫິ ຌາເນຫິ ຌາຍາມິ. ປມຕ຺ຕພນ຺ຘູຕິ ມາຣໍ ອາລປຕິ. ໂສ ຫິ ເຍເກຈິ ໂລເກ ປມຕ຺ຕາ, ເຕສໍ ພນ຺ຘຸ.

ສເຈ ມຄ຺ຄໍ ອນຸພຸທ຺ຘນ຺ຕິ ຍທິ ຕຍາ ມຄ຺ໂຄ ອນຸພຸທ຺ໂຘ. ອເປຫີຕິ ອປຍາຫິ. ອມຈ຺ຈຸເຘຍ຺ຍນ຺ຕິ ມຈ຺ຈຸໂນ ອໂນກາສຠູຕໍ ນິພ຺ພານໍ. ປາຣຄາມິໂນຕິ ເຍປິ ປາຣໍ ຄຕາ, ເຕປິ ປາຣຄາມິໂນ. ເຍປິ ປາຣໍ ຄຈ຺ຉິສ຺ສນ຺ຕິ, ເຍປິ ປາຣໍ ຄນ຺ຕຸກາມາ, ເຕປິ ປາຣຄາມິໂນ.

ວິສູກາຍິການີຕິ ມາຣວິສູການິ. ວິເສວິຕານີຕິ ວິຣຸທ຺ຘເສວິຕານິ, ‘‘ອປ຺ປມາຍຸ ມນຸສ຺ສານໍ, ອຈ຺ຈຍນ຺ຕິ ອໂຫຣຕ຺ຕາ’’ຕິ ວຸຕ຺ເຕ. ‘‘ທີຆມາຍຸ ມນຸສ຺ສານໍ, ນາຈ຺ຈຍນ຺ຕິ ອໂຫຣຕ຺ຕາ’’ຕິອາທີນິ ປຏິໂລມກາຣຓານິ. ວິປ຺ຜນ຺ທິຕານີຕິ, ຕມ຺ຫິ ຕມ຺ຫິ ກາເລ ຫຕ຺ຖິຣາຊວຓ຺ຓສປ຺ປວຓ຺ຓາທິທສ຺ສນານິ. ນິພ຺ເພຊນີຍາຕິ ອຸກ຺ກຓ຺ຐນີຍາ.

ອນຸປຣິຍຄາຕິອາທີສຸ ກິຎ຺ຈາປິ ອຕີຕວຈນໍ ກຕໍ, ອຕ຺ໂຖ ປນ ວິກປ຺ປວເສນ ເວທິຕພ຺ໂພ. ອິທໍ ວຸຕ຺ຕໍ ໂຫຕິ – ຍຖາ ເມທວຓ຺ຓໍ ປາສາຓໍ ວາຍໂສ ທິສ຺ວາ – ‘‘ອປິ ນາເມຕ຺ຖ ມຸທຸໍ ວິນ຺ເທຍ຺ຍາມ, ອປິ ອສ຺ສາໂທ ສິຍາ’’ຕິ ອນຸປຣິຄຈ຺ເຉຍ຺ຍ, ອຖ ໂສ ຕຕ຺ຖ ອສ຺ສາທໍ ອລຠິຕ຺ວາວ ວາຍໂສ ເອຕ຺ໂຕ ອປກ຺ກເມຍ຺ຍ, ຕໂຕ ປາສາຓາ ອປຄຈ຺ເຉຍ຺ຍ, ເອວໍ ມຍມ຺ປິ ໂສ ກາໂກ ວິຍ ເສລໍ ໂຄຕມໍ ອາສຊ຺ຊ ອສ຺ສາທໍ ວາ ສນ຺ຖວໍ ວາ ອລຠນ຺ຕາ ໂຄຕມາ ນິພ຺ພິນ຺ທິຕ຺ວາ ອປຄຈ຺ຉາມ. ຈຕຸຕ຺ຖໍ.