໒. ມຈ຺ຉຣິສຸຕ຺ຕວຓ຺ຓນາ

໓໒. ທຸຕິເຍ ມຈ຺ເຉຣາ ຈ ປມາທາ ຈາຕິ ອຕ຺ຕສມ຺ປຕ຺ຕິນິຄູຫນລກ຺ຂເຓນ ມຈ຺ເຉເຣນ ເຈວ ສຕິວິປ຺ປວາສລກ຺ຂເຓນ ປມາເທນ ຈ. ເອກຈ຺ໂຈ ຫິ ‘ອິທໍ ເມ ເທນ຺ຕສ຺ສ ປຣິກ຺ຂຍໍ ຄມິສ຺ສຕິ, ມຍ຺ຫໍ ວາ ຆຣມານຸສການໍ ວາ ນ ຠວິສ຺ສຕີ’’ຕິ ມຈ຺ຉຣິເຍນ ທານໍ ນ ເທຕິ. ເອກຈ຺ໂຈ ຂິຑ຺ຑາທິປສຸຕຕ຺ຕາ ‘ທານໍ ທາຕພ຺ພ’’ນ຺ຕິ ຈິຕ຺ຕມ຺ປິ ນ ອຸປ຺ປາເທຕິ. ເອວໍ ທານໍ ນ ທີຍຕີຕິ ເອວເມຕໍ ຍສທາຍກໍ ສິຣີທາຍກໍ ສມ຺ປຕ຺ຕິທາຍກໍ ສຸຂທາຍກໍ ທານໍ ນາມ ນ ທີຍຕີຕິອາທິນາ ກາຣຓໍ ກເຖສິ. ປຸຎ຺ຎໍ ອາກງ຺ຂມາເນນາຕິ ປຸພ຺ພເຈຕນາທິເຠທໍ ປຸຎ຺ຎໍ ອິຈ຺ຉມາເນນ. ເທຍ຺ຍໍ ໂຫຕິ ວິຊານຕາຕິ ອຕ຺ຖິ ທານສ຺ສ ຜລນ຺ຕິ ຊານນ຺ເຕນ ທາຕພ຺ພເມວາຕິ ວທຕິ.

ຕເມວ ພາລໍ ຜຸສຕີຕິ ຕໍເຍວ ພາລໍ ອິຘໂລກປຣໂລເກສຸ ຊິຆຈ຺ຉາ ຈ ປິປາສາ ຈ ຜຸສຕິ ອນຸພນ຺ຘຕິ ນ ວິຊຫຕິ. ຕສ຺ມາຕິ ຍສ຺ມາ ຕເມວ ຜຸສຕິ, ຕສ຺ມາ. ວິເນຍ຺ຍ ມຈ຺ເຉຣນ຺ຕິ ມຈ຺ເຉຣມລໍ ວິເນຕ຺ວາ. ທຊ຺ຊາ ທານໍ ມລາຠິຠູຕິ ມລາຠິຠູ ຫຸຕ຺ວາ ຕໍ ມຈ຺ເຉຣມລໍ ອຠິຠວິຕ຺ວາ ທານໍ ທເທຍ຺ຍ.

ເຕ ມເຕສຸ ນ ມີຍນ຺ຕີຕິ ອທານສີລຕາຍ ມຣເຓນ ມເຕສຸ ນ ມີຍນ຺ຕິ. ຍຖາ ຫິ ມໂຕ ສມ຺ປຣິວາເຣຕ຺ວາ ຐປິເຕ ພຫຸມ຺ຫິປິ ອນ຺ນປານາທິມ຺ຫິ ‘‘ອິທໍ ອິມສ຺ສ ໂຫຕຸ, ອິທໍ ອິມສ຺ສາ’’ຕິ ອຸຏ຺ຐຫິຕ຺ວາ ສໍວິຠາຄໍ ນ ກໂຣຕິ, ເອວໍ ອທານສີໂລປີຕິ ມຕກສ຺ສ ຈ ອທານສີລສ຺ສ ຈ ໂຠຄາ ສມສມາ ນາມ ໂຫນ຺ຕິ. ເຕນ ທານສີລາ ເອວຣູເປສຸ ມເຕສຸ ນ ມີຍນ຺ຕີຕິ ອຕ຺ໂຖ. ປນ຺ຖານໍວ ສຫ ວຊໍ, ອປ຺ປສ຺ມິໍ ເຍ ປເວຈ຺ຉນ຺ຕີຕິ ຍຖາ ອທ຺ຘານໍ ກນ຺ຕາຣມຄ຺ຄໍ ສຫ ວຊນ຺ຕາ ປຖິກາ ສຫ ວຊນ຺ຕານໍ ປຖິການໍ ອປ຺ປສ຺ມິໍ ປາເຖຍ຺ເຍ ສໍວິຠາຄໍ ກຕ຺ວາ ປເວຈ຺ຉນ຺ຕິ ທທນ຺ຕິເຍວ, ເອວເມວໍ ເຍ ປນ ອນມຕຄ຺ຄໍ ສໍສາຣກນ຺ຕາຣໍ ສຫ ວຊນ຺ຕາ ສຫ ວຊນ຺ຕານໍ ອປ຺ປສ຺ມິມ຺ປິ ເທຍ຺ຍຘມ຺ເມ ສໍວິຠາຄໍ ກຕ຺ວາ ທທນ຺ຕິເຍວ, ເຕ ມເຕສຸ ນ ມີຍນ຺ຕິ.

ເອສ ຘມ຺ໂມ ສນນ຺ຕໂນຕິ ເອສ ໂປຣາຓໂກ ຘມ຺ໂມ, ສນນ຺ຕນານໍ ວາ ປຓ຺ຑິຕານໍ ເອສ ຘມ຺ໂມຕິ. ອປ຺ປສ຺ເມເກຕິ ອປ຺ປສ຺ມິໍ ເທຍ຺ຍຘມ຺ເມ ເອເກ. ປເວຈ຺ຉນ຺ຕີຕິ ທທນ຺ຕິ. ພຫຸເນເກ ນ ທິຈ຺ຉເຣຕິ ພຫຸນາປິ ໂຠເຄນ ສມນ຺ນາຄຕາ ເອກຈ຺ເຈ ນ ທທນ຺ຕິ. ສຫສ຺ເສນ ສມໍ ມິຕາຕິ ສຫສ຺ເສນ ສທ຺ຘິໍ ມິຕາ, ສຫສ຺ສ ທານສທິສາ ໂຫຕິ.

ທຸຣນ຺ວໂຍຕິ ທຸຣນຸຄມໂນ, ທຸປ຺ປູໂຣຕິ ອຕ຺ໂຖ. ຘມ຺ມໍ ຈເຣຕິ ທສກຸສລກມ຺ມປຖຘມ຺ມໍ ຈຣຕິ. ໂຍປິ ສມຸຎ຺ຊກຎ຺ຈເຣຕິ ໂຍ ອປິ ຂລມຓ຺ຑລາທິໂສຘນປລາລໂປຐນາທິວເສນ ສມຸຎ຺ຊກຎ຺ຈຣຕິ. ທາຣຎ຺ຈ ໂປສນ຺ຕິ ທາຣຎ຺ຈ ໂປສນ຺ໂຕ. ທທໍ ອປ຺ປກສ຺ມິນ຺ຕິ ອປ຺ປກສ຺ມິໍ ປຓ຺ຓສາກມຕ຺ຕສ຺ມິມ຺ປິ ສໍວິຠາຄໍ ກຕ຺ວາ ທທນ຺ໂຕວ ໂສ ຘມ຺ມໍ ຈຣຕິ. ສຕໍ ສຫສ຺ສານນ຺ຕິ ສຫສ຺ສໍ ສຫສ຺ສໍ ກຕ຺ວາ ຄຓິຕານໍ ປຸຣິສານໍ ສຕໍ, ສຕສຫສ຺ສນ຺ຕິ ອຕ຺ໂຖ. ສຫສ຺ສຍາຄິນນ຺ຕິ ຠິກ຺ຂຸສຫສ຺ສສ຺ສ ວາ ຍາໂຄ ກຫາປຓສຫສ຺ເສນ ວາ ນິພ຺ພຕ຺ຕິໂຕ ຍາໂຄປິ ສຫສ຺ສຍາໂຄ. ໂສ ເອເຕສໍ ອຕ຺ຖີຕິ ສຫສ຺ສຍາຄິໂນ, ເຕສໍ ສຫສ຺ສຍາຄິນໍ. ເອເຕນ ທສນ຺ນໍ ວາ ຠິກ຺ຂຸໂກຏີນໍ ທສນ຺ນໍ ວາ ກຫາປຓໂກຏີນໍ ປິຓ຺ຑປາໂຕ ທສ຺ສິໂຕ ໂຫຕິ. ເຍ ເອຕ຺ຕກໍ ທທນ຺ຕິ, ເຕ ກລມ຺ປິ ນຄ຺ຆນ຺ຕິ ຕຖາວິຘສ຺ສາຕິ ອາຫ. ຍ຺ວາຍໍ ສມຸຎ຺ຊກໍ ຈຣນ຺ໂຕປິ ຘມ຺ມໍ ຈຣຕິ, ທາຣໍ ໂປເສນ຺ໂຕປິ, ອປ຺ປກສ຺ມິໍ ທທນ຺ໂຕປິ, ຕຖາວິຘສ຺ສ ເອເຕ ສຫສ຺ສຍາຄິໂນ ກລມ຺ປິ ນຄ຺ຆນ຺ຕິ. ຍໍ ເຕນ ທລິທ຺ເທນ ເອກປຏິວີສກມຕ຺ຕມ຺ປິ ສລາກຠຕ຺ຕມຕ຺ຕມ຺ປິ ວາ ທິນ຺ນໍ, ຕສ຺ສ ທານສ຺ສ ສພ຺ເພສມ຺ປິ ເຕສໍ ທານໍ ກລໍ ນຄ຺ຆຕີຕິ. ກລໍ ນາມ ໂສຬສຠາໂຄປິ ສຕຠາໂຄປິ ສຫສ຺ສຠາໂຄປິ. ອິຘ ສຕຠາໂຄ ຄຫິໂຕ. ຍໍ ເຕນ ທານໍ ທິນ຺ນໍ, ຕສ຺ມິໍ ສຕຘາ ວິຠຕ຺ເຕ ອິຕເຣສໍ ທສໂກຏິສຫສ຺ສທານໍ ຕໂຕ ເອກໂກຏ຺ຐາສມ຺ປິ ນຄ຺ຆຕີຕິ ອາຫ.

ເອວໍ ຕຖາຄເຕ ທານສ຺ສ ອຄ຺ຆໍ ກໂຣນ຺ເຕ ສມີເປ ຐິຕາ ເທວຕາ ຈິນ຺ເຕສິ – ‘‘ເອວໍ ຠຄວາ ມຫນ຺ຕໍ ທານໍ ປາເທນ ປວຏ຺ເຏຕ຺ວາ ຣຕນສຕິເກ ວິຍ ນຣເກ ປກ຺ຂິປນ຺ໂຕ ອິທໍ ເອວໍ ປຣິຕ຺ຕກໍ ທານໍ ຈນ຺ທມຓ຺ຑເລ ປຫຣນ຺ໂຕ ວິຍ ອຸກ຺ຂິປຕິ, ກຖໍ ນຸ ໂຂ ເອຕໍ ມຫປ຺ຜລຕຣ’’ນ຺ຕິ ຊານນຕ຺ຖໍ ຄາຖາຍ ອຊ຺ຌຠາສິ. ຕຕ຺ຖ ເກນາຕິ ເກນ ກາຣເຓນ. ມຫຄ຺ຄໂຕຕິ ມຫຕ຺ຕໍ ຄໂຕ, ວິປຸລສ຺ເສຕໍ ເວວຈນໍ. ສເມນ ທິນ຺ນສ຺ສາຕິ ສເມນ ທິນ຺ນສ຺ສ ທານສ຺ສ. ອຖສ຺ສາ ຠຄວາ ທານໍ ວິຠຊິຕ຺ວາ ທສ຺ເສນ຺ໂຕ ທທນ຺ຕິ ເຫເກຕິອາທິມາຫ. ຕຕ຺ຖ ວິສເມ ນິວິຏ຺ຐາຕິ ວິສເມ ກາຍວຈີມໂນກມ຺ເມ ປຕິຏ຺ຐິຕາ ຫຸຕ຺ວາ. ເຉຕ຺ວາຕິ ໂປເຖຕ຺ວາ. ວຘິຕ຺ວາຕິ ມາເຣຕ຺ວາ. ໂສຈຍິຕ຺ວາຕິ ປຣໍ ໂສກສມປ຺ປິຕໍ ກຕ຺ວາ. ອສ຺ສຸມຸຂາຕິ ອສ຺ສຸມຸຂສມ຺ມິສ຺ສາ. ປຣໍ ໂຣທາເປຕ຺ວາ ທິນ຺ນທານຎ຺ຫິ ອສ຺ສຸມຸຂທານນ຺ຕິ ວຸຈ຺ຈຕິ. ສທຓ຺ຑາຕິ ທຓ຺ເຑນ ຕຊ຺ເຊຕ຺ວາ ປຫຣິຕ຺ວາ ທິນ຺ນທກ຺ຂິຓາ ສທຓ຺ຑາຕິ ວຸຈ຺ຈຕິ. ເອວນ຺ຕິ ນາຫໍ ສມ຺ມາສມ຺ພຸທ຺ຘຕາຍ ມຫາທານໍ ຄເຫຕ຺ວາ ອປ຺ປຜລໍ ນາມ ກາຕຸໍ ສກ຺ໂກມິ ປຣິຕ຺ຕກທານໍ ວາ ມຫປ຺ຜລໍ ນາມ. ອິທໍ ປນ ມຫາທານໍ ອຕ຺ຕໂນ ອຸປ຺ປຕ຺ຕິຍາ ອປຣິສຸທ຺ຘຕາຍ ເອວໍ ອປ຺ປຜລໍ ນາມ ໂຫຕິ, ອິຕຣໍ ປຣິຕ຺ຕທານໍ ອຕ຺ຕໂນ ອຸປ຺ປຕ຺ຕິຍາ ປຣິສຸທ຺ຘຕາຍ ເອວໍ ມຫປ຺ຜລໍ ນາມາຕິ ອິມມຕ຺ຖໍ ທສ຺ເສນ຺ໂຕ ເອວນ຺ຕິອາທິມາຫາຕິ. ທຸຕິຍໍ.