໓. ຕຕິຍວຄ຺ໂຄ

໑. ເຉຕ຺ວາສຸຕ຺ຕວຓ຺ຓນາ

໒໖໗. ຕຕິຍວຄ຺ຄສ຺ສ ປຐມໍ ວຸຕ຺ຕຕ຺ຖເມວ. ປຐມໍ.

໒. ທຸພ຺ພຓ຺ຓິຍສຸຕ຺ຕວຓ຺ຓນາ

໒໖໘. ທຸຕິເຍ ທຸພ຺ພຓ຺ໂຓຕິ ຌາມຂາຓຸວຓ຺ໂຓ. ໂອໂກຏິມໂກຕິ ລກຸຓ຺ຑໂກ ມໂຫທໂຣ. ອາສເນຕິ ປຓ຺ຑຸກມ຺ພລສິລາຍໍ. ໂກຘຠກ຺ໂຂຕິ ສກ຺ເກນ ຄຫິຕນາມເມເວຕໍ. ໂສ ປນ ເອໂກ ຣູປາວຈຣພ຺ຣຫ຺ມາ, ‘‘ສກ຺ໂກ ກິຣ ຂນ຺ຕິພເລນ ສມນ຺ນາຄໂຕ’’ຕິ ສຸຕ຺ວາ ວີມໍສນຕ຺ຖໍ ອາຄໂຕ. ອວຣຸທ຺ຘກຍກ຺ຂາ ປນ ເອວຣູປໍ ສໍວິຫິຕາຣກ຺ຂໍ ຐານໍ ປວິສິຕຸໍ ນ ສກ຺ໂກນ຺ຕິ. ອຸປສງ຺ກມີຕິ ເທວານໍ ສຸຕ຺ວາ ‘‘ນ ສກ຺ກາ ເອສ ຜຣຸເສນ ຈາເລຕຸໍ, ນີຈວຸຕ຺ຕິນາ ປນ ຂນ຺ຕິຍໍ ຐິເຕນ ສກ຺ກາ ປລາເປຕຸ’’ນ຺ຕິ ຕຖາ ປລາເປຕຸກາໂມ ອຸປສງ຺ກມິ. ອນ຺ຕຣຘາຍີຕິ ຂນ຺ຕິຍໍ ຐຕ຺ວາ ພລວຈິຕ຺ຕີກາຣໍ ປຈ຺ຈຸປຏ຺ຐເປຕ຺ວາ ນີຈວຸຕ຺ຕິຍາ ທສ຺ສິຍມານາຍ ສກ຺ກາສເນ ຐາຕຸໍ ອສກ຺ໂກນ຺ໂຕ ອນ຺ຕຣຘາຍິ. ນ ສູປຫຕຈິຕ຺ໂຕມ຺ຫີຕິ ເອຕ຺ຖ ສູຕິ ນິປາຕມຕ຺ຕໍ, ອຸປຫຕຈິຕ຺ໂຕມ຺ຫີຕິ ອາຫ. ນາວຕ຺ເຕນ ສຸວານໂຍຕິ ນ ໂກຘາວຕ຺ເຕນ ສຸອານໂຍ, ໂກຘວເສ ວຕ຺ເຕຕຸໍ ນ ສຸກໂຣມ຺ຫີຕິ ວທຕິ. ນ ໂວ ຈິຣາຫນ຺ຕິ ໂວຕິ ນິປາຕມຕ຺ຕໍ, ອຫໍ ຈິຣໍ ນ ກຸຊ຺ຌາມີຕິ ວທຕິ. ທຸຕິຍໍ.

໓. ສມ຺ພຣິມາຍາສຸຕ຺ຕວຓ຺ຓນາ

໒໖໙. ຕຕິເຍ ອາພາຘິໂກຕິ ອິສິຄເຓນ ອຠິສປກາເລ ອຸປ຺ປນ຺ນາພາເຘນ ອາພາຘິໂກ. ວາເຈຫິ ມນ຺ຕິ ສເຈ ມໍ ສມ຺ພຣິມາຍໍ ວາເຈສິ, ເອວມຫໍ ຕມ຺ປິ ຕິກິຈ຺ຉິສ຺ສາມີຕິ ວທຕິ. ມາ ໂຂ ຕ຺ວໍ, ມາຣິສ, ວາເຈສີຕິ ວິນາປິ ຕາວ ສມ຺ພຣິມາຍໍ ສກ຺ໂກ ອມ຺ເຫ ພາຘຕິ, ຍທິ ປນ ຕໍ ຊານິສ຺ສຕິ, ນຏ຺ຐາ ມຍໍ, ມາ ອຕ຺ຕໂນ ເອກສ຺ສ ອຕ຺ຖາຍ ອມ຺ເຫ ນາເສຫີຕິ ວຕ຺ວາ ນິວາຣຍິໍສຸ. ສມ຺ພໂຣວ ສຕໍ ສມນ຺ຕິ ຍຖາ ສມ຺ພໂຣ ອສຸຣິນ຺ໂທ ມາຍາວີ ມາຍໍ ປໂຍເຊຕ຺ວາ ວສ຺ສສຕໍ ນິຣເຍ ປກ຺ໂກ, ເອວໍ ປຈ຺ຈຕິ. ຕຸມ຺ເຫ ຘມ຺ມິກາວ, ອລໍ ໂວ ມາຍາຍາຕິ ວທຕິ. ກິໍ ປນ ສກ຺ໂກ ຕສ຺ສ ໂກຘໍ ຕິກິຈ຺ຉິຕຸໍ ສກ຺ກຸເຓຍ຺ຍາຕິ? ອາມ ສກ຺ກຸເຓຍ຺ຍ. ກຖໍ? ຕທາ ກິຣ ໂສ ອິສິຄໂຓ ຘຣຕິເຍວ, ຕສ຺ມາ ນໍ ອິສີນໍ ສນ຺ຕິກໍ ເນຕ຺ວາ ຂມາເປຍ຺ຍ, ເອວມສ຺ສ ຜາສຸ ຠເວຍ຺ຍ. ເຕນ ປນ ວຎ຺ຈິຕຕ຺ຕາ ຕຖາ ອກຕ຺ວາ ປກ຺ກນ຺ໂຕວ. ຕຕິຍໍ.

໔. ອຈ຺ຈຍສຸຕ຺ຕວຓ຺ຓນາ

໒໗໐. ຈຕຸຕ຺ເຖ ສມ຺ປໂຍເຊສຸນ຺ຕິ ກລຫໍ ອກໍສຸ. ອຈ຺ຈສຣາຕິ ອຕິກ຺ກມິ, ເອໂກ ຠິກ຺ຂຸ ເອກໍ ຠິກ຺ຂຸໍ ອຕິກ຺ກມ຺ມ ວຈນໍ ອໂວຈາຕິ ອຕ຺ໂຖ. ຍຖາຘມ຺ມໍ ນປ຺ປຏິຄ຺ຄຓ຺ຫາຕີຕິ ນ ຂມຕິ. ໂກໂຘ ໂວ ວສມາຍາຕູຕິ ໂກໂຘ ຕຸມ຺ຫາກໍ ວສໍ ອາຄຈ຺ຉຕຸ, ມາ ຕຸມ຺ເຫ ໂກຘວສໍ ຄມິຕ຺ຖາຕິ ທີເປຕິ. ມາ ຈ ມິຕ຺ເຕ ຫິ ໂວ ຊຣາຕິ ເອຕ຺ຖ ຫີຕິ ນິປາຕມຕ຺ຕໍ, ຕຸມ຺ຫາກໍ ມິຕ຺ຕຘມ຺ເມ ຊຣາ ນາມ ມາ ນິພ຺ພຕ຺ຕິ. ຠຸມ຺ມຕ຺ເຖ ວາ ກຣຓວຈນໍ, ມິຕ຺ເຕສຸ ໂວ ຊຣາ ມາ ນິພ຺ພຕ຺ຕິ, ມິຕ຺ຕຠາວໂຕ ອຎ຺ຎຖາຠາໂວ ມາ ໂຫຕູຕິ ອຕ຺ໂຖ. ອຄຣຫິຍໍ ມາ ຄຣຫິຕ຺ຖາຕິ ອຄາຣຍ຺ຫໍ ຂີຓາສວປຸຄ຺ຄລໍ ມາ ຄຣຫິຕ຺ຖ. ຈຕຸຕ຺ຖໍ.

໕. ອກ຺ໂກຘສຸຕ຺ຕວຓ຺ຓນາ

໒໗໑. ປຎ຺ຈເມ ມາ ໂວ ໂກໂຘ ອຊ຺ຌຠວີຕິ ໂກໂຘ ຕຸມ຺ເຫ ມາ ອຠິຠວິ, ຕຸມ຺ເຫວ ໂກຘໍ ອຠິຠວຖ. ມາ ຈ ກຸຊ຺ຌິຕ຺ຖ ກຸຊ຺ຌິຕນ຺ຕິ ກຸຊ຺ຌນ຺ຕານໍ ມາ ປຏິກຸຊ຺ຌິຕ຺ຖ. ອກ຺ໂກໂຘຕິ ເມຕ຺ຕາ ຈ ເມຕ຺ຕາປຸພ຺ພຠາໂຄ ຈ. ອວິຫິໍສາຕິ ກຣຸຓາ ຈ ກຣຸຓາປຸພ຺ພຠາໂຄ ຈ. ອຖ ປາປຊນໍ ໂກໂຘ, ປພ຺ພໂຕວາຠິມທ຺ທຕີຕິ ລາມກຊນໍ ປພ຺ພໂຕ ວິຍ ໂກໂຘ ອຠິມທ຺ທຕີຕິ. ປຎ຺ຈມໍ.

ຕຕິໂຍ ວຄ຺ໂຄ.

ສກ຺ກສໍຍຸຕ຺ຕວຓ຺ຓນາ ນິຏ຺ຐິຕາ.

ອິຕິ ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ສຄາຖາວຄ຺ຄວຓ຺ຓນາ ນິຏ຺ຐິຕາ.

ສໍຍຸຕ຺ຕນິກາຍ-ອຏ຺ຐກຖາຍ ປຐໂມ ຠາໂຄ.