໖. ໂຣຫິຕສ຺ສສຸຕ຺ຕວຓ຺ຓນາ

໑໐໗. ຉຏ຺ເຐ ຍຕ຺ຖາຕິ ຈກ຺ກວາຬໂລກສ຺ສ ເອໂກກາເສ ຠຸມ຺ມໍ. ນ ຈວຕິ ນ ອຸປປຊ຺ຊຕີຕິ ອິທໍ ອປຣາປຣໍ ຈຸຕິປຏິສນ຺ຘິວເສນ ຄຫິຕໍ. ຄມເນນາຕິ ປທຄມເນນ. ນາຫໍ ຕໍ ໂລກສ຺ສ ອນ຺ຕນ຺ຕິ ສຕ຺ຖາ ສງ຺ຂາຣໂລກສ຺ສ ອນ຺ຕໍ ສນ຺ຘາຍ ວທຕິ. ຎາເຕຍ຺ຍນ຺ຕິອາທີສຸ ຎາຕພ຺ພໍ, ທຏ຺ຐພ຺ພໍ, ປຕ຺ຕພ຺ພນ຺ຕິ ອຕ຺ໂຖ.

ອິຕິ ເທວປຸຕ຺ເຕນ ຈກ຺ກວາຬໂລກສ຺ສ ອນ຺ໂຕ ປຸຈ຺ຉິໂຕ, ສຕ຺ຖາຣາ ສງ຺ຂາຣໂລກສ຺ສ ກຖິໂຕ. ໂສ ປນ ອຕ຺ຕໂນ ປຎ຺ເຫນ ສທ຺ຘິໍ ສຕ຺ຖຸ ພ຺ຍາກຣຓໍ ສເມຕີຕິ ສຎ຺ຎາຍ ປສໍສນ຺ໂຕ ອຈ຺ຉຣິຍນ຺ຕິອາທິມາຫ.

ທຬ຺ຫຘມ຺ໂມຕິ ທຬ຺ຫຘນຸ, ອຸຕ຺ຕມປ຺ປມາເຓນ ຘນຸນາ ສມນ຺ນາຄໂຕ. ຘນຸຄ຺ຄໂຫຕິ ຘນຸອາຈຣິໂຍ. ສຸສິກ຺ຂິໂຕຕິ ທສ ທ຺ວາທສ ວສ຺ສານິ ຘນຸສິປ຺ປໍ ສິກ຺ຂິໂຕ. ກຕຫຕ຺ໂຖຕິ ອຸສຠປ຺ປມາເຓປິ ວາລຄ຺ຄໍ ວິຊ຺ຌິຕຸໍ ສມຕ຺ຖຠາເວນ ກຕຫຕ຺ໂຖ. ກຕູປາສໂນຕິ ກຕສຣກ຺ເຂໂປ ທສ຺ສິຕສິປ຺ໂປ. ອສເນນາຕິ ກຓ຺ເຑນ. ອຕິປາເຕຍ຺ຍາຕິ ອຕິກ຺ກເມຍ຺ຍ. ຍາວຕາ ໂສ ຕາລຈ຺ຉາຍໍ ອຕິກ຺ກເມຍ຺ຍ, ຕາວຕາ ກາເລນ ເອກຈກ຺ກວາຬໍ ອຕິກ຺ກມາມີຕິ ອຕ຺ຕໂນ ຊວສມ຺ປຕ຺ຕິໍ ທສ຺ເສຕິ.

ປຸຣຕ຺ຖິມາ ສມຸທ຺ທາ ປຈ຺ຉິໂມຕິ ຍຖາ ປຸຣຕ຺ຖິມສມຸທ຺ທາ ປຈ຺ຉິມສມຸທ຺ໂທ ທູເຣ, ເອວໍ ເມ ທູເຣ ປທວີຕິຫາໂຣ ອໂຫສີຕິ ວທຕິ. ໂສ ກິຣ ປາຈີນຈກ຺ກວາຬມຸຂວຏ຺ຏິຍໍ ຐິໂຕ ປາທໍ ປສາເຣຕ຺ວາ ປຈ຺ຉິມຈກ຺ກວາຬມຸຂວຏ຺ຏິຍໍ ອກ຺ກມຕິ, ປຸນ ທຸຕິຍໍ ປາທໍ ປສາເຣຕ຺ວາ ປຣຈກ຺ກວາຬມຸຂວຏ຺ຏິຍໍ ອກ຺ກມຕິ. ອິຈ຺ຉາຄຕນ຺ຕິ ອິຈ຺ຉາ ເອວ. ອຎ຺ຎຕ຺ເຣວາຕິ ນິປ຺ປປຎ຺ຈຕໍ ທສ຺ເສຕິ. ຠິກ຺ຂາຈາຣກາເລ ກິເຣສ ນາຄລຕາທນ຺ຕກຏ຺ຐໍ ຂາທິຕ຺ວາ ອໂນຕຕ຺ເຕ ມຸຂໍ ໂຘວິຕ຺ວາ ກາເລ ສມ຺ປຕ຺ເຕ ອຸຕ຺ຕຣກຸຣຸມ຺ຫິ ປິຓ຺ຑາຍ ຈຣິຕ຺ວາ ຈກ຺ກວາຬມຸຂວຏ຺ຏິຍໍ ນິສິນ຺ໂນ ຠຕ຺ຕກິຈ຺ຈໍ ກໂຣຕິ, ຕຕ຺ຖ ມຸຫຸຕ຺ຕໍ ວິສ຺ສມິຕ຺ວາ ປຸນ ຊວຕິ. ວສ຺ສສຕາຍຸໂກຕິ ຕທາ ທີຆາຍຸກກາໂລ ໂຫຕິ, ອຍໍ ປນ ວສ຺ສສຕາວສິຏ຺ເຐ ອາຍຸມ຺ຫິ ຄມນໍ ອາຣຠິ. ວສ຺ສສຕຊີວີຕິ ຕໍ ວສ຺ສສຕໍ ອນນ຺ຕຣາເຍນ ຊີວນ຺ໂຕ. ອນ຺ຕຣາວ ກາລງ຺ກໂຕຕິ ຈກ຺ກວາຬໂລກສ຺ສ ອນ຺ຕໍ ອປ຺ປຕ຺ວາ ອນ຺ຕຣາວ ມໂຕ. ໂສ ປນ ຕຕ຺ຖ ກາລໍ ກຕ຺ວາປິ ອາຄນ຺ຕ຺ວາ ອິມສ຺ມິໍເຍວ ຈກ຺ກວາເຬ ນິພ຺ພຕ຺ຕິ. ອປ຺ປຕ຺ວາຕິ ສງ຺ຂາຣໂລກສ຺ສ ອນ຺ຕໍ ອປ຺ປຕ຺ວາ. ທຸກ຺ຂສ຺ສາຕິ ວຏ຺ຏທຸກ຺ຂສ຺ສ. ອນ຺ຕກິຣິຍນ຺ຕິ ປຣິຍນ຺ຕກຣຓໍ. ກເຬວເຣຕິ ອຕ຺ຕຠາເວ. ສສຎ຺ຎິມ຺ຫິ ສມນເກຕິ ສສຎ຺ເຎ ສຈິຕ຺ເຕ. ໂລກນ຺ຕິ ທຸກ຺ຂສຈ຺ຈໍ. ໂລກສມຸທຍນ຺ຕິ ສມຸທຍສຈ຺ຈໍ. ໂລກນິໂຣຘນ຺ຕິ ນິໂຣຘສຈ຺ຈໍ. ປຏິປທນ຺ຕິ ມຄ຺ຄສຈ຺ຈໍ. ອິຕິ – ‘‘ນາຫໍ, ອາວຸໂສ, ອິມານິ ຈຕ຺ຕາຣິ ສຈ຺ຈານິ ຕິຓກຏ຺ຐາທີສຸ ປຎ຺ຎເປມິ, ອິມສ຺ມິໍ ປນ ຈາຕຸມຫາຠູຕິເກ ກາຍສ຺ມິໍ ເຍວ ປຎ຺ຎເປມີ’’ຕິ ທສ຺ເສຕິ. ສມິຕາວີຕິ ສມິຕປາໂປ. ນາສີສຕີຕິ ນ ປຕ຺ເຖຕິ. ຉຏ຺ຐໍ.

໑໐໘-໑໐໙. ສຕ຺ຕມຏ຺ຐມານິ ວຸຕ຺ຕຕ຺ຖາເນວ. ສຕ຺ຕມໍ, ອຏ຺ຐມໍ.