໘. ຫິຣີສຸຕ຺ຕວຓ຺ຓນາ

໑໘. ອຏ຺ຐເມ ຫິຣີນິເສໂຘຕິ ຫິຣິຍາ ອກຸສເລ ຘມ຺ເມ ນິເສເຘຕີຕິ ຫິຣີນິເສໂຘ. ໂກຈິ ໂລກສ຺ມິໍ ວິຊ຺ຊຕີຕິ ໂກຈິ ເອວຣູໂປ ວິຊ຺ຊຕີຕິ ປຸຈ຺ຉຕິ. ໂຍ ນິນ຺ທໍ ອປໂພຘຕີຕິ ໂຍ ຄຣຫໍ ອປຫຣນ຺ໂຕ ພຸຊ຺ຌຕິ. ອສ຺ໂສ ຠທ຺ໂຣ ກສາມິວາຕິ ຍຖາ ຠທ຺ໂຣ ອສ຺ສາຊານີໂຍ ກສໍ ອປຫຣນ຺ໂຕ ພຸຊ຺ຌຕິ, ປໂຕທຈ຺ຉາຍໍ ທິສ຺ວາ ສໍວິຊ຺ຌນ຺ໂຕ ວິຍ ກສາຍ ອຕ຺ຕນິ ນິປາຕໍ ນ ເທຕິ, ເອວເມວ ໂຍ ຠິກ຺ຂຸ ຠູຕສ຺ສ ທສອກ຺ໂກສວຕ຺ຖຸໂນ ອຕ຺ຕນິ ນິປາຕໍ ອທທນ຺ໂຕ ນິນ຺ທໍ ອປໂພຘຕິ ອປຫຣນ຺ໂຕ ພຸຊ຺ຌຕິ, ເອວຣູໂປ ໂກຈິ ຂີຓາສໂວ ວິຊ຺ຊຕີຕິ ປຸຈ຺ຉຕິ. ອຠູຕກ຺ໂກເສນ ປນ ປຣິມຸຕ຺ໂຕ ນາມ ນຕ຺ຖິ. ຕນຸຍາຕິ ຕນຸກາ, ຫິຣິຍາ ອກຸສເລ ຘມ຺ເມ ນິເສເຘຕ຺ວາ ຈຣນ຺ຕາ ຂີຓາສວາ ນາມ ອປ຺ປກາຕິ ອຕ຺ໂຖ. ສທາ ສຕາຕິ ນິຈ຺ຈກາລໍ ສຕິເວປຸລ຺ເລນ ສມນ຺ນາຄຕາ. ອນ຺ຕໍ ທຸກ຺ຂສ຺ສ ປປ຺ປຸຍ຺ຍາຕິ ວຏ຺ຏທຸກ຺ຂສ຺ສ ໂກຏິໍ ອນ຺ຕຠູຕໍ ນິພ຺ພານໍ ປາປຸຓິຕ຺ວາ. ເສສໍ ວຸຕ຺ຕນຍເມວາຕິ.

ຫິຣີສຸຕ຺ຕວຓ຺ຓນາ ນິຏ຺ຐິຕາ.