໑໐. ນານາຕິຕ຺ຖິຍສາວກສຸຕ຺ຕວຓ຺ຓນາ

໑໑໑. ທສເມ ນານາຕິຕ຺ຖິຍສາວກາຕິ ເຕ ກິຣ ກມ຺ມວາທິໂນ ອເຫສຸໍ, ຕສ຺ມາ ທານາທີນິ ປຸຎ຺ຎານິ ກຕ຺ວາ ສຄ຺ເຄ ນິພ຺ພຕ຺ຕາ, ເຕ ‘‘ອຕ຺ຕໂນ ອຕ຺ຕໂນ ສຕ຺ຖຣິ ປສາເທນ ນິພ຺ພຕ຺ຕມ຺ຫາ’’ຕິ ສຎ຺ຎິໂນ ຫຸຕ຺ວາ ‘‘ຄຈ຺ຉາມ ທສພລສ຺ສ ສນ຺ຕິເກ ຐຕ຺ວາ ອມ຺ຫາກໍ ສຕ຺ຖາຣານໍ ວຓ຺ຓໍ ກເຖສ຺ສາມາ’’ຕິ ອາຄນ຺ຕ຺ວາ ປຈ຺ເຈກຄາຖາຫິ ກຖຍິໍສຸ. ຕຕ຺ຖ ຉິນ຺ທິຕມາຣິເຕຕິ ຉິນ຺ທິເຕ ຈ ມາຣິເຕ ຈ. ຫຕຊານີສູຕິ ໂປຖເນ ຈ ຘນຊານີສຸ ຈ. ປຸຎ຺ຎໍ ວາ ປນາຕິ ອຕ຺ຕໂນ ປຸຎ຺ຎມ຺ປິ ນ ສມນຸປສ຺ສຕິ, ສງ຺ເຂປໂຕ ປຸຎ຺ຎາປຸຎ຺ຎານໍ ວິປາໂກ ນຕ຺ຖີຕິ ວທຕິ. ສ ເວ ວິສ຺ສາສມາຈິກ຺ຂີຕິ ໂສ – ‘‘ເອວໍ ກຕປາປານມ຺ປິ ກຕປຸຎ຺ຎານມ຺ປິ ວິປາໂກ ນຕ຺ຖີ’’ຕິ ວທນ຺ໂຕ ສຕ຺ຕານໍ ວິສ຺ສາສໍ ອວສ຺ສຍໍ ປຕິຏ຺ຐໍ ອາຈິກ຺ຂຕິ, ຕສ຺ມາ ມານນໍ ວນ຺ທນໍ ປູຊນໍ ອຣຫຕີຕິ ວທຕິ.

ຕໂປຊິຄຸຈ຺ຉາຍາຕິ ກາຍກິລມຖຕເປນ ປາປຊິຄຸຈ຺ຉເນນ. ສຸສໍວຸຕຕ຺ໂຕຕິ ສມນ຺ນາຄໂຕ ປິຫິໂຕ ວາ. ເຊຄຸຈ຺ຉີຕິ ຕເປນ ປາປຊິຄຸຈ຺ຉໂກ. ນິປໂກຕິ ປຓ຺ຑິໂຕ. ຈາຕຸຍາມສຸສໍວຸໂຕຕິ ຈາຕຸຍາເມນ ສຸສໍວຸໂຕ. ຈາຕຸຍາໂມ ນາມ ສພ຺ພວາຣິວາຣິໂຕ ຈ ໂຫຕິ ສພ຺ພວາຣິຍຸຕ຺ໂຕ ຈ ສພ຺ພວາຣິຘຸໂຕ ຈ ສພ຺ພວາຣິຜຸໂຏ ຈາຕິ ອິເມ ຈຕ຺ຕາໂຣ ໂກຏ຺ຐາສາ. ຕຕ຺ຖ ສພ຺ພວາຣິວາຣິໂຕຕິ ວາຣິຕສພ຺ພອຸທໂກ, ປຏິກ຺ຂິຕ຺ຕສພ຺ພສີໂຕທໂກຕິ ອຕ຺ໂຖ. ໂສ ກິຣ ສີໂຕທເກ ສຕ຺ຕສຎ຺ຎີ ໂຫຕິ, ຕສ຺ມາ ຕໍ ນ ວລຎ຺ເຊຕິ. ສພ຺ພວາຣິຍຸຕ຺ໂຕຕິ ສພ຺ເພນ ປາປວາຣເຓນ ຍຸໂຕ. ສພ຺ພວາຣິຘຸໂຕຕິ ສພ຺ເພນ ປາປວາຣເຓນ ຘຸຕປາໂປ. ສພ຺ພວາຣິຜຸໂຏຕິ ສພ຺ເພນ ປາປວາຣເຓນ ຜຸຏ຺ໂຐ. ທິຏ຺ຐໍ ສຸຕຎ຺ຈ ອາຈິກ຺ຂນ຺ຕິ ທິຏ຺ຐໍ ‘‘ທິຏ຺ຐໍ ເມ’’ຕິ ສຸຕໍ ‘‘ສຸຕໍ ເມ’’ຕິ ອາຈິກ຺ຂນ຺ໂຕ, ນ ນິຄຸຫນ຺ໂຕ. ນ ຫິ ນູນ ກິພ຺ພິສີຕິ ເອວຣູໂປ ສຕ຺ຖາ ກິພ຺ພິສກາຣໂກ ນາມ ນ ໂຫຕິ.

ນານາຕິຕ຺ຖິເຍຕິ ໂສ ກິຣ ນານາຕິຕ຺ຖິຍານໍເຍວ ອຸປຏ຺ຐາໂກ, ຕສ຺ມາ ເຕ ອາຣພ຺ຠ ວທຕິ. ປກຸຘໂກ ກາຕິຍາໂນຕິ ປກຸໂຘ ກຈ຺ຈາຍໂນ. ນິຄຓ຺ໂຐຕິ ນາຏປຸຕ຺ໂຕ. ມກ຺ຂລິປູຣຓາເສຕິ ມກ຺ຂລິ ຈ ປູຣໂຓ ຈ. ສາມຎ຺ຎປ຺ປຕ຺ຕາຕິ ສມຓຘມ຺ເມ ໂກຏິປ຺ປຕ຺ຕາ. ນ ຫິ ນູນ ເຕຕິ ສປ຺ປຸຣິເສຫິ ນ ທູເຣ, ເຕເຍວ ໂລເກ ສປ຺ປຸຣິສາຕິ ວທຕິ. ປຈ຺ຈຠາສີຕິ ‘‘ອຍໍ ອາໂກຏໂກ ອິເມສໍ ນຄ຺ຄນິສ຺ສິຣິການໍ ທສພລສ຺ສ ສນ຺ຕິເກ ຐຕ຺ວາ ວຓ຺ຓໍ ກເຖຕີຕິ ເຕສໍ ອວຓ຺ຓໍ ກເຖສ຺ສາມີ’’ຕິ ປຕິອຠາສີຕິ.

ຕຕ຺ຖ ສຫາຈຣິເຕນາຕິ ສຫ ຈຣິຕມຕ຺ເຕນ. ຉໂວ ສິຄາໂລຕິ ລາມໂກ ກາລສິຄາໂລ. ໂກຕ຺ຖຸໂກຕິ ຕສ຺ເສວ ເວວຈນໍ. ສງ຺ກສ຺ສຣາຈາໂຣຕິ ອາສງ຺ກິຕສມາຈາໂຣ. ນ ສຕໍ ສຣິກ຺ໂຂຕິ ປຓ຺ຑິຕານໍ ສປ຺ປຸຣິສານໍ ສທິໂສ ນ ໂຫຕິ, ກິໍ ຕ຺ວໍ ກາລສິຄາລສທິເສ ຕິຕ຺ຖິເຍ ສີເຫ ກໂຣສີຕິ?

ອນ຺ວາວິສິຕ຺ວາຕິ ‘‘ອຍໍ ເອວຣູປານໍ ສຕ຺ຖາຣານໍ ອວຓ຺ຓໍ ກເຖຕິ, ເຕເນວ ນໍ ມຸເຂນ ວຓ຺ຓໍ ກຖາເປສ຺ສາມີ’’ຕິ ຈິນ຺ເຕຕ຺ວາ ຕສ຺ສ ສຣີເຣ ອນຸອາວິສິ ອຘິມຸຈ຺ຈິ, ເອວໍ ອນ຺ວາວິສິຕ຺ວາ. ອາຍຸຕ຺ຕາຕິ ຕໂປຊິຄຸຈ຺ຉເນ ຍຸຕ຺ຕປຍຸຕ຺ຕາ. ປາລຍໍ ປວິເວກິຍນ຺ຕິ ປວິເວກໍ ປາລຍນ຺ຕາ. ເຕ ກິຣ ‘‘ນ຺ຫາປິຕປວິເວກໍ ປາເລສ຺ສາມາ’’ຕິ ສຍໍ ເກເສ ລຸຎ຺ຈນ຺ຕິ. ‘‘ຈີວຣປວິເວກໍ ປາເຕສ຺ສາມາ’’ຕິ ນຄ຺ຄາ ວິຈຣນ຺ຕິ. ‘‘ປິຓ຺ຑປາຕປວິເວກໍ ປາເລສ຺ສາມາ’’ຕິ ສຸນຂາ ວິຍ ຠູມິຍໍ ວາ ຠຸຎ຺ຊນ຺ຕິ ຫຕ຺ເຖສຸ ວາ. ‘‘ເສນາສນປວິເວກໍ ປາເລສ຺ສາມາ’’ຕິ ກຓ຺ຏກເສຍ຺ຍາທີນິ ກປ຺ເປນ຺ຕິ. ຣູເປ ນິວິຏ຺ຐາຕິ ຕຓ຺ຫາທິຏ຺ຐີຫິ ຣູເປ ປຕິຏ຺ຐິຕາ. ເທວໂລກາຠິນນ຺ທິໂນຕິ ເທວໂລກປຕ຺ຖນກາມາ. ມາຕິຍາຕິ ມຈ຺ຈາ, ເຕ ເວ ມຈ຺ຈາ ປຣໂລກຕ຺ຖາຍ ສມ຺ມາ ອນຸສາສນ຺ຕີຕິ ວທຕິ.

ອິຕິ ວິທິຕ຺ວາຕິ ‘‘ອຍໍ ປຐມໍ ເອເຕສໍ ອວຓ຺ຓໍ ກເຖຕ຺ວາ ອິທານິ ວຓ຺ຓໍ ກເຖຕິ, ໂກ ນຸ ໂຂ ເອໂສ’’ຕິ ອາວຊ຺ເຊນ຺ໂຕ ຊານິຕ຺ວາວ. ເຍ ຈນ຺ຕລິກ຺ຂສ຺ມິໍ ປຠາສວຓ຺ຓາຕິ ເຍ ອນ຺ຕລິກ຺ເຂ ຈນ຺ໂທຠາສສູຣິໂຍຠາສສຎ຺ຌາຣາຄອິນ຺ທຘນຸຕາຣກຣູປານໍ ປຠາສວຓ຺ຓາ. ສພ຺ເພວ ເຕ ເຕຕິ ສພ຺ເພວ ເຕ ຕຍາ. ນມຸຈີຕິ ມາຣໍ ອາລປຕິ. ອາມິສໍວ ມຈ຺ຉານໍ ວຘາຍ ຂິຕ຺ຕາຕິ ຍຖາ ມຈ຺ຉານໍ ວຘຕ຺ຖາຍ ພຬິສລຄ຺ຄໍ ອາມິສໍ ຂິປຕິ, ເອວໍ ຕຍາ ປສໍສມາເນນ ເອເຕ ຣູປາ ສຕ຺ຕານໍ ວຘາຍ ຂິຕ຺ຕາຕິ ວທຕິ.

ມາຓວຄາມິໂຍຕິ ອຍໍ ກິຣ ເທວປຸຕ຺ໂຕ ພຸທ຺ຘຸປຏ຺ຐາໂກ. ຣາຊຄຫີຍານນ຺ຕິ ຣາຊຄຫປພ຺ພຕານໍ. ເສໂຕຕິ ເກລາໂສ. ອຆຄາມິນນ຺ຕິ ອາກາສຄາມີນໍ. ອຸທຘິນນ຺ຕິ ອຸທກນິຘານານໍ. ອິທໍ ວຸຕ຺ຕໍ ໂຫຕິ – ຍຖາ ຣາຊຄຫີຍານໍ ປພ຺ພຕານໍ ວິປຸໂລ ເສຏ຺ໂຐ, ຫິມວນ຺ຕປພ຺ພຕານໍ ເກລາໂສ, ອາກາສຄາມີນໍ ອາທິຈ຺ໂຈ, ອຸທກນິຘານານໍ ສມຸທ຺ໂທ, ນກ຺ຂຕ຺ຕານໍ ຈນ຺ໂທ, ເອວໍ ສເທວກສ຺ສ ໂລກສ຺ສ ພຸທ຺ໂຘ ເສຏ຺ໂຐຕິ. ທສມໍ.

ນານາຕິຕ຺ຖິຍວຄ຺ໂຄ ຕຕິໂຍ.

ອິຕິ ສາຣຕ຺ຖປ຺ປກາສິນິຍາ

ສໍຍຸຕ຺ຕນິກາຍ-ອຏ຺ຐກຖາຍ

ເທວປຸຕ຺ຕສໍຍຸຕ຺ຕວຓ຺ຓນາ ນິຏ຺ຐິຕາ.