໓. ສາຘຸສຸຕ຺ຕວຓ຺ຓນາ

໓໓. ຕຕິເຍ ອຸທານໍ ອຸທາເນສີຕິ ອຸທາຫາຣໍ ອຸທາຫຣິ. ຍຖາ ຫິ ຍໍ ເຕລໍ ມານໍ ຄເຫຕຸໍ ນ ສກ຺ໂກຕິ ວິສ຺ສນ຺ທິຕ຺ວາ ຄຈ຺ຉຕິ, ຕໍ ອວເສສໂກຕິ ວຸຈ຺ຈຕິ. ຍຎ຺ຈ ຊລໍ ຕຬາກໍ ຄເຫຕຸໍ ນ ສກ຺ໂກຕິ, ອຊ຺ໂຌຕ຺ຖຣິຕ຺ວາ ຄຈ຺ຉຕິ, ຕໍ ໂອໂຆຕິ ວຸຈ຺ຈຕິ, ເອວເມວໍ ຍໍ ປີຕິວຈນໍ ຫທຍໍ ຄເຫຕຸໍ ນ ສກ຺ໂກຕິ, ອຘິກໍ ຫຸຕ຺ວາ ອນ຺ໂຕ ອສຓ຺ຐຫິຕ຺ວາ ພຫິ ນິກ຺ຂມຕິ, ຕໍ ອຸທານນ຺ຕິ ວຸຈ຺ຈຕິ. ເອວຣູປໍ ປີຕິມຍໍ ວຈນໍ ນິຈ຺ຉາເຣສີຕິ ອຕ຺ໂຖ. ສທ຺ຘາຍປິ ສາຫຸ ທານນ຺ຕິ ກມ຺ມຎ຺ຈ ກມ຺ມຜລຎ຺ຈ ສທ຺ທຫິຕ຺ວາປິ ທິນ຺ນທານໍ ສາຫຸ ລທ຺ຘກໍ ຠທ຺ທກເມວ. ອາຫູຕິ ກເຖນ຺ຕິ. ກຖໍ ປເນຕໍ ອຸຠຍໍ ສມໍ ນາມ ໂຫຕີຕິ? ຊີວິຕຠີຣຸໂກ ຫິ ຍຸຊ຺ຌິຕຸໍ ນ ສກ຺ໂກຕິ, ຂຍຠີຣຸໂກ ທາຕຸໍ ນ ສກ຺ໂກຕິ. ‘‘ຊີວິຕຎ຺ຈ ຣກ຺ຂິສ຺ສາມິ ຍຸຊ຺ຌິສ຺ສາມິ ຈາ’’ຕິ ຫິ ວທນ຺ໂຕ ນ ຍຸຊ຺ຌຕິ. ຊີວິເຕ ປນ ອາລຍໍ ວິສ຺ສຊ຺ເຊຕ຺ວາ, ‘‘ເຉຊ຺ຊໍ ວາ ໂຫຕຸ ມຣຓໍ ວາ, ຄຓ຺ຫິສ຺ສາເມຕໍ ອິສ຺ສຣິຍ’’ນ຺ຕິ ອຸສ຺ສຫນ຺ໂຕວ ຍຸຊ຺ຌຕິ. ‘‘ໂຠເຄ ຈ ຣກ຺ຂິສ຺ສາມິ, ທານຎ຺ຈ ທສ຺ສາມີ’’ຕິ ວທນ຺ໂຕ ນ ທທາຕິ. ໂຠເຄສຸ ປນ ອາລຍໍ ວິສ຺ສຊ຺ເຊຕ຺ວາ ມຫາທານໍ ທສ຺ສາມີຕິ ອຸສ຺ສຫນ຺ໂຕວ ເທຕິ. ເອວໍ ທານຎ຺ຈ ຍຸທ຺ຘຎ຺ຈ ສມໍ ໂຫຕິ. ກິຎ຺ຈ ຠິຍ຺ໂຍ? ອປ຺ປາປິ ສນ຺ຕາ ພຫຸເກ ຊິນນ຺ຕີຕິ ຍຖາ ຈ ຍຸທ຺ເຘ ອປ຺ປກາປິ ວີຣປຸຣິສາ ພຫຸເກ ຠີຣຸປຸຣິເສ ຊິນນ຺ຕິ, ເອວໍ ສທ຺ຘາທິສມ຺ປນ຺ໂນ ອປ຺ປກມ຺ປິ ທານໍ ທທນ຺ໂຕ ພຫຸມຈ຺ເຉຣໍ ມທ຺ທຕິ, ພຫຸຎ຺ຈ ທານວິປາກໍ ອຘິຄຈ຺ຉຕິ. ເອວມ຺ປິ ທານຎ຺ຈ ຍຸທ຺ຘຎ຺ຈ ສມານໍ. ເຕເນວາຫ –

‘‘ອປ຺ປມ຺ປິ ເຈ ສທ຺ທຫາໂນ ທທາຕິ,

ເຕເນວ ໂສ ໂຫຕິ ສຸຂີ ປຣຕ຺ຖາ’’ຕິ.

ອິມສ຺ສ ຈ ປນຕ຺ຖສ຺ສ ປກາສນຕ຺ຖໍ ເອກສາຏກພ຺ຣາຫ຺ມຓວຕ຺ຖຸ ຈ ອງ຺ກຸຣວຕ຺ຖຸ ຈ ວິຕ຺ຖາເຣຕພ຺ພໍ.

ຘມ຺ມລທ຺ຘສ຺ສາຕິ ຘມ຺ເມນ ສເມນ ລທ຺ຘສ຺ສ ໂຠຄສ຺ສ ຘມ຺ມລທ຺ຘສ຺ສ ຈ ປຸຄ຺ຄລສ຺ສ. ເອຕ຺ຖ ປຸຄ຺ຄໂລ ລທ຺ຘຘມ຺ໂມ ນາມ ອຘິຄຕຘມ຺ໂມ ອຣິຍປຸຄ຺ຄໂລ. ອິຕິ ຍໍ ຘມ຺ມລທ຺ຘສ຺ສ ໂຠຄສ຺ສ ທານໍ ຘມ຺ມລທ຺ຘສ຺ສ ອຣິຍປຸຄ຺ຄລສ຺ສ ທີຍຕິ, ຕມ຺ປິ ສາຘູຕິ ອຕ຺ໂຖ. ໂຍ ຘມ຺ມລທ຺ຘສ຺ສາຕິ ອິມສ຺ມິມ຺ປິ ຄາຖາປເທ ອຍເມວ ອຕ຺ໂຖ. ອຸຏ຺ຐານວີຣິຍາຘິຄຕສ຺ສາຕິ ອຸຏ຺ຐາເນນ ຈ ວີຣິເຍນ ຈ ອຘິຄຕສ຺ສ ໂຠຄສ຺ສ. ເວຕຣຓິນ຺ຕິ ເທສນາສີສມຕ຺ຕເມຕໍ. ຍມສ຺ສ ປນ ເວຕຣຓິມ຺ປິ ສຎ຺ຊີວກາຬສຸຕ຺ຕາທໂຍປິ ເອກຕິໍສມຫານິຣເຍປິ ສພ຺ພໂສວ ອຕິກ຺ກມິຕ຺ວາຕິ ອຕ຺ໂຖ.

ວິເຈຍ຺ຍ ທານນ຺ຕິ ວິຈິນິຕ຺ວາ ທິນ຺ນທານໍ. ຕຕ຺ຖ ທ຺ເວ ວິຈິນນາ ທກ຺ຂິຓາວິຈິນນໍ ທກ຺ຂິເຓຍ຺ຍວິຈິນນຎ຺ຈ. ເຕສຸ ລາມກລາມເກ ປຈ຺ຈເຍ ອປເນຕ຺ວາ ປຓີຕປຓີເຕ ວິຈິນິຕ຺ວາ ເຕສໍ ທານໍ ທກ຺ຂິຓາວິຈິນນໍ ນາມ. ວິປນ຺ນສີເລ ອິໂຕ ພຫິທ຺ຘາ ປຎ຺ຈນວຸຕິປາສຓ຺ຑເຠເທ ວາ ທກ຺ຂິເຓຍ຺ເຍ ປຫາຍ ສີລາທິຄຸຓສມ຺ປນ຺ນານໍ ສາສເນ ປພ຺ພຊິຕານໍ ທານໍ ທກ຺ຂິເຓຍ຺ຍວິຈິນນໍ ນາມ. ເອວໍ ທ຺ວີຫາກາເຣຫິ ວິເຈຍ຺ຍ ທານໍ. ສຸຄຕປ຺ປສຕ຺ຖນ຺ຕິ ສຸຄເຕນ ວຓ຺ຓິຕໍ. ຕຕ຺ຖ ທກ຺ຂິເຓຍ຺ຍວິຈິນນໍ ທສ຺ເສນ຺ໂຕ ເຍ ທກ຺ຂິເຓຍ຺ຍາຕິອາທິມາຫ. ພີຊານິ ວຸຕ຺ຕານິ ຍຖາຕິ ອິມິນາ ປນ ທກ຺ຂິຓາວິຈິນນໍ ອາຫ. ອວິປນ຺ນພີຊສທິສາ ຫິ ວິຈິນິຕ຺ວາ ຄຫິຕາ ປຓີຕປຓີຕາ ເທຍ຺ຍຘມ຺ມາຕິ.

ປາເຓສຸປິ ສາຘຸ ສໍຍໂມຕິ ປາເຓສຸ ສໍຍຕຠາໂວປິ ຠທ຺ທໂກ. ອຍໍ ເທວຕາ ອິຕຣາຫິ ກຖິຕໍ ທານານິສໍສໍ ອຕິກ຺ກມິຕ຺ວາ ສີລານິສໍສໍ ກເຖຕຸມາຣທ຺ຘາ. ອເຫຐຍໍ ຈຣນ຺ຕິ ອວິຫິໍສນ຺ໂຕ ຈຣມາໂນ. ປຣູປວາທາຕິ ປຣສ຺ສ ອຸປວາທຠເຍນ. ຠຍາຕິ ອຸປວາທຠຍາ. ທານາ ຈ ໂຂ ຘມ຺ມປທໍວ ເສຍ຺ໂຍຕິ ທານໂຕ ນິພ຺ພານສງ຺ຂາຕໍ ຘມ຺ມປທເມວ ເສຍ຺ໂຍ. ປຸພ຺ເພ ຈ ຫິ ປຸພ຺ພຕເຣ ຈ ສນ຺ໂຕຕິ ປຸພ຺ເພ ຈ ກສ຺ສປພຸທ຺ຘາທິກາເລ ປຸພ຺ພຕເຣ ຈ ໂກຓາຄມນພຸທ຺ຘາທິກາເລ, ສພ຺ເພປິ ວາ ເອເຕ ປຸພ຺ເພ ຈ ປຸພ຺ພຕເຣ ຈ ສນ຺ໂຕ ນາມາຕິ. ຕຕິຍໍ.