໒. ທຸຕິຍວຄ຺ໂຄ

໑. ວຕປທສຸຕ຺ຕວຓ຺ຓນາ

໒໕໗. ທຸຕິຍວຄ຺ຄສ຺ສ ປຐເມ ວຕປທານີຕິ ວຕໂກຏ຺ຐາສານິ. ສມຕ຺ຕານີຕິ ປຣິປຸຓ຺ຓານິ. ສມາທິນ຺ນານີຕິ ຄຫິຕານິ. ກຸເລ ເຊຏ຺ຐາປຈາຍີຕິ ກຸລເຊຏ຺ຐການໍ ມຫາປິຕາ ມຫາມາຕາ ຈູຬປິຕາ ຈູຬມາຕາ ມາຕຸໂລ ມາຕຸລານີຕິອາທີນໍ ອປຈິຕິກາຣໂກ. ສຓ຺ຫວາໂຈຕິ ປິຍມຸທຸມຘຸຣວາໂຈ. ມຸຕ຺ຕຈາໂຄຕິ ວິສ຺ສຏ຺ຐຈາໂຄ. ປຍຕປາຓີຕິ ເທຍ຺ຍຘມ຺ມທານຕ຺ຖາຍ ສທາ ໂຘຕຫຕ຺ໂຖ. ໂວສ຺ສຄ຺ຄຣໂຕຕິ ໂວສ຺ສຊ຺ຊເນ ຣໂຕ. ຍາຈໂຍໂຄຕິ ປເຣຫິ ຍາຈິຕພ຺ພາຣໂຫ, ຍາຈໂຍໂຄຕິ ວາ ຍາຈໂຍເຄເນວ ຍຸຕ຺ໂຕ. ທານສໍວິຠາຄຣໂຕຕິ ທາເນ ຈ ສໍວິຠາເຄ ຈ ຣໂຕ. ປຐມໍ.

໒. ສກ຺ກນາມສຸຕ຺ຕວຓ຺ຓນາ

໒໕໘. ທຸຕິເຍ ມນຸສ຺ສຠູໂຕຕິ ມຄຘຣຏ຺ເຐ ມຈລຄາເມ ມນຸສ຺ສຠູໂຕ. ອາວສຖໍ ອທາສີຕິ ຈຕຸມຫາປເຖ ມຫາຊນສ຺ສ ອາວສຖໍ ກາເຣຕ຺ວາ ອທາສິ. ສຫສ຺ສມ຺ປິ ອຕ຺ຖານນ຺ຕິ ສຫສ຺ສມ຺ປິ ກາຣຓານໍ, ຊນສຫສ຺ເສນ ວາ ວຈນສຫສ຺ເສນ ວາ ໂອສາຣິເຕ ‘‘ອຍໍ ອິມສ຺ສ ອຕ຺ໂຖ, ອຍໍ ອິມສ຺ສ ອຕ຺ໂຖ’’ຕິ ເອກປເທ ຐິໂຕວ ວິນິຈ຺ຉິນຕິ. ທຸຕິຍໍ.

໓. ມຫາລິສຸຕ຺ຕວຓ຺ຓນາ

໒໕໙. ຕຕິເຍ ອຸປສງ຺ກມີຕິ ‘‘ສກ຺ໂກ ເທວຣາຊາຕິ ກເຖນ຺ຕິ, ອຕ຺ຖິ ນຸ ໂຂ ໂສ ສກ຺ໂກ, ເຍນ ໂສ ທິຏ຺ຐປຸພ຺ໂພຕິ ອິມມຕ຺ຖໍ ທສພລໍ ປຸຈ຺ຉິສ຺ສາມີ’’ຕິ ອຸປສງ຺ກມິ. ຕຎ຺ຈ ປຊານາມີຕິ ພຫຸວຈເນ ເອກວຈນໍ, ເຕ ຈ ຘມ຺ເມ ປຊານາມີຕິ ອຕ຺ໂຖ. ສກ຺ໂກ ກິຣ ອນນ຺ຕເຣ ອຕ຺ຕຠາເວ ມຄຘຣຏ຺ເຐ ມຈລຄາເມ ມໂຆ ນາມ ມາຓໂວ ອໂຫສິ ປຓ຺ຑິໂຕ ພ຺ຍຕ຺ໂຕ, ໂພຘິສຕ຺ຕຈຣິຍາ ວິຍ ຈ ຕສ຺ສ ຈຣິຍາ ອໂຫສິ. ໂສ ເຕຕ຺ຕິໍສ ປຸຣິເສ ຄເຫຕ຺ວາ ກລ຺ຍາຓມກາສິ. ເອກທິວສໍ ອຕ຺ຕໂນວ ປຎ຺ຎາຍ ອຸປປຣິກ຺ຂິຕ຺ວາ ຄາມມຊ຺ເຌ ມຫາຊນສ຺ສ ສນ຺ນິປຕິຕຏ຺ຐາເນ ກຈວຣໍ ອຸຠໂຕປສ຺ເສສຸ ອປພ຺ຍູຫິຕ຺ວາ ຕໍ ຐານໍ ຣມຓີຍໍ ອກາສິ. ປຸນ ຕຕ຺ເຖວ ມຓ຺ຑປໍ ກາເຣສິ. ປຸນ ຄຈ຺ຉນ຺ເຕ ກາເລ ສາລໍ ກາເຣສິ. ຄາມໂຕ ຈ ນິກ຺ຂມິຕ຺ວາ ຄາວຸຕມ຺ປິ ອຑ຺ຒໂຍຊນມ຺ປິ ຕິຄາວຸຕມ຺ປິ ໂຍຊນມ຺ປິ ວິຈຣິຕ຺ວາ ເຕຫິ ສຫາເຍຫິ ສທ຺ຘິໍ ວິສມໍ ສມໍ ອກາສິ. ເຕ ສພ຺ເພວ ເອກຈ຺ຉນ຺ທາ ຕຕ຺ຖ ຕຕ຺ຖ ເສຕຸຍຸຕ຺ຕຏ຺ຐາເນ ເສຕຸໍ, ມຓ຺ຑປສາລາໂປກ຺ຂຣຓິມາລາວຈ຺ຉໂຣປນປທີນໍ ຍຸຕ຺ຕຏ຺ຐາເນສຸ ມຓ຺ຑປສາລາໂປກ຺ຂຣຓິມາລາວຈ຺ຉໂຣປນາທີນິ ກໂຣນ຺ຕາ ພຫຸໍ ປຸຎ຺ຎມກໍສຸ. ມໂຆ ສຕ຺ຕ ວຕປທານິ ປູເຣຕ຺ວາ ກາຍສ຺ສ ເຠທາ ສທ຺ຘິໍ ສຫາເຍຫິ ຕາວຕິໍສຠວເນ ນິພ຺ພຕ຺ຕິ. ຕໍ ສພ຺ພໍ ຠຄວາ ຊານາຕິ. ເຕນາຫ – ເຍສໍ ຘມ຺ມານໍ ສມາທິນ຺ນຕ຺ຕາ ສກ຺ໂກ ສກ຺ກຕ຺ຕໍ ອຊ຺ຌຄາ, ຕຎ຺ຈ ປຊານາມີຕິ. ອຍໍ ສກ຺ກສ຺ສ ສກ຺ກຕ຺ຕາຘິຄເມ ສງ຺ເຂປກຖາ, ວິຕ຺ຖາໂຣ ປນ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍ ສກ຺ກປຓ຺ຫວຓ຺ຓນາຍໍ ວຸຕ຺ໂຕ. ຕຕິຍໍ.

໔. ທລິທ຺ທສຸຕ຺ຕວຓ຺ຓນາ

໒໖໐. ຈຕຸຕ຺ເຖ ມນຸສ຺ສທລິທ຺ໂທຕິ ມນຸສ຺ສອຘໂນ. ມນຸສ຺ສກປໂຓຕິ ມນຸສ຺ສກາຣຸຎ຺ຎຕໍ ປຕ຺ໂຕ. ມນຸສ຺ສວຣາໂກຕິ ມນຸສ຺ສລາມໂກ. ຕຕ຺ຣາຕິ ຕສ຺ມິໍ ຐາເນ, ຕສ຺ມິໍ ວາ ອຕິໂຣຈເນ. ອຸຊ຺ຌາຍນ຺ຕີຕິ ອວຊ຺ຌາຍນ຺ຕິ ລາມກໂຕ ຈິນ຺ເຕນ຺ຕິ. ຂິຍນ຺ຕີຕິ ກເຖນ຺ຕິ ປກາເສນ຺ຕິ. ວິປາເຈນ຺ຕີຕິ ຕຕ຺ຖ ຕຕ຺ຖ ກເຖນ຺ຕິ ວິຕ຺ຖາເຣນ຺ຕິ. ເອໂສ ໂຂ ມາຣິສາຕິ ເອຕ຺ຖ ອຍມນຸປຸພ຺ພິກຖາ – ໂສ ກິຣ ອນຸປ຺ປນ຺ເນ ພຸທ຺ເຘ ກາສິຣຏ຺ເຐ ພາຣາຓສິຣາຊາ ຫຸຕ຺ວາ ສມຸສ຺ສິຕທ຺ຘຊປຏາກນານາລງ຺ກາເຣນ ສຸຏ຺ຐຸ ອລງ຺ກຕໍ ນຄຣໍ ປທກ຺ຂິຓໍ ອກາສິ ອຕ຺ຕໂນ ສິຣິສມ຺ປຕ຺ຕິຍາ ສມາກຑ຺ຒິຕເນຕ຺ເຕນ ຊນກາເຍນ ສມຸລ຺ໂລກິຍມາໂນ. ຕສ຺ມິຎ຺ຈ ສມເຍ ເອໂກ ປຈ຺ເຈກພຸທ຺ໂຘ ຄນ຺ຘມາທນປພ຺ພຕາ ອາຄມ຺ມ ຕສ຺ມິໍ ນຄເຣ ປິຓ຺ຑາຍ ຈຣຕິ, ສນ຺ຕິນ຺ທ຺ຣິໂຍ ສນ຺ຕມານໂສ ອຸຕ຺ຕມທມຖສມນ຺ນາຄໂຕ. ມຫາຊໂນປິ ຣາຊຄຕໍ ຈິຕ຺ຕີກາຣໍ ປຫາຍ ປຈ຺ເຈກພຸທ຺ຘເມວ ໂອໂລເກສິ. ຣາຊາ – ‘‘ອິທານິ ອິມສ຺ມິໍ ຊນກາເຍ ເອໂກປິ ມໍ ນ ໂອໂລເກຕິ. ກິໍ ນຸ ໂຂ ເອຕ’’ນ຺ຕິ? ໂອໂລເກນ຺ໂຕ ປຈ຺ເຈກພຸທ຺ຘໍ ອທ຺ທສ. ໂສປິ ປຈ຺ເຈກພຸທ຺ໂຘ ມຫລ຺ລໂກ ໂຫຕິ ປຈ຺ຉິມວເຍ ຐິໂຕ. ຈີວຣານິປິສ຺ສ ຊິຓ຺ຓານິ, ຕໂຕ ຕໂຕ ສຸຕ຺ຕານິ ຄຬນ຺ຕິ. ຣຎ຺ໂຎ ສຕສຫສ຺ສາຘິການິ ທ຺ເວ ອສງ຺ຂ຺ເຍຍ຺ຍານິ ປູຣິຕປາຣມິໍ ປຈ຺ເຈກພຸທ຺ຘໍ ທິສ຺ວາ ຈິຕ຺ຕປສາທມຕ຺ຕໍ ວາ ຫຕ຺ຖໍ ປສາເຣຕ຺ວາ ວນ຺ທນມຕ຺ຕໍ ວາ ນາໂຫສິ. ໂສ ຣາຊາ ‘‘ປພ຺ພຊິໂຕ ມຎ຺ເຎ ເອສ ອຸສູຍາຍ ມໍ ນ ໂອໂລເກຕີ’’ຕິ ກຸຊ຺ຌິຕ຺ວາ ‘‘ກ຺ວາຍໍ ກຸຏ຺ຐິຈີວຣານິ ປາຣຸໂຕ’’ຕິ ນິຏ຺ຐຸຠິຕ຺ວາ ປກ຺ກາມິ. ຕສ຺ສ ກມ຺ມສ຺ສ ວິປາເກນ ມຫານິຣເຍ ນິພ຺ພຕ຺ຕິຕ຺ວາ ວິປາກາວເສເສນ ມນຸສ຺ສໂລກໍ ອາຄຈ຺ຉນ຺ໂຕ ຣາຊຄເຫ ປຣມກປຓາຍ ອິຕ຺ຖິຍາ ກຸຈ຺ຉິມ຺ຫິ ປຏິສນ຺ຘິໍ ຄຓ຺ຫິ. ຄຫິຕກາລໂຕ ປຏ຺ຐາຍ ສາ ອິຕ຺ຖີ ກຎ຺ຊິກມຕ຺ຕມ຺ປິ ອຸທຣປູຣໍ ນາລຕ຺ຖ. ຕສ຺ສ ກຸຈ຺ຉິຄຕສ຺ເສວ ກຓ຺ຓນາສາ ວິລີນາ, ສງ຺ຂປລິຕກຸຏ຺ຐີ ຫຸຕ຺ວາ ມາຕຸກຸຈ຺ຉິໂຕ ນິກ຺ຂນ຺ໂຕ. ມາຕາປິຕໂຣ ນາມ ທຸກ຺ກຣກາຣິກາ ໂຫນ຺ຕິ, ເຕນສ຺ສ ມາຕາ ຍາວ ກປາລໍ ຄເຫຕ຺ວາ ຈຣິຕຸໍ ນ ສກ຺ໂກຕິ, ຕາວສ຺ສ ກຎ຺ຊິກມ຺ປິ ອຸທກມ຺ປິ ອາຫຣິຕ຺ວາ ອທາສິ. ຠິກ຺ຂາຍ ຈຣິຕຸໍ ສມຕ຺ຖກາເລ ປນສ຺ສ ກປາລໍ ຫຕ຺ເຖ ທຕ຺ວາ ‘‘ປຎ຺ຎາຍິສ຺ສສິ ສເກນ ກມ຺ເມນາ’’ຕິ ປກ຺ກາມິ.

ອຖສ຺ສ ຕໂຕ ປຏ຺ຐາຍ ສກລສຣີຣໂຕ ມໍສານິ ຉິຊ຺ຊິຕ຺ວາ ຉິຊ຺ຊິຕ຺ວາ ປຕນ຺ຕິ, ຍູສໍ ປຄ຺ຆຣຕິ, ມຫາເວທນາ ວຕ຺ຕນ຺ຕິ. ຍໍ ຍໍ ຣຈ຺ຉໍ ນິສ຺ສາຍ ສຍຕິ, ສພ຺ພຣຕ຺ຕິໍ ມຫາຣເວນ ຣວຕິ. ຕສ຺ສ ກາຣຸຎ຺ຎປຣິເທວິຕສທ຺ເທນ ສກລວີຖິຍໍ ມນຸສ຺ສາ ສພ຺ພຣຕ຺ຕິໍ ນິທ຺ທໍ ນ ລຠນ຺ຕິ. ຕສ຺ສ ຕໂຕ ປຏ຺ຐາຍ ສຸຂສຍິເຕ ປໂພເຘຕີຕິ ສຸປ຺ປພຸທ຺ໂຘຕ຺ເວວ ນາມໍ ອຸທປາທິ. ອຖາປເຣນ ສມເຍນ ຠຄວຕິ ຣາຊຄຫໍ ສມ຺ປຕ຺ເຕ ນາຄຣາ ສຕ຺ຖາຣໍ ນິມນ຺ເຕຕ຺ວາ ນຄຣມຊ຺ເຌ ມຫາມຓ຺ຑປໍ ກຕ຺ວາ ທານໍ ອທໍສຸ. ສຸປ຺ປພຸທ຺ໂຘປິ ກຸຏ຺ຐີ ຄນ຺ຕ຺ວາ ທານຄ຺ຄມຓ຺ຑປສ຺ສ ອວິທູເຣ ນິສີທິ. ນາຄຣາ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ປຓີເຕນ ຂາທນີເຍນ ໂຠຊນີເຍນ ປຣິວິສນ຺ຕາ ຕສ຺ສາປິ ຍາຄຸຠຕ຺ຕໍ ອທໍສຸ. ຕສ຺ສ ປຓີຕໂຠຊນໍ ຠຸຕ຺ຕສ຺ສ ຈິຕ຺ຕໍ ເອກຄ຺ຄໍ ອໂຫສິ. ສຕ຺ຖາ ຠຕ຺ຕກິຈ຺ຈາວສາເນ ອນຸໂມທນໍ ກຕ຺ວາ ສຈ຺ຈານິ ທີເປສິ, ສຸປ຺ປພຸທ຺ໂຘ ນິສິນ຺ນຏ຺ຐາເນ ນິສິນ຺ໂນວ ເທສນານຸສາເຣນ ຎາຓໍ ເປເສຕ຺ວາ ໂສຕາປຕ຺ຕິຜເລ ປຕິຏ຺ຐິໂຕ. ສຕ຺ຖາ ອຸຏ຺ຐາຍ ວິຫາຣໍ ຄໂຕ. ໂສປິ ຈຸມ຺ພຏໍ ອາຣຸຍ຺ຫ ກປາລມາທາຍ ທຓ຺ຑໂມລຸພ຺ຠ ອຕ຺ຕໂນ ວສນຏ຺ຐານໍ ຄຈ຺ຉນ຺ໂຕ ວິພ຺ຠນ຺ຕາຍ ຄາວິຍາ ຊີວິຕາ ໂວໂຣປິໂຕ ມຕ຺ຕິກປາຕິໍ ຠິນ຺ທິຕ຺ວາ ສຸວຓ຺ຓປາຕິໍ ປຏິລຠນ຺ໂຕ ວິຍ ທຸຕິຍຈິຕ຺ຕວາເຣ ເທວໂລເກ ນິພ຺ພຕ຺ໂຕ ອຕ຺ຕໂນ ປຸຎ຺ຎໍ ນິສ຺ສາຍ ອຎ຺ເຎ ເທເວ ອຕິກ຺ກມ຺ມ ວິໂຣຈິຕ຺ຖ. ຕໍ ກາຣຓໍ ທສ຺ເສນ຺ໂຕ ສກ຺ໂກ ເທວານມິນ຺ໂທ ເອໂສ ໂຂ ມາຣິສາຕິອາທິມາຫ.

ສທ຺ຘາຕິ ມຄ຺ເຄນາຄຕສທ຺ຘາ. ສີລຎ຺ຈ ຍສ຺ສ ກລ຺ຍາຓນ຺ຕິ ກລ຺ຍາຓສີລໍ ນາມ ອຣິຍສາວກສ຺ສ ອຣິຍກນ຺ຕສີລໍ ວຸຈ຺ຈຕິ. ຕຕ຺ຖ ກິຎ຺ຈາປິ ອຣິຍສາວກສ຺ສ ເອກສີລມ຺ປິ ອກນ຺ຕໍ ນາມ ນຕ຺ຖິ, ອິມສ຺ມິໍ ປນຕ຺ເຖ ຠວນ຺ຕເຣປິ ອປ຺ປຫີນໍ ປຎ຺ຈສີລໍ ອຘິປ຺ເປຕໍ. ຈຕຸຕ຺ຖໍ.

໕. ຣາມເຓຍ຺ຍກສຸຕ຺ຕວຓ຺ຓນາ

໒໖໑. ປຎ຺ຈເມ ອາຣາມເຈຕ຺ຍາຕິ ອາຣາມເຈຕິຍານິ. ວນເຈຕ຺ຍາຕິ ວນເຈຕິຍານິ. ອຸຠຍຕ຺ຖາປິ ຈິຕ຺ຕີກຕຏ຺ເຐນ ເຈຕ຺ຍໍ ເວທິຕພ຺ພໍ. ມນຸສ຺ສຣາມເຓຍ຺ຍສ຺ສາຕິ ມນຸສ຺ສຣມຓີຍຠາວສ຺ສ. ອິທານິ ມນຸສ຺ສຣມຓີຍກວເສນ ຠູມິຣມຓີຍກໍ ທສ຺ເສນ຺ໂຕ ຄາເມ ວາຕິອາທິມາຫ. ປຎ຺ຈມໍ.

໖. ຍຊມານສຸຕ຺ຕວຓ຺ຓນາ

໒໖໒. ຉຏ຺ເຐ ຍຊມານານນ຺ຕິ ຍຊນ຺ຕານໍ. ຕທາ ກິຣ ອງ຺ຄມຄຘວາສິກາ ມນຸສ຺ສາ ອນຸສໍວຈ຺ຉຣໍ ສປ຺ປິມຘຸຜາຓິຕາທີສຸ ອຄ຺ຄໍ ຄເຫຕ຺ວາ ເອກສ຺ມິໍ ຐາເນ ທາຣູນໍ ສຏ຺ຐິມຕ຺ເຕ ສກຏຠາເຣ ຣາສິໍ ກຕ຺ວາ ອຄ຺ຄິໍ ທຕ຺ວາ ປຊ຺ຊລິຕກາເລ ‘‘ມຫາພ຺ຣຫ຺ມຸໂນ ຍຊາມາ’’ຕິ ຕໍ ສພ຺ພໍ ປກ຺ຂິປນ຺ຕິ. ‘‘ເອກວາຣໍ ປກ຺ຂິຕ຺ຕໍ ສຫສ຺ສຄຸຓຜລໍ ເທຕີ’’ຕິ ເນສໍ ລທ຺ຘິ. ສກ຺ໂກ ເທວຣາຊາ ‘‘ສພ຺ເພປິເມ ສພ຺ພອຄ຺ຄານິ ຄເຫຕ຺ວາ ‘ມຫາພ຺ຣຫ຺ມຸໂນ ຍຊາມາ’ຕິ ອຄ຺ຄິມ຺ຫິ ຌາເປນ຺ຕິ. ອຜລໍ ກໂຣນ຺ຕິ, ມຍິ ປສ຺ສນ຺ເຕ ມາ ນສ຺ສນ຺ຕຸ, ຍຖາ ພຸທ຺ຘສ຺ສ ເຈວ ສງ຺ຆສ຺ສ ຈ ທຕ຺ວາ ພຫຸໍ ປຸຎ຺ຎໍ ປສວນ຺ຕິ, ເອວໍ ກຣິສ຺ສາມີ’’ຕິ ທາຣຸຣາສິໍ ຊລາເປຕ຺ວາ ໂອໂລເກນ຺ເຕສຸ ມນຸສ຺ເສສຸ ປຸຓ຺ຓມທິວເສ ພ຺ຣຫ຺ມຕ຺ຕຠາວໍ ມາເປຕ຺ວາ ມຫາຊນສ຺ສ ປສ຺ສນ຺ຕສ຺ເສວ ຈນ຺ທມຓ຺ຑລໍ ຠິນ຺ທິຕ຺ວາ ນິກ຺ຂນ຺ໂຕ ວິຍ ອໂຫສິ. ມຫາຊໂນ ທິສ຺ວາ ‘‘ອິມໍ ຍຎ຺ຎໍ ປຏິຄ຺ຄເຫຕຸໍ ມຫາພ຺ຣຫ຺ມາ ອາຄຈ຺ຉຕີ’’ຕິ ຊຓ຺ຓຸເກຫິ ຠູມິຍໍ ປຕິຏ຺ຐາຍ, ອຎ຺ຊລິໍ ປຄ຺ຄຍ຺ຫ ນມສ຺ສມາໂນ ອຏ຺ຐາສິ. ພ຺ຣາຫ຺ມຓາ ອາຫໍສຸ ‘‘ຕຸມ຺ເຫ ‘ມຍໍ ຕກ຺ເກນ ກເຖມາ’ຕິ ມຎ຺ຎຖ, ອິທານິ ປສ຺ສຖ, ອຍໍ ໂວ ພ຺ຣຫ຺ມາ ສຫຕ຺ຖາ ຍຎ຺ຎໍ ປຏິຄ຺ຄເຫຕຸໍ ອາຄຈ຺ຉຕີ’’ຕິ. ສກ຺ໂກ ອາຄນ຺ຕ຺ວາ ທາຣຸຈິຕກມຕ຺ຖເກ ອາກາເສ ຐຕ຺ວາ ‘‘ກສ຺ສາຍໍ ສກ຺ກາໂຣ’’ຕິ ປຸຈ຺ຉິ? ຕຸມ຺ຫາກໍ, ຠນ຺ເຕ, ປຏິຄ຺ຄຓ຺ຫຖ ໂນ ຍຎ຺ຎນ຺ຕິ. ເຕນ ຫິ ອາຄຈ຺ຉຖ, ມາ ຕຸລໍ ຉຑ຺ເຑຕ຺ວາ ຫຕ຺ເຖນ ຕຸລຍິຕ຺ຖ, ອຍໍ ສຕ຺ຖາ ຘຸຣວິຫາເຣ ວສຕິ, ຕໍ ປຸຈ຺ຉິສ຺ສາມ ‘‘ກສ຺ສ ທິນ຺ນໍ ມຫປ຺ຜລໍ ໂຫຕີ’’ຕິ? ອຸຠຍຣຏ຺ຐວາສິໂນ ຄເຫຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ປຸຈ຺ຉນ຺ໂຕ ເອວມາຫ.

ຕຕ຺ຖ ປຸຎ຺ຎເປກ຺ຂານນ຺ຕິ ປຸຎ຺ຎໍ ອິຈ຺ຉນ຺ຕານໍ ປຸຎ຺ຎຕ຺ຖິການໍ. ໂອປຘິກໍ ປຸຎ຺ຎນ຺ຕິ ອຸປຘິວິປາກໍ ປຸຎ຺ຎໍ. ສງ຺ເຆ ທິນ຺ນໍ ມຫປ຺ຜລນ຺ຕິ ອຣິຍສງ຺ເຆ ທິນ຺ນໍ ວິປ຺ຜາຣວນ຺ຕໍ ໂຫຕິ. ເທສນາວສາເນ ຈຕຸຣາສີຕິປາຓສຫສ຺ສານິ ອມຕປານໍ ປິວິໍສຸ. ຕໂຕ ປຏ຺ຐາຍ ມນຸສ຺ສາ ສພ຺ພານິ ອຄ຺ຄທານານິ ຠິກ຺ຂຸສງ຺ຆສ຺ສ ອທໍສຸ. ຉຏ຺ຐໍ.

໗. ພຸທ຺ຘວນ຺ທນາສຸຕ຺ຕວຓ຺ຓນາ

໒໖໓. ສຕ຺ຕເມ ອຸຏ຺ເຐຫີຕິ ອຸຏ຺ຐຫ, ຆຏ, ວາຍມ. ວິຊິຕສງ຺ຄາມາຕິ ຣາຄາທີນຎ຺ເຈວ ທ຺ວາທສໂຍຊນິກສ຺ສ ຈ ມາຣພລສ຺ສ ຊິຕຕ຺ຕາ ຠຄວນ຺ຕໍ ເອວໍ ອາລປຕິ. ປນ຺ນຠາຣາຕິ ໂອໂຣປິຕຂນ຺ຘກິເລສາຠິສງ຺ຂາຣຠາຣ. ປນ຺ນຣສາຍ ຣຕ຺ຕິນ຺ຕິ ປນ຺ນຣສາຍ ປຸຓ຺ຓມາຍ ຣຕ຺ຕິໍ. ສຕ຺ຕມໍ.

໘. ຄຫຏ຺ຐວນ຺ທນາສຸຕ຺ຕວຓ຺ຓນາ

໒໖໔. ອຏ຺ຐເມ ປຸຖຸທ຺ທິສາຕິ ຈຕສ຺ໂສ ທິສາ ຈຕສ຺ໂສ ອນຸທິສາ ຈ. ຠຸມ຺ມາຕິ ຠູມິວາສິໂນ. ຈິຣຣຕ຺ຕສມາຫິເຕຕິ ອຸປຈາຣປ຺ປນາຫິ ຈິຣຣຕ຺ຕສມາຫິຕຈິຕ຺ເຕ. ວນ຺ເທຕິ ວນ຺ທາມິ. ພ຺ຣຫ຺ມຈຣິຍປຣາຍເຓຕິ ທສປິ ວສ຺ສານິ ວີສຕິປິ ວສ຺ສານິ…ເປ… ສຏ຺ຐິປິ ວສ຺ສານິ ອາປາຓໂກຏິກໍ ເອກເສຍ຺ຍໍ ເອກຠຕ຺ຕນ຺ຕິອາທິກໍ ເສຏ຺ຐຈຣິຍໍ ພ຺ຣຫ຺ມຈຣິຍໍ ຈຣມາເນຕິ ອຕ຺ໂຖ. ປຸຎ຺ຎກຣາຕິ ຈຕຸປຈ຺ຈຍທານໍ ກຸສຸມ຺ຠສຸມນປູຊາ ທີປສຫສ຺ສຊາລນ຺ຕິ ເອວມາທິປຸຎ຺ຎກາຣກາ. ສີລວນ຺ໂຕຕິ ອຸປາສກຕ຺ເຕ ປຕິຏ຺ຐາຍ ປຎ຺ຈຫິປິ ທສຫິປິ ສີເລຫິ ສມນ຺ນາຄຕາ. ຘມ຺ເມນ ທາຣໍ ໂປເສນ຺ຕີຕິ ອຸມງ຺ຄຠິນ຺ທນາທີນິ ອກຕ຺ວາ ຘມ຺ມິເກຫິ ກສິໂຄຣກ຺ຂວຓິຊ຺ຊາທີຫິ ປຸຕ຺ຕທາຣໍ ໂປເສນ຺ຕິ. ປມຸໂຂ ຣຖມາຣຸຫີຕິ ເທວານໍ ປມຸໂຂ ເສຏ຺ໂຐ ຣຖໍ ອາຣຸຫິ. ອຏ຺ຐມໍ.

໙. ສຕ຺ຖາຣວນ຺ທນາສຸຕ຺ຕວຓ຺ຓນາ

໒໖໕. ນວເມ ຠຄວນ຺ຕໍ ນມສ຺ສຕີຕິ ເອກໍສໍ ອຸຕ຺ຕຣິຍໍ ທຸກຸລໍ ກຕ຺ວາ, ພ຺ຣຫ຺ມຊາຓຸໂກ ຫຸຕ຺ວາ ສິຣສິ ອຎ຺ຊລິໍ ຐເປຕ຺ວາ ນມສ຺ສຕິ. ໂສ ຍກ຺ໂຂຕິ ໂສ ສກ຺ໂກ. ອໂນມນາມນ຺ຕິ ສພ຺ພຄຸເຓຫິ ໂອມກຠາວສ຺ສ ນຕ຺ຖິຕາຍ ສພ຺ພຄຸຓເນມິຕ຺ຕເກຫິ ນາເມຫິ ອໂນມນາມໍ. ອວິຊ຺ຊາສມຕິກ຺ກມາຕິ ຈຕຸສຈ຺ຈປຏິຈ຺ຉາທິກາຍ ວຏ຺ຏມູລກອວິຊ຺ຊາຍ ສມຕິກ຺ກເມນ. ເສກ຺ຂາຕິ ສຕ຺ຕ ເສກ຺ຂາ. ອປຈຍາຣາມາຕິ ວຏ຺ຏວິທ຺ຘໍສເນ ຣຕາ. ສິກ຺ຂເຣຕິ ສິກ຺ຂນ຺ຕິ. ນວມໍ.

໑໐. ສງ຺ຆວນ຺ທນາສຸຕ຺ຕວຓ຺ຓນາ

໒໖໖. ທສເມ ອຊ຺ຌຠາສີຕິ ກສ຺ມາ ເອສ ປຸນປ຺ປຸນໍ ເອວໍ ຠາສຕີຕິ? ສກ຺ກສ຺ສ ກິຣ ເທວຣຎ຺ໂຎ ສທ຺ໂທ ມຘຸໂຣ, ສຸຜສິຕໍ ທນ຺ຕາວຣຓໍ, ກຖນກາເລ ສຸວຓ຺ຓກິງ຺ກິຓິກສທ຺ໂທ ວິຍ ນິຈ຺ຉຣຕິ. ຕໍ ປຸນປ຺ປຸນໍ ໂສຕຸໍ ລຠິສ຺ສາມີຕິ ຠາສຕິ. ປູຕິເທຫສຍາຕິ ປູຕິມ຺ຫິ ມາຕຸສຣີເຣ ວາ, ອຕ຺ຕໂນເຍວ ວາ ສຣີຣໍ ອວຕ຺ຖຣິຕ຺ວາ ສຍນໂຕ ປູຕິເທຫສຍາ. ນິມຸຄ຺ຄາ ກຸຓປມ຺ເຫເຕຕິ ທສມາເສ ມາຕຸກຸຈ຺ຉິສງ຺ຂາເຕ ກຸຓປສ຺ມິໍ ເອເຕ ນິມຸຄ຺ຄາ. ເອຕໍ ເຕສໍ ປິຫຍາມີຕິ ເອເຕສໍ ເອຕໍ ປິຫຍາມິ ປຕ຺ຖຍາມິ. ນ ເຕ ສໍ ໂກຏ຺ເຐ ໂອເປນ຺ຕີຕິ ນ ເຕ ສໍ ສນ຺ຕກໍ ຘຎ຺ຎໍ ໂກຏ຺ເຐ ປກ຺ຂິປນ຺ຕິ. ນ ຫິ ເອເຕສໍ ຘຎ຺ຎໍ ອຕ຺ຖິ. ນ ກຸມ຺ຠີຕິ ນ ກຸມ຺ຠິຍໍ. ນ ກໂຬປິຍນ຺ຕິ ນ ປຈ຺ຉິຍໍ. ປຣນິຏ຺ຐິຕເມສານາຕິ ປເຣສໍ ນິຏ຺ຐິຕໍ ປຣຆເຣ ປກ຺ກໍ ຠິກ຺ຂາຈາຣວຕ຺ເຕນ ເອສມານາ ຄເວສມານາ. ເຕນາຕິ ເອວໍ ປຣິຍິຏ຺ເຐນ. ສຸພ຺ພຕາຕິ ທສປິ…ເປ… ສຏ຺ຐິປິ ວສ຺ສານິ ສຸສມາທິນ຺ນສຸນ຺ທຣວຕາ.

ສຸມນ຺ຕມນ຺ຕິໂນຕິ ຘມ຺ມໍ ສຊ຺ຌາຍິສ຺ສາມ, ຘຸຕງ຺ຄໍ ສມາທິຍິສ຺ສາມ, ອມຕໍ ປຣິຠຸຎ຺ຊິສ຺ສາມ, ສມຓຘມ຺ມໍ ກຣິສ຺ສາມາຕິ ເອວໍ ສຸຠາສິຕຠາສິໂນ. ຕຸຓ຺ຫີຠູຕາ ສມຎ຺ຈຣາຕິ ຕິຍາມຣຕ຺ຕິໍ ອສນິໂຆເສນ ໂຆສິຕາ ວິຍ ຘມ຺ມໍ ກເຖນ຺ຕາປິ ຕຸຓ຺ຫີຠູຕາ ສມໍ ຈຣນ຺ຕິເຍວ ນາມ. ກສ຺ມາ? ນິຣຕ຺ຖກວຈນສ຺ສາຠາວາ. ປຸຖຸມຈ຺ຈາ ຈາຕິ ພຫຸສຕ຺ຕາ ຈ ອຎ຺ຎມຎ຺ຎໍ ວິຣຸທ຺ຘາ. ອຕ຺ຕທຓ຺ເຑສຸ ນິພ຺ພຸຕາຕິ ປຣວິເຫຐນຕ຺ຖໍ ຄຫິຕທຓ຺ເຑສຸ ສຕ຺ເຕສຸ ນິພ຺ພຸຕາ ວິສ຺ສຏ຺ຐທຓ຺ຑາ. ສາທາເນສຸ ອນາທານາຕິ ສຄຫເຓສຸ ສຕ຺ເຕສຸ ຈ ຠວໂຍນິອາທີນໍ ເອກໂກຏ຺ຐາສສ຺ສາປິ ອຄຫິຕຕ຺ຕາ ອຄຫຓາ. ທສມໍ.

ທຸຕິໂຍ ວຄ຺ໂຄ.