໘. ປິຓ຺ຑສຸຕ຺ຕວຓ຺ຓນາ

໑໕໔. ອຏ຺ຐເມ ປາຫຸນການິ ຠວນ຺ຕີຕິ ຕຖາຣູເປ ນກ຺ຂຕ຺ເຕ ຕຕ຺ຖ ຕຕ຺ຖ ເປເສຕພ຺ພານິ ປາຫຸນການິ ຠວນ຺ຕິ, ອາຄນ຺ຕຸກປຓ຺ຓາກາຣທານານິ ວາ. ສຍໍຈຣຓທິວເສ ສມວຍຊາຕິໂຄຕ຺ຕາ ກຸມາຣກາ ຕໂຕ ຕໂຕ ສນ຺ນິປຕນ຺ຕິ. ກຸມາຣິກາໂຍປິ ອຕ຺ຕໂນ ອຕ຺ຕໂນ ວິຠວານຸຣູເປນ ອລງ຺ກຕາ ຕຫໍ ຕຫໍ ວິຈຣນ຺ຕິ. ຕຕ຺ຣ ກຸມາຣິກາໂຍປິ ຍຖາຣຸຈິການໍ ກຸມາຣການໍ ປຓ຺ຓາກາຣໍ ເປເສນ຺ຕິ, ກຸມາຣກາປິ ກຸມາຣິການໍ ອຎ຺ຎສ຺ມິໍ ອສຕິ ອນ຺ຕມໂສ ມາລາຄຸເຬນປິ ປຣິກ຺ຂິປນ຺ຕິ. ອນ຺ວາວິຏ຺ຐາຕິ ອນຸ ອາວິຏ຺ຐາ. ຕໍທິວສໍ ກິຣ ປຎ຺ຈສຕາ ກຸມາຣິກາໂຍ ອຸຍ຺ຍານກີຬໍ ຄຈ຺ຉນ຺ຕິໂຍ ປຏິປເຖ ສຕ຺ຖາຣໍ ທິສ຺ວາ ຉຓປູວໍ ທເທຍ຺ຍຸໍ. ສຕ຺ຖາ ຕາສໍ ທານານຸໂມທນຕ຺ຖໍ ປກິຓ຺ຓກຘມ຺ມເທສນໍ ເທເສຍ຺ຍ, ເທສນາປຣິໂຍສາເນ ສພ຺ພາປິ ໂສຕາປຕ຺ຕິຜເລ ປຕິຏ຺ຐເຫຍ຺ຍຸໍ. ມາໂຣ ຕາສໍ ສມ຺ປຕ຺ຕິຍາ ອນ຺ຕຣາຍໍ ກຣິສ຺ສາມີຕິ ອນ຺ວາວິສິ. ປາຬິຍໍ ປນ ມາ ສມໂຓ ໂຄຕໂມ ປິຓ຺ຑມລຕ຺ຖາຕິ ເອຕ຺ຕກໍເຍວ ວຸຕ຺ຕນ຺ຕິ.

ກິໍ ປນ ສຕ຺ຖາ ມາຣາວຏ຺ຏນໍ ອຊານິຕ຺ວາ ປວິຏ຺ໂຐຕິ? ອາມ ອຊານິຕ຺ວາ. ກສ຺ມາ? ອນາວຊ຺ຊນຕາຍ. ພຸທ຺ຘານຎ຺ຫິ – ‘‘ອສຸກຏ຺ຐາເນ ຠຕ຺ຕໍ ລຠິສ຺ສາມ, ນ ລຠິສ຺ສາມາ’’ຕິ ອາວຊ຺ຊນໍ ນ ອນນຸຈ຺ຉວິກໍ. ປວິຏ຺ໂຐ ປນ ມນຸສ຺ສານໍ ອຸປຈາຣເຠທໍ ທິສ຺ວາ, ‘‘ກິໍ ອິທ’’ນ຺ຕິ? ອາວຊ຺ເຊນ຺ໂຕ ຎຕ຺ວາ, ‘‘ອາມິສຕ຺ຖໍ ມາຣາວຏ຺ຏນໍ ຠິນ຺ທິຕຸໍ ອນນຸຈ຺ຉວິກ’’ນ຺ຕິ ອຠິນ຺ທິຕ຺ວາວ ນິກ຺ຂນ຺ໂຕ.

ອຸປສງ຺ກມີຕິ ອມິຕ຺ຕວິຊເຍນ ວິຍ ຕຸຏ຺ໂຐ ສກລຄາເມ ກຏຈ຺ຉຸມຕ຺ຕມ຺ປິ ຠຕ຺ຕໍ ອລຠິຕ຺ວາ ຄາມໂຕ ນິກ຺ຂມນ຺ຕໍ ຠຄວນ຺ຕໍ ຄາມິຍມນຸສ຺ສເວເສນ ອຸປສງ຺ກມິ. ຕຖາຫໍ ກຣິສ຺ສາມີຕິ ອິທໍ ໂສ ມຸສາ ຠາສຕິ. ເອວໍ ກິຣສ຺ສ ອໂຫສິ – ‘‘ມຍາ ເອວໍ ວຸຕ຺ເຕ ປຸນ ປວິສິສ຺ສຕິ, ອຖ ນໍ ຄາມທາຣກາ ‘ສກລຄາເມ ຈຣິຕ຺ວາ ກຏຈ຺ຉຸຠິກ຺ຂມ຺ປິ ອລຠິຕ຺ວາ ຄາມໂຕ ນິກ຺ຂມ຺ມ ປຸນ ປວິຏ຺ໂຐສີ’ຕິອາທີນິ ວຕ຺ວາ ອຸປ຺ປຓ຺ເຑສ຺ສນ຺ຕີ’’ຕິ. ຠຄວາ ປນ – ‘‘ສຈາຍໍ ມໍ ເອວໍ ວິເຫເຐສ຺ສຕິ ມຸທ຺ຘມສ຺ເສວ ສຕ຺ຕຘາ ຜລິສ຺ສຕີ’’ຕິ ຕສ຺ມິໍ ອນຸກມ຺ປາຍ ອປວິສິຕ຺ວາ ຄາຖາທ຺ວຍມາຫ.

ຕຕ຺ຖ ປສວີຕິ ຊເນສິ ນິປ຺ຜາເທສິ. ອາສຊ຺ຊາຕິ ອາສາເທຕ຺ວາ ຆຏ຺ເຏຕ຺ວາ. ນ ເມ ປາປໍ ວິປຈ຺ຈຕີຕິ ມມ ປາປໍ ນ ປຈ຺ຈຕິ. ນິປ຺ຜລໍ ເອຕນ຺ຕິ ກິໍ ນຸ ຕ຺ວໍ ເອວໍ ມຎ຺ຎສິ? ມາ ເອວໍ ມຎ຺ຎິ, ອຕ຺ຖິ ຕຍາ ກຕສ຺ສ ປາປສ຺ສ ຜລນ຺ຕິ ທີເປຕິ. ກິຎ຺ຈນນ຺ຕິ ມທ຺ທິຕຸໍ ສມຕ຺ຖໍ ຣາຄກິຎ຺ຈນາທິ ກິເລສຊາຕໍ. ອາຠສ຺ສຣາ ຍຖາຕິ ຍຖາ ອາຠສ຺ສຣາ ເທວາ ສປ຺ປີຕິກຊ຺ຌາເນນ ຍາເປນ຺ຕາ ປີຕິຠກ຺ຂາ ນາມ ໂຫນ຺ຕິ, ເອວໍ ຠວິສ຺ສາມາຕິ. ອຏ຺ຐມໍ.