໕. ຊນ຺ຕຸສຸຕ຺ຕວຓ຺ຓນາ

໑໐໖. ປຎ຺ຈເມ ໂກສເລສຸ ວິຫຣນ຺ຕີຕິ ຠຄວໂຕ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ຕຕ຺ຖ ຄນ຺ຕ຺ວາ ວິຫຣນ຺ຕິ. ອຸທ຺ຘຕາຕິ ອກປ຺ປິເຍ ກປ຺ປິຍສຎ຺ຎິຕາຍ ຈ ກປ຺ປິເຍ ອກປ຺ປິຍສຎ຺ຎິຕາຍ ຈ ອນວຊ຺ເຊ ສາວຊ຺ຊສຎ຺ຎິຕາຍ ຈ ສາວຊ຺ເຊ ອນວຊ຺ຊສຎ຺ຎິຕາຍ ຈ ອຸທ຺ຘຈ຺ຈປກຕິກາ ຫຸຕ຺ວາ. ອຸນ຺ນຬາຕິ ອຸຄ຺ຄຕນຬາ, ອຸຏ຺ຐິຕຕຸຈ຺ຉມານາຕິ ວຸຕ຺ຕໍ ໂຫຕິ. ຈປລາຕິ ປຕ຺ຕຈີວຣມຓ຺ຑນາທິນາ ຈາປລ຺ເລນ ຍຸຕ຺ຕາ. ມຸຂຣາຕິ ມຸຂຂຣາ, ຂຣວຈນາຕິ ວຸຕ຺ຕໍ ໂຫຕິ. ວິກິຓ຺ຓວາຈາຕິ ອສໍຍຕວຈນາ, ທິວສມ຺ປິ ນິຣຕ຺ຖກວຈນປລາປິໂນ. ມຸຏ຺ຐສ຺ສຕິໂນຕິ ນຏ຺ຐສ຺ສຕິໂນ ສຕິວິຣຫິຕາ, ອິຘ ກຕໍ ເອຕ຺ຖ ປມຸສ຺ສນ຺ຕິ. ອສມ຺ປຊານາຕິ ນິປ຺ປຎ຺ຎາ. ອສມາຫິຕາຕິ ອປ຺ປນາອຸປຈາຣສມາຘິຣຫິຕາ, ຈຓ຺ຑໂສເຕ ພທ຺ຘນາວາສທິສາ. ວິພ຺ຠນ຺ຕຈິຕ຺ຕາຕິ ອນວຏ຺ຐິຕຈິຕ຺ຕາ, ປນ຺ຖາຣຸຬ຺ຫພາລມິຄສທິສາ. ປາກຕິນ຺ທ຺ຣິຍາຕິ ສໍວຣາຠາເວນ ຄິຫິກາເລ ວິຍ ວິວຏອິນ຺ທ຺ຣິຍາ.

ຊນ຺ຕູຕິ ເອວໍນາມໂກ ເທວປຸຕ຺ໂຕ. ຕທຫຸໂປສເຖຕິ ຕສ຺ມິໍ ອຫຸ ອຸໂປສເຖ, ອຸໂປສຖທິວເສຕິ ອຕ຺ໂຖ. ປນ຺ນຣເສຕິ ຈາຕຸທ຺ທສິກາທິປຏິກ຺ເຂໂປ. ອຸປສງ຺ກມີຕິ ໂຈທນຕ຺ຖາຍ ອຸປຄໂຕ. ໂສ ກິຣ ຈິນ຺ເຕສິ – ‘‘ອິເມ ຠິກ຺ຂູ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ນິກ຺ຂນ຺ຕາ, ອິທານິ ປມຕ຺ຕາ ວິຫຣນ຺ຕິ, ນ ໂຂ ປເນເຕ ປາຏິເຍກ຺ກໍ ນິສິນ຺ນຏ຺ຐາເນ ໂຈທິຍມານາ ກຖໍ ຄຓ຺ຫິສ຺ສນ຺ຕິ, ສມາຄມນກາເລ ໂຈທິສ຺ສາມີ’’ຕິ ອຸໂປສຖທິວເສ ເຕສໍ ສນ຺ນິປຕິຕຠາວໍ ຎຕ຺ວາ ອຸປສງ຺ກມິ. ຄາຖາຫິ ອຊ຺ຌຠາສີຕິ ສພ຺ເພສໍ ມຊ຺ເຌ ຐຕ຺ວາ ຄາຖາ ອຠາສິ.

ຕຕ຺ຖ ຍສ຺ມາ ຄຸຓກຖາຍ ສທ຺ຘິໍ ນິຄ຺ຄຸຓສ຺ສ ອຄຸໂຓ ປາກໂຏ ໂຫຕິ, ຕສ຺ມາ ຄຸຓໍ ຕາວ ກເຖນ຺ໂຕ ສຸຂຊີວິໂນ ປຸເຣ ອາສຸນ຺ຕິອາທິມາຫ. ຕຕ຺ຖ ສຸຂຊີວິໂນ ປຸເຣ ອາສຸນ຺ຕິ ປຸພ຺ເພ ຠິກ຺ຂູ ສຸປ຺ໂປສາ ສຸຠຣາ ອເຫສຸໍ, ອຸຈ຺ຈນີຈກຸເລສຸ ສປທານໍ ຈຣິຕ຺ວາ ລທ຺ເຘນ ມິສ຺ສກປິຓ຺ເຑນ ຍາເປສຸນ຺ຕິ ອຘິປ຺ປາເຍນ ເອວມາຫ. ອນິຈ຺ຉາຕິ ນິຕ຺ຕຓ຺ຫາ ຫຸຕ຺ວາ.

ເອວໍ ໂປຣາຓກຠິກ຺ຂູນໍ ວຓ຺ຓໍ ກເຖຕ຺ວາ ອິທານິ ເຕສໍ ອວຓ຺ຓໍ ກເຖນ຺ໂຕ ທຸປ຺ໂປສນ຺ຕິອາທິມາຫ. ຕຕ຺ຖ ຄາເມ ຄາມຓິກາ ວິຍາຕິ ຍຖາ ຄາເມ ຄາມກຸຏາ ນານປ຺ປກາເຣນ ຊນໍ ປີເຬຕ຺ວາ ຂີຣທຘິຕຓ຺ຑຸລາທີນິ ອາຫຣາເປຕ຺ວາ ຠຸຎ຺ຊນ຺ຕິ, ເອວໍ ຕຸມ຺ເຫປິ ອເນສນາຍ ຐິຕາ ຕຸມ຺ຫາກໍ ຊີວິກໍ ກປ຺ເປຖາຕິ ອຘິປ຺ປາເຍນ ວທຕິ. ນິປຊ຺ຊນ຺ຕີຕິ ອຸທ຺ເທສປຣິປຸຈ຺ຉາມນສິກາເຣຫິ ອນຕ຺ຖິກາ ຫຸຕ຺ວາ ສຍນມ຺ຫິ ຫຕ຺ຖປາເທ ວິສ຺ສຊ຺ເຊຕ຺ວາ ນິປຊ຺ຊນ຺ຕິ. ປຣາຄາເຣສູຕິ ປຣເຄເຫສຸ, ກຸລສຸຓ຺ຫາທີສູຕິ ອຕ຺ໂຖ. ມຸຈ຺ຉິຕາຕິ ກິເລສມຸຈ຺ຉາຍ ມຸຈ຺ຉິຕາ.

ເອກຈ຺ເຈຕິ ວຕ຺ຕພ຺ພຍຸຕ຺ຕເກເຍວ. ອປວິທ຺ຘາຕິ ຉຑ຺ຑິຕກາ. ອນາຖາຕິ ອປຕິຏ຺ຐາ. ເປຕາຕິ ສຸສາເນ ຉຑ຺ຑິຕາ ກາລງ຺ກຕມນຸສ຺ສາ. ຍຖາ ຫິ ສຸສາເນ ຉຑ຺ຑິຕາ ນານາສກຸຓາທີຫິ ຂຊ຺ຊນ຺ຕິ, ຎາຕກາປິ ເນສໍ ນາຖກິຈ຺ຈໍ ນ ກໂຣນ຺ຕິ, ນ ຣກ຺ຂນ຺ຕິ, ນ ໂຄປຍນ຺ຕິ, ເອວເມວໍ ເອວຣູປາປິ ອາຈຣິຍຸປຊ຺ຌາຍາທີນໍ ສນ຺ຕິກາ ໂອວາທານຸສາສນິໍ ນ ລຠນ຺ຕີຕິ ອປວິທ຺ຘາ ອນາຖາ, ຍຖາ ເປຕາ, ຕເຖວ ໂຫນ຺ຕິ. ປຎ຺ຈມໍ.