໙. ກຸຏິກາສຸຕ຺ຕວຓ຺ຓນາ

໑໙. ນວເມ ກຈ຺ຈິ ເຕ ກຸຏິກາຕິ ອຍໍ ເທວຕາ ທສ ມາເສ ອນ຺ໂຕວສນຏ຺ຐານຏ຺ເຐນ ມາຕຣໍ ກຸຏິກໍ ກຕ຺ວາ, ຍຖາ ສກຸຓາ ທິວສໍ ໂຄຈຣປສຸຕາ ຣຕ຺ຕິໍ ກຸລາວກໍ ອລ຺ລີຍນ຺ຕິ, ເອວເມວໍ ສຕ຺ຕາ ຕຕ຺ຖ ຕຕ຺ຖ ຄນ຺ຕ຺ວາປິ ມາຕຸຄາມສ຺ສ ສນ຺ຕິກໍ ອາຄຈ຺ຉນ຺ຕິ, ອາລຍວເສນ ຠຣິຍໍ ກຸລາວກໍ ກຕ຺ວາ. ກຸລປເວຓິໍ ສນ຺ຕານກຏ຺ເຐນ ປຸຕ຺ເຕ ສນ຺ຕານເກ ກຕ຺ວາ, ຕຓ຺ຫໍ ພນ຺ຘນໍ ກຕ຺ວາ, ຄາຖາພນ຺ຘເນນ ອິເມ ປຎ຺ເຫ ສໂມຘາເນຕ຺ວາ ຠຄວນ຺ຕໍ ປຸຈ຺ຉິ, ຠຄວາປິສ຺ສາ ວິສ຺ສຊ຺ເຊນ຺ໂຕ ຕຄ຺ຆາຕິອາທິມາຫ. ຕຕ຺ຖ ຕຄ຺ຆາຕິ ເອກໍສວຈເນ ນິປາໂຕ. ນຕ຺ຖີຕິ ປຫາຍ ປພ຺ພຊິຕຕ຺ຕາ ວຏ຺ຏສ຺ມິໍ ວາ ປຸນ ມາຕຸກຸຈ຺ຉິວາສສ຺ສ ທາຣຠຣຓສ຺ສ ປຸຕ຺ຕນິພ຺ພຕ຺ຕິຍາ ວາ ອຠາວໂຕ ນຕ຺ຖິ.

ເທວຕາ ‘‘ມຍາ ສນ຺ນາຫໍ ພນ຺ຘິຕ຺ວາ ຄຸຬ຺ຫາ ປຎ຺ຫາ ປຸຈ຺ຉິຕາ, ອຍຎ຺ຈ ສມໂຓ ປຸຈ຺ຉິຕມຕ຺ເຕເຍວ ວິສ຺ສຊ຺ເຊສິ, ຊານໍ ນຸ ໂຂ ເມ ອຊ຺ຌາສຍໍ ກເຖສິ, ອຸທາຫຸ ອຊານໍ ຍໍ ວາ ຕໍ ວາ ມຸຂາຣຸຬ຺ຫໍ ກເຖສີ’’ຕິ ຈິນ຺ເຕຕ຺ວາ ປຸນ ກິນ຺ຕາຫນ຺ຕິອາທິມາຫ. ຕຕ຺ຖ ກິນ຺ຕາຫນ຺ຕິ ກິໍ ເຕ ອຫໍ. ອຖສ຺ສາ ຠຄວາ ອາຈິກ຺ຂນ຺ໂຕ ມາຕຣນ຺ຕິອາທິມາຫ. ສາຫຸ ເຕຕິ ຄາຖາຍ ອນຸໂມທິຕ຺ວາ ສມ຺ປຫໍສິຕ຺ວາ ຠຄວນ຺ຕໍ ວນ຺ທິຕ຺ວາ ຄນ຺ຘມາລາທີຫິ ປູເຊຕ຺ວາ ອຕ຺ຕໂນ ເທວຏ຺ຐານເມວ ຄຕາຕິ.

ກຸຏິກາສຸຕ຺ຕວຓ຺ຓນາ ນິຏ຺ຐິຕາ.