໓-໔. ເສຣີສຸຕ຺ຕາທິວຓ຺ຓນາ

໑໐໔. ຕຕິເຍ ທາຍໂກຕິ ທານສີໂລ. ທານປຕີຕິ ຍໍ ທານໍ ເທມິ, ຕສ຺ສ ປຕິ ຫຸຕ຺ວາ ເທມິ, ນ ທາໂສ ນ ສຫາໂຍ. ໂຍ ຫິ ອຕ຺ຕນາ ມຘຸຣໍ ຠຸຎ຺ຊຕິ, ປເຣສໍ ອມຘຸຣໍ ເທຕິ, ໂສ ທານສງ຺ຂາຕສ຺ສ ເທຍ຺ຍຘມ຺ມສ຺ສ ທາໂສ ຫຸຕ຺ວາ ເທຕິ. ໂຍ ຍໍ ອຕ຺ຕນາ ຠຸຎ຺ຊຕິ, ຕເທວ ເທຕິ, ໂສ ສຫາໂຍ ຫຸຕ຺ວາ ເທຕິ. ໂຍ ປນ ອຕ຺ຕນາ ເຍນ ເຕນ ຍາເປຕິ, ປເຣສໍ ມຘຸຣໍ ເທຕິ, ໂສ ປຕິ ເຊຏ຺ຐໂກ ສາມິ ຫຸຕ຺ວາ ເທຕິ. ອຫໍ ‘‘ຕາທິໂສ ອໂຫສິ’’ນ຺ຕິ ວທຕິ.

ຈຕູສຸ ທ຺ວາເຣສຸຕິ ຕສ຺ສ ກິຣ ຣຎ຺ໂຎ ສິນ຺ຘວຣຏ຺ຐໍ ໂສຘິວາກຣຏ຺ຐນ຺ຕິ ທ຺ເວ ຣຏ຺ຐານິ ອເຫສຸໍ, ນຄຣໍ ໂຣຣຸວໍ ນາມ. ຕສ຺ສ ເອເກກສ຺ມິໍ ທ຺ວາເຣ ເທວສິກໍ ສຕສຫສ຺ສໍ ອຸປ຺ປຊ຺ຊຕິ, ອນ຺ໂຕນຄເຣ ວິນິຈ຺ຉຍຏ຺ຐາເນ ສຕສຫສ຺ສໍ. ໂສ ພຫຸຫິຣຎ຺ຎສຸວຓ຺ຓໍ ຣາສິຠູຕໍ ທິສ຺ວາ ກມ຺ມສ຺ສກຕຎາຓໍ ອຸປ຺ປາເທຕ຺ວາ ຈຕູສຸ ທ຺ວາເຣສຸ ທານສາລາໂຍ ກາເຣຕ຺ວາ ຕສ຺ມິໍ ຕສ຺ມິໍ ທ຺ວາເຣ ອຸຏ຺ຐິຕອາເຍນ ທານໍ ເທຖາຕິ ອມຈ຺ເຈ ຐເປສິ. ເຕນາຫ – ‘‘ຈຕູສຸ ທ຺ວາເຣສຸ ທານໍ ທີຍິຕ຺ຖາ’’ຕິ.

ສມຓພ຺ຣາຫ຺ມຓກປຓທ຺ຘິກວນິພ຺ພກຍາຈການນ຺ຕິ ເອຕ຺ຖ ສມຓາຕິ ປພ຺ພຊ຺ຊູປຄຕາ. ພ຺ຣາຫ຺ມຓາຕິ ໂຠວາທິໂນ. ສມິຕປາປພາຫິຕປາເປ ປນ ສມຓພ຺ຣາຫ຺ມເຓ ເອສ ນາລຕ຺ຖ. ກປຓາຕິ ທຸຄ຺ຄຕາ ທລິທ຺ທມນຸສ຺ສາ ກາຓກຸຓິອາທໂຍ. ອທ຺ຘິກາຕິ ປຖາວິໂນ. ວນິພ຺ພກາຕິ ເຍ ‘‘ອິຏ຺ຐໍ, ທິນ຺ນໍ, ກນ຺ຕໍ, ມນາປໍ, ກາເລນ, ອນວຊ຺ຊໍ ທິນ຺ນໍ, ທທໍ ຈິຕ຺ຕໍ ປສາເທຍ຺ຍ, ຄຈ຺ຉຕຸ ຠວໍ ພ຺ຣຫ຺ມໂລກ’’ນ຺ຕິອາທິນາ ນເຍນ ທານສ຺ສ ວຓ຺ຓໍ ໂຖມຍມານາ ວິຈຣນ຺ຕິ. ຍາຈກາຕິ ເຍ ‘‘ປສຕມຕ຺ຕໍ ເທຖ, ສຣາວມຕ຺ຕໍ ເທຖາ’’ຕິອາທີນິ ຈ ວຕ຺ວາ ຍາຈມານາ ວິຈຣນ຺ຕິ. ອິຕ຺ຖາຄາຣສ຺ສ ທານໍ ທີຍິຕ຺ຖາຕິ ປຐມທ຺ວາຣສ຺ສ ລທ຺ຘຕ຺ຕາ ຕຕ຺ຖ ອຸປ຺ປຊ຺ຊນກສຕສຫສ຺ເສ ອຎ຺ຎມ຺ປິ ຘນໍ ປກ຺ຂິປິຕ຺ວາ ຣຎ຺ໂຎ ອມຈ຺ເຈ ຫາເຣຕ຺ວາ ອຕ຺ຕໂນ ອມຈ຺ເຈ ຐເປຕ຺ວາ ຣຎ຺ຎາ ທິນ຺ນທານໂຕ ຣາຊິຕ຺ຖິໂຍ ມຫນ຺ຕຕຣໍ ທານໍ ອທໍສຸ. ຕໍ ສນ຺ຘາເຍວມາຫ. ມມ ທານໍ ປຏິກ຺ກມີຕິ ຍໍ ມມ ທານໍ ຕຕ຺ຖ ທີຍິຕ຺ຖ, ຕໍ ປຏິນິວຕ຺ຕິ. ເສສທ຺ວາເຣສຸປິ ເອເສວ ນໂຍ. ໂກຈີຕິ ກຕ຺ຖຈິ. ທີຆຣຕ຺ຕນ຺ຕິ ອສີຕິວສ຺ສສຫສ຺ສານິ. ເອຕ຺ຕກໍ ກິຣ ກາລໍ ຕສ຺ສ ຣຎ຺ໂຎ ທານໍ ທີຍິຕ຺ຖ. ຕຕິຍໍ.

໑໐໕. ຈຕຸຕ຺ຖໍ ວຸຕ຺ຕຕ຺ຖເມວ. ຈຕຸຕ຺ຖໍ.