໙. ກສ຺ສກສຸຕ຺ຕວຓ຺ຓນາ

໑໕໕. ນວເມ ນິພ຺ພານປຏິສໍຍຸຕ຺ຕາຍາຕິ ນິພ຺ພານໍ ອປທິສິຕ຺ວາ ປວຕ຺ຕາຍ. ຫຏຫຏເກໂສຕິ ປຸຣິມເກເສ ປຈ຺ຉໂຕ, ປຈ຺ຉິມເກເສ ປຸຣໂຕ ວາມປສ຺ສເກເສ ທກ຺ຂິຓໂຕ, ທກ຺ຂິຓປສ຺ສເກເສ ວາມໂຕ ຜຣິຕ຺ວາ ຜຣິຕ຺ວາ ວິປ຺ປກິຓ຺ຓເກໂສ. ມມ ຈກ຺ຂຸສມ຺ຜສ຺ສວິຎ຺ຎາຓາຍຕນນ຺ຕິ ຈກ຺ຂຸວິຎ຺ຎາເຓນ ສມ຺ປຍຸຕ຺ໂຕ ຈກ຺ຂຸສມ຺ຜສ຺ໂສປິ ວິຎ຺ຎາຓາຍຕນມ຺ປິ ມເມວາຕິ. ເອຕ຺ຖ ຈ ຈກ຺ຂຸສມ຺ຜສ຺ເສນ ວິຎ຺ຎາຓສມ຺ປຍຸຕ຺ຕກາ ຘມ຺ມາ ຄຫິຕາ, ວິຎ຺ຎາຓາຍຕເນນ ສພ຺ພານິປິ ຈກ຺ຂຸທ຺ວາເຣ ອຸປ຺ປນ຺ນານິ ອາວຊ຺ຊນາທິວິຎ຺ຎາຓານິ. ໂສຕທ຺ວາຣາທີສຸປິ ເອເສວ ນໂຍ. ມໂນທ຺ວາເຣ ປນ ມໂນຕິ ສາວຊ຺ຊນກໍ ຠວງ຺ຄຈິຕ຺ຕໍ. ຘມ຺ມາຕິ ອາຣມ຺ມຓຘມ຺ມາ. ມໂນສມ຺ຜສ຺ໂສຕິ ສາວຊ຺ຊເນນ ຠວງ຺ເຄນ ສມ຺ປຍຸຕ຺ຕຜສ຺ໂສ. ວິຎ຺ຎາຓາຍຕນນ຺ຕິ ຊວນຈິຕ຺ຕໍ ຕທາຣມ຺ມຓມ຺ປິ ວຏ຺ຏຕິ.

ຕເວວ ປາປິມ, ຈກ຺ຂູຕິ ຍໍ ໂລເກ ຕິມິຣກາຈາທີຫິ ອຸປທ຺ທຸຕໍ ອເນກໂຣຄາຍຕນໍ ອຸປກ຺ກວິປກ຺ກໍ ອນ຺ຕມໂສ ກາຓຈກ຺ຂຸປິ, ສພ຺ພໍ ຕໍ ຕເວວ ຠວຕຸ. ຣູປາທີສຸປິ ເອເສວ ນໂຍ.

ຍໍ ວທນ຺ຕີຕິ ຍໍ ຠຓ຺ຑກໍ ‘‘ມມ ອິທ’’ນ຺ຕິ ວທນ຺ຕິ. ເຍ ວທນ຺ຕິ ມມນ຺ຕິ ຈາຕິ ເຍ ຈ ປຸຄ຺ຄລາ ‘‘ມມ’’ນ຺ຕິ ວທນ຺ຕິ. ເອຕ຺ຖ ເຈ ເຕ ມໂນ ອຕ຺ຖີຕິ ເອເຕສຸ ຈ ຐາເນສຸ ຍທິ ຈິຕ຺ຕໍ ອຕ຺ຖິ. ນ ເມ ສມຓ ໂມກ຺ຂສີຕິ ສມຓ ມຍ຺ຫໍ ວິສຍໂຕ ນ ມຸຈ຺ຈິສ຺ສສິ. ຍໍ ວທນ຺ຕີຕິ ຍໍ ຠຓ຺ຑກໍ ວທນ຺ຕິ, ນ ຕໍ ມຍ຺ຫໍ. ເຍ ວທນ຺ຕີຕິ ເຍປິ ປຸຄ຺ຄລາ ເອວໍ ວທນ຺ຕິ, ນ ເຕ ອຫໍ. ນ ເມ ມຄ຺ຄມ຺ປິ ທກ຺ຂສີຕິ ຠວໂຍນິຄຕິອາທີສຸ ມຍ຺ຫໍ ຄຕມຄ຺ຄມ຺ປິ ນ ປສ຺ສສິ. ນວມໍ.